Vakavinavinaka ena Siga ni Vakacecegu

Kemuni na taciqu kei na ganequ o ni tu ena veiyasai vuravura taucoko ena Lotu i Jisu Karisito ni Yalododonu Edaidai, au vakavinavinaka ni kerei au o Peresitedi Thomas S. Monson meu vosa ena koniferedi ena siga ni Vakacecegu oqo. Au masuta na Yalo Tabu me na kauta yani na noqu vosa ki yalomuni.

Nikua au vinakata meu vosa baleta na veika e vakila na yalo. Na kena au na vosa kina o ya na vakavinavinaka—vakauasivi ena Siga ni Vakacecegu.

Eda vakavinavinakataka e levu na ka: nona yalovinaka e dua o sega ni kila, na kakana ni da walokai, e dua na delavuvu mamaca e uluda ni tubu na cava, na kena semati tale e dua na sui ramusu, kei na nona tagi bulabula e dua na gone sucu vou. E vuqa vei keda eda na nanuma na noda a vakavinavinaka ena veigauna vakaoqo.

Vei keda na Yalododonu Edaidai, na Siga ni Vakacecegu sa dua, dina na siga ni vakavinavinaka kei na loloma. A vakasalataki ira na Yalododonu mai na Yasayasa vaka-Jackson, Missouri na Turaga, ena 1831 me vagolei ga ki lomalagi na nodra masu ni vakavinavinaka. A soli vei ira na Yalododonu e dua na ivakatakila me baleta na ivakarau ni kena rokovi na Siga ni Vakacecegu kei na ivakarau ni lolo kei na masu.¹

Sa tukuna na Turaga vei ira vata kei keda, na ivakarau ni sokalou kei na vakavinavinaka ena Siga ni Vakacecegu. Me vaka o ni rawa ni kila, na ka ga e bibi sai koya na loloma eda dau vakila me baleti koya e solia na isolisoli. Oqo na vosa ni Turaga me baleta na ivakarau me da vakavinavinaka kei na ivakarau ni loloma ena Siga ni Vakacecegu:

“Raica au sa vakaroti ira ka kaya: Mo lomana na Turaga na nomu Kalou ena lomamu taucoko kei na nomu kaukauwa taucoko; ia mo qaravi Koya ena yaca i Jisu Karisito. …

“Mo vakavinavinakataka vua na Turaga na nomu Kalou na nona isolisoli kecega.

“Mo vakacabora vua na Turaga na nomu Kalou na isoro e dodonu, io na yalo sa bibivoro ka raramusumusu.”²

Oti qai tomana na Turaga ena nona ivakasala me baleta na kena rerevaki ke da sega ni vakavinavinakataka na Tamada Vakalomalagi kei Jisu Karisito ni rau solia na isolisoli: “Raica sa kilikili sara me vakatusa na tamata ni sa bulia na ka kecega na Kalou, io me muria talega na nona vunau.”³

E vuqa vei kemuni na vakarorogo tiko era sa kune reki tiko ena Siga ni Vakacecegu me siga era vakananuma ka vakavinavinaka kina vua na Kalou me baleta na veivakalougatataki. Ko ni nanuma tiko kina na sere kilailevu:

Au dau ciqoma na ivola kei na veisiko mai vei ira na Yalododonu Edaidai yalodina era yalobibi voli. Eso vei ira, sa voleka sara ni ra nanuma, ni sa sega na vakanuinui vei ira, sa yali na veika kece. Au nuitaka ka masuta ni na veivuke na veika au tukuna me baleta na noda vakavinavinakataka tiko na Siga ni Vakacecegu me na vuka tani kina na vakatitiqa ka tekivu na lagasere e yalomu.

