Kaping Kalahngan Rahn en Sapad

Riei ohl oh lih oko me kipedier wasa koaros nan sampah nan Mwomwohdiso en Sises Krais en Souleng en Imwin Rahn-akan, I inenen kapingki Presiden Thomas S. Monson eh ketin mweidohngie ansou mwahu kiset pwe I en iang padahk nan kapokon en rahn Sarawi wet. I kapakapki me Ngehn Sarawio pahn idanewei mahsen pwukat nan mohngiongimwail kan.

Rahnwet I men koasoaia pepehm kan en nan mohngiong. Me I pahn udahn doke mehlel iei kaping kalahngan—mehlel nan rahn en Sapad.

Kitail kin kapingki soahng tohto: kadek sang aramas me kitail sehse, mwenge ni anaous me kitail kin duhpek, imwatail ihmw kan ansoun engimah,, ehu tih ohla me kin mwahula, oh ngihl kalaimwung en kisin seri me ahpwtehn ipwidi. Me tohto kitail pahn tamanda pepehm en kaping kalahngan nan soangen ansou pwukat..

Ong Souleng en Imwin Rahn-akan, Rahn en Sapad iei ansou mwahu, mehlel ehu rahn, en kaping kalahngan oh limpoak. Kauno ketin kaweidiki Souleng kan nan Jackson County, Missouri, nan 1831 me arail kapakap akan oh kaping kan uhdahn pahn doke te nanleng. Irail Souleng en mahs oko aledier ehu kaudiahl me pid duwen kin wauneki rahn en Sapad oh duwen kaisihsol oh kapakap.¹

Irail, oh kitail, esehier sang rehn Kauno duwen kaudok oh kasapahl kalahngan Rahnsarawi. Duwehte omw kak nda,,dahme keieu kesemwpal iei limpoak me kitail kin pehm ong irail kan me kin kiheng kitail kisakiski kan. Iet sapwellimen Kauno mahsen kan me pid duwen kasapahl kalahngan oh duwen limpoak Rahnsarawi:

“I kiheng kumwail kosonned ehu, me ketihtihki: Kumwail poakohng Kauno amwail Koht sang nan amwail mohngiong unsek, amwail kehl unsek, amwail madmadau, oh roson; oh ni mwaren Sises Krais kumwail pahn papah Ih. …

“Kumwail pahn kapingkihong Kauno amwail Koht ni soahng koaros.

“Kumwail pahn wia amwail meirong ong Kauno amwail Koht ni pwung, mehlel ni nsensuwed oh ni karakarahk.²

Oh Kauno eri ketin doula oh pwe en kepehmki duwen kahpwal en ma kitail sohte kapingkiheng Sahm Nanleng oh Sises Krais ara ketin wia soun ketikihda kisakis kan: “Oh sohte me aramas kak kansensuwedieki Koht, de sohte me e kin ketin engiengda pah, mehd pai me kin doarehla irail kan me sohte kin wehkada dahme irail wiahdahr, oh sohte kin peikieng Sapwellime kosonned akan.³

Me tohto kumwail me wie rongorongehr kehnehr peren en rahn en Sapad me wia ehu rahn en temataman oh kapingkihong Kauno kapai kan. Kumwail tamataman koul kumwail esehiero:

I kin alehdi kisinlikou kei oh mie Souleng Mwomwohdiso loaloapwoat kei me kin toutoukihla arail pwunod kin pwarekie. Ekei irail ahnki pepehm me, ong pein irail, solahr irail mehkot. I kopworopworki oh kapakapki me dahme I koasoia me pid duwen kaping kalahngan rahn en Sapad pahn sawas laudki kumwail en kak saledek sang nan dihp oh kokoul nan mohngiongmwail kan.

