Enyisɔ wɔ Ahomgyeda no

Mo nuanom na me nkyerɛbaa adɔfo a hom atserɛw wɔ wiadze nyina mu a, hom wɔ Jesus Christ n’Asɔr a ɔwɔ hɔ ma Nda a Odzi Ekyir Ahotseweefo mu no, Ɔyɛ me enyisɔ dɛ President Thomas S Monson ase me dɛ menkasa wɔ ehyiadzi yi ase Ahomgyeda anapa yi. Mobɔ mpaa dɛ Sunsum Krɔnkrɔn no dze m’asɛm no bɔkɔ hom akoma mu.

Ndɛ mepɛ dɛ mekasa fa akoma atsenkã horow ho. Kor a mebɛtsĩ mu wɔ do no nye enyisɔ—nkanka wɔ Ahomgyeda no.

Ndzɛmba pii na yenya ho enyisɔ: ɔhɔho a ɔayɛ hɛn ayamuyie, edziban ber a ɔkɔm dze hɛn, dan nkurii pa a sɛ ehum tu a hɛnho mmfɔw; biew a oebu a ɔsã, na abɔdomaba a ɔawoo no fofor no sũ a ɔkyerɛ nkwa. Hɛn mu dodowara bɛkaa enyisɔ atsenkã a yenya no dɛm mber yinom mu.

Latter-day Saintfo no, Ahomgyeda no yɛ da a ɔtse dɛm, ɔfa enyisɔ na ɔdɔ da ho ampara. Ewuradze hyɛɛ Ahotseweefo no a wɔwɔ Jackson Mansin, Missouri, wɔ afe 1831 mu dɛ ɔwɔ dɛ wɔma hɔn mpaabɔ na ndaase kɔ sor. Ahotseweefo edzikamfo no wɔmaa hɔn nyikyerɛ a ɔfa mbrɛ wonsi wonsie Ahomgyeda no nye mbrɛ wonsi nkyen kɔm na wɔmbɔ mpaa.¹

Ewuradze ase hɔn na hɛn, mbrɛ yensi nsɔr na yɛma ndaase wɔ Ahomgyeda no. Dɛ mbrɛ hom hu no, dza ohia tsitsir nye hɛn atsenkã a yenya ma hɔn a wɔma akyɛdze horow no. Ewuradze ne nsɛm a ɔkyerɛ mbrɛ yensi nda ase na mbrɛ yensi ndodɔ wɔ Ahomgyeda no nye yi:

“Medze mbrasɛm yi ma hɔn se dɛ: Hom mfa hom akoma nyina, nye hom ahom, hom adwen, nye hom ahoɔdzen nyina ndɔ Ewuradze hom Nyankopɔn, na hom nsom no wɔ Jesus Christ ne dzin mu. …

“Hom nda Ewuradze hom Nyankopɔn ase wɔ adze nyina mu.

“Hom mbɔ afɔr mma Ewuradze hom Nyankopɔn wɔ tseneneeyɛ mu, hom mfa akoma a abobɔ nye sunsum a abotow mpo nyɛ.”²

Na nkyii Ewuradze kɔ do bɔ hɔn kɔkɔ fa mbusu a ɔwɔ hɔ sɛ yɛpow dɛ yɛbɛda Ɔsor Egya na Jesus Christ ase dɛ Hɔn na wɔma akyɛdze horow ho no: “Na biribiara nnyi hɔ a nyimpa nam do fom Nyankopɔn, anaa obiara nnyi hɔ a n’ebufuhyew dzɛw no do, kã hɔn a wɔnngye nnto mu dɛ ne nsa wɔ biribiara mu, na wonndzi ne mbrasɛm do.”³

Hom mu dodowara a hom retsie no nya enyigye wɔ Ahomgyeda no mu dɛ da a hom dze kaa na hom dze ndaase ma Nyankopɔn wɔ nhyira horow ho. Hom kaa ndwom a hɛn nyina yenyim no:

Me nsa kã nkrataa na nsera fi Latter-day Saintfo nokwafo pii a, wɔtse dɛ adzesoadze kɛse bi haw hɔn no hɔ. Binom aka kakra ara ma wɔatse dɛ, annhwɛ a hɔn dze, woedzi nkõgu koraa. Mowɔ enyidado na mobɔ mpaa dɛ dza mebɛkã afa yebenya enyisɔ Ahomgyeda no bɛyɛ mboa ma ekyingye horow ayew na ndwontow ahyɛ ase wɔ hom akoma mu.

