Ak Mo Nguu sel Llomes e ra Ebangkelio el me er a Blik
Ng sebeched el nguu a llomes er a ebangkelio el mera elsel a blid, skuul, ma urrered alsekum me kede osiik a techall e ouchais a ungil tekoi el kirir a rechad.
Ngokiu a ongit el mla er a Sister Linda K. Burton er a klou longdibel,1 e ra Ongeua el buil, e te betok er kemiu a uluureor lokiu a bekokeuii me a ulekerreu el lomeruul er a beltik el reng el kirel a usbechir tirkel iliis el ngara ikel basio er kemiu. A ikal lomeruul a uldimukl a blak el reng el mulbang e lolengeseu er a re derta el chad, e dirrek e lolengeseu a prokram, e aikal lomeruul a redechel a beltik el reng er kemiu. Sera omodars a temiu, me a duch, me a klokliu, e ng rengmiu me a rengrir —tirkal iliis —el mlo kebekakl. Sel lukurulel omelatk me a klaumerang me a lmuut el tmolech el beltik el reng er a delongelir a re mesiou me a siungel a diak el mochib el rolel a meral beltik el reng.
A profet Moroni a melekoi er kid el kmo a tmolech el beltik el reng a klou el teletelir tirkel mo kiei lobengkel a Demad er a Babeluades er sel ngarbab el dauch er a renged. Ng meluches, “Alsekum meng diak a tmolech el beltik el reng er kau e ng diak el sebechem el me kiei er a rengedel a Dios.”2
Ng uaisei, a Jesus Kristo a melmalt el lokesiul a beltik el reng. Sel blak el reng lulebang er a uchelel el mo Osebeled, e mle bekebuai a klengar er Ngii, sel chedaol sengk er Ngii er a Tngakireng, e dirrek lolemolem el lolengeseu er kid lobekid el lmuut el mo er a Demad er a Babeluades a ikang a kot el ngarbab lolechotel a beltik el reng. Ng ouedekil el di imong a moktek: beltik el reng el mo er a Demal e lokiu sel beltkil a rengul el me rekid. Sera loker el kmo ngera sel kot el ngarbab el llach, e a Jesus a ulenger el kmo:
“Bol betik a rengum e ra Rubak el Dios er kau loba rengum el rokir, me a delbengem, me a uldesuem el rokir.”
“Tiang a kot e klou el llach.
“E a ongerung el longingil, Bol betik a rengum er a kmeed er kau el di ua sel kau a betik a rengum er kau.”3
A tara kot el bedochel el rael e ng sebeched e lomekdubech e ocholt a beltik el reng el mo er a re kmeed er kid a okiu sel de bokokeuii er a ikel domdasu me a tekinged. Sesei el rrak e ra memong, e a betik e ra renguk el sechelik a milekoi el kmo, “Sel kot el ngarbab el lolechotel a beltik el reng a sel lak ke domecheliu er a chad.”4 Tiang a kmal dirrek el klemerang er chelechal sils.
Ngidelisb, e a edei a rekil el Alyssa a omes a katsudo ngii me a rebebil er ngii, e ng melekoi el kora rau a rengul, “Edei, ngkel malk a kora ngodech!”
A delal a ulemes er tial katsudo e dula el kmo el klikmechur, “Rungalk, ngke peacock.”
El di ua ngkel luriid er a tekoi el ledei a rekil, e kid a bebil er a taem e ke de omes er a rebebil e loba tedobech malechub e ng ngesonges a klaudengei er kid. Ke de omtutk a klekakerous me a osenged e ra ngesengesir tirkel ngar bita er kid e a kuk Demad er a Babeluades omes er a rengelekel, lulbeob el di uai Ngii, e lolab a uldingerongel e klebkall el klisiich.
A President James E. Faust a dodengelii el dilu el kmo, “Erengel a taem me kurael el mo uodel, e ak mengai el mo diak kulais.”5 Ak mo lotkii a utebengel a Apostol Paul:
“Sera ak ngalek, e ak milngedecheduch el ko er a ngalek, e ak kulemdasu el ua ngalek: e ng di kurael el [klungang], e ak iroid a teletelir a rengalek.
