Lotofaafetai i le Aso Sapati

Ou uso e ma tuafafine pele o loo i ai i le lalolagi atoa i Le Ekalesia a Iesu Keriso o le Au Paia o Aso e Gata Ai, ua ou faafetai lava ua faatonuina au e Peresitene Thomas S. Monson e lauga i le konafesi i lenei aso Sapati. Ou te tatalo ia molioo atu e le Agaga Paia a’u upu i o outou loto.

O le asō ou te manao ai e talanoa atu e uiga i lagona o le loto. O le lagona o le a ou taulai atu i ai o le lotofaafetai—aemaise lava i le aso Sapati.

Tatou te lotofaafetai mo le tele o mea: o se agalelei mai o se tagata ese, o se meaai pe a tatou fiaaai, o se malutaga i luga o o tatou ulu pe a oo mai ni afā, o se ivi ua gau ua faamaloloina, ma le tagi malosi a se pepe fou faato’a fanau mai. O le toatele o i tatou o le a manatuaina se lagona o le lotofaafetai i taimi faapena.

Mo le Au Paia o Aso e Gata Ai, o le Sapati o se taimi lena, po o le aso tonu lea, o le lotofaafetai ma le alofa. Sa faatonuina e le Alii le Au Paia i le Itumalo o Siakisone, Misuri, i le 1831, e tatau ona tuusa’o atu a latou tatalo ma faafetai i le lagi. Sa tuu atu i le Au Paia anamua se faaaliga e uiga i le auala e tausi ai le aso Sapati ma le auala e anapopogi ai ma tatalo.¹

Ua ta’u mai e le Alii ia i latou, ma i tatou, le auala e tapuai atu ai ma avatu le faafetai i le Sapati. E pei ona outou silafia, o le mea e sili ona taua o le alofa tatou te lagonaina mo ē e foai maia ni meaalofa. O le fetalaiga lenei a le Alii i le auala e avatu ai le faafetai ma le auala e alolofa ai i le Sapati:

“Ou te tuu atu ia te outou se poloaiga, e fai atu: Ia e alofa atu i le Alii lou Atua ma lou loto atoa, ma lou manatu atoa, mafaufau, ma le malosi; ma ia e auauna atu ia te ia i le suafa o Iesu Keriso. …

“Ia e faafetai atu i le Alii lou Atua i mea uma.

“Ia e osi atu se taulaga i le Alii lou Atua i le amiotonu, o se taulaga lava o le loto momomo ma le agaga salamo.”²

Ona faaauau lea o le fetalaiga a le Alii ma lapatai mai e uiga i le le faafetai atu i le Tama Faalelagi ma Iesu Keriso o ē e foaiina mai meaalofa: “Ma ua leai se mea e faatausuai ai le tagata i le Atua, pe ua leai ni isi e faamumu faasaga i ai lona toasa, tau lava o i latou o e latou te lē tautinoina lona aao i mea uma, ma lē usiusitai i ana poloaiga.”³

O le toatele o outou o loo faafofoga mai o loo maua lava le olioli lava i le Sapati o se aso e manatua ai ma avatu le faafetai i le Atua mo faamanuiaga. Tou te manatuaina le pese masani:

Ou te maua ni tusi ma ni asiasiga mai tagata faamaoni o le Au Paia o Aso e Gata Ai o loo lagonaina le mamafatū i avega. O nisi ua latalata atu lava i le lagonaina e faapea, mo i latou lava ia, ua le toe aoga. Ou te faamoemoe ma tatalo o mea ou te ta’u atu e uiga i le lotofaafetai i le Sapati o le a aoga lea e mouese ai masalosaloga ma amata vivii ai o outou loto.