Dua na veivakalougatataki e rawa meda vakavinavinakataka sai koya ni da mai tiko rawa ena soqoni ni sakaramede, soqoni vata kei na dua se rua na Nona tisaipeli ena Yacana. Era tu mai vale eso era sega ni biuta rawa nodra idavodavo. Eso era vinakata tu me ra tiko ena vanua eda tiko kina oqori ia era veiqaravi tu ena veivalenibula ka veitaqomaki raraba ena nodra solia nodra bula ena vukuda ena dua beka na vanua dravuisiga se veikauloa. Na dina ni da rawa mada ga ni soqoni vata kei na dua tale na Yalododonu mo vakaivotavota ena sakaramede ena vukea meda tekivu gadreva meda vakavinavinaka ka lomana nona vinaka na Kalou.

Ena vuku ni Parofita o Josefa Simici kei na kosipeli vakalesui mai, e dua tale na veivakalougatataki eda rawa ni wilika sai koya noda rawa ni vakayagataka na sakaramede e veimacawa—vakarautaki, masulaki, ka veisoliyaki mai vei ira na italai vakadonui ni Kalou. E rawa ni da vakavinavinaka ni vakadeitaka vei keda na Yalo Tabu ni sa ciqoma ka doka na Tamada Vakalomalagi na veimalanimasu ni sakaramede era cabora na matabete vakadonui yalomalumalumu.

Ena veivakalougatataki kece eda rawa ni wilika, e dua vei ira na kena cecere duadua ena gauna oqo o ya na yalo ni veivosoti e yaco mai ni da sa kania na sakaramede. Eda na vakila na loloma cecere kei na vakavinavinaka vua na iVakabula, a yaco kina na nona solibula tawamudu me bokoci kina na noda ivalavala ca. Ni da vakayagataka na madrai kei na wai, eda sa nanuma kina ni a vakararawataki o Koya ena vukuda. Kei na gauna eda na yalo vakavinavinaka kina Vua me baleta na veika sa cakava ena vukuda, eda na vakila na Nona loloma vei keda kei na noda loloma Vua.

Na veivakalougatataki ni loloma eda sa ciqoma ena vakarawarawataka vei keda meda marroroya tiko na ivunau o ya meda “daunanumi koya tikoga.”⁵ E rawa ni o vakila sara mada ga na nomu loloma kei na vakavinavinaka me vaka niu dau cakava vua na Yalo Tabu, o koya sa yalataka o Tamada Vakalomalagi ni na dau tiko ga vata kei keda ni da yalodina tiko ga ki na veiyalayalati eso eda sa vakayacora. E rawa meda wilika na veivakalougatataki taucoko eso oqori ena Sigatabu ka da yalo vakavinavinaka kina.

Na Siga ni Vakacecegu sa gauna vinaka sara talega me da nanuma kina na veiyalayalati eda a vakayacora ena wai ni veipapitaisotaki me da lomani ira ka qaravi ira na Luvena na Tamada Vakalomalagi. Me rawati na yalayala oqori ena Siga ni Vakacecegu me na oka kina noda vakaitavi ena dua na kuoramu se kalasi mai vuniyalomu me tarai cake kina na vakabauta kei na veilomani vei ira na tacida kei na ganeda eda tiko vata e kea. Na yalayala oqori e rawa talega ni okati kina na qaravi vakavinaka ena yalomarau na noda veikacivi.

Au vakavinavinakataka na vuqa na Sigatabu au dau vakavulica kina e dua na kuoramu ni dikoni e Bountiful mai Utah, vakakina e dua na kalasi ni Wilivola ni Sigatabu e Idaho. Kau nanuma na veigauna eso au veiqaravi kina vakaivukevuke vua na watiqu ena isususu, ka noqu itavi levu meu veisoliyaka yani ka tomi ka ni vakatatalo.

Sa oti e vica tale na yabaki au qai kila mai na Yalotabu ni vakabetena sara na noqu veiqaravi lalai ena nodra bula na Luvena na Tamada Vakalomalagi. Au kurabuitaka ni so vei ira era se nanuma tu ga ka vakavinavinakataki au meu qaravi ira ena vukuna na iVakavuvuli ena vei Siga ni Vakacecegu oqori.