Nhyira kor a yebotum enya ho enyisɔ nye dɛ yɛwɔ sacrament nhyiamu ase no koraa, yɛnye N’esuafo baako anaa beenu ehyia mu wɔ Ne dzin mu. Binom wɔ hɔ a wɔwɔ fie a woenntum annsor emmfi hɔn mpa do. Binom wɔ hɔ a nkyɛ wɔbɛpɛ dɛ wɔbɔwɔ bea a yɛwɔ no na mbom wɔrosom asopitsi horow na wɔrema nkorɔfo ayarhwɛ anaa wɔrobɔ hɛnho ban a wɔdze hɔnankasa hɔn nkwa ato hɔ wɔ sardo anaa pɔw bi mu. Yeetum ara dɛ yɛnye Ahotseweefo no mu kor aboa ano mpo rebedzi sacrament no nye dza ɔbɔboa hɛn ma yɛahyɛ ase enya enyisɔ na ɔdɔ ama Nyankopɔn wɔ N’ayamuyie ho.

Osian Nkɔnhyɛnyi Joseph Smith na asɛmpa nsan-ananmu no ntsi, nhyira kor so a yebotum akan nye dɛ yɛwɔ akwanya dɛ yedzi sacrament no dapɛn biara—a Nyame asomafo a wɔama hɔn tumdzi no siesie, wohyira do na wɔdze akɔ aporɔw. Yebotum enya enyisɔ ber a Sunsum Krɔnkrɔn no si no pi kyerɛ hɛn dɛ sacrament mpaabɔ mu nsɛm no, a hɔn a wokitsa asɔfodzi a wɔwɔ tumdzi no kã no, Ɔsor Egya gye to mu.

Nhyira horow a yɛbotum akan nyina no, no mu kɛse koraa no nye bɔnfakyɛ ho atsenkã a ɔba ber a yeredzi sacrament no. Yenya ɔdɔ kɛse na enyisɔ ma Agyenkwa no, Ɔno a N’afɔrbɔ a ɔmmbɔadze no ma wotum tsew hɛnho fi bɔn ho. Ber a yedzi paanoo na yɛnom nsu no, yɛkaa dɛ Ohun amandze maa hɛn. Na ber a yenya enyisɔ wɔ dza Ɔayɛ ama hɛn no, yɛtse No dɔ a Ɔwɔ ma hɛn na hɛn dɔ a yɛdze dɔ No ne nkã.

Ɔdɔ ho nhyira a yebenya no bɛma wɔayɛ mberɛw ama hɛn dɛ yebesie mbrasɛm no dɛ “yɛbɛkaa no aber nyina.”⁵ Ibotum mpo enya dɔ na enyisɔ, tse dɛ mbrɛ meyɛ no, ama Sunsum Krɔnkrɔn no a, Ɔsor Egya abɔ ho anohoba dɛ Ɔnye hɛn bɛtsena aber nyina no, sɛ yɛyɛ anokwafo ma anohoba no a yɛabɔ no do a. Yebotum akan dɛm nhyira yinom Kwesida biara na yeenya enyisɔ.

Ahomgyeda no so nye ber pa a hom dze bɛkaa ahyɛmu a yɛyɛɛ no enuma esu no ho dɛ hom bɔdɔ na hom asom Ɔsor Egya Ne mba. Hom riyi hom akoma mu nyina dze homho ahyɛ adzesua anaa quorum dwumadzi mu dze epegya gyedzi na ɔdɔ wɔ hom nuambanyin na nkyerɛbaa a wɔnye hɛn wɔ hɔ mu no bɛkã anohoba ne mãhyɛ no ho. Yɛretsew hɛn enyim dze ahyɛ ɔfrɛ biara mã no so bɛkã dɛm anohoba no ho.

M’enyisɔ Kwesida Kwesida no a mekyerɛɛ deaconfo quorum wɔ Bountiful, Utah hɔn adze no, nye Kwesida Skuul adzesũa wɔ Idaho no so. Mekaa mpo mber no so mosom dɛ me yer no boafo wɔ nursery, bea a nna m’edwuma tsitsir ara nye mema hɔn mbofra agodzidze na miyiyi no famu.

Mfe pii bɛsenee ana murudua Sunsum mu ehu mo som krakra ma Ewuradze no no ho hiae wɔ Ɔsor Egya Ne mba no hɔn abrabɔ mu no. Ɔyɛ me ahobow dɛ, mfe pii abɛsen no hɔn mu binom kae na wɔdaa me ase wɔ mo mbɔdzembɔ nkakrankakra dɛ mobɔsom hɔn ama Owura no dɛm Ahomgyeda nda no.

