E horoi te Atua i te mau roimata atoʼa

’Ei tuha’a nō te fa’anahora’a a tō tātou Metua i te Ao ra, ’ua fa’ati’a ’Oia ’ia mamae ’ia riro ’ei ’itera’a nō tātou i te tāhuti nei.¹ ’A maʼiri noa mai ai te mau tamataraʼa māuiui ’aifāito ʼore i niʼa ia tātou, e nehenehe ia tātou ’ia ʼite pāpū ē noa atu te huru fāito, e māuiui tātou pā’āto’a ’e e ’aro. Tā’u pure e ’ia arata’i mai te Vārua Maita’i ia tātou ’ia māramarama maita’i a’e nō te aha i na reira ai.

’Ia hi’o anaʼe tātou i te mau ʼohipa fifi o te oraraʼa na roto i te mata o te faʼaroʼo i te Mesia, e ti’a ia tātou ’ia hi’o ē te vai ra te tumu a te Atua i roto i tō tātou mau māuiui. E nehenehe i te feiā ha’apa’o maita’i e ’ite i te parau mau nō te aʼo a Petero. ’Ua pāpa’i ’oia, « e ’ia pohe ā ʼoutou i te parau tiʼa ra, ʼe ao ā tō ʼoutou ».² ’A fa’a’ohipa ai tātou i tō tātou « ’ā’au nō te hāroaroa »,³ e nehenehe tā tātou e faʼarahi i tō tātou ʼaravihi nō te faʼaʼoromaʼi maitaʼi i tō tātou mau tamataraʼa ’e ’ia ha’api’i mai---’e ’ia ha’amaita’ihia mai---nā roto mai i te reira. E hōro’a mai teie ’itera’a i te hō’ē pāhonora’a i te uira’a matahiti ‘ore « nō te aha te mau ’ohipa ’ino e tupu ai i ni’a i te mau ta’ata maita’i ? »

’Ua fa’aro’o te mau taʼata atoʼa i teie mahana ’ua mātau rātou i te tahi fāito nō te ’ōtahi, te hepohepo, te mihi, te māuiui ’aore rā te ʼoto. ’Aita anaʼe hō’ē « mata o te faʼaroʼo »⁴ ʼe hō’ē māramama nō te parau mau mure ʼore, pinepine tātou i te ’ite ē te ʼati ʼe te māuiui i orahia mai i te tāhuti nei e haʼapouri ïa ’aore rā e ha’amo’e i te ’oa’oa mure ’ore nō te ’itera’a ē te fa’anahora’a rahi a tō tātou Metua i te Ao ra o te fa’anahora’a mau mure ’ore ïa nō te ’oa’oa. ’Aita e rāve’a ’ē atu nō te fāri’i i te  ’īra’a o te ’oa’oa.⁵

Tē ani nei te Atua ia tātou ’ia pāhono ma te fa’aro’o i tō tātou iho mau ʼati ’ia nehenehe ia tātou ’ia ʼōʼoti i te mau haʼamaitaʼiraʼa ’e ’ia roa’a te ’itera’a o te ’ore e ha’api’ihia na roto i te tahi ’ē atu rāve’a. ’Ua haʼapiʼihia tātou ’ia ha’apa’o i te mau fa’auera’a i roto i te huru oraraʼa atoʼa, nō te mea « o ʼoia o tei haʼapaʼo maitaʼi i roto i te ʼati ra, ’ua hau aʼe ïa tōna ra utuʼa maitaʼi i roto i te bāsileia o te ao ra ».⁶ ’E ’a tai’o ai tātou i roto i te pāpa’ira’a mo’a, « mai te mea te ’oto nei ’oe, ’a ti’aoro atu i te Fatu o tō ’oe Atua ma te ani-hua-ra’a ’atu ’ia riro mai tō ’oe ’ā’au i te ’oa’oa ».⁷

Te ’āpōsetolo Paulo, tei mātau i te ʼati, na roto mai i tōna iho itera’a, ’ua ha’api’i mai ma te hōhonu ʼe te nehenehe i te hiʼoraʼa ātea mure ʼore o te tae mai ’ia tāpe’a māite maitaʼi anaʼe tātou ’e ma te fa’a’oroma’i. ’Ua parau ’oia, « nō tō tātou ho‘i pohe iti poto māmā i teie nei, te faʼatupu nei ïa i te ora rahi roa teimaha ʼe te mure ore nō tātou ».⁸ I roto i te tahi atu parau, e nehenehe tātou e ’ite i roto i tō tātou ’ati ē e hōro’a mai te Atua i te hō’ē utu’a mure ’ore.

