2010–2019
Jen Mour im Kabun̄-jar kōn Kam̧m̧olool
Oktoba 2016


Jen Mour im Kabun̄-jar kōn Kam̧m̧olool

N̄an ro Rekwojarjar ilo Raan–ko Āliktata, Jabōt ej juon raan in kam̧m̧oolol im iakwe.

Ro jeiū im jatū rejitōnbōro ro rejeplōklōk ipeļaakin laļ in ilo Kabun̄ eo an Jisōs Kraist im Armej ro Rekwojarjar ilo Raan Kein Āliktata, ij kam̧m̧olool bwe Būreejtōn Thomas  S. Monson eaar kajjitōk ippa bwe in kōnono ilo kweilo̧k in ilo raan in Jabōt in. Ij jar bwe Jetōb Kwojarjar eo enaaj un̄ūr buruōmi kōn enaan in aō.

Rainin ij ikdeelel n̄an kōnono kōn en̄jake ko ilo bōro. Juon men inaaj kōnnaan kake rainin ej kam̧m̧olool—eļaptata raan in Jabōt.

Jej kam̧m̧olool kōn men otemjej: jouj jān juon ruwamājet, mōn̄ā n̄e jej ioon kwole, būrowaj n̄e ej itok lan̄ ko, jako būļo̧k in dii, im ājmourur in ainikien nin̄nin̄ ko rej kab lotaktok. Elōn̄ iaad jenaaj keememej in kam̧m̧olool ilo iien rōt kein.

N̄an ro Rekwojarjar ilo Raan–ko Āliktata, Jabōt ej juon raan in kam̧m̧oolol im iakwe. Irooj eaar kakkōl ro Rekwojarjar ilo Jackson County, Missouri, ilo 1831 bwe jar ko aer im aer kam̧m̧olool ren kajju n̄an Anij. Rikwojarjar ro etto kar leļo̧k n̄an er revelesōn kōn wāween kōjparok raan in Jabōt im wāween jitlo̧k im jar.1

Er, im kōj, Irooj eaar ba n̄an kōj wāween ad kabun̄-jar im leļo̧k kam̧m̧olool ilo Jabōt. Ilo am jeļā, ta eo eaorōk tata ej iakwe eo ad n̄an rileļo̧k menin letok ko. Erkein naan ko an Irooj kōn wāween leļo̧k kam̧m̧olool im wāween iakwe ilo Jabōt:

“Ij leļo̧k n̄an er juon kien, im ba āindein: Kwōn iakwe Irooj am Anij kōn aolepān būruōm̧, kōn aolepān am maron̄, ļōmņak, im kajoor; im ilo etan Jisōs Kraist kwōn jerbal n̄an E. …

“Kwōn kam̧m̧oolol Irooj am Anij ilo men otemjeļo̧k.

“Kwōn katok juon katok n̄an Irooj am Anij ilo jejjet, em̧ool eo ej bōro eo erub im jetōb eo ettā.”2

Innem Irooj ej wōnm̧aanļo̧k wōt im kakkōl kōn likjab in ad iakwe im kam̧m̧olool Jemādwōj Ilan̄ im Jisōs Kraist āinwōt juon rileļo̧k menin letok ko: “Im ilo ejjeļo̧k men armej ej kainepataik Anij, ak ņae ejjeļo̧k An illu ej urur, ijello̧kun wōt ro rej jab kile Pein ilo men ko otemjeļo̧k, im jab pokake kien ko An.”3

Elōn̄ iaad jej ron̄jake kadede im m̧ōņōņō kōn Jabōt āinwōt juon raan n̄an kakeememej im leļo̧k kam̧m̧olool n̄an Anij kōn kōjeraam̧m̧an ko. Kom̧ij keememej ke al in ebun̄bun̄:

N̄e kwoj ion buktak ko an metwan Mour,

N̄e jako kōjatdikdik im Kwoj ebwer,

Bwini menin joij n̄ōn Yuk kajo iair,

Inem kwo naj bwilon̄ kin an Yokwe Yuk.

Bwini menin joij;

Kajo iair.

Bwini menin joij;

Im lo bwe ej Yokwe Yuk. …

Ebolikim ke kin men ko rej joon Yuk?

Eddo ke drebail eo ear kir Yuk n̄ōn e?

Bwini menin joij; berre naj jako,

Im kwo naj el im lan̄lōn̄ raan otemjej.4

Ij ello leta im rilotok jān Rikwojarjar ro retiljek ro rej eddodo kōn men ko rej joon er. Jet repaake en̄jake in, ekkar n̄an er, aolep naaj jako. Ij kōjatdikdik im jar bwe ta eo ij ba kōn kam̧m̧oolol kōn raan in Jabōt enaaj lukkuun jipan̄ n̄an kōm̧m̧an bwe pere ren jako im al ko ren jino jan̄ ilo buruōmi.

