Kev Ris Txiaj Thaum Hnub Caiv

Kuv cov kwv tij thiab cov muam uas nyob thoob plaws lub ntiaj teb no nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, kuv zoo siab uas Thawj Tswj Hwm Thomas S. Monson tau hais kom kuv hais lus hauv lub rooj sab laj no thaum Hnub Sunday. Kuv thov kom tus Vaj Ntsuj Plig Dawb Huv yuav coj kuv tej lus nkag mus rau hauv nej lub siab.

Hnub no kuv xav hais txog tej kev xav hauv lub siab. Qhov uas kuv yuav hais txog hnub no yog kev ris txiaj—qhov tseem ceeb yog thaum Hnub Caiv.

Peb muaj kev ris txiaj rau ntau yam: thaum ib tug neeg peb tsis paub ua siab zoo, ib pluas mov thaum peb tshaib plab, lub ruv tsev thaum muaj cua daj cua dub, kev kho mob thaum dam pob txha, los yog thaum ib tug me nyuam mos liab quaj nrov. Peb feem coob yuav nco ntsoov ris Vajtswv txiaj thaum ntawd.

Rau Haiv Neeg Ntseeg hauv Hnub Nyoog, Hnub Caiv yog ib lub sij hawm zoo li ntawd, ib hnub kom ris Vajtswv txiaj thiab muaj kev hlub. Tus Tswv tau qhia cov Neeg Ntseeg nyob hauv Jackson County, Missouri, thaum xyoo 1831 hais tias lawv yuav tsum thov Vajtswv thiab ua Vajtswv tsaug. Cov Neeg Ntseeg thaum ntawd tau txais kev tshwm sim kom paub hwm Hnub Caiv thiab paub yoo mov thiab thov Vatjswv.¹

Tus Tswv tau qhia lawv thiab peb paub teev tiam thiab ua Nws tsaug thaum Hnub Caiv li cas. Nej yeej paub tias qhov tseem ceeb tshaj yog qhov uas peb hlub tus uas muab tej lub txiaj ntsim ntawd rau peb. Nov yog tus Tswv tej lus kom paub ua Nws tsaug thiab hlub lwm tus thaum Hnub Caiv:

Kuv muab ib lo lus txib rau lawv, hais li no tias: Nej yuav tsum hlub tus Tswv nej tus Vajtswv kom kawg nej lub siab lub ntsws, thiab kawg nej lub dag lub zog; thiab nej yuav tsum ua hauj lwm rau nws los ntawm Yexus Khetos lub npe. …

Nej yuav tsum ua tus Tswv nej tus Vajtswv tsaug rau txhua yam.

Nej yuav tsum muab ib qho kev txi ntawm kev ncaj ncees, uas twb yog ntawm lub siab mob thiab lub siab xav ua zoo, pub rau tus Tswv nej tus Vajtswv.²

Ces tus Tswv ceeb toom txog thaum peb tsis hais ua tsaug rau Leej Txiv Saum Ntuj Ceeb Tsheej thiab Yexus Khetos vim nkawd pub tej lub txiaj ntsim ntawd: Thiab neeg yeej tsis ua txhaum Vajtswv ib yam dab tsi li, los yog nws txoj kev npau taws tsis tau chim rau ib tug twg, tsuas yog rau cov neeg uas tsis lees paub nws txhais tes rau txhua yam, thiab tsis ua raws li nws tej lus txib.³

Nej feem coob uas mloog hnub no yeej muaj kev xyiv fab thaum Hnub Caiv vim yog ib hnub nco ntsoov thiab ua Vajtswv tsaug rau cov koob hmoov. Nej yeej nco ntsoov zaj nkauj no:

Muaj Haiv Neeg Ntseeg hauv Hnub Nyoog Kawg uas sau ntawv thiab tuaj xyuas kuv qhia kuv tias lawv muaj kev txhawj kev ntshai. Ib txhia xav tias ntshe lawv ntsib txoj kev nyuaj siab kev txhawj xeeb loj dhau. Kuv cia siab thiab thov Vajtswv hais tias tej yam kuv hais yuav pab nej txoj kev nyuaj siab ploj mus thiab pab nej hu nkauj nyob hauv nej lub siab.

Ib txoj koob hmoov uas peb ris Vajtswv txiaj yog qhov uas peb nyob hauv kev sib ntsib txais lub cim nco txog, vim muaj ntau dua li ib tug los ob tug ntawm Nws cov thwj tim uas koom ua ke los ntawm Nws lub npe. Muaj ib txhia uas nyob hauv tsev vim sawv tsis tau ntawm txaj los li. Muaj ib txhia uas xav nyob hauv kev sib ntsib txais lub cim nco txog tiam sis lawv ua hauj lwm hauv lub tsev kho mob thiab pab cov pej xeem tsis raug xwm txheej los sis tiv thaiv peb nyob hauv roob moj sab qhua los yog hav zoov. Qhov uas nej muaj cai sib sau ua ke nrog ib tug Neeg Ntseeg thiab txais lub cim nco txog yog tib qho uas nej xav tau kom ris Vajtswv txiaj thiab paub tias Vajtswv muaj siab dawb siab zoo hlub nej.