Te ʼaravihi o Paulo i te parauraʼa i te mau tamataraʼa, te mau hāmani-ʼino-raʼa, ʼe te mau ʼoto o tōna oraraʼa ’ei mau « pohe iti māmā », ’ua huna ïa i te teimaha o tōna ’oto, o tei riro nōna i te horomi’ira’a o te ’itera’a ātea mure ’ore o te ’evanelia. Te fa’aro’o o Paulo nō Iesu Mesia e maraʼa ïa te mau mea atoʼa ’ia faʼaʼoromaʼihia. E pae taime tōna papa’iraʼahia i te ’ōpe’a, e toru taime i te papa’iraʼahia i te rāʼau ; hōʼē taime i te tū’iraʼahia i te ʼōfaʼi ; e toru taime i tōna pauraʼa i te pahi parari ; pinepine ’oia i te faʼarurura’a i te ati pape tahe e te nānā ʼeiā, ʼe ’oia ato’a e te mau taeaʼe haʼavare ; ’ua fa’aruru ’oia i te rohirohi ʼe te māuiui, te porori ʼe te poʼihā, ʼe ’ua tāpeʼahia i roto i te toʼetoʼe ʼe te vai tahaʼa noa.⁹

E rave rahi o tātou tei tāparu i te Fatu ’ia fa’aore i te tumu nō tō tātou māuiui, ’e ’ia ’ore ana’e te tāmarūra’a tā tātou e ’imi ra e tae mai, e roa’a mai te ferurira’a ia tātou e ’aita ’Oia e fa’aro’o mai nei. Tē fa’a’ite pāpū nei au ē, i roto i te reira mau taime, tē fa’aro’o ra ’Oia i tā tātou mau pure, te vai ra rā te hō’ē tumu nō te fa’ati’ara’a ’ia tāmau noa tō tātou mau ’ati,¹⁰ ’e e tauturu te fa’a’oroma’ira’a i te reira ’ia tātou.¹¹

I roto i te hō’ē tuha’a parau tāna ’e te ferurihia, tē parau mai nei o Paulo ia tātou nō te hō’ē « tara » ’aita e i’oa, i roto i tōna ’i’o, tei ha’amāuiui rahi iāna ’e tei tītau iāna ’ia tūturi e toru taime, ma te ti’aoro atu i te Fatu ’ia ’īriti ’ē atu i te reira. I roto i te pāhonora’a i te pure a Paulo, ’aita te Fatu i ’īriti ’ē atu i te tara, ’ua parau ra ma te hau ’e ma te hōro’a i te hāroaroara’a i tōna ’ā’au, i parau ai, « tō’u nei maita’i ’ātīrē ïa tā ’oe : ’ei tei paruparu e ta’a maita’i roa ai tō’u pūai ». Ma te hāroaroara’a ’āpī, ’ua ti’a ia Paulo ’ia fāri’i ’e ’ia ha’amāuruuru nō te tara tāna i hōro’a mai. ’Ua parau ’oia, « e teie nei e mea ’oa’oa ïa iā’u ’ia ’ārue i tō’u nei paruparu, ’ia vai māite te pūai o te Mesia i ni’a iā’u nei ».¹²

’A fāri’i ai tātou i taua ’itera’a ātea mure ’ore ra i roto i tō tātou orara’a, e rahi tō tātou ’aravihi nō te tāpe’a-māite-ra’a, e ha’api’i mai tātou e nāhea i te turu i te feiā e hina’aro i te turuhia,¹³ ’e e ha’afa’ahiahia tātou ’e ’oia ato’a e fa’a’ite i te māuruuru rahi nō te mau ’ohipa tei tupu tā te Atua i fa’ati’a ia tātou ’ia fāri’i ’ei mau turu i ni’a i te ’ē’a nō te ora mure ’ore.

’Ia ’ite ana’e tātou ia tātou iho i te rohiraʼa na roto i te ’ati, ʼe mea fifi paha ’ia faʼariro i tō tātou mau tamataraʼa ʼei mau tāpaʼo faʼaʼite i ni’a i tō tātou iho ’ēʼa nō te ti’ara’a pipi. Terā rā, mai te peu tei roto tātou iho i te ’āfa’a o te hepohepo rahi ʼaore rā i ni’a i te puromu o te ʼoaʼoa rahi i te tahi taime, ’a haʼapiʼi mai ʼe ’a fāri’i ma te aroha i te mau māuiui o vetahi ’ē, e nehenehe e riro ’ei ha’amaita’ira’a.