Kōjeraam̧m̧an eo kein kajuon eo kwomaron̄ kam̧m̧olool kake ej bwe kwoj pād ilo kweilo̧k in kwojkwoj eo aolep iien, kobatok in juon ak ruo Rikaļooran ilo Etan. Elōn̄ jet ilo mōko mōer ro rejjab maron̄ jerkak jān peet ko aer. Elōn̄ ro rekōnaan pād ijo kwoj pād ie ak kōnke rej jerbal ilo hospital ak jerbal ko jet n̄an kōjparok aenōm̧m̧an ak baare kōj jān kauwōtata in mour ko aer make ilo āne jam̧dān ak jan̄kōļ. Kōn m̧ool in me kwomaron̄ kobaļo̧k ippān ro Rekwojarjar im bōk mōttan kwojkwoj ej men eo kwoj aikuj n̄an kam̧m̧olool im iakwe kōn jouj an Anij.

Kōn Rikanaan Josep Smith im jepļaaktok eo an gospel, kōjeraam̧m̧an eo kein karuo ej bwe ewōr ad iien n̄an bōk kwojkwoj kajjojo wiik—kōpooje, kōjeraam̧m̧ane, im ajjeje jān rikajeran Anij ro ewōr aer mālim. Kwomaron̄ kam̧m̧olool n̄e Jetōb Kwojarjar ej kam̧ool n̄an eok bwe naan ko ilo jar in kwojkwoj eo, kar kōm̧m̧ane jān ro rikabwijer priesthood me emōj kōmalim er, rej menin utiej ippān Jemādwōj Ilan̄.

Jān aolep kōjeraam̧m̧an kein jemaron̄ bwine, men eo eļaptata ej en̄jake in jeorļo̧k bōd eo ej itok ilo ad bōk m̧ōttan kwojkwoj eo. Jenaaj en̄jake iakwe eo eļapļo̧k im kam̧m̧oolol kōn Rilo̧mo̧o̧r eo, eo katok eo an eļap ekar kōm̧m̧ane bwe jen maron̄ erreo jān jerawiwi. Ilo ad bōk m̧ōttan pilawā im dān, jej keememej bwe Ekar en̄taan kōn kōj. Im n̄e jej en̄jake kam̧m̧oolol kōn ta eo ekar kōm̧m̧ane n̄an kōj, jenaaj en̄jake iakwe eo An n̄an kōj im ad iakwe n̄an E.

Kōjeraam̧m̧an in iakwe eo jej bōke enaaj kōm̧m̧ane bwe en pidodo ad kōjparok kien ko n̄an “keememej e iien otemjej.”5 Kwomaron̄ barāinwōt en̄jake iakwe im kam̧m̧olool n̄an Jetōb Kwojarjar, eo Jemādwōj Ilan̄ eaar kalim̧ur bwe enaaj pād ippād iien otemjej n̄e jej tiljek wōt n̄an bujen ko jaar kōm̧m̧ani. Jemaron̄ bwini aolep kōjeraam̧m̧an kein aolep Jabōt im en̄jake kam̧m̧oolol.

Jabōt ej juon iien ejjejet n̄an kakeememej bujen eo kwar kōm̧m̧ani ke kwar peptaij n̄an iakwe im jerbal n̄an ajri ro nejin Jemādwōj Ilan̄. Kakūrm̧ool kalim̧ur eo emaron̄ kitbuuj bōk koņaam ilo kūlaaj ko ak doulul ko kōn aolepān buruōm bwe kwon kalōk tōmak im iakwe eo am ilubwiljin būratōr im sister ro am ro repād iturid. Kalim̧ur in enaaj koba m̧ōņōņō in kakūrm̧ool eddo ko ad.

Ij keememej wōt elōn̄ Jabōt ko iaar katakin juon doulul an dikōn ilo Bountiful, Utah, barāinwōt ilo juon Jabōt Jikuul kūlaaj eo ilo Idaho. Im ij bar keememej tōre eo iaar jerbal āinwōt juon rijipan̄ n̄an kōrā eo pāleeō ilo kūlaaj eo an nursery, ijo me kar lukkuun eddo eo aō ej elleļo̧k kein ikkure im aini er.