Dhau los ntawm tus Yaj Saub Yauxej Xamiv thiab txoj moo zoo uas tau muab txum tim rov qab los, ib txoj koob hmoov ntxiv uas peb suav tau yog lub cib fim txais lub cim nco txog txhua lub lim tiam—uas Vajtswv tso cai rau Nws cov tub qhe kom npaj, foom koob hmoov thiab muab rau nej. Peb yuav ris Vajtswv txiaj thaum tus Vaj Ntsuj Plig Dawb Huv qhia hais tias peb Leej Txiv Saum Ntuj Ceeb Tsheej pom zoo rau tej lus uas cov tuav lub pov thawj hwj hais kom thov Vajtswv foom koob hmoov rau lub cim nco txog.

Hais txog cov koob hmoov uas peb suav tau, txoj koob hmoov zoo tshaj plaws yog kev zam txim uas los rau peb thaum peb txais lub cim nco txog. Peb yuav hlub thiab ris tus Cawm Seej txiaj ntxiv, tus uas theej peb lub txhoj kom peb thiaj yuav tsis muaj kev txhaum. Thaum peb txais cov mov mog thiab cov dej, peb nco ntsoov tias Nws raug txom nyem rau peb. Thiab thaum peb ris Nws txiaj rau tej yam uas Nws tau ua rau peb, peb yuav paub txog Nws txoj kev hlub thiab peb yuav hlub Nws ib yam thiab.

Txoj koob hmoov ntawm kev hlub uas peb txais yuav ua yooj yim rau peb xav ua raws li lo lus txib kom “nco ntsoov txog nws.”⁵ Tej zaum nej yuav hlub thiab ris tus Vaj Ntsuj Plig Dawb Huv txiaj, tus uas Leej Txiv Saum Ntuj Ceeb Tsheej cog lus tias yuav nrog nraim nej thaum nej ua raws li nej tej kev khi lus. Peb suav tau cov koob hmoov ntawd txhua hnub Sunday thiab ris Vajtswv txiaj.

Hnub Caiv yog ib lub sij hawm zoo tshaj kom nco txog kev khi lus uas peb ua thaum peb ua kev cai raus dej kom hlub thiab pab Leej Txiv Saum Ntuj Ceeb Tsheej cov me nyuam. Xwv kom peb yuav ua raws li peb tau cog lus, tej zaum peb yuav tsum rau siab ntso koom tes kawm hauv ib hoob los yog pawg pov thawj hwj kom thiaj li txhawb nqa peb cov kwv tij cov muam uas koom nrog peb txoj kev ntseeg thiab txoj kev hlub. Peb yuav zoo siab ua raws li peb tej hauj lwm uas Vajtswv hu peb ua.

Kuv ua Vajtswv tsaug rau ntau Hnub Sunday thaum kuv qhia ib pawg dikas nyob hauv Bountiful, Utah, thiab ib hoob rau Hnub Caiv Kev Kawm Vaj Lug Kub nyob hauv Idaho. Thiab kuv nco txog thaum kuv pab kuv tus poj niam nyob hauv chaw zov me nyuam, es kuv txoj hauj lwm tseem ceeb tshaj plaws yog tu thiab muab khoom ua si rau cov me nyuam.

Ntau xyoo tom qab ntawd kuv thiaj li paub dhau los ntawm tus Ntsuj Plig hais tias kuv txoj hauj lwm rau tus Tswv me me ntawd muaj nqi rau Leej Txiv Saum Ntuj Ceeb Tsheej cov me nyuam. Ua rau kuv xav tsis thoob, ib txhia tseem nco qab txog kuv thiab ua kuv tsaug rau kuv txoj kev sim pab lawv kom ua hauj lwm rau tus Xib Hwb.

Zoo ib yam li peb tsis pom tej yam uas muaj los ntawm peb tej hauj lwm thaum Hnub Caiv, tej zaum peb pom tsis tau tej yam uas muaj los ntawm tus Tswv lwm tus tub qhe ib yam thiab. Tiam sis tus Tswv siv Nws cov tub qhe uas rau siab ntseeg thiab txo hwj chim kom ua rau Nws lub nceeg vaj muaj zog thiab yeeb koob zuj zus mus rau yav tom ntej. Peb yuav tsum muaj tus Vaj Ntsuj Plig Dawb Huv kom pom tias lub nceeg vaj yuav loj npaum li cas.

