Medze Asɛmpa no ne Kan no Bɛba Me Fie

Hom mu dodowara dze homho ahyɛ adwenpa na ayamuyie ndzeyɛɛ a woetsim etukɔtsenafo a wɔwɔ hom apaamu hɔn ehyiadze do, dze ayɛ mbuae ama Akyerɛbaa Linda K. Burton ne nsato a ɔtoo no Ebɔbira wiadze mfɛndzanan ehyiadzi mu no.¹ Fitsi ankorankor mbɔdzembɔ kesi sɔn mu nyina nhyehyɛɛ no, dɛm ndzeyɛɛ no ne farbaa nye ɔdɔ. Ber a hom dze hom mber, talent horow na ahodze kyɛ no, hom—na etukɔtsenafo no—akoma enya ahotɔ. Enyidado na gyedzi no na ɔdɔ kɛse mpo ɔkyekyer wɔ nyia ɔma nye nyia ɔgye no hɔn ntamu, a no yɛ nokwar ayamuyie no nsunsuando.

Nkɔnhyɛnyi Moroni kã kyerɛ hɛn dɛ ayamuyie yɛ hɔn a wɔnye Ɔsor Egya bɛtsena celestial ahenman mu no hɔn su tsitsir. Ɔkyerɛw dɛ: “Na gyedɛ hom nya ayamuyie ɔno wonnkotum agye hom nkwa wɔ Nyankopɔn n’ahenman no mu.”²

Nyew, Jesus Christ nye ayamuyie ne fasusu no a odzi mu no. Ɔdze Noho maa dɛ Ɔbɛyɛ hɛn Agyenkwa wɔ abrabɔ ansaana nyimpa reba asaase, Ne nkitahodzi wɔ No asaase do nkwa ber mu, N’akyɛdze kɛse a ɔyɛ Werdambɔ no, na No mbɔdzembɔ daa nyina dɛ Ɔnye hɛn bɛsan aba Ɔsor Egya enyim no, kyɛrɛ ayamuyie mapã. Otsim adze kor do dzi dwuma: Odua No dɔ a Ɔwɔ ma hɛn ankorankor no do, dze kyerɛ No dɔ a Ɔwɔ ma No Sor Egya. Ber a wobisaa No faa mbrasɛm no mu dza ɔsõ kɛse no, Jesus buaa dɛ:

“Dɔ Ewuradze wo Nyankopɔn, wɔ w’akoma nyina mu, nye wo kra nyina mu, nye w’adwen nyina mu.

“Iyi nye mbra no mu asɛm kɛse a odzi kan na ɔsõ.

“Na dza otsĩa ebien no a ɔtse dɛ ɔno nye dɛ, Dɔ wo nyɛnko dɛ wankasa woho.”³

Akwan etsitsir mu kor a yebotum enya na yɛakyerɛ ɔdɔ ama hɛn anyɛnkofo nkaa no nye yɛbɛyɛ ahwɛyie wɔ dza yɛdwen na dza yɛkã ho. Mfe pii a abɛsen kɔ no, nyɛnko dɔfo bi kãa dɛ, “Ayamuyie ne fã kɛse nye dɛ yɛnnkobua binom atsɛn.”⁴ Ɔda ho yɛ nokwar ndɛ.

Ndaansa yi, ber a mfe-ebiasa Alyssa nye no nuanom rohwɛ sene no, ɔdze ahobow kãa dɛ, “Mama, dɛm akokɔ yi noho yɛ hu papa!”

Ne maame hwɛɛ mfonyin no na ɔyerɛɛw n’ano dze buaa dɛ, “Ɔdɔ, ɔno yɛ koohaa.”

Tse dɛ mfe-ebiasa ba a onnyim adze no, ɔtɔfabi a yɛdze hɛn ntseasee a onndzi mu anaa ɔnnsɛ no hwɛ nkaafo. Yebotum etsim wɔ nsonsonee na esintɔ a yehu no wɔ nkorɔfo a woetwa hɛnho ehyia no do, wɔaber a hɛn Ɔsor Egya hu Ne mba a, Ɔbɔɔ hɔn wɔ Ne onnyiewiei su do no, hɔn ndaamba enyimnyam nwanwa no.

Obi kaa dɛ President James E. Faust kãa dɛ, “Me mpanyinyɛ mu no, nna atsɛmbu medze bua nkaafo no rebrɛ adze.” ⁵ Ɔno kaa me dza Ɔsomafo Paul kyerɛkyerɛɛ no:

“Meyɛ abofra no, mekasaa dɛ abofra, metsee adze ase dɛ abofra, modween dɛ abofra, na mebɛyɛɛ [panyin no], medze mbofrasɛm guu nkyɛn.