“Le chelechang e ke de omes er a elsel a klas, el diak desekid; e ng di sel de chachebangel: e ak mecha mesang a telkib; e ng di se ikid e ak mocha medengei el kmo ngak a techang.”6
Sel deues a kuk ngesonges er kid el moungil, e ng diak desa el lomes er a rebebil e lokiu “a klas, e lak desekid.” Ng soad e lousbech er sel llomes e ra ebangkelio e lomes er a rebebil el di ua Osobel—e loba klubechub, omelatk, me a beltik el reng. Sel sils a mei el mor ngii a ungil el klaudengei er a delongelir a rechad e oureng a soal er a klubechub el mlodars el mei er kid—el di uai sel doldars a omeletked me a tekoi el mo er a rebebil er chelechal klengar.
Kesai el rrak e ra memong, e ak mlo meiius lobengterir a cheldebechel er a re mekerei el dil. Tial klou el lomelemau el lomeuachel lileuekl e ra chemadech el ked e lomelekulk el loreomel me a risois a meral luldingerongel a klebekelel. Tial mechelins el ralm er tial lomeuachel a melidiich e ra kerdel a sils sel ki moiius e ra elsel, e a sils a melidiich el mekekeald sel ki morael el mekekokemam er bebul tial lomeuachel.
E ng di, ng mle telkib e a chetau a odelkelkii a iabed e a mesisich el iolt a mocha melokeu. Mal sekum e ng kirel omerael el bedul luchei er a di kedeb el lomerael, e ng kirel oisemam el ngmelt el mo tmolech er a elsel a ralm el meiius e loba klou el klisiich, e meiius el diak ki molnguul. Uriul er a kesai el sikang er a meringl el de mudach er ngii e lureor, e aki mocha mesa bkul a beluu el ngar tial lomeuachel, e melchesuar e mechas a rengmam el dmeu a rengmam el kmo tial iolt a melokeu el kirel a basio el somam el mo rengii.
Ki orechedang, el mocha ousbech er ngii el iolt. Me ki motebedii a kekerei el tento, el mechet a bkul e ra uchul oiius me a ikel bebil er a bkul a ochil a bechik, e le temetii er a bkul tial mlai er a bul. Ma iolt e lolokeu er tial iars, me a ki bocha omekall el bekeruret!
Me tirkal ngeasek el redil el ngara ikel bebil er a mlai er a lomes er kemam el kmal lungil lomekall, e te orechedang el mocha meruul a iars er tir. Ng mlo klou a doreuakl el lungil a rengmam, dmeu a rengmam el mlo duosob er tial meringel e lomeiius.
El ua sel klebokel el yolt me blo lungil otengau a sechelim, dmeu a rengul mesekau a chad e ra blim, osengel a ta er kau el kongei er a ungil tekoi el mrirellii, malechub e ng klikm er a chad e ra urrerem malechub kom dmak el ngara skuul el ngilsukau, ng rokui el meskid sel reng el de dosob er ngii el di uai sel iolt el dilokeu a iarsam sel bode chebangel a ongarem e ra klechad! A President Thomas S. Monson a dilii tial losisechakl el ua tiang: “Ng diak el sebeched el torebengii a yolt, e ng di ng sebeched el metebechel a iersed. A mo mui el deurreng, budech, me a diul a reng, a sel dolilt e ra melmalt el blekeradel.”7
A tekoi a ngar ngii a ngodech el klisichel, el smisichid e oitechetud. Ke de di medengei el rokui a mekngit el tekoi el silchedid me a bebil er a tekoi el mildung lokiu a beltik el reng el tilkakll a rengud. Ke de melilt el melekoi a ungil el kirel—ea—rebebil a ngosuterir e melisiich er tirkel iuekel er kid e olngeseu er a rebebil el mo oltirakl er a rolel a Osobel.
