I Pahn Wahdo Marain en Rongamwahuo nan Imwei

Tohto kumwail mwekidki en Sister Linda K. Burtin kaweid en nan Kapokon Lap en April samwalahro,¹ ni amwail patehngehr ni kadek sapan oh wiewiahn kadek ni limpoak en apwaliala anahn akan en me tangasang nan arail wehi kan oh mih ni amwail wasa kan. Sang ni amwail kin ehupenehn doadoahk ong prokrahm en minimin en kousapw kan, wiewia pwuko iei lupwen limpoak. Ni amwail kin ehuki amwail ahnsou, koahiek, oh mehn sawas akan, mohngiongomwail oh pil mohngiongerail kin mararahda. Kakehlada koapworopwor oh pwoson oh lalaudlahn limpoak nanpwungen aramas me lupwen limpoak mehlel.

Soukohp Moronahi padahkiong kitail me limpoak mehlel uhdahn wiewia kesempwal ong me pahn kousoanla rehn Samatail Nanleng nan Wein Selestel. E ntingiada, “Ma ke sohte ahneki limpoak mehlel ke sohte kak iang kamourla nan wein Koht.”²

Apw uhdahn, Sises Krais me keieu karasaras mwahu duwen limpoak mehlel. Sapwellime ngoang en wia atail Sounkomour, Sapwellime wiewiahkan ni Eh ketiket pohn sampah, Sapwellime kisakis sarawi en Tomw o, oh E ketin kupwkupwurei kitailte en pwurala rehn Samatail Nanleng me wahn limpoak mehlel me keieu lap. Sapwellime wiewiahkan kin dokehte soahng ehute: limpoak ong Seme sansal sang Sapwellime limpoak ong emenemen kitail. Ahnsou me peidek kohieng duwen kosonned me keieu kesempwal, Sises sapeng mahsanih:

“Ke pahn poakohng Kaun-o ahmw Koht sang nan kapehdomw unsek, sang ni ngenomw unsek, sang ni omw lamalam unsek.

“Ih met kosonned me keieu lapalap oh kesempwal.

“A me keriaun kesempwal me rasehngete met, iei: ‘Ke pahn poakohng mehn mpomw duwen omw kin poakohng pein uhk.”³

Ehu me keieu kesempwal kitail en wia, kitail kak koadoakiada oh kasalehda limpoak rehn mehn mpetail kan sang ni kadek ni atail madamadau oh kosoi. Sounpar kei samwalahro, emen kempoakepahi nda, “Ehu kilelpen limpoak mehlel iei dehr kadeik aramas.”⁴ Met memehlelte.

Me keren, kisin seri men, ede Alyssa me sounpahr siluh, iangih riehko kilang kahsdo, ni e mesen ping e ahpw nda, “Ihno, mahleko ehu soahng!”

Ah nohnou kilenglahng tv o oh sapengki oh kouruhr, “Nei serepein, pihkak men mwo.”

Ekeipak kitail duwehte kisin serepeino, ni atail kin kilang aramas ahpw sohte nohn ese de wewehkin irail. Elemwein kitail kin tehk mwomwen ar weksang kitail oh arail luwet akan ahpw Samatail me ketiket Nanleng, me ketin wiahda aramas rasehng Ih, kin ketin ireirong Sapwellime seri kan, pwe en mahsanih dahme re kak wiahla.

Mie me rong Preseden James E. Faust mahsanih, “Ni ei wia mamahlahr, I solahr nohn teneki aramas.”⁵ Met katamankin ie ehu padahk en Wahnpoaron Pohl:

“Ni ei seri, ei lokaia kan, ei lamalam akan, ei pepehm kan, duwehte en seri. A met, ni ei wialahr ohl emen, I solahr kin wia mwomwen seri.

“Met I kakehr kilengwei pwar kilahs, rotoroto; eri kilengpene: met I esehier mepwukat; ahpw I kakehr esehla dahme I men esehla.”⁶

Ahnsou me kitail pahn wewehkihla mwahu pein atail luwet akan, e pahn tikitikla atail kin kasawih mehteikan nan “kilahs edied ehu.” Kitail men doadoahngki marain en rongamwahu en kilang mehteikan nin duwen Sounkomouro ketin wia—ni kadek, koapworopwor, oh limpoak. Rahno pahn leledo me kitail pahn wewehkihla audepen mohngiong en aramas oh kitail ahpw pahn kapingki ahnsou me aramas kin mahk ong kitail—duwehte atail kin kihwei atail lamalam oh lokaia mwahu ong metei kan nan mour wet.

Sounpahr kei samwalahro, I iangih pwihn en peinakapw kei dake wahr. Pihl en lehu poh mei, kapilkihpene dohl en welin tuhke kan oh paip ileile kan inenen kaselel mehlel. Pihlo kin lingaling ni aht kin sei nan pihl mwakelekelo, oh ketipino kansenamwahu ni aht sesei kohwei nan leho.