Ekar eļļlāļo̧k iiō ko moktaļo̧k ke iaar kile kōn Jetōb bwe eddo jidikdik eo aō n̄an Irooj eaar lukkuun aorōk ilo mour an ajri ro nejin Jemādwōj Ilan̄. Iaar bwilōn̄, jet iaer raar keememej wōt ilo aolepān iiō ko in aō jerbal ippāer men̄e iaar jab lukkuun jeļā ak iaar kajjieon̄ n̄an jerbal n̄an Maajta eo ilo raan in Jabōt ko.

Āinwōt ad jab maron̄ lo tōprak in jerbal ko ad ilo Jabōt, jemaron̄ jab lo tōprak ko an ro jet rikarejaran Irooj. Ak Irooj ej tōl wōt aelōn̄ in kiin̄ eo an ilo lur im kōn tiljek im rikaloor ro An rettā ilo an jidikin wōt ad lo wōnm̧aanļo̧k eo n̄an aiboojoj in itok eo an Kraist. Jetōb Kwojarjar wōt emaron̄ kōm̧m̧an bwe jen lo men in ekabwilōn̄lōn̄.

Iaar rūttoļo̧k ilo aō etal n̄an kweilo̧k ko an kwojkwoj ilo branch eo ilo New Jersey ippān jejjo wōt membōr im juon baam̧le, baam̧le eo aō. Jiljimjuonn̄oul lalem iiō ko rem̧ootļo̧k, iaar peptaij ilo juon wōt kar mōn jar ilo Pennsylvania im New Jersey. Ijo me ewōr juon branch jidikdik ilo Princeton, New Jersey, ijen kiiō ewōr ruo ward ko reļļap. Im jejjo raan remootļo̧k, taujin rum̧m̧an ded ro raar ikkure ilo juon iien kam̧ōņōņōik aje eo an Philadelphia Pennsylvania Temple.

Ke iaar juon likao, iaar bōk kūr āinwōt juon district missionary ijo kōm kar kabun̄-jar ie ilo mōn jar eo ej make wōt ilo Albuquerque, New Mexico. Rainin ewōr juon tampeļ im elōn̄ stake ko.

Iaar etal jān Albuqueque bwe in etal im jikuuļ ilo Cambridge, Massachusetts. Ekar wōr juon mōn jar im juon district eo ikōtaan Massachusetts im Rhode Islands. Iaar ettōr lōn̄ļo̧k ilo tōļ ko ilo jikin eo aiboojoj bwe in pād ilo kweilo̧k in kwojkwoj eo ilo juon branch jidikdik, ilo juon jikin rej reen e ak em̧ jidikdik rej kōkm̧anm̧anļo̧k. Kiiō ewōr juon tampeļ eo ekwojarjar imōn Anij ilo Belmont, Massachusetts, im stake ko me rejepelōklōk ilo bukwōn en.

Ta eo ijjab maron̄ lo ilo tōre ko ej bwe Irooj eaar lutōkleplep Jetōb eo an ioon armej ro ilo iien kweilo̧k in kwojkwoj ko. Iaar en̄jake, ak iaar jab lo an eddōkļo̧k im iien eo ejjejet n̄an karōk eo an Irooj n̄an kalōk im kaiboojoj aelōn̄ in kiin̄ eo An. Juon rikanaan, kōn revelesōn, ekar lo im rekoot ta eo jemaron̄ kiiō lo. Nipai eaar ba bwe oran ro uwaan kabun̄ emaron̄ jab lukkuun ļap, ak em̧m̧an in jerbal ko ad rekabwilōn̄lōn̄:

“Im ālikin men kein, iaar lo kabun̄ eo an Lam an Anij, im oran ro ie eaar iiet. …

““Im ālkin men kein, n̄a, Nipai, iaar lo kajoor in Lam an Anij, bwe ekar bun̄ ioon ro rekwojarjar jān kabun̄ eo an Lam eo, im ioon armej in bujen ko an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap.”6

Ilo epepen in, ejja kōmeļeļe in kannan in wōt kōn jekjek ko im iien ko rem̧m̧an imaan rej pād ilo Katak im Bujen ko:

“Kom̧ij jan̄in kar meļeļe ewi jon̄an ļap in kōjeraam̧m̧an ko ippān Jemān … kōpooji n̄an kom̧;

“Im kom̧ij jab maron̄ ineek aolep men otemjeļo̧k kiiō; mekarta, kom̧in m̧ōņōņō, bwe Inaaj tōlļo̧k kom̧. Aelōn̄ in kiin̄ eo ej ami im kōjeraam̧m̧an ko ie rej ami, im m̧weiie ko an indeeo rej ami.