Ehu kapai me kitail kak kapingki iei me kitail iang mi nan tuhpene en sarawio, patehng tohtohsang emen de riemen Sapwellime tohnpadahk ko ni Mware. Mie ekei ni imwarail kan me sohte kak pwourdahsang nan douwarail kan. Mie ekei irail me men iang mih wasa kitail mihmie ahpw sohte kak pwe irail wie doadoahk nan imwenwini de palien polis de sawasawaski onepek mwahu en wehipokon de doandoare kitail ni tohnmeteiki arail mour kan nan ekei sapwtehn de nanwel. Pwehki eh mehlel me kitail kak kahrehdo emen Souleng oh iang ale kamadipw sarawi pahn seweseikitail tepda pehm kaping kalahngan oh limpoak ong Sapwelimen Koht kadek.

Pwehki Soukohp Joseph Smith oh rongamwahu kopwurpwurdohr wet, pil ehu kapai me kitail kak kopworopworki iei me kitail ahniki ansou mwahu en ale kamadipw sarawi nan wihk koaros—kaunopada, kapaida, oh nehnepeseng sang irail ladu kan en Koht me aledier mweimwei. Kitail kak kapingki Ngehn Sarawi eh ketin kamanahhieng kitail me mahsen kan nan kamadipw sarawio, me kin wiawi sang irail prihsduhd kan me kolokol mweimwei, kamanamanlahr sang rehn Samatail Nanleng.

Nan pwungen kapai koaros me kitail kak wadekada, me keieu kaselel iei pepehm en mahk me kin kohdo ni atail kin ale kamadipw sarawi. Kitail pahn kehn limpoak oh kaping laud ong Sounkomouro, me sapwellime meirong laudo kahredahr atail kak mwakelekelada sang dihp. Ni atail ale pilawao oh pihlo, kitail kin tamataman me E ketin lokolongki kitail. Oh ansou me kitail kin kehn kaping kalahngan ong dahme E ketin wiadahr ong kitailo, kitail pahn kehn Sapwellime limpoak ong kitail oh atail limpoak ong Ih.

Kapai en limpoak me kitail kin alehdi pahn kamangaiong kitail en kak kolokol kosonned en “tamataman ih ansou koaros”⁵Kumwail kak kehn limpoak oh kaping kalahngan, duwehte ei kin kehn, pwe Ngehn Sarawio, me Samatail Nanleng ketin inoukihong kitailehr pahn ieiang kitail ansou koaros ni atail pahn wie pepeikieng inou kan me kitail wiadahr. Kitail kak kopworopworki kapai ko koaros rahn Sarawi koaros oh ahneki kaping.

Rahn en Sapad iei pil ehu ansou mwahu en tamataman inou me kitail wiahda ni pihl en pepdaiso pwe kitail en poakohng oh papah sapwellimen Sahm Nanleng seri kan. Kapwaiada inouo rahn en Sapad pahn iangahki ehu kasukuhl de pwihn ni mohngiong unsek pwe en kalaudehla pwoson oh limpoak rehn riatail ohl oh lih akan me iang kitail mih mwo. Inouo pahn pil iangahki pereniki kapwaiada atail pwukoah kan.

I kaping kalahnganki rahn Sarawi tohto me I kin padahkih pwihn en dihken kan nan Bountiful, Utah, oh pil I wia sounpadahk en pwihn en Sandi Sukuhl nan Idaho. Oh I pil tamatamante ansou ko me I wia soun sawas ong ahi pwoudo nan perehn kisin serio, wasa me uhdahn ahi pwukoah iei kihiei mehn mwadong oh rikpene.

Sounpar kei mwohn ei esehda sang rehn Ngehno me kisin sawas tikitik ong Kauno katapan nan mour en Sapwellimen Sahm Nanleng seri kan. I pwuriamweiki,ekei irail ar tamatamante oh kapingkihongie ei kin nannantiheng papah irail pwehki Kauno nan rahn en Sapad kan.

Duwehte atail kin ekei ansou sohte kak kilang wahn pein atail sawas me kitail kin wia rahn Sarawi, kitail pil kak sohte kilang wahn doadoahk mwahu kan en ladu teikan en Kauno. Ahpw Kauno ketin kaukauada Sapwellime wehi ni mehleilei sang rehn Sapwellime soun papah loaloapoat oh akitikitik kan, ni kisin sansal, ong,irair en ansou me kohkohdoht. E pahn anahne Ngehn Sarawio pwe kitail en kak kilang lingan me wie lalaudlao.