Sera ak kekerei el ngalek er a Primary, e ak mle blak a renguk el merasem er a beot el tekoi el kmo, “Ngak a mo nguu a llomes er a ebangkelio el me er a elsel a blik.” A tara suelb, me a kemam el redil ki morasem a ikal mamde, e a sensei er kemam a ouchais e ra cheldechedechal a ngalek el redil el kiliei er a bebul a ked el mo bedul a beluu. A bekl el suelb, e ng mesang er a bebul a ked el kuk ngara bitang er tial beluu el ngar ngii a mengeldoich el kolt el mado er ngii. E a blil a kekerei e kora mechetong, e ngikal ngalk a di ombeberous e leko kiei er a elsel sel klebokel el blai el kolt a mado er ngii.
A tara klebesei e ngikal ngalek el redil a le kilngei er ngii meng mlo sebechel el ngara rat er ngii el mo er a bita el beluu. Ng kmal mle semeriar el melolk el mocha er tial blai el kolt a mado er ngii el sal kmal mle chemat er ngii el meketeket el taem. E ng di tia er a le betengel er a rat er ngii, e ng milsa a blai el diak a chad er ngii e teruud, e mekemangt a udel er ngii ra mekesokes e a mado a di cheleluut e idokel. Meng mekngitei a rengul ngikal dil e ulebult el bedul a blil. E kilebetiekl, e mesa a blai el mengecheldoich, el kolt a mado er ngii er a bebul a ked er a kuk bitang er tial beluu, e mo melchesuar el kmong blil!8
A bebil er a taem, el ua ngikal kekerei el dil, e kede omes e ra tekoi el bebil er a rechad olab, malechub e te ua techang, e melchesuar el kmo ke dolngesonges sel domekesiu er kid er tir. Me ke de mocha kelkall er a klengar er a rechad el lolecholt e ra telebision malechub e ke de mla mo kelkall e ra tekoi er a skuul malechub e ng ngurered el mo imis el di kirel a klausichai. E ng di, sel de bode chelelakl e “domechur a betok el klengeltengat el merkid,”9 e ke de mo klebechel osenged e mo medengelii a klungiolel a rengul a Dios el mo er a rokui el Ngelekel.
Ma blo de eiai malechub e ng dart me a eiai a rekid, ng sebeched el nguu a llomes er a ebangkelio el mo er a ikel de ngar ngii, a le blo le metongakl el blai er a Manhattan, ng blai el mekemangt a tengal er a Malaysia, malechub e ng tento el eldoil er a budel a charem er a Mongolia. Ng sebeched el melilt el lomes a ikel lungil er a rebebil ma ikel tekoi el meliuekl er kid. A re mekerei me a re meklou el redil er a ngi dil ker a sebechir e lochotii a beltik el reng sel lolilt e lousbech a tekoi el mebii a ulserechakl el reng me a klaumerang e ra rebebil er a rechad.
A Elder Jeffrey R. Holland a uluuchais er a cheldechedechal a kekerei el chad el mle blil a ulekakeu er a re sechelil er a taem el ngara skuul. Kesai el rrak ruriul, e ng mlo cheroid, mlo soldau, ngiluu a skulel, e mlo mesisiich e ra Ikelesia. Tial taem e ra klengar er ngii a mle mui er a ungil el blekeradel.
Kesai el rrak ruriul, e ng liluut el mo remei. E ng di, a rechad a dimlak el sorir el mesa el mla mo ultebechel e ungil. Te ullemes er ngii el direke uai ngii, e di milemolm a blekerdelir el mo rengii. Lorael a taem el mong, e ngikal lungil chad a kileed e ng ngobedobed e ra ikel rokui el tekoi el luleketek e dimlak el bol sebechel e lousbech a ikel le tilketek el sengk er ngii me lomekngeltengat er tirkel luetang el mo omtelub er ngii e uletngakl er ngii.10 Ng klou el chelbuul, el mlo rengii me a tial beluu!