O le tasi faamanuiaga e mafai ona tatou lotofaafetai ai o lo tatou i ai lea iina i le sauniga faamanatuga, ma potopoto faatasi e sili atu ma le toatasi pe toalua o Ona soo i Lona suafa. O loo i ai nisi i le fale ua le mafai ona toe tulai mai o latou moega. O loo i ai nisi o loo fia i ai i le mea o loo tatou i ai ae o loo auauna atu i falema’i ma tuuina atu le saogalemu mo tagata lautele, pe o loo puipuia foi i tatou i le lamatia ai o o latou lava ola i ni toafa po o ni togavao. O le mea moni i le mafai ona tatou potopoto ma le isi tagata e toatasi o le Au Paia ma taumamafa i le faamanatuga, o le a fesoasoani ia i tatou ia lagona ai le lotofaafetai ma le alofa mo le agalelei o le Atua.

Ona o le Perofeta o Iosefa Samita ma le talalelei toefuataiina, o se isi faamanuiaga e mafai ona tatou faitauina o le mauaina lea o le avanoa e taumamafa ai i le faamanatuga i vaiaso taitasi—e saunia, faamanuiaina, ma tufaina e ni auauna faatagaina a le Atua. E mafai ona tatou lotofaafetai pe a faamautu atu e le Agaga Paia ia te oe upu o le tatalo o le faamanatuga, e fofogaina e ni au perisitua faatagaina, ua faamamaluina e lo tatou Tama Faalelagi.

I faamanuiaga uma e mafai ona tatou faitauina, o le faamanuiaga aupito silisili, o le lagonaina o le faamagaloga lea e oo mai pe a tatou aai i le faamanatuga. O le a tatou lagonaina le alofa sili atu ma le talisapaiaina o le Faaola, o le ana le taulaga lemafuatia ua mafai ai ona faamamaina i tatou mai le agasala. A tatou aai ma feinu i le areto ma le vai, tatou te manatuaina na mafatia o Ia mo i tatou. Ma pe a tatou lagonaina le lotofaafetai mo mea ua Ia faia mo i tatou, o le a tatou lagonaina Lona alofa mo i tatou ma lo tatou alolofa mo Ia.

O le faamanuiaga o le alofa tatou te mauaina o le a faafaigofie atili ai mo i tatou ona tausia le poloaiga ia “manatua pea o ia.”⁵ E mafai foi ona e lagonaina le alofa ma le lotofafetai, e pei o au, mo le Agaga Paia, o le ua folafola mai e le Tama Faalelagi o le a faatasi pea ma i tatou pe a tatou tumau faamaoni i feagaiga ua tatou osia. E mafai ona tatou faitauina na faamanuiaga uma i Aso Sa uma ma lagonaina le lotofaafetai.

O le Sapati o se taimi tonu foi lea e manatua ai le feagaiga na tatou osia i le vai o le papatisoga e alofa atu ma auauna atu i fanau a le Tama Faalelagi. O le faataunuuina o lena folafolaga e mafai ona aofia ai le auai i se vasega po o se korama ma le faamoemoe atoa o le loto ina ia mafai ona fausia le faatuatua ma le alofa i va o uso ma tuafafine o loo i ai iina faatasi ma i tatou. O lena folafolaga o le a aofia ai ma le faataunuuina ma le fiafia o o tatou valaauga.

Ou te faafetai mo le tele o Aso Sa na ou faiaoga ai i se korama a tiakono i Bountiful, Iuta, faapea foi ma se vasega o le Aoga Sa i Idaho. Ma ou te manatua foi taimi na ou auauna ai o se fesoasoani i lo’u toalua i le vasega pepe, ma o la’u galuega autu lava o le tufaina atu ma le pikiina i luga o meataalo.

Sa tele ni tausaga ae faatoa ou iloaina e ala i le Agaga o la’u auaunaga faatauvaa mo le Alii sa taua tele i olaga o fanau a le Tama Faalelagi. Sa faate’ia au ona o loo manatua pea e nisi o i latou ma faafetai mai ia te au mo au taumafaiga le atoatoa e auauna atu ia i latou mo le Matai i na aso Sapati.