Ahpw mesenlengo rotorotdi oh kisinieng kehlail tepda ipido. Se anahne sei kehlail pwe se en kak kohwei mwowe ekis ekis, oh se sohte kak kommoal. Mwurin awa kei en aht doadoahk laud, se ahpw lella wasa kis oh perenkihda oh pil pwuriamweikihla ni aht diarada me ahngo ulahng wasa me se men kohla ie.

Se mwadangete isanikihla kisiniengo. Se waikeiei kisin kappa ieu, katengehdi keimw riahu ni mehn sei ko oh keimw teiko ni paten nehn ahi pwoudo, ni eh kadengpeseng pohn wahro. Kisiniengo eri ipir mehn sereko me se wiahdahu, oh se samwalah!

Ahnsou me Peinakapw ako nan wererail wahr ko kilangada ia uwen aht mengei en mwokid kohwei nan pihl o, re mwadangete wiahda pein arail serek. Se perenkihda oh insenemwahukihla oh kalahnganki aht kommoalsang aht lokasang sei rahno.

Kisinieng kansenemwahu-o e duwehte kaping mehlel en kempoakepahmw, rahnmwahu kadek sang nohno pahpa, pirien iou me emen pohnese emen, sirei en iengomw tohn doadoahk de iongomw tohn skuhl, mepwukat koaros rasehngete angin kisinieng me kin ipir atail serek kan ni atail kin sohpai kahpwal kan en mour! Preseden Thomas S. Monson mahsanih: “Kitail sohte kak kaunda kisinieng ahpw kitail kak kamwekid serek. Pwe uwen laud en peren, popohl, oh insenemwahu me kitail kak ahneki, kitail en pilada lamalam mwahu kan.”⁷

Mie kopwuriamwei oh manaman en koasoi, e kak kamwahuiala oh pil kak kawehla. Kitail kak tamanada lokaia suwed kan me kin karehieng atail luwetala oh ekei koasoai ni limpoak me kin mwadangete kakehlailihada pali ngenitail. Pilada ken ndahte koasoi me mwahu—oh—ong irail kan me karanih kitail kitail pwok irailda oh kakehlailih irailda oh sewese mehtei kan en idawehn Sounkomouro.

Kilel

Cross-stitch en “I pahn wahdo marain rongamwahu en nan imwei”

Ahnsou me I kin iang Praimeri, I nantieng deiadih nting pohn likou me nda, “I pahn wahdo marain en rongamwahuo nan imwei.” Ni souwas ieu, ni ahnsou me kiht, serepein kan wiewia deidei, aht sounpadahko ndahiong kiht soai pwoat duwen serepein men me kin mihmi pohn dohl ehu apali wahuo. Mwurin souwas koaros, e kin kilkilang ihmw ehu pohn dohlo apali wahu-o me wenimwtongko melingileng oh kohl. Imwehu me tikitik oh tok, oh kisin serepeino kin oaramanki me emen kousoan nan ihmw kaselel me wenihmwtoko kohl.

Ehu rahno e mweimwei ong serepein menet en dake were pwaisikel tang kotehla wauw o. E tangatang kohla oh lao e lel ni ihmw me wenihmw tok kohlo me e kin kaskaselelki sangete mahso . Ahpw ni ah keredihsang pohn were pwaisikelo, e kilangada me ihmwo ohla oh toklahr, dihpw reireida likin ihmwo oh wonihmwtok ko samin. E pahtoula, oh pwuralahng ni imwehu. Ni ah pwuriamweikihla, e kilangada ihmw me lingalingki, wenihmwtok kohl pohn kumwukumw en wauw o, oh apw diarada me imwehu mwo!⁸

Ekeipak, kitail kin duwehte serepein menet, kitail kin kilang dahme ekei kin ahneki de pehm nan kapehd tikitingkihla atail kin karasaikitailpene. Kitail kin tepda tetehkte dahme mih pohn Pinterest de Instagram en mouren nan computer de kawehkihla atail skuhl de doadoahk ni atail tengelahr nan madmadau en men siai. Ni mehlel, ma kitail pahn “wadek wen totohn atail kapai kan,”⁹ e pahn sansal ong kitail oh kitail pahn wewehki uwen Koht Eh kin ketin kupwuramwahuwih oh pohnesekoarosSapwellime serih kan serihkan.

Menda ma ke sounpahr 8 de 108, kitail kak wahdo marain en rongamwahu nan pein atail wasahn kousoan, menda ma ihmw poasohka nan Manhattan, de oahs nan Malaysia, de imwpwal nan Mongolia. Kitail kak koasoanehdi en rapahki me mwahu rehn aramas oh mouratail kan. Serepein pwulopwul oh lih mehlel kan wasa koaros kak kasalehda limpoak mehlel ni arail pahn lokaia ki soangen lokaia kan me pahn kakehlada koapworopwor oh pwoson.