I tikida ni ei kin kohkohla ni tuhpene en kamadipw sarawi kan iangahki pein ahi peneineio nan ehu kisin branch nan New Jersey me towe ko malaulau . Sounpar isihsek- limau samwalahro, I papdaisla nan Philedelphia nan ihte Ihmw Sarawi me kokoudahr me se kak pwaralaie nan Pennsylvania de New Jersey. Ahpw wasa me ehu kisin branch miehierieo nan Princeton, New Jersey, ansouet miehier ward laud riau mwo. Oh rahn ekei samwalahro, aramas pwulopwul kid kei wia arail kasansal nan ehu kowou mwohn kasarawi en Tehnpas Sarawi en Philadelphia Pennsylvania.

Ni ansou me I wia pwutak pwulopwulo, I wia pwukoahn district misineri wasa me se kin kaudokie Rahn Sarawi kan nan ihte ihmw sarawi me mie nan Albuquerque, New Mexico. Rahnwet miehier tehnpas sarawi ehu oh stake pahieu.

I mwesel sang Albuquerque pwe I en kohla sukuhl nan Cambridge, Massachusetts. Ihmw sarawi ehute oh distrik ehu me mie nan pali laud en Massachusetts oh Rhode Island. I kin dake sidohsa ni uluhl kan en county lingano ong kamadipw sarawi kan nan kisin branch kan, pali laud nan kisin ihmw en rent tikitik kan de kisin ihmw en kouson kan me pwurehngehr kamwahula. Ansouet miehier tehnpas sarawi en Koht nan Belmont, Massachusetts, oh stake kei me pil kokoudahr likin kahnihmw ko.

Dahme I sohte kak kadehde mwahu ansouo iei me Kauno eh ketin kamwekamwerehdi Sapwellime Ngehno pohn aramas akan nan kisin ansoun kamadipw sarawi ko. I kak kehn, ahpw I sohte kak kilang pallahsang mwo oh ansou da me Kauno pahn ketin kauada oh kalinganahda Sapwellime wehio. Soukohp men, sang ni kaudiahl, kilangehr oh ntingihdier dahme kitail kak pein kilang ansouet.. Niphi koasoia me uwen tohtohn kitail sohte pahn laudla ahpw wiewia mwahu pahn tohtohla oh kaperenda wasa:

“Oh e ahpw wiawiher me I kilangada mwomwohdiso en Sihmpwul en Koht, oh towe kan me malaulau. …

“Oh e ahpw wiawiher me Ngehi,Nephi, kilangadahr manaman en Simpwul en Koht, me e ketididohr pohn souleng kan en mwomwohdiso en Simpwulo, oh pohn irail sapwellimen Kauno seri en inou kan, me milahr wasa koaros pohn sampah; oh me silasilkidier pwung oh ni manaman en Koht ni lingan laud.”⁶

Nan irair en ansou wet, kokohp me pil duwehte met oh soahng kan me pil kokohdo mwohtail ntingdier nan Doctrine and Covenant:

“Kumwail saik wewekihla ia uwen laud en kapai me Sahmo ketin Sapwellimaniki nan pein lime kan oh kaunopadahr ong kumwail;

“Oh kumwail sohte kak wahda soahng koaros ansouet; ahpw, kitail en ahniki peren, pwe I pahn kahluwaikumwail. Wehio iei amwail oh kapai koaros amwail, oh kapai koaros en mour soutuk iei amwail.

Oh me kin alehdi soahng koaros ni kaping kalahngan pahn ndandla; oh soahng koaros pohn sampah pahn kapatapatohng, pahn kak en welwel epwiki, ei, tohtohsang.⁷

I kehnehr wekila kan en diralahn kaping kalahngan ong kapai kan oh limpoak en Koht me wie tohtohla nan Mwomwohdiso wet. E mwomwen tang mwadang nan pwungen towe kan en Mwomwohdiso ni ansou kan oh wasa kan me mie kahpwal akan en arail pwoson, wasa re pahn peki rehn Koht sawas pwe ren kak peusehla arail mour.

