Nga Fah Use Kahlwem ke Pweng Wo nuh Lohm Sihk

In topuk nuh ke solsol lal Sister K. Burton ke toeni luhlahp ke Eprel ah,¹puhs suwos wi tari ke mukwikwi luhngse ac kuhlwacng ke luhngse muhtahl in oruh yohk nuh ke ahkfalye enenuh luhn mwet suc lihllihllac nuh fin acn suwos uh. Mukwikwi inge weacng pac kuhiyowos in kahsruh kais sie mwet, oacyacpac wi lowos ke prokracm in kahsruh ke mura lowos, pa ma sikyak ke luhngse lowos. Ke kowos akacsruhi pacl, talan, ac kahsruh lowos, insiyowos—ac insiyacn mwet lihllihllac an—muhlahlahi. Ahkyohkye finsrak ac luhlahlfongi ac finne luhngse yohk inmahsrlon mwet eis ac mwet sang uh ma sikyak na pwacye ke luhngse muhtahl pwacye uh.

Mwet Pahluh Moroni el fahk nuh sesr lah luhngse muhtahl pa sie atac yohk srihpac emet luhn mwet suc fah muhta yurin Pahpah Lucng ke tohkohsrahi luhn celestial. El suhmuhslah, “Fin wacngihn luhngse muhtahl yuruwos kowos tiac kuh in moliyucklac ke Tohkohsrahi luhn God.”²

Pwacyena, Jisus Kraist pa srihkasrak suwohswohs ke luhngse muhtahl. Olwelah Lal in Mwet Lahngo lasr met liki moul se inge, kuhpahsr Lal ke moul Lal facluh, mwe sang wolacna Lal ke Iwaclah sac, ac kuh kalweniyuck Lal in fohlohkihn kuhtlac nuh yurin Pahpah Lucng pa ohiyac yohk emet ke luhngse muhtahl. Mukwikwi Lal uh lohacng yohk nuh ke ma se: luhngse nuh sin Pahpah Tuhmwacl ahkkahlwemyeyuck ke luhngse Lal nuh sesr kais sie. Ke siyuckyuck ke masap yohk se emet ah, Jisus El topuk:

“Kom fah lungse Leum God lom ke insiom kewa, ke ngumun kewa, ac ke ku lom kewa.

“Pa inge ma sap se ma yohk oemeet ac yohk srihpac oemeet.

“Ma sap se akluo yohk sripa oapana ma se meet an: ‘Kom fah lungse mwet tulan lom oana kom lungse kom sifacna.”³

Sie sin inkacnek yohk srihpac emet kuht kuh in ahkyohkye ac ahkkahlwemye luhngse nuh sin mwet tuhlan lasr pa in kuhlwacng ke nuhnak ac kahs lasr uh. Yac ekahsr somlah ah, kawuck se nga luhngse uh el fahk, “Atac wo emet ke luhngse muhtahl kuh in pa tiac nuhnuhnkuh mwet.”⁴Ma ingacn pwacye ne mihsenge.

Tuhfahna, ke Alyssa suc yac tolu el liye sie petsac wi tuhlihk wiyacl ah, el oraclah muhtahl fohsack ac fahk, “Ninac, siena atacn won se ngi!”

Ninac kiyacl ah ngwet nuh ke screen sac ac topuk ke sie isracsr, “Uhni, won peacock se pa ngi.”

Oacna tuhlihk yac tolu nuhkanlah sac, kuht kuhtuh pacl uh liye mwet sahyac uh ke etuh suhfal kuh tahfonglac. Kuht kuh in lohacng yohk nuh ke ma siena uh ac liye ma suhfal ke mwet raunikuhtlac tuhsruhk Pahpah tuhmasr Lucng El liye tuhlihk Nahtuhl, oracloslac oacna luhmahl, ke kuh usrnguck ac wolacna.

Mwet se tuh esam Prestuhn James E. Faust el fahk, “Ke nga mahtohoh uh, srihkeni ohiyacn nuhnuhnkuh mwet luhk uh.”⁵Ma ingacn ahkacsmakihnyeyuc ke luti lal Mwet Sap Paul ah:

“Ke nga tulik, nga kaskas oana tulik, etu luk oana etu lun tulik, ac nga nunku oana tulik; a inge ke nga mwet matu, nga sisla ouiya lun tulik.