Na sesei dze yɛnam ahwehwɛ mu hu adze wɔ bɛ mu, na ndaamba dze enyim na enyim: sesei dze minyim fã-na-fã, na ndaamba dze mubohu dɛ mbrɛ woehu mo so.”⁶

Sɛ yehu hɛnara hɛn esintɔ yie a, yɛnnkɛpɛ dɛ yɛbɔhwɛ binom wɔ “bɛ bu mu.” Yɛbɛpɛ dɛ yɛdze asɛmpa ne kan no hwɛ binom dɛ mbrɛ Agyenkwa no yɛ no—yɛdze ayamuhyehye, enyidado, na ayamuyie. Da no reba a yebenya nkaafo hɔn akoma ho ntseasee a odzi mu na ɔbɛyɛ hɛn enyisɔ dɛ wobohu hɛn mbɔbɔr—tse dɛ mbrɛ abrabɔ ber yi mu no, yɛdwen na yɛkã binom ho nsɛmpa no.

Mfe pii abɛsen kɔ no, menye young women kuw bi dze hɛmba faa nsu do. Nna mbrɛ nsutaae n’enyi ayɛ na akoko a no do ndua ayɛ fromfrom etwa ho ehyia, nye afowee abo-abo no ayɛ fɛw dodoodow. Nsu a enyi agyen no gyegyee wɔ ewia no ne kan mu ber a hɛn ntabon no kãa nsu no, a nna ewia epue yie ber yɛkɔnee faa nsutaae tromtrom no do no.

Mbom, annkyɛr na wimu no munae na mframa dzendzen hyɛɛ ase dɛ ɔrobɔ. Ama yeetum aakɔ enyim kakra ara mpo no, nna ɔsɛ dɛ yɛdze hɛn tabon no nu nsu no mu kɔ ase ara yie a, yenngyaa kɔn. Dɔnhwer kakra a yɛyɛɛ ekyirpaa dzen ekyir no, yɛdaanee faa esupruw bi ho wɔ nsutaae kɛse no do, na ɔyɛɛ hɛn ahobow na enyigye dɛ yehun dɛ mframa no robɔ kɔ bea a yɛpɛ dɛ yɛkɔ no.

Ntsɛmara, yɛdze akyɛdze yi dzii dwuma. Yɛtwee tarpauline kakraba bi, na yɛdze n’ano afã ebien kyekyeer ntabon n’ekyir na ebien nkaa no yɛdze kyekyeer mo kun n’anan a ɔtseen mu wɔ hɛmba no enyim. Mframa no bɔɔ hɛn abradaa yɛayɛ no hɔ-na-hɔ ara no, nna hɛn na yɛrekɔ no!

Ber a young women a wɔwɔ hɛmba nkaa mu no hun mbrɛ yɛrokɔ ntsɛm a yɛmmbrɛ no, wɔyɛɛ hɔnara hɔn abradaa hɔ-na-hɔ noara. Enyigye na serew na ahotɔ hyɛɛ hɛn akoma mu, na yenyaa enyisɔ dɛ haw a yɛfaa mu da no abrɛ adze.

Dɛ mbrɛ enyimnyam mframa no botum abɛyɛ ɔboafo nyɛnko nokwarfo no, ɔwofo ne nkyia enyigye mu, onua ne mfua ekyir, anaa dwumayɛnyi adamfo anaa skuulnyi n’ano yerɛw no, ne nyina ma hɛn “mframa pa wɔ hɛn abradaa mu” ber a yɛnye abrabɔ mu ɔhaw ridzi esi! President Thomas S. Monson kãa no dɛ: “Yennkotum aakyerɛ mframa bea ɔmbɔ nkɔ, mbom yebotum adandan hɛn abradaa no.” Ama yeenya enyigye, asomdwee, na enyisɔ mbordo no, yebotum asan mu eyi su pa.”⁷

Nsɛmfua wɔ tum a ɔyɛ nwanwa, dɛ ɔbɛma hɛn ntowdo anaa ɔbɛsɛɛ hɛn. Hɛn nyina yebotum akaa nsɛmfua a wɔkãa dze twuuw hɛn ma ɔmaa hɛn abaw mu gurae na nsɛmfua binom so a wɔdze ɔdɔ kãa ma opegyae hɛn sunsum. Yɛresan mu akã dza oye nko afa—na—yepegya binom na yɛahyɛ hɔn a woetwa hɛnho ehyia no dzen no, boa binom ma wɔfa Agyenkwa no No kwan do.