Thaum kuv loj hlob tuaj kuv mus rau kev sib ntsib txais lub cim nco txog nyob hauv ib ceg ntseeg New Jersey me me nrog ob peb tug mej zeej thiab ib tsev neeg xwb, uas yog kuv li. Xya caum tsib xyoos tas los, kuv ua kev cai raus dej nyob hauv Philadelphia nyob hauv tib lub tsev teev ntuj uas lub Koom Txoos ua nyob hauv Pennsylvania thiab New Jersey. Tiam sis txawm muaj ib ceg ntseeg me me nyob hauv Princeton thaum ntawd, tam sim no muaj ob pawg ntseeg loj. Thiab tsis ntev tas los, muaj ntau txhiab tus tub hluas ntxhais hluas uas ua yeeb yam koob tsheej ua ntej yuav muab lub Tuam Tsev Philadelphia Pennsylvania fij tseg.

Thaum kuv yog ib tug tub hluas, lawv hu kuv ua ib koog chaw tus tub txib nyob hauv tib pawg ntseeg nyob hauv Albuquerque, New Mexico uas peb nyob teev tiam thaum Hnub Sunday. Hnub no muaj ib lub tuam tsev thiab plaub ceg txheem ntseeg.

Kuv ncaim Albuquerque mus kawm ntawv nyob hauv Cambridge, Massachusetts. Muaj ib lub tsev teev ntuj thiab ib koog chaw rau lub xeev Massachusetts thiab Rhode Island tag nrho. Kuv tau tsav tsheb nyob hauv thaj av ntawd mus rau kev sib ntsib txais lub cim nco txog hauv tej ceg ntseeg me me, feem ntau yog nyob hauv tej tsev uas muab xauj los yog lub tsev me me. Tam sim no muaj Vajtswv ib lub tuam tsev nyob hauv Belmont, Massachusetts, thiab tej ceg txheem ntseeg nyob thoob plaws thaj av ntawd.

Qhov uas kuv pom tsis tau thaum ntawd yog qhov uas tus Tswv tso Nws tus Ntsuj Plig rau cov neeg nyob hauv kev sib ntsib txais lub cim nco txog ntawd. Kuv twb hnov qhov ntawd hauv kuv lub siab, tiam sis kuv tsis tau pom tias tus Tswv yuav ua thiab muab yeeb koob rau Nws lub nceeg vaj kom loj npaum li cas. Ib tug yaj saub tau txais kev tshwm sim thiab sau txog tej yam uas peb pom tau tam sim no. Nifais hais tias peb yeej yuav tsis muaj neeg coob pes tsawg tiam sis lawv qhov kaj yuav ci ntsa iab heev:

“Thiab tau muaj tias kuv tau pom Vajtswv tus Me Nyuam Yaj lub koom txoos, thiab nws tsis muaj neeg coob pes tsawg. …

“Thiab tau muaj tias kuv, Nifais, tau pom Vajtswv tus Me Nyuam Yaj lub hwj chim, nws tau nqis los rau saum cov ntseeg ntawm tus Me Nyuam Yaj lub koom txoos, thiab tau nqis los rau saum tus Tswv cov neeg uas tau khi lus tseg, cov uas tau tawg ri niab mus thoob plaws hauv lub qab ntuj no; thiab lawv tau muab txoj kev ncaj ncees los ua ntaj riam thaiv lawv thiab nrog rau Vajtswv lub hwj chim uas muaj yeeb koob heev.”⁶

Nyob hauv lub caij nyoog no, ib tug yaj saub piav txog peb lub zwj ceeb thiab tej cib fim uas yuav muaj thaum yav tom ntej nyob hauv phau Lus Qhuab Qhia thiab Kev Khi Lus:

Nej tseem tsis tau to taub hais tias Leej Txiv muaj tej koob hmoov loj npaum li cas nyob hauv nws tus kheej txhais tes thiab tau npaj rau nej;

Thiab nej ris tsis taus txhua yam lub sij hawm no; txawm li ntawd los, cia li zoo siab, vim kuv yuav coj nej kev. Lub nceeg vaj yog nej li thiab tej koob hmoov uas nyob hauv yog nej li, thiab tej kev nplua nuj nyob mus ib txhis yog nej li.

Thiab tus uas txais txhua yam nrog txoj kev ua tsaug puv npo los tus Tswv yuav ua kom tus ntawd muaj yeeb koob heev; thiab yuav muab tej nyob hauv lub ntiaj teb no ntxiv rau nws, ib puas npaug kiag, muaj tseeb tiag, tshaj qhov ntawd.⁷

Kuv paub kev ris Vajtswv txiaj rau cov koob hmoov thiab kev hlub Vajtswv loj zuj zus tuaj nyob thoob plaws lub Koom Txoos. Cov mej zeej ntawm lub Koom Txoos nyob hauv tej lub sij hawm thiab tej qhov chaw uas muaj kev sim siab rau lawv txoj kev ntseeg haj yam muaj kev ris txiaj, vim lawv yuav tsum thov Vajtswv kom tau kev pab tiv mus tom ntej.