“Oana ke kut ngetang nu ke sie selngun ohk; a tok kut fah ngetani sie sin sie. Inge nga etu tafu na; na tok ac fah fonla etu luk—oana ke God El arulana eteyu.”⁶

Ke kuht kahlwemi in liye sesuwohs lasr sifacna uh, kuht tiac arulacna ke liye mwet sahyac uh “ke sie selnguhn ohk.” Kuht ac kena in orekmakihn kahlwem ke pweng wo in liye mwet sahyac uh oacna Mwet Lahngo El oruh—ke luhngse, finsrak, ac luhngse muhtahl. Lwen se ac tuhkuh ke kuht fah eis sie etuh kahlwem ke insiyacn mwet sahyac uh ac fah tarilacna in utuckuh nuh sesr pahkomuhta—oacna ke kuht tahfwelah nuhnak ac kahs kuhlwacng nuh sin mwet sahyac ke moul se inge.

Yac ekahsr somlah ah, nga wi sie un muhtwacn fuhsr kalkal. Inluhluh folfol loal uh raunikuhtlac ke inging folfolsra, mahtol ac ohl yotyot uh kahto na pwacye. Kof uh sahromrom ke oac lasr uh ke kuht isongyac nuh ke kof nwacsnwacs uh, ac faht uh sahromrom fucsrfucsr ke kuht mukwi fwel fin inluhluh sac.

Tuhsruhktuh, puhkuhnyeng uh lohsrlah, ac sie eng fokoko muhtwacwacack in ukuk. In kuh in oruh finne kihtinmac in mukwi nuh met, kuht enenuh in isongyac loal oac uh nuh inkof uh, kal ke tiac tui inmahsrlon mukwi uh. Tukun ao ullac ekahsr ke orekma upac, kuht sahflah sun ipin acn se ke inluhluh na yohk sac, ac lut in sokwack ac enganwack lah eng uh ukuk nuh ke acn kuht kena som nuh we uh.

Sana, kuht eis mwe sang se inge nuh ke ma wo lasr. Kuht ollah sie rapa srihsrihk ac kapriyac sroasrihk kac an nuh ke poun oac an ac sroasrihk sahyac an nuh ke niyacn mukul tuhmuhk ah, ma el ahsroelah fin sisken oak an. Eng uh uk sifacna kal uh, ac kuht kahsruhsr fwel!

Ke muhtwacn fuhsr ke oak sahyac uh liye ohiyacn kal lasr ke kof uh fihsrwacsr, elos silahklahk sang in sifacna kal ma ukwaclos uh. Kuht puhla engan ac isracsr ke tarilacna, kulohkihn ke monglac liki ma upac ke lwen sac.

Eng na wowo sac kuh in oacna fahk wowo luhn sie kawuck, pwacngwack engan luhn sie pahpah ninac, insese luhn sie tuhlihk wiyac, kuh isrwacsr kahsrwelah luhn sie mwet wi kom orekma kuh lutlut, mwet nuh kwewa sang puhla ke kahsruh oacna eng sasuc ke oak ukwacsr an oruh ke kuht lain ma upac ke moul uh! Prestuhn Thomas S. Monson el fahk ohinge: “Kuht tiac kuh in kol eng uh, tushruhk kuht kuh in furok kahsruhsr la uh. Nuh ke engan, mihs, ac fal yohk lowos, lwelah kuht in sulaclah sie atac wowo.”⁷

Kahs uh oasr kuh na lut kac, kwewana in muhsaheack ac in ahkkolukyelah. Kuht nohfohn sahp kuh in esam kahs suhfal ma ahkkolukye kuht ac kahs sahyac ma sruhmuhnyuck ke luhngse ma ahkkweye nguhnasr. Sulaclah in fahk muhkwena ma wo ke—ac nuh sin—mwet sahyac in sruhk ac ahkkweye mwet raunikuhtlac uh ac kahsruh mwet sahyac uh in ukwe inkacnek luhn Mwet Lahngo.