A Apostol Petrus a ulsisechakl, “Ngarbab er a rokui el tekoi a moba mesisiich el beltik el reng er a delongeliu: le beltik el reng a ngebetel a betok el klengit.”11 A mesisiich el beltik el reng, el belkul a “cherungel el reng” a ulecholt ersel dobes a ikel chelebirukel me a telmelel a ta er a chad er a bai dolemolem el kesib a rengud malechub e ngomeletked e omeklatk er a rebebil er a telemall er a mla memong.
A ngercheled me a lemelted a ngara rengud el mes a ikel lungil er a re bek el chad e melasem el mo ua Osebeled, er a Jesus Kristo. Ng smiich a rengud, el mesa deureng er a osengel a chad el mla mo medengelii sel Tngakireng er a Jesus Kristo e mengetmokl el melodech e ra klengar ngii! A re missionariis e mla mesa sel blekeradel er a deureng el ngkel lulebult el mlo metecholb e mocha soiiseb e ra templo me te sioning e ra ikel klengeltengat e ra techall—el melisiich—er a rebebil me lobult. A rechad er a ikelesia e loutkeu er a rulebult el dulmdedenger er tir el mo chemau a Dios a mo ungil a rengrir el lolngeseu er tir el mo melchesuar er a beltik el reng er a Rubak. Sel klou el klebekelel a ebangkelio er a Jesus Kristo sel lulecholt el lomerael el diak a ullebengelel—kid a diak el dil kengei me dobult me bo dungil ke de morimel, e dirrek el modurech, el melmolem el losiik a rael el ngoriakl e, merael mo cherungel.
A President Thomas S. Monson olsisechakl el kmo: “Ngokiu a dart el mekerei el rolel, e kemiu el rokui a olecholt er a beltik el reng. … Ra bai di momecheliu [malechub] e ke doltengel a daob er a [tang ma tang], e bo dolchesuar ersel klikiid el beltik el reng er a Kristo el kirir a rebebil er kid el meleuaoch er tial lomerael er a elsel a klengar. Mei me domes el kmo a derta el chad a meruul e ra ngerchelel ersel bkul rebab el sebechel el chelbangel a ongarem el bol chebangel, e kid bo dolasem el mo er a ikel bkul rebab el sebeched el ngosuterir.”12
A beltik el reng, ersel meral lemeltel, a klou a rengul, chubechub, e ultebechel. A beltik el reng a nguu a tang el mo ruchei, e ngariou a rengul, ulsemuul er a ultebechel reng, omes a ungil er a rebebil, e tmeu a rengul sel bo lungil a tang.13
Me ke de rodos (e rodam) er a Zion, ng sebeched el kongei el “rokui el dmak e loureor … el mo kutmokl a ngi dil tekoi el delmedemk e klebechel, e choieng e omekngeltengat loba ngklel [Osobel] ”?14 Ng sebeched, loba beltik el reng me a klou lomelatk, losiik e mengeluoleu a ikel lungil blekerdelir a rebebil, e kongei, el melisiich a klungiolir? Ng sebeched el loldeu a rengud er a ikel le ngeriakl er ngii a rebebil e melemolem e loureor el kirel a kuk moungil el kired?
Oi, ngsebeched el nguu sel llomes e ra ebangkelio el me er a elsel a blid, skuled, me a urered alsekum ke de osiik e kerrous e ungil tekoi el kirir a rebebil e bo bechei a ikel mechitechut er ngii mel riid. Ng meral mo dmeu a renguk sel kumdasu ersel ouchel reng el Losebeled er a, Jesus Kristo, a kiltmeklii el me rekid el rokui el di mla ruebet e ra klengit er tial meringel e chetiteuokel el beluulechad!
A kudersii el sioning el kmo sel doltirakl ersel lokesiul, e ng sebeched el nguu sel sengk e ra beltik el reng, el mo meskid a klou el deurreng er tial klengar me sel klengeltengat el telbiil er a diak a ullebengelel klengar lobengkel a Demad er a Babeluades. Loba ngklel a Jesus Kristo, amen.