Tse dɛ mbrɛ hɛnara ɔtɔfabi a yenntum nnhu hɛn som a yɛma no Ahomgyeda no nsunsuando no, yennkotum so ehu Ewuradze N’asomfo binom so hɔn dze mbrɛ okowie. Mbom Ewuradze nam No asomfo nokwafo na ahobrɛadzefo risi N’ahenman no dzinn akɔ n’enyimnyam mfe apem ndaamba no mu a wɔmmbɔ ho totorobɛnto. Wɔnam Sunsum Krɔnkrɔn no do dze ehu ne kɛseyɛ no.

Mirinyin no nna mokɔ sacrament nhyiamu wɔ New Jersey nkorbata ketseaba bi mu a yɛnye asɔrmba kumaa nko na ebusua kor, mara medze no. Mfe eduosuon enum a abɛsen no, wonumaa me wɔ Philadelphia wɔ asɔrdan kor pɛr ara a Asɔr no esi a yebotum akɔ mu wɔ Pennsylvania anaa New Jersey no. Naaso bea a nna nkorbata kakrabaa kor wɔ Princeton no, ndɛ ward akɛse ebien na wɔwɔ hɔ. Na ndaansa yi ara, mbabun mpempem dzii dwuma wɔ fa a wɔhyɛɛ ansaana worutu Philadelphia, Pennsylvania Temple no ahyɛ Nyame nsa no.

Meyɛ aberantsɛba no, wɔfrɛɛ me dɛ mansin mu asɛmpasomafo ber a yɛsɔr Kwesida Kwesida wɔ asɔrdan kortsee a nna ɔwɔ Albuquerque, New Mexico no. Ndɛ temple wɔ hɔ nye stake anan.

Mifii Abuquerque kɔr skuul wɔ Cambridge, Massachussetts. Nna asɔrdan na asɔr ne mansin kor na ɔwɔ asaase a ɔtsen fa Massachusetts na Rhode Island ne kɛse no. Mekãa kar faa akoko no do wɔ ɔman fɛɛfɛw no mu dze kɔr sacrament nhyiamu mu wɔ nkorbata nketsenketse no, a dodowara wɔwɔ mbea nkakraba wotua ho kaw anaa efiefi nkakramba woesiesie no. Sesei Nyame Ne temple krɔnkrɔn wɔ Belmont, Massachusetts, na stake horow atserɛw wɔ nkorow nkorow no mu.

Nna dza munntum nnhu no dɛm mber no nye Ewuradze No Sunsum a Oruhue gu dɛm nkorɔfo no do wɔ sacrament nhyiamu kumabaa no mu. Nna mutum tse naaso menntum ennhu mbrɛ ɔbɛtra ekodu na Ewuradze Ne tsirmpɔw dɛ Obesi na Ɔahyɛ N’ahenman no enyimnyam no ne mber nhyehyɛɛ. Nkɔnhyɛnyi bi, nam nyikyerɛ do, hunii na ɔkyerɛɛw dza hɛn ankasa yehu. Nephi kãa dɛ hɛn dodow ronndɔɔsõ mbom kan no ne mboano no bɛyɛ ɔkrabɔhwɛ:

“Na ɔbaa dɛ muhun Nyame Eguambaa n’asɔr no, na no dodow suar. …

Na ɔbaa dɛ emi, Nephi, muhun Nyame Eguambaa no no tum, dɛ oesian aba Eguambaa no n’asɔrmba a wɔyɛ ahotseweefo no do, nye Ewuradze n’ahyɛmu mba no a wɔapetse wɔ asaase nyinara enyi no do; na wɔdze ndzeyɛtsenenee na enyimnyam nye Nyankopɔn no tum kɛse ayɛ akontar.”⁶

Berano yi mu no, nkɔnhyɛsɛm a ɔfa hɛn gyinabew na akwanya a ɔda hɛn enyim no wɔakyerɛw no wɔ Nkyerɛkyerɛ na ahyɛmudzi no mu.

“Na hom nnyae nntsee nhyira akɛse a ɔwɔ Egya ne nsamu a oesiesie ama hom no ase;

“Na hom nnkotum agye ndzɛmba nyina sesei; naaso, hom enyi ngye, osiandɛ mibedzi hom kan. Ahenman no yɛ homdze, na nhyira a ɔwɔ hɔ no yɛ homdze, na mbersantsen ahonyadze so yɛ homdze.

Na nyia ɔnam ndaase mu bɛgye ndzɛmba nyina no, wɔbɛhyɛ no enyimnyam; na wɔdze wiadze yi mu ndzɛmba bɛkã no ho, ɔha na no mbɔho mpo, nyew, mbordo.”⁷

Menya dɛm nsakyer no ho atsenkã, dza ofi nhyira na Nyame No dɔ ho enyisɔ a ɔretserɛw wɔ Asɔr no nyina mu no. Ɔyɛ dɛ ma ɔrokɔ do ntsɛmtsɛm wɔ Asɔrmba no mu a wɔwɔ mber na mbea horow a hɔn gyedzi ho nsɔhwɛ rokɔ do, mbea a wɔatotɔ aserɛ Nyame wɔ mboa a wɔdze botum akɔ do mpo.