Me vaka ni so na gauna eda sega ni rawa ni raica na vua ni noda veiqaravi dau soli ena Siga ni Vakacecegu, ena rawa ni da sega ni raica na kedra revurevu lalai eso tale na italai ni Turaga. Ia sa tara cake tiko vakamalua na Turaga na Nona matanitu maivei ira na Nona ivakatawa yalodina ka yalomalua ka kilai vakalailai sara na kena vunilagi lagilagi vakameleniumi. E taura na Yalo Tabu me rawa ni da raica na vakasakiti ni kena tubucake tiko.

Au dau lako ki na soqoni ni sakaramede ena noqu tubucake tiko ena dua na tabana lailai sara mai New Jersey ka vica wale na lewena kei na dua na matavuvale, na noqu. Ena vitusagavulu kalima na yabaki sa oti, au a papitaiso mai Philadelphia ena valenilotu duadua ga ka tara na Lotu e rawa ni keitou yaco kina mai Pennsylvania se e New Jersey. Ia ena vanua a dua toka ga kina na tabana lailai e Princeton, New Jersey, sa tu kina ena gauna oqo e rua na tabanalevu lelevu. Ena vica ga na siga sa oti, era a vakatasuasua e udolu na itabagone ena dua na vakatasuasua ni se bera na vakatabui na Valetabu na Philadelphia Pennsylvania.

Niu se cauravou, au a kacivi vakadaukaulotu ni tikina ena valenilotu duadua ga mai Albuquerque e New Mexico. Nikua sa tu e dua na valetabu kei na va na iteki.

Au biuti Albuquerque meu laki vuli e Cambridge mai Massachusetts. E dua ga na valenilotu kei na dua na tikina ka dodo kosova na iwase levu kei Massachusetts kei Rhode Island. Au draiva ena veidelana ni vanua totoka oya ki na soqoni ni sakaramede ena veitabana lalai, e vuqa ena veivale redetaki se vale vakavoutaki. Oqo sa tu e dua na valetabu ni Kalou e Belmont, Massachusetts, kei na veiiteki ena vanua raraba taucoko.

Na ka au a sega ni raica vakavinaka ena gauna oya ni a sovaraka tiko na Turaga na Yalona vei ira na tamata ena veisoqoni ni sakaramede. A rawa niu vakila ia au sega ni rawa ni raica na rabailevu kei na gauna ni nona inaki na Turaga me tara ka vakalagilagia na Nona matanitu. E dua na parofita, a raica ena ivakatakila ka vola na ka eda sa rawa ni wanonova. E kaya o Nifai ni na sega ni levu na keda iwiliwili ia na rarama soqoni vata ena dua na ka me saravi:

“Au sa raica na isoqosoqo lewe ni lotu ni Lami ni Kalou, ia era sa lewe lailai ga. …

“Ia koi au ko Nifai, au sa raica na kaukauwa ni Lami ni Kalou, ni sa curumi ira na lewe ni lotu ni Lami, kei ira talega na nona tamata ni veiyalayalati na Turaga, ka ra veiseyaki tu e vuravura taucoko; ka ra vakaiyaragi tu ena ivalavala dodonu kei na kaukauwa ni Kalou ena lagilagi cecere.”⁶

Ena itabagauna oqo, e volai ena Vunau kei na Veiyalayalati e dua na ivakamacala vakaparofita tautauvata ni keda ituvaki kei na madigi e tu mai liu:

“Dou sa sega ni kila na veika sa vakarautaka tu ko Tamaqu me vakalougatataki kemudou kina;

“Raica dou sa sega ni vosota rawa oqo na veika kece, ia mo dou reki ga, niu sa tuberi kemudou tiko. Raica sa soli vei kemudou na matanitu kei na kena veivakalougatataki, sa nomudou talega na lagilagi me tawamudu.