Mfonyin

“Medze asɛmpa no ne kan no” a ɔawen no bɛba me fie

Ber a meyɛ Primary basiaba no, meyɛɛ edwuma enyiberdo dɛ mebɛpam cross-stitch dze akyerɛw, “Me dze asɛmpa no ne kan no bɛba me fie.” Da kor ewiaber bi ber a hɛn mbasiamba no dze hɛn pandze roduadua tam no mu no, hɛn kyerɛkyerɛnyi kãa hɛn asɛm bi a ɔfa basiaba bi a ɔtse koko do wɔ bɔnsa n’afã do no. Sɛ ewia rokɔtɔ biara a ohu wɔ koko no a ɔwɔ bɔnsa n’afã noho no, dan bi a ɔwɔ sika ntokura, hyɛnhyɛn. Ɔnoara ne fie no yɛ kakraba na hɔ yɛ basabasa, na basiaba n’adaaso nye dɛ ɔbɛtsena dan fɛɛfɛw no a ɔwɔ sika ntokura no mu.

Da kor wɔmaa basiaba no kwan dɛ otwuw ne bike ntwa bɔnsa no. Enyigye mu ara otwuwii ara kɛpeem dɛ odur dan no a ɔwɔ sika ntokura no a mber pii mu n’enyi agye ho no. Mbom ber a osianee fii ne bike do no, ohun dɛ dan no ayɛ amamfo na ɔasɛɛ koraa, mfuw atsentsen efuw no wɔ ne paado, na ntokura no nnyɛ nwanwa biara na no mu ayɛ fĩ. Awerɛhow mu ara, basiaba no danee hwɛɛ ne fie afamu. N’ahobow mu no, ohun fie a ɔrehyerɛn, a ɔwɔ sika ntokura wɔ bɔnsa n’afã no na ntsɛmara na ohun dɛ ɔyɛ ɔnoara ne fie!⁸

Ɔtɔfabi a, yɛtse dɛ basiaba kakraba yi, yɛhwɛ dza binom wɔ anaa mbrɛ wɔyɛ na yenya atsenkã dɛ yɛnnto hɔn. Yetsim wɔ Pinterest anaa Instagram abrabɔ ho anaa yɛma akansi a ɔkɔ do wɔ hɛn skuul anaa edwumayɛbea no daadaa hɛn. Naaso, ber biara a yɛfa mber kumabaa dze “kan (hɛn) nhyira dodow no,”⁹ yɛdze nokwar nhumu hwɛ ndaamba na yehu Nyame Ne papayɛ ma Ne mba nyina.

Dɛ yeedzi mfe 8 anaa 108 no, yebotum yɛdze asɛmpa no ne kan no aba bea hɛnankasa yɛwɔ, sɛ ɔyɛ abantsentsen a ɔwɔ Manhattan o, dan a osi mpuna do, anaa suaba a ɔwɔ Mongolia a. Yebotum esi nkitsi dɛ yɛbɔhwehwɛ papa a ɔwɔ binom mu na wɔ hɛn gyinabew a otwa hɛnho hyia no mu. Young Women nye mpanyimfo kakra a wɔwɔ beebiara no botum akyerɛ ayamuyie ber a wɔsan mu kã nsɛmfua a obepegya awerɛhyɛmu na gyedzi wɔ nkaafo mu.

Elder Jeffrey R. Holland kãa fa aberantsɛba bi a ne tsipɛmfo sii no atwetwe ber a ɔkɔ skuul no. Mfe kakra ekyir no otuii kɔree, ɔkɛkãa nsordaafo ho, onyaa adzesũa, na ɔbɛyɛɛ Asɔrba a ɔbɔ hyew. Onyaa konyimdzi sũahu nwanwa wɔ n’abrabɔ mu wɔ dɛm aber yi mu.

Mfe pii ekyir no ɔsanee baa nankasa no kurow mu. Naaso, nkorɔfo anngye ne kankɔ na no mpontu no annto mu. Hɔn dze, nna ɔda ho yɛ “osimesi” dadaw noara, na dɛmara na wɔdze twuuw no. Ewiei no, nyimpa pa yi wodowee koraa fii no konyimdzi su no a nkyɛ ɔwɔ no, a oenntum ammfa ne talent horow a oetu no mpon nwanwa mu ennhyira hɔn a wɔserew no an wɔpoow no bio no.¹⁰ Ebɛn awerɛhow nkõgu nye yi, a ɔkã ɔnoara nye ne sɔnmufo!

Ɔsomafo Peter kyerɛkyerɛɛ dɛ, “Na ne tsitsir hom mfa ɔdɔ a no mu yɛ dzen ndodɔ homho, osiandɛ dɔ kata bɔn pii do.”¹¹Ɔdɔ a no mu yɛ dzen, n’asekyerɛ nye “hɛn akoma nyina,” a yɛma hɛn werɛ fir binom hɔn mfom na mfintsiwii, kyɛn dɛ yebedzi hɛn yamu anaa yɛbɛkaa hɛnho anaa binom wɔ esintɔ a wɔabɛsen kɔ no.