E pei lava ona masani ai i nisi taimi, le le mafai ona tatou vaaia o taunuuga o a tatou lava auaunaga e tuuina atu i le Sapati, e ono le mafai foi ona tatou vaaia aafiaga faatupulaia o isi auauna a le Alii. Ae o loo fausia e le Alii ma le filemu Lona malo e ala i Ana auauna faamaoni ma faamaulalo, ma sina faailoa faalauaitele e agai atu i lona lumanai mamalu i le meleniuma. E manaomia ai le Agaga Paia ina ia vaaia ai le mamalu faatupulaia.

Sa ou ola ae ma alu i sauniga faamanatuga i se paranesi laitiiti lava i New Jersey faatasi ma ni nai tagata ma le aiga e toatasi, le matou aiga. I le fitusefulu-lima tausaga talu ai, sa papatiso ai au i Philadelphia i le falesa e tasi lava na fausia e le Ekalesia na mafai ona matou o i ai i Penisilevania po o New Jersey. Ae i le mea sa i ai le paranesi laitiiti i Princeton, New Jersey, ua i ai nei ni uarota tetele se lua. Ma i le lua aso talu ai, na faatinoina ai e le faitau afe o tagata talavou se fiafia a o lumanai ai le faapaiaga o le Malumalu o Philadelphia Penisilevania.

A o avea ma se alii talavou, sa valaauina au o se faifeautalai o le itu lea sa matou tapuai ai i Aso Sa i le falesa e tasi i Alebuquerque, Niu Mekisiko. O le asō o loo i ai se malumalu ma siteki e fa.

Sa ou tuua Albuquerque ina ia alu i le a’oga i Cambridge, Massachusetts. Sa na o le tasi le falesa ma se itu na i ai mo le tele o le vaega o Massachusetts ma Rhode Island. Sa ou tietie atu i mauga o lena nuumaotua matagofie e alu ai i sauniga faamanatuga i ni paranesi toalaiti, ole tele lava i ni tamai fale mautotogi po o ni fale o aiga ua toefaafou. O lea la ua i ai nei se malumalu paia a le Atua i Belmont, Massachusetts, ma siteki ua salalau solo i le itumalo.

O le mea sa lei mafai ona manino tele i la’u vaai i lena taimi o le liligiina e le Alii o Lona Agaga i luga o tagata i na tamai sauniga faamanatuga. Sa mafai ona ou lagonaina, ae sa lei mafai ona ou vaaia le faalauteleina ma le taimi o faamoemoega o le Alii e fausia ma faamamalu Lona malo. Sa vaaia e se perofeta e ala i faaaliga, ma faamaumauina mea ua mafai nei ona tatou vaai i ai i tatou lava. Sa fai mai Nifae o le a le maoae lava lo tatou aofai, ae o le malamalama faatupulaia o le a avea ma se vaaiga e vaaia:

“Ma sa oo ina ou vaai atu i le ekalesia a le Tamai Mamoe a le Atua, ma sa toaitiiti ona aofai. …

“Ma sa oo ina aʼu, vaai aʼu o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele.”⁶

I lenei tisipenisione, o se faamatalaga faaperofeta faapenei o lo tatou tulaga ma avanoa i luma atu o loo faamaumauina i le Mataupu Faavae ma Feagaiga:

“Tou te lei malamalama lava i le tetele o faamanuiaga o i ai i le Tamā i ona lava aao ma ua saunia mo outou;

“Ma e lē mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala. O le malo ua ia outou ma o ona faamanuiaga ua ia outou, ma o ʼoa o le faavavau ua ia outou ia.

“Ma o ia o lē e taliaina mea uma ma le faafetai o le a faamamaluina; ma o mea o le lalolagi lenei o le a faaopoopoina ia te ia, i le sautuaselau lava, ioe, e sili atu.”⁷

Ua ou lagonaina lena suiga o le faatupulaia o le lotofaafetai mo faamanuiaga ma se alofa i le Atua ua faateleina i le Ekalesia atoa. E foliga mai ua faatelevaveina i tagata o le Ekalesia i taimi ma nofoaga o loo i ai tofotofoga o lo latou faatuatua, lea e ao ai ona latou aioi atu i le Atua mo se fesoasoani e faaauau ai le malaga.