I roto i te hōʼē iho nei ’āmuiraʼa titi tā’u i haere atu i te fenua Philipino, ’ua ʼoto tōʼu ʼāʼau ʼa faʼaroʼo ai au i te ʼati tei tupu i te taeaʼe Daniel Apilado. ’Ua bāpetizohia te taea’e Apilado ʼe tāna vahine faʼaipoipo i te matahiti 1974. ’Ua fāriʼi rāua i te ʼevanelia tei faʼahoʼihia mai ʼe ’ua taʼatihia i roto i te hiero. I muri iho, ’ua haʼamaitaʼihia rāua e nā e pae tamariʼi nehenehe. I te 7 nō tiurai 1997, ʼa tāvini ai te taeaʼe Apilado ʼei peresideni titi, ’ua ura te auahi i roto i tō rāua fare naʼinaʼi. ’Ua faʼaora ʼe ’ua huti mai te tamaiti matahiapō a te taeaʼe Apilado, o Michael, i tōna metua tāne mai roto mai i te fare ʼe ura ra, ʼe ’ua horo faʼahou i roto i te fare nō te faʼaora i te tahi atu mau taʼata. Tera ïa te taime hopeʼa tō te taeaʼe Apilado ’iteraʼa i tāna tamaiti ora. Tei pohe i roto i te auahi te vahine fa’aipoipo a te taea’e Apilado, ʼo Dominga ʼe tā rāua mau tamariʼi tāta’ītahi e pae.

ʼAita te orara’a ha’apa’o maita’i o te taeaʼe Apilado i ārai iāna i te ’ati ’a tupu ai teie ’ati auahi ’e i pāruru iāna i te mau ʼoto i muri mai. Na tōna rā haʼapaʼo maitaʼi i roto i te tāpe’ara’a i tāna mau fafauraʼa ʼe te fa’a’ohipara’a i tōna fa’aro’o i te Mesia i hōro’a iāna te ha’apāpūra’a i roto i te fafauraʼa ē e ’āmui fa’ahou ’oia e tāna vahine fa’aipoipo ’e tōna ’utuāfare. ’Ua riro teie tia’ira’a ʼei tutau nō tōna vārua.¹⁴

I roto i tō’u fārereira’a, ’ua faʼaʼite mai te taeaʼe Apilado iāʼu, e patereareha ʼoia i teie taime, i tāna vahine faʼaipoipo ʼāpī, ʼo Simonette, ʼe tā rāua na tamāroa e piti, ’o Raphael ’e ’o Daniel. ’Oia mau, e ti’a ia Iesu Mesia e « faʼaora hoʼi i te feia ʼāʼau ʼoto ».¹⁵

Na roto i te faʼaʼiteraʼa i te ʼāʼamu ʼo te taeaʼe Apilado, tē manaʼo nei au ē e nehenehe paha te rahi o tōna pau e tūraʼi i te mau taʼata ’ia feruri e mea iti roa tō rātou mau ʼoto ʼe mau māuiui ’ia faʼaauhia i tō teie taeaʼe. ʼEiaha e faʼaau, a tūtava rā i te haʼapiʼi ʼe ’ia faʼaʼohipa i te mau parau tumu mure ʼore ʼa tere ai ʼoutou na roto i te umu o tō ʼoutou iho mau ʼati.

’Āhani e nehenehe iāʼu e paraparau atu ia ʼoutou tātaʼitahi---« ʼe te feiā atoʼa i haʼa rahi ʼe tei teimaha te hōpoiʼa »¹⁶---e nehenehe au e parau ē tō ʼoutou iho mau ʼaroraʼa, tō ʼoutou iho mau ʼoto, mau māuiui, mau tamatara’a ’e mau huru maʼi atoʼa, ’ua ʼite pā’āto’a tō tātou Metua i te Ao ra ʼe Tāna Tamaiti i te reira. ʼA faʼaitoito ! ʼA tāpeʼa i te faʼaroʼo ! ʼE ’a tiʼaturi i te mau fafauraʼa ʼa te Atua !