Petsac

Kahs tuhtwacni ke “Nga fah use kahlwem ke pweng wo nuh lohm sihk”

Ke nga sie tuhlihk muhtwacn Primary fuhsr ah, nga orekma oaru in twacni kahs fihsrwacsr ma riti, “Nga fah use kahlwem ke pweng wo nuh lohm sihk.” Sie ekuhn lwen in orekma ke kuht ul ninucl nahtuhsr uh lucng ac ten ke nuknuk uh, mwet luti lasr ah sruhmuhn nuh sesr ke sie tuhlihk muhtwacn suc muhta fin soko ohl ke infahlfahl se sahyac ah. Kais sie ekuh nuh kwewa el akihlen fin ohl soko lwacyacn sahyacn infahlfahl sac sie lohm ma oasr winto na sahromrom ac kol. Lohm sel sifacna an srihk ac luhman mah, ac tuhlihk muhtwacn sacn mwemwei in muhta ke lohm kahto ke winto kol an.

Sie lwen ah tuhlihk muhtwacn sacn ituckyang suwohs lal in pwacskuhl ahluhkwelah infahlfahl sac. El silahklahk in kahsruhsr nuh ke el sun sie lohm ma oasr winto kol se ma el luhngse ke pacl loes. Tuhsruhk ke el srolah liki pwacskuhl ukwacl an, el liye lah lohm sac muhkwena oan ac mahi, ke mah loeloes ke lihkihnihm an ac winto an ohklah ac fohkfohk. Ke ahsor, tuhlihk muhtwacn sacn forlah fohlohk nuh lohm sel ah. Nuh ke lut lal, el liye sie lohm ma winto an sahromrom, kol fin ohl sac siskacn infahlfahl sac ac tok akihlacnack lah pa lohm sel sifacna an!⁸

Kuhtuh pacl uh, oacna tuhlihk muhtwacn fuhsr se inge, kuht liye ma mwet sahyac uh liye kuh oacna ac puhla lah kuht srihklac in kapsreyuck. Kuht ac yohkna lohacng ke ohiyacn Pinterest kuh Instagram ke moul uh kuh lohsrlah ke lutlut lasr kuh aorekmai ke acn orekma uh. Tuhsruhktuh, ke kuht eis kihtin pacl in “wek mwe insewowo pucspucs [lasr] uh,”⁹kuht liye ke sie liye na pwacye ac akihlen ma wo luhn God nuh sin tuhlihk nuh kwewa Nahtuhl uh.

Finne kuht yac 8 kuh 108, kuht kuh in us kahlwem luhn wosasuc nuh ke acn kuht oasr we uh, finne apartment fuhlwact fin acn Manhattan, kuh lohm fin pahmpu fin acn Malaysia, kuh sie lohm nes Mongolia. Kuht kuh in sulaclah in liye ma wo ke mwet sahyac ke ohiyac raunikuhtlac uh. Muhtwacn fuhsr kuh mahtuh acn nuh kwewa kuh in ahkkahlwemye luhngse muhtahl ke elos sulaclah in orekmakihn kahs ma muhsahi puhlaik ac luhlahlfongi ke mwet sahyac.

Elder Jeffrey R. Holland el sruhmuhn ke sie mukul fuhsr suc ahksruhksruhkyeyuck sin mwet weluhl ke yac in lutlut lal ah. Kuhtuh yac tohkoh, el som nuh sahyac, welah military, eis sie lutlut, ac eklac fokokoi ke Alu uh. Pacl se inge ke moul lal uh nwacnwaclah ke ohiyac wolacna oreklac wo.

Tukun yac pucspucs, el fohlohklac nuh lohm sel ah. Tuhsruhktuh, mwet we ah sruhnga in akihlen kapkapwack ac oraclah wo lal. Nuh selos, el srwackna mwet sac pacna, ac elos oracl oacna ingacn. Pacl na sa, mukul wowo se inge apkuhran in wacngihnlac nohfohn oraclah wowo lal ah ac tiac kuh in orekmakihn talan oasr lal an in ahkinsewowoye mwet suc sifilpac isrucnucl ac sruhngwacl ah.¹⁰Mwe pahkomuhta, kwewana nuh sel ac mura sacn!