O le a tatou pasia ni taimi o tofotofoga faigata e pei foi ona sa i ai mo le nuu o Alema i lalo o le taitaiga a Amulona agaleaga, lea na tuuina ni avega i o latou tua sa matua mamafatu mo i latou ona tauaveina:

“Ma sa oo ina oo mai le siufofoga o le Alii ia te i latou i o latou puapuaga, ua fetalai mai: Ina ea ia o outou ulu ma ia faamafanafanaina outou; ona ua Ou iloa le feagaiga na outou faia mai ia te a’u; ma o le a Ou osifeagaiga ma o’u tagata ma laveai i latou mai le pologa.

“Ma o le a Ou faamāmāina foi avega ua tuu i o outou tau’au, e oo ia te outou tou te le lagonaina i latou i luga o o outou tua, a’o outou i ai lava i le pologa; ma o le a Ou faia lenei mea ina ia mafai ona outou tutu e avea o ni molimau mo a’u i le lumanai, ma ina ia mafai ona outou iloa ma le mautinoa o A’u, o le Alii le Atua, e asiasi atu i o’u tagata i o latou puapuaga.

“Ma o lenei sa oo ina faamāmāina avega sa tuu i luga o Alema ma ona uso; ioe, sa faamalosia i latou e le Alii ina ia mafai ona latou tauave ma le faigofie a latou avega, ma sa latou gauaʼi atu ma le fiafia ma le onosai i le finagalo atoa o le Alii.”⁸

O oe ma au o ni molimau i soo se taimi lava tatou te tausia ai a tatou feagaiga a le Alii, aemaise lava pe a faigata, e faafofogaina e Ia a tatou tatalo o le faafetai mo mea ua Ia faia mo i tatou ma tali mai i a tatou tatalo mo le malosi e tumau ai ma le faatuatua. Ua sili atu ma le faatasi ona Ia faafiafiaina i tatou e pei foi ona Ia faamalosia tatou.

Atonu e te tomanatu lelei po o le a se mea e mafai ona e faia e ola ma tapuai ai i lenei lava aso Sapati e faaali atu ai le lotofaafetai ma faamalosia ai oe lava ia ma isi mo tofotofoga o loo i luma atu.

E mafai ona e amata i se tatalo patino ma se tatalo faaleaiga o le faafetai mo mea uma ua faia e le Atua mo oe. E mafai ona e tatalo ia iloa mea e finagalo le Alii e te faia e auauna atu ai ia te Ia ma isi. Aemaise lava, e mafai ona e tatalo ia ta’u atu e le Agaga Paia ia te oe se tagata o loo tuuatoatasi pe o loo mafatia lea e finagalo le Alii e te alu atu i ai.

E mafai ona ou folafola atu o le a taliina au tatalo, ma a e faatino ia tali o le a e mauaina, o le a e maua le olioli i le Sapati ma o le a taumasuasua lou loto i le faafetai.

Ou te molimau atu e silafia ma alofa le Atua le Tama ia te oe. Sa togiolaina e le Faaola, le Alii o Iesu Keriso au agasala, ona o le alofa mo oe. O le Tama ma le Alo, La te silafiaina lou igoa e pei ona La silafiaina le igoa o le Perofeta o Iosefa Samita ina ua La faaali atu ia te ia. Ou te molimau atu o le Ekalesia lenei a Iesu Keriso ma o le a Ia faamamaluina feagaiga ua e osia ma faafouina ma le Atua. O le a suiga lou lava natura ia avea atili ai e faapei o le Faaola. O le a faamalosia oe e tetee atu i faaosoosoga ma tetee atu i lagona o le masalosalo e uiga i le upumoni. O le a e mauaina le olioli i le Sapati. Ou te folafola atu ai ia te outou i le suafa o le Alii o Iesu Keriso, amene.