“Ia ko koya sa vakavinavinakataka na ka kecega sa soli vua, ena vakalougatataki, io ena soli me kena ikuri vua na veika kecega e vuravura, io ena yadrau ka sivia.”⁷

Au sa vakila na veisau ni vakavinavinaka tubucake me baleta na veivakalougatataki kei na lomana na Kalou sa levu cake tiko ena Lotu raraba. E vaka me totolo cake tikoga vei ira na lewe ni Lotu ena gauna kei na vanua ka vakatovolei kina nodra vakabauta, ka ra vakatakekere kina vua na Kalou me vukea mada ga nodra toso tiko.

Na gauna eda na lako sivita ena tu kina na veivakatovolei dredre, me vaka a yaco vei ira na tamata i Alama mai vua na tamata ca o Emuloni ka vakacolata vei ira na icolacola sa rui bibi me ra colata:

“Ia ni ra sa rarawa tiko, sa qai rogo mai vei ira na domo ni Turaga ka kaya: Dou laveta cake na ulumudou ka vakacegu, niu sa kila tu na veiyalayalati dou a cakava vei au; ia au sa dau veiyalayalati kei ira na noqu tamata, ka vakabulai ira mai na nodra vakabobulataki.

“Ia au na vakamamadataka na icolacola dou sa vakacolati kina, mo dou kakua ni vakila ni dou sa colata ena nomudou tiko vakabobula; ia au na kitaka oqo mo dou na kila vakaidina kina ni sai au na Turaga na Kalou, kau sa dau talevi ira na noqu tamata era sa vakararawataki.

“A sa vakamamadataki na icolacola kece sa vakataqari vei Alama kei ira na wekana; a sa vakaukauwataki ira na Turaga me ra colata rawa na nodra icolacola, ka ra soli ira ena yalomarau kei na yalovosota ki na nona lewa na Turaga.”⁸

O iko kei au daru sa ivakadinadina bula ni veigauna kecega daru rokova na nodaru veiyalayalati kei na Kalou, vakauasivi ena gauna a dredre kina, sa dau rogoca ko Koya na nodaru masu ni vakavinavinaka me baleta na veika sa vakayacora oti vei kedaru ka sa sauma na nodaru masu me baleta na kaukauwa me daru vosota kina ena yalodina. Sa vakavuqa nona dau vakamarautaki keda ka vakaukauwataki keda.

O na vakataroga tu beka na cava e rawa ni o cakava mo bula ka sokalou ena Siga ni Vakacecegu oqo mo vakaraitaka na nomu vakavinavinaka ka vaqaqacotaki iko kei ira tale eso me baleta na veivakatovolei sa tu e matamu.

E rawa ni o tekivu nikua ena dua na masu taudua kei na masu vakamatavuvale ni vakavinavinaka ena veika kece sa cakava vei iko na Kalou. E rawa ni o masu mo kila na ka e vinakata na Turaga mo cakava mo qaravi Koya kina kei ira tale eso. Vakauasivi, e rawa ni o masu me tukuna vei iko na Yalo Tabu e dua e galili se vakaleqai ka vinakata na Turaga mo lako vua.

Au rawa ni yalataka vei iko ni na saumi na nomu masu, ia ni o cakacakataka na kena isau o ciqoma, o na kunea na reki ena Siga ni Vakacecegu ka vakakina e yalomu ni na vakasinaiti uabale ena vakavinavinaka.

Au vakadinadinataka ni Kalou na Tamada e kilai iko ka lomani iko. A sorovaki iko na iVakabula ena vuku ni nomu ivalavala ca ni sa lomani iko. Erau kila na yacamu me vaka na nodrau a kila na yacana na Parofita o Josefa Simici ena Nodrau a rairai vua. Au vakadinadinataka ni oqo na Lotu i Jisu Karisito ka na rokova o Koya na veiyalayalati o sa vakayacora ka vakavoutaka vata kei na Kalou. Na kemu ituvaki ena yaco me veisau me yaco me vakataka cake na iVakabula. O na vaqaqacotaki mo vorata na veitemaki kei na yalo vakatitiqa me baleta na dina. O na kune reki ena Siga ni Vakacecegu. Au sa yalataka oqo vei kemuni ena yaca ni Turaga o Jisu Karisito, emeni.