Mwet Sap Peter el luti, “Yohk liki na nukewa, kowos in lungse sie sin sie ke inse pwaye, mweyen elos su lungse elos akola pacl nukewa in nunak munas ke ma koluk mwet uh oru nu selos.”¹¹Insacneacng luhngse muhtah uh, kalmac pa “suwohs na pwacye,” ahkkahlwemyeyuck ke muhlkuhnlah ma tahfonglac ac suhfal luhn mwet sahyac likina in sruhnga na mwet kuh ahkacsmakihnye kuht sifacna kuh mwet sahyac ke ma sesuwohs somlah ah.

Ma kunacsr ac pacl wowo lasr uh pa in eis oraclah wowo ke mwet nuh kwewa ke kuht kampare in eklac oacna Mwet Lahngo lasr, Jisus Kraist. Ma na engan se in liye engan ke muhtuhn mwet suc kahlwemi ke Iwaclah luhn Jisus Kraist ac pa oraclah eklac pwacye ke moul lalos uh! Misineri suc puhlakihn engan ke liye sie mwet eklac som nuh ke kof in pacptais uh ac na utyak nuh ke sruhnguhl luhn tempuhl pa mwe lohoh ke mwe insewowo ma lwelah—ac tahpuhk—sie sin sie in eklac. Mempucr suc pain mwet eklac suc motkeyuck muh tiac kuh in oacna elos nuh ke tohkohsrahi uh sokwack engan yohk in kahsrwelos puhla luhngse luhn Leum. Ma wo yohk ke wosasuc luhn Jisus Kraist pa ma pwacye ke oraclah wo ma pahtpaht—kuht tiac lwelah muhkwena in eklac wo liki met ah tuhsruhk oacyacpac ahkkweyeyuck, ac finne sapkihnyuck, in kalweni in kwacfweacng nuh ke ahkwoye ac, sahflahiyac uh, suwohswohs.

Prestuhn Thomas S. Monson el fahk: “Ke inkacnek puhs siofok, kowos nuh kwewa ahkkahlwemye luhngse muhtahl. … Likina in nuhnuhnkuh [kuh] ahkkolukye [sie] sin sie, kuht enenuh in puhla luhngse nwacsnwacs luhn Kraist, nuh sin mwet wiyacsr ke fuhfahsryucsr ke moul se inge. Lwelah kuht in akihlen lah kais sie oruh kuhiyaclos in kuhtanglah ma upac ma tuhkuh nuh inkacnek luhn [kais sie], ac lwelah kuht in kampare in oruh kuhiyacsr in kahsruh.”¹²

Mwet suc oasr luhngse muhtahl la uh, pa mongfihsracsr, kuhlwacng, ac engan. Luhngse muhtahl uh sang mwet sahyac uh emet, pa puhsisacl, ahkyohkye sifac liyacacng, liye wo luhn mwet sahyac uh, ac engan ke mwet sahyac uh oraclah wo.¹³

In tahmtahel (ac tamuhlwel) fin acn Saion, yac kuht fah olwelah in “nohfohn tuhkweni orekma … in oruh oacna sie ma fihsrwacsr ac wo, in ahkkweye ac ahkinsewowoye inen [Mwet Lahngo]”?¹⁴Yac kuht kuh, ke luhngse ac finsrak yohk, in suk ac ahkkweye ohiyac wo luhn mwet sahyac, lwelah ac tahpuhk oraclah wo uh? Yac kuht kuh in engankihn oraclah wo luhn mwet sahyac ke kalweni in orekma nuh ke oraclah wowo lasr sifacna?

Ahok, kuht kuh in us kahlwem nuh ke wosasuc uh nuh in lohm sesr, lohm lutlut, ac acn orekma lasr uh fin kuht suk ac akacsruhi ma wowo ke mwet sahyac uh ac tiac lohacng nuh ke ma suhfal uh. Insiyuck sesseslah ke tarilacna ke nga nuhnkuh ke auliyak ma Mwet Lahngo lasr, Jisus Kraist, El oraclah kuh nuh sesr nohfohn suc enenuh in oruh ma koluk ke facluh suhfal ac kuhtuh pacl upac se inge!

Nga fahkwack luhlahlfongi luhk lah ke kuht ukwe srihkasrak suwohs Lal uh, kuht kuh in eis mwe sang luhn luhngse muhtahl, ma ac use nuh sesr engan yohk ke moul se inge ac mwe insewowo uliyucklac ke moul ma pahtpaht yurin Pahpah tuhmasr Lucng. Ke inen Jisus Kraist, amen.