Ɔyɛ hɛn asɛdze na ndzinoa dɛ yebofua mpontu wɔ obiara mu ber a yɛper dɛ yɛbɛyɛ tse dɛ hɛn Agyenkwa, Jesus Christ yie. Ber a ihu obi a oebenya ntseasee wɔ Jesus Christ No Werdambɔ no mu, na ɔreyɛ n’abrabɔ mu nsesã ampaara no n’enyiwa mu kan no, enyigye bɛn na ɔyɛ! Asɛmpasomafo a woenya enyigye sũahu dɛ wohu obi a wɔasakyer kɔ enuma esu mu na nkyii ɔhɛn temple mbobow mu no, yɛ adasefo ma nhyira ɔwɔ erema binom kwan—na erehyɛ nkuran—ma wɔasesã. Asɔrmba a wɔma hɔn a wɔasakyer no akwaaba no, hɔn a nkyɛ wɔnnsɛ mfata ahenman no mu nyimpa no, nya abodwee ara yie dɛ wɔaboa hɔn ma woenya Ewuradze No dɔ ho atsenkã. Dza ɔyɛ dɛw kɛse wɔ Jesus Christ asɛmpa no ho nye onnyiewiei mpontu no nokwar—wɔmma hɛn kwan nko dɛ yɛnsesã mbɛyɛ nyimpa apapafo, mbom wɔhyɛ hɛn nkuran so, na wɔhyɛ hɛn mpo dɛ yɛnkɔ do nhwehwɛ mpontu na, ewiei no, emudzi.

President Thomas S. Monson tuu fo dɛ: “Akwan ahorow nkitsenkitse pii mu no, hom nyina hyɛ ayamuyie atar. … Nkyɛ yebobua binom atsɛn [anaa] yɛbɛkasa etsĩa [hɛnho] no, wɔma yenya Christ No dɔ mapã no mma hɛn ɔbra sar yi do akwantufo mfɛfo no. Hom mma yenhu dɛ ankorankor biara reyɛ dza obotum ayɛ dze esiw ɔhaw horow a ɔba [hɔn] akwan mu no, na wɔma yɛmbɔ mbɔdzen mboa dɛ mbrɛ yebotum.¹²

Obi a ɔyɛ ayamuyie no, ɔwɔ abotar, ne yamu ye, na no bo dwe. Ayamuyie dzi kan dwen binom ho, ɔyɛ ahobrɛadze, onya ahohyɛdo, ɔhwɛ papa wɔ binom mu, na odzi dɛw wɔ obi ne yieyɛ ho. ¹³

Dɛ yɛyɛ nkyerɛbaa (na enuanom) wɔ Zion no, ana yebesi nkitsi dɛ “hɛn nyina yɛbɔbɔ mu ayɛ edwuma dze ayɛ dza ɔyɛ botoo a nyimpa botum ayɛ, dze akyekye binom hɔn werɛ na yeehyira hɔn wɔ [Agyenkwa no] dzin mu”?¹⁴ Ana yebotum, yɛdze ɔdɔ na enyidado kɛse, aahwɛ na yeefua su pa horow a ɔwɔ binom mu, ber a yɛrema mpontu kwan na yɛrehyɛ nkuran a? Ana yeebotu edzi ehurusi wɔ binom mbɔdzembɔ ho ber a yɛrokɔ do yɛ hɛnankasa hɛn mpontu ho edwuma a?

Nyew, yebotum yɛdze asɛmpa no ne kan no aba hɛn efiefi, skuul, na edwumayɛbea horow sɛ yɛhwehwɛ na yɛkyɛ dza oye fa binom ho na yenntsim dza onndzi mu nnwiei no do a. Enyisɔ na ɔhyɛ m’akoma mu mã ber a modwen nnuho no a hɛn Agyenkwa, Jesus Christ, dze abɔbɔ adze a ɔdze ma hɛn nyina, a mbrɛ ɔtse biara yɛayɛ bɔn wɔ wiadze yi a onndzi mu na ɔtɔfabi a no mu yɛ dzen no.

Megye me dasee dɛ ber a yedzi Ne fasusu a odzi mu do no, yebotum enya ayamuyie akyɛdze a, ɔdze dɛwdzi kɛse bɛbrɛ hɛn wɔ wiadze yi mu na onnyiewiei nkwa anohoba nhyira wɔ hɛn Ɔsor Egya nkyɛn. Wɔ Jesus Christ ne dzin mu, amen