Lub caij nyoog tom ntej yeej yuav muaj tej kev sim siab nyuaj heev, ib yam li thaum Amuloos kav Amas cov neeg, thaum nws muab tej lub nra uas hnyav dhau rau lawv ris.

“Thiab tau muaj tias tus Tswv lub suab tau los rau lawv nyob hauv lawv tej kev txom nyom, hais tias: Cia li tsa nej tej taub hau thiab cia li zoo siab, vim kuv paub txog tej lus sib khi uas nej tau khi rau kuv lawm; thiab kuv yuav sib khi lus nrog kuv cov neeg thiab coj lawv dim ntawm txoj kev poob cev qhev.

“Thiab kuv kuj yuav ua rau tej nra uas nyob saum nej tej xub pwg kom yooj yim, xwv kom nej yuav tsis hnov tias lawv nyob saum nej nraub qaum, thaum uas nej tseem poob cev qhev; thiab kuv yuav ua li no xwv kom nej yuav sawv ua tim khawv rau kuv txij li no mus, thiab xwv kom nej yuav paub tseeb tias kuv, tus Tswv uas yog Vajtswv, yeej los saib xyuas kuv cov neeg thaum lawv muaj kev txom nyem.

“Thiab nim no tau muaj tias tej nra hnyav uas raug tso saum Amas thiab nws cov kwv tij tau raug ua kom sib; muaj tseeb tiag, tus Tswv tau txhawb lawv lub dag lub zog ces lawv thiaj ris tau lawv tej nra hnyav sib sib, thiab lawv tau kam ua zoo siab hlo thiab ua siab ntev nyiaj rau tag nrho tej uas tus Tswv lub siab nyiam.”⁸

Peb yeej ua tau tim khawv hais tias thaum twg peb ua raws li peb tej kev khi lus nrog Vajtswv, qhov tseem ceeb yog thaum nyuaj ua li ntawd, Nws tau hnov peb tej lus ua Nws tsaug rau tej yam uas Nws tau ua rau peb lawm thiab Nws teb peb tej lus thov kom muaj zog rau siab ntseeg. Tsis yog Nws twb txhawb peb kom peb zoo siab xwb Nws kuj ua rau peb muaj zog.

Tej zaum Hnub Caiv no nej yuav xav paub seb nej yuav tsum ua li cas kom muaj kev ris txiaj thiab txhawb nqa nej tus kheej thiab lwm tus rau tej kev sim siab uas yuav muaj los thaum yav tom ntej.

Tej zaum hnub no nej yuav pib thov Vajtwv nej tus kheej thiab hauv nej tsev neeg ua Vajtswv tsaug rau txhua yam Nws tau foom pub rau nej. Tej zaum nej yuav thov Vajtswv paub tias tus Tswv xav kom nej ua li cas ua Nws txoj hauj lwm thiab pab lwm tus. Qhov tseem ceeb, nej thov tau kom tus Vaj Ntsuj Plig Dawb Huv qhia nej txog ib tug neeg uas kho siab los yog paub seb tus Tswv xav kom nej mus qhov twg.

Kuv cog lus rau nej tias Vajtswv yuav teb nej tej lus thov, thiab thaum nej ua raws li Nws tej lus teb, nej yuav nrhiav tau kev xyiv fab thaum Hnub Caiv, thiab nej lub siab yuav puv npo nrog kev ris txiaj.

Kuv ua tim khawv tias Vajtswv Leej Txiv paub thiab hlub nej. Tus Cawm Seej, tus Tswv Yexus Khetos, theej nej lub txhoj vim Nws hlub nej. Leej Txiv thiab Leej Tub, nkawd paub nej lub npe ib yam li Nkawd paub tus Yaj Saub Yauxej Xamiv lub npe thaum Nkawd tshwm sim rua nws. Kuv ua tim khawv tias nov yog Yexus Khetos lub Koom Txoos thiab Nws yuav ua raws li tej kev khi lus uas nej tau khi nrog Vajtswv. Nej tus cwj pwm yuav hloov ua neeg zoo li tus Cawm Seej. Nej yuav muaj zog tiv thaiv kom tsis txhob raug kev ntxias thiab kev ua xyem xyav txog qhov tseeb. Nej yuav muaj kev xyiv fab txog Hnub Caiv. Kuv cog lus rau nej li no los ntawm tus Tswv Yexus Khetos lub npe, amees.