“Im e eo ej bōk aolep men ko otemjeļo̧k kōn kam̧m̧oolol naaj kōm̧m̧an bwe en wōj; im men ko an laļ in renaaj kobaļo̧k n̄an e, em̧ool bukwi alen, aaet, eļapļo̧k.”7

Iaar en̄jake oktak in an ļapļo̧k kam̧m̧olool kōn kōjeraam̧m̧an ko im iakwe eo an Anij ej ļapļo̧k ilo aolepān Kabun̄ in. Ilo kalimjōkļo̧k n̄an kamakaj ilubwiljin ro uwaan Kabun̄ in ilo iien ko im jikin ko ijoko eļap idajon̄jon̄ n̄an tōmak eo aer, ijoko rej akweļap n̄an Anij n̄an jipan̄ er mour m̧aanļo̧k.

Iien ko jej mour ilo ad ioon melejon̄ ko reppen āinwōt kar armej ro an Alma iumin tōl eo an Amulon eo enana, eo eaar likūt eļap eddo ioon aeraer ko rejjab kar maron̄ ineeki:

“Im ālikin men kein ainikien Irooj eaar itok n̄an er ilo en̄taan ko aer, im ba: Kom̧in kotak bōrami im kom̧in ineem̧m̧an, bwe I jeļā kōn bujen eo kom̧ ar kōm̧m̧ane n̄an Eō; im Inaaj bujen ippān armej ro Aō im kōtļo̧k er jān kōm̧akoko.

“Im Inaaj barāinwōt kameraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālikimi, em̧ool n̄e kom̧ij pād ilo kōm̧akoko; im men in Inaaj kōm̧m̧an bwe kom̧in maron̄ jutak āinwōt rikam̧ool ro n̄an Eō tokālik, im bwe kom̧in maron̄ jeļā kōn m̧ool in bwe N̄a, Irooj Anij, ij loļo̧k armej ro Aō ilo en̄taan ko aer.

“Im kiiō ālikin men kein, eddo ko kar likūt ioon Alma im ro jein im jatin kar kōm̧m̧an bwe ren mera; aaet, Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok-limo im kōn ineem̧m̧an n̄an aolep ankilaan Irooj.”8

Kwe im n̄a jej rikam̧ool bwe jabdewōt iien jej kōjparok kien ko an Irooj, eļaptata n̄e ej pen, Eaar ron̄jake jar in kam̧m̧olool ko ad kōn ta eo Emōj an kōm̧m̧an n̄an kōj im an uwaak jar ko ad kōn kajoor n̄an niknik ilo tiljek. Im elōn̄ ļo̧k jān juon kōttan an kam̧ōņōņōik eok barāinwōt kōkajoor eok.

Kwomaron̄ bar bwilōn̄ kōn ta eo kwomaron̄ kōm̧m̧an n̄an mour im kabun̄-jar ilo Raan in Jabōt in n̄an kwaļo̧k kam̧m̧olool im n̄an kōkajoor kwe make im ro jet kōn mālejjon̄ ko rej pād immami.

Kwomaron̄ jino kōn jar eo am make ettino ak jar eo an baam̧le n̄an kam̧m̧olool kōn aolepān ta ko Anij eaar kōm̧m̧an n̄an kwe. Kwomaron̄ jar n̄an jeļā ta eo Irooj enkar kōņaan bwe kwon kōm̧m̧ane n̄an jerbal n̄an E im ro jet. Eļaptata kwomaron̄ jar bwe Jetōb Kwojarjar en ba kwe kōn juon eo ej make iaan ak ej pād ilo aikuj ro im Irooj ekōnaan bwe kwon loļo̧k.

Ij kalim̧ur kom̧ bwe jar ko ami renaaj uwaak, im ilo am jerbal ekkar n̄an uwaakin jar eo am, kwonaaj lo lan̄lōn̄ ilo Jabōt im en̄jake m̧ōņōņō ilo buruōm.

Ij kam̧ool bwe Anij Jemed ejeļā im ej iakwe eok. Rilo̧mo̧o̧r, Irooj Jisōs Kraist eo ekar pinmuur kōn jerawiwi ko kōn iakwe eo n̄an kwe. Rejeļā, Jemen im Nejin, etam āinwōt aer jeļā etan Rikanaan Joseph Smith ke Raar waļo̧k n̄an e. Ij kam̧ool bwe en̄in ej Kabun̄ eo an Jisōs Kraist im bwe Enaaj kautiej bujen ko kwar kōm̧m̧ani ippān Anij. Piktokūm̧ enaaj oktak im erom āinwōt Rilo̧mo̧o̧r eo. Kwonaaj kajoorļo̧k ņae mālejjon̄ ko im ņae en̄jake ko kōn pere kōn m̧ool eo. Kwonaaj lo lan̄lōn̄ ilo raan in Jabōt. Ilo etan Jisōs Kraist, Amen.