Te tumu ʼe te misioni ʼa Iesu Mesia ’oia hō’i e « rave ïa i te māuiui ʼe te mau maʼi o tāna mau taʼata i niʼa iāna », ’ia « rave i tō rātou paruparu i niʼa iāna », ’e ’ia « faʼaora i tōna mau taʼata i tō rātou paruparuraʼa ra »¹⁷

Nō te fāriʼi hope roa i teie mau hōroʼaraʼa tā tō tātou Faʼaora i pūpū hua mai, e tiʼa ia tātou pāʼātoʼa ’ia haʼapiʼi ē te māuiui---i roto ia tātou iho---e’ita e haʼapiʼihia ʼaore rā e hōroʼa mai ia tātou te tahi mea faufaʼa rahi maori rā ’ia tomo tātou ma tō tātou iho hinaʼaro i roto i te rāveʼa nō te haʼapiʼiraʼa na roto i tō tātou mau ʼati ma te fa’aohipa i te fa’aro’o.

’Ua faʼaʼite mai Elder Neal A. Maxwell i te mea tāna i haʼapiʼi mai nō niʼa i te tumu o te māuiuiraʼa na roto i teie mau parau :

« E nehenehe te tahi mau huru māuiui, mai te mea e faʼaʼoromaʼi-māite-hia e riro ʼei mea hanahana …

« … Te tahi tufaʼa o te faʼaʼoromaʼi-māite-raʼa ’ia navaʼi ïa te ha’eha’a i roto i tō tātou māuiui, ’ia haʼapiʼi mai roto mai i tō tātou mau ’itera’a rau. Maoti te haere-noa-ra’a na roto i teie mau mea, e ti’a i te reira ’ia haere na roto ia tātou ’ei rāveʼa nō te haʼamoʼa ia [tātou]  ».¹⁸

’Ua ʼite au i roto te oraraʼa ’e te mau hi’ora’a o vetahi ’ē e hōroʼa mai te fa’aohipara’a pūai ’e te tura nō te fa’aro’o ’ia Iesu Mesia ’e Tāna mau fafauraʼa i te hōʼē tia’ira’a pāpū nō te mau mea maitai a’e e tae mai. E ha’apa’ari teie tia’ira’a pāpū ia tātou, e hōro’a mai te pūai ’e te mana e hina’arohia e tātou, ’ia ti’a ia tātou ’ia tāpe’a māite.¹⁹ ’Ia nehenehe ana’e ia tātou e tūati i tō tātou ’oto i te hō’ē fā pāpū i te tāhuti nei ’e hau atu ā, i te utu’a e tia’i mai ra ia tātou i te ra’i, e rahi atu tō tātou fa’aro’o i te Mesia ’e e fāri’i tātou i te tāmahanahana i tō tātou vārua.

I muri iho e ’ite atu tātou i te māramarama i te hope’a o te ’ana. ’Ua ha’api’i mai o Elder Jeffrey R. Holland : « Tē vai ra ihoa te māramarama i te hope’a o te ’ana. O ’oia te Māramarama o te Ao, te Feti’a Po’ipo’i ’e te ’Ana’ana, te ‘māramarama ’aita e hope’ara’a, e ’ore roa e ti’a ’ia ha’apōirihia’.[Mosia 16:9] ’O ’Oia ihoa te Tamaiti a te Atua ».²⁰

E nehenehe tātou e rave mai i te pūai ma te hāroaroa ē nō te hō’ē taime poto noa te mau ’itera’a fifi ato’a i roto i teie orara’a, ’oia ato’a e taui te pōiri ta’ota’o o te pō ’ei ’ā’ahiata nō te feiā parau ti’a.

’Ia ’oti anaʼe te mau ’ohipa atoʼa ’e ’a fa’a’oroma’i māite ai tātou i te mau mea ato’a ma te fa’aro’o ia Iesu Mesia, ’ua fafauhia mai ia tātou ē « na te Atua e horoi hua i tō [tātou] roimata ».²¹

Tē fa’a’ite pāpū nei au ē tē ora nei te Atua tō tātou Metua ’e Tāna Tamaiti o Iesu Mesia ’e e tāpe’a Rāua i te mau fafaura’a. Tē fa’a’ite pāpū nei au ē tē ani mai nei te Fa’aora ia tātou pā’āto’a ia haere mai ’e ia rave i Tāna Tāra’ehara. ’A fa’a’ohipa ai tātou i tō tātou fa’aro’o Iāna, e fa’ateitei ’Oia ia tātou ’e e amo ’Oia ia tātou na roto i tō tātou mau tamatara’a ’e ’oia ato’a e fa’aora ia tātou i te bāsileia tiretiera. Tē ani nei au ’ia haere mai i te Mesia, ’ia fa’a’oroma’i māitē i roto i te fa’aro’o ’e ’ia maita’i roa mai Iāna ’e ’ia fāri’i i te ’oa’oa rahi i roto Iāna. Na roto i te i’oa mo’a o Iesu Mesia ra, ’āmene.