Mber a yɛbɛfa mu yinom nsɔhwɛ dzendzen bɔwɔ mu, tse dɛ mbrɛ wɔdze yɛɛ Alma no nkorɔfo wɔ Amulon otsiɔdzennyi amambu ase no, ɔno a ɔdze adzesoadze a ɔbor dza wobotum asoa too hɔn do no.

“Na ɔbaa dɛ Ewuradze ne ndze baa hɔn nkyɛn wɔ hɔn amandzehu mu see dɛ: Hom mma hom etsir do na hom nya awerɛkyekyer, na minyim ahyɛmu a hom edzi akyerɛ me; na menye mo nkorɔfo bedzi ahyɛmu na m’eyi hɔn efi nkowaasom mu.

“Na mebɛma adzesoadze a wɔdze egu hom abatsir do no ayɛ har a hom renntse mpo dɛ ɔda hom ekyir, wɔ ber a hom wɔ nkowaasom mu mpo; na iyi na mebɛyɛ ama hom egyina ayɛ adasefo ama me ndaamba, na ama hom ehu nokwar no dɛ Emi, Ewuradze Nyankopɔn, mesera mo nkorɔfo wɔ hɔn amandzehu mu.

“Na afei ɔbaa dɛ adzesoadze a wɔdze too Alma nye n’enuanom do no yɛɛ har; nyew, Ewuradze hyɛɛ hɔn dzen ama woeetum asoa hɔn adzesoadze no na wɔammberɛ, na enyigye mu na abotar na wɔdze gyaa hɔnho mu maa Ewuradze ne pɛ.”⁸

Hom na emi yɛyɛ adasefo dɛ ber biara a yeesie ahyɛmu yɛnye Nyame ayɛ no, nkanka ber a nna ɔyɛ dzen no, Oetsie hɛn ndaase mpaabɔ ma dza Ɔayɛ ama hɛn dada no, na Oebua hɛn mpaabɔ dɛ yentsim nokwar mu no. Mpɛn binom mu na Ɔama hɛn enyi agye na yɛahyɛ dzen no so.

Ibia na ebɔdwendwen dɛ ebɛnadze na ibotum ayɛ dze atsena ase na asɔr wɔ Ahomgyeda yi mu dze akyɛrɛ w’enyisɔ na edze ahyɛ ɔwo na binom dzen wɔ nsɔhwɛ a ɔda hɔn enyim no mu.

Hom botum dze kokoa mu na ebusua mpaabɔ ahyɛ ase ndɛ dze ada Nyame ase wɔ dza Ɔayɛ ama hom no ho. Hom botum abɔ mpaa dze ehu dza Ewuradze bɛpɛ dɛ hom bɛyɛ dze asom Ɔno na binom. Dɛ, hom botum abɔ mpaa ama Sunsum Krɔnkrɔn no akã obi a ɔayɛ ankonam anaa ɔwɔ ahohia mu a Ewuradze bɛpɛ dɛ hom kɔ no hɔ.

Mubotum abɔ hom anohoba dɛ hom benya hom mpaabɔ ho mbuae, na ber a hom dzi mbuae a hom nya no do no, hom benya enyigye wɔ Ahomgyeda no mu, na ndaase bɛpem ebudo wɔ hom akoma mu.

Megye dase dɛ Nyame Egya no nyim hom na Ɔdɔ hom. Ɔnam No dɔ ma hom no ntsi na Agyenkwa no, Ewuradze Jesus Christ poon hom bɔn. Hɔn, Egya no na Ɔba no, nyim wo dzin dɛ mbrɛ nna wonyim Nkɔnhyɛnyi Joseph Smith ne dzin ber a wopuee no do no. Megye dase dɛ iyi nye Jesus Christ n’Asɔr no na anohoba horow a hom nye No yɛ na hom nye Nyame yɛ no fofor no, Obedzi do. Hom su ankasa no bɛsesã abɛyɛ tse dɛ Agyenkwa Ne dze no ara yie. Wɔbɛhyɛ hom dzen etsĩa nsɔhwɛ nye nokwar ho ekyingye nkã-tse ho. Hom benya enyigye wɔ Ahomgyeda no mu. Mobɔ hom anohoba wɔ ho wɔ Ewuradze Jesus Christ dzin mu, amen.