Ansou kan me kitail pahn weidla loale pahn mie kasongsong kan me inenen apwal, ni duwen me wiawihongehr nein Alma aramas akan me mihla pahn manaman en Amulon mwersuwedo, me kihong pohrail kapwunod kan me irail sohla kakehng wahda:

“Oh e ahpw wiawiher me kepitien Kauno peidohng irail nan arail apwal akan, masanih: Kumwail sarada oh nsenamwahula, pwe I esehier inou kan me irail wiahiongiehier; oh I pahn inoukhieng nei aramas akan oh wairail sang nan arail kahpwal akan.

“Oh I pahn pil kihsang katoutou kan me kataur kumwailahr, me kumwail pahn sohte kak pehm wesik toutou pwukat, pil ni ansou me kumwail mih nan katoutou, oh I pahn wia met pwe kumwail en wiahla soun kadede kei, oh kumwail en ese ni mehlel me Ngehi, Kauno Koht, kin ketin pwarek nei aramas akan nan arail kahpwal akan.

“Oh e wiawiher me kotoutou kan me kohiengehr pohn Alma oh rie ko mararadahr; ei,Kauno ketin kakehlailihrailda pwe irail en kak pitsang arail katoutou kan, oh irail perendahr kouwahlap oh wiadahr soahng koaros me Kauno kupwurki.”⁸

Kumwail oh ngehi wia soun kadedeh kei ansou me kitail kin kolokol atail inou kan rehn Koht, ahpw mehlel ni ansou me e apwal, E kin karonge atail kapakap akan en kapingki dahme E ketin wiahieng kitailehr oh ketin sapengehr atail kapakap ong kakehlail pwe kitail en dadaurete ni pwoson. Oh pak tohtoier E ketin karehiong atail peren oh kehlail.

Kumwail kak medemedewe mwahu dahme kumwail kak wia pwe kumwail en momour oh kaudoak rahn Sarawi wet pwehn kasalehda amwail kaping kalahngan oh kakehlailih pein kumwail oh mehteikan ong kahpwal akan me mihmi mwohmwail.

Kumwail kak tepkihda rahnwet ehu kapakap rir oh kapakap en peneinei en kalahngan kan ong soahng koaros me Koht ketin wiahiongehr kumwail. Kumwail kak kapakap pwe kumwail en esehda dahme Kauno kupwurki kumwail en wia pwe kumwail en papah Ih oh mehteikan. Mehlel, kumwail kak kapakapki Ngehn Sarawi en mansaniheng kumwail emen aramas me nsenswed de mie ah anahn me Kauno kupwurki kumwail en kohla oh tuhwong.

I kak inoukihong kumwail me amwail kapakap akan pahn pasapengla, oh ni amwail doadoahngki pasapeng kan me kumwail pahn alehdi, kumwail pahn diar popohl ni rahn en Sapad, oh mohngiongimwail kan pahn direkihla kaping kalahngan.

I wia ahi kadedeh me Koht Sahm ketin mwahngih oh poakoahng kumwail. Sounkomouro, Kauno Sises Krais, ketin tomwikihla dipamwail kan sang ni eh ketin poakehng kumwail. Ira, Sahmo oh Naho, mwahngih adamwail kan duwehte Ara ketin mwahngih mwaren Soukohp Joseph Smith ni ansou me Ira ketin pwarohngo. I wia ahi kadede me iei Mwomwohdiso en Sises Krais met oh me E pahn ketin wauniki inou kan me kumwail kin oh weliakapwih ong Ih. Amwail mour pahn wekila oh duwehla Sounkomouro. Kumwail pahn silasildihsang kasongosong oh pepehm en peikasalki duwen me mehlelo. Kumwail pahn diar peren nan rahn en Sapad. I inoukihong kumwail ni mwaren Kauno Sises Krais, amen.