Elder Jeffrey R. Holland koasoiahda mwahnakapw men me iengehko kin kalapw kapailoke nan erein ah kin suksukuhlo. Nan pahr kei mwuri, e kesousang wasahu, iangala sounpei, kanekehla ah skuhl, oh tepda kehlaila nan Mwomwodiso. Ahnsouo ah mour inenen pweida mwahu.

Mwurin sounpar kei, e pwurala nan ah wasa. Ahpw, tohn wasahu sohte kin pohnese ah koahieklahr oh keirdahr . Ong irail, e duduwehte aramas me re kin ese mwowehu,” oh re kin wiakawe duwen me re kin epwehnki wia. Kokohlao, ohl mwahu menet luhluwetala salongasang ah ohl marain men apw e sohte doadoahngki ah koahiek kaselelko me e koadoahkehda en kapahiehki irail ako me kin wiakawe.¹⁰ Ia uwen kansensuwed, ong ih oh tohn wasao!

Woahnpoaron Piter padahngki, “Mwohn mehkoaros kumwail nantihong en limpoak pene nan pwungamwail: pwe limpoak me kihsang dipatail kan koaros.”¹¹ Nantihong en limpoak, wehwehki “sang nan kapehd mehlel,” kin sansal sang ni atail pahn monokehla en aramas sapwung kan oh sohte kolokolte nsensuwed pahn aramas de katkataman ong kitail de meteikan duwen sapwung kan me nekier.

Atail pwukoah oh ahnsou mwahu en kin pereniki keirda mwahu en aramas koarosni atail songosong en duwehla atail Sounkomour, Sises Krais. Ia uwen kaperen en kilang mas peren en nan mesen emen me kin wewehkihda Tomwpen Sises Krais oh weliakapwala! Misinerihkan me kehnehr popohl en kilang weliakapwalahn emen me pepdaisla oh mwuri pedelong ni wenihmw en tehnpas sarawi iei kadehdepen kapahi en atail mweidong—oh koangoangehki irail en wekidekla. Tohn mwomwodiso me kin kasamwo me apwtehn pepdaisla kan kin insenemwahuki ar sowese irail kehn limpoak en Kauno. Me keiou kasalel en rongamwahu en Sises Krais iei mehlel en keirda poatoapoat—emweimweiengkitail en wekidekla, koangoangeikitail, oh pil poahngok ong kitail wekidekla, pwehn doulahte nantiong en mwauhla lao unsekla.

Preseden Thomas S. Monson padahngki: “Mie soangsoangen wiepen amwail pahn kasalehda limpoak mehlel. … Ieremen teneki aramas [de] kauwe [emen], ahpw kitail en ahniki limpoak mehlel en Krais ong iangatail sounseiloak en mour wet. Kitail en wauneki emenemen ni arail nannationg en wia uwen me re kak pwehn apwalih arail kahpwal kan me re kin sohpai, oh kitail en nantihong enwia uwen atail kak en seweseirail.”¹²

Aramas me ahneki limpoak mehlel, kin kenengamah, kadek, oh nsenamwahu. E kin karehiong kitail en tehk mahs aramas teikan, en karakarahkala, kaunda atail ineng kan, rapahki me mwahu rehn aramas teikan, oh perenda ahnsou me aramas kin pweida.¹³

Nin duwen lih perien (oh ohl perien) nan Saion, kitail “koaros kak poadidi ong “doadoahkpene … pwehn wia dahme konehng, pwehn koaloalomwahuih oh kapaiada aramas ni [mwaren atail Sounkomour”?¹⁴ Kitail en kak ahneki limpoak oh koapworopwor laud, ni atail pahn rapahki oh kapinga me mwahu rehn aramas, mweideng oh koangoahngehkin irail en keirda? Kitail kak perenikihda en aramas pweida kan oh ahnsowohte nannantieng kamwahuiahla pein kitail?

Ei, kitail kak wahdo marain en rongamwahuo nan imwatail, skuhl, oh wasahn doadoahk ma kitail pahn rapahki oh ehuki me mwahu kan duwen mehteikan oh dehr pwunodki en aramas ar luwet kan. Mohngiongiet kin audaudki kaping ni ei kin medewe duwen koluhla me atail Sounkomour, Sises Krais ketkihong emenemen kitail me dipadahr nan mour wet me soh unsek oh apwal!

I kadehdehiong kumwail me ni atail pahn idahwen Sapwellime karasaras unsek, kitail kak alehdi kisakis en limpoak mehlel, me pahn wahdo peren mehlel nan mour wet oh inouhn kapahi en mour soutuk rehn Sahm Nanlehng. Ni mwaren Sises Krais, Ahmen.