O Le A Ou Aumaia le Malamalama o le Talalelei i totonu o Lo’u Aiga

I se tali atu i le valaaulia a Sister Linda K. Burton i le konafesi aoao ia Aperila,¹ e toatele outou na auai i ni faatinoga magafagafa ma agaalofa o le alofa mama na taulai atu i le faafetaia’ia o manaoga o tagata sulufai i a outou eria i le lotoifale. Mai ni taumafaiga faatauvaa, taitoatasi e oo atu i polokalama lautele i nuu [ma alalafaga], o na faatinoga o le taunuuga o le alofa. A o outou faasoa atu tou taimi, taleni, ma punaoa, o o outou loto—ma loto o tagata sulufai—na faamalamalamaina. O le fausiaina o le faamoemoe ma le faatuatua ma e oo lava i se alofa tele atu i le va o lē e mauaina ma lē e foai atu o ni taunuuga lemaalofia ia o le alofa mama moni.

Ua ta’u mai e le perofeta o Moronae ia i tatou e faapea o le alofa mama o se uiga taua lea o i latou o le a ola faatasi ma le Tama Faalelagi i le malo selesitila. Ua ia tusia, “E vagana ai ua ia te outou le alofa mama e le mafai lava i se ala ona faaolaina outou i le malo o le Atua.”²

Ioe, o Iesu Keriso o le faataitaiga atoa o le alofa mama. O Lona ofo mai i le muai olaga e avea ma o tatou Faaola, o Ana fegalegaleaiga i Lona olaga faaletino atoa, o Lana meaalofa paia o le Togiola, ma Ana taumafaiga faifai pea ia toe avatu i tatou i lo tatou Tama Faalelagi, o ni faailoaga sili ia o le alofa mama. E galue o Ia i se taulaiga se tasi lava: o le alofa mo Lona Tama ua faailoa e ala i Lona alofa mo i tatou taitoatasi. Ina ua fesiligia e uiga i le poloaiga sili, sa tali Iesu:

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi le lona lua, E te alofa atu i le lua te tuaoi, ia pei o oe lava ia te oe.”³

O se tasi o auala sili ona taua e mafai ona tatou atiae ai ma faailoa atu ai lo tatou alofa mo o tatou tuaoi e ala lea i le faaali atu o mafaufauga ma upu agaalofa. I ni nai tausaga talu ai, sa ta’ua ai e se uo pele e faapea, “O le ituaiga silisili o le alofa mama atonu o le taofi o le faamasino atu.”⁴ O loo moni pea lena mea i aso nei.

Talu ai nei, a o matamata ai Alisa e tolu tausaga i se ata ma ona tei, sa ia faapea mai ma se lagona le mautonu, “Mama, e ese a le la moa!”

Sa tilotilo atu lona tina i le tv ma tali atu ma le ata, “Hani, o le pīpī le la.”

E pei foi o lena teineitiiti tolu tausaga lemailoa, o nisi taimi tatou te tilotilo ai i isi ma se malamalama lē atoatoa. Atonu tatou te taulai atu i ni eseesega ma vaai ai i ni mea sese ia i latou o siomiaina i tatou ae o loo silasila i ai lo tatou Tama Faalelagi i Ana fanau, na foafoaina i Lona faatusa e faavavau, i ni gafatia ofoofogia ma mamalu.

E manatuaina lava Peresitene James E. Faust i lana saunoaga, “O le faateleina lava o lo’u matua, o le faaitiitia foi lena o lo’u faamasino atu.”⁵ Ua faamanatu mai e lena mea ia te a’u le matauga a le Aposetolo o Paulo:

“O ona po na ou itiiti ai, na ou tautala ai faatamaitiiti, na ou manatunatu faatamaitiiti, na ou filifili faatamaitiiti, a ua oo ina ou tagata matua, ona ou tiai lea o mea a tamaiti.

“Aua o ona po nei tatou te vaavaai ai faanenefu i le faaata, a o ia ona po tatou te fesagai ai; o nei ona po ou te iloa ai faaleatoa, a o ia ona po ou te iloa tino ai, pei ona iloatinoina o a’u.”⁶

A tatou vaai ma le manino atili i o tatou lava lē atoatoa, o le a itiiti le faaosofia o i tatou e vaavaai atu i isi ma le “faanenefu i le faaata.” Tatou te mananao ia faaaoga le malamalama o le talalelei e vaai atu ai i isi e pei ona silasila i ai le Faaola—i le agaalofa, faamoemoe, ma le alofa mama. O le a oo mai le aso o le a tatou maua ai se malamalama atoatoa o loto o isi ma o le a faafetai o le a ofo mai ia i tatou le alofa mutimutivale—e pei lava ona tatou ofo atua mafaufauga ma upu o le alofa moni i isi i lenei olaga.

I nai tausaga talu ai, sa matou o ai e alo paopao ma se vaega o tamaitai talavou. O vaituloto lanumoana loloto na siomia e atumauga lanulauava i vaomatua ma tofē papa sa ofoofogia le matagofie. Sa fe’ilafi mai le vai i a matou foe a o matou faatofuina i totonu o le vai manino, ma mafanafana le susulu mai o le la a o matou sopoiaina ma le sologalelei le vaituloto.

Peitai, sa lei pine ae faauli ma le lagi ma se savili malosi na amata ona agi. Ina ia vave ona o ese atu, sa ao ia i matou ona faatofu loloto i lalo a matou foe ma alo malosi e aunoa ma le malolo. I le mavae ai o ni nai itula o le lelavavā ma le galuega faigata tele, na i’u ina matou tau atu i se vaega o le vaituloto ma iloa ai ma lo matou ofo tele ma le fiafia o loo agi le savili i le itu na matou mananao e o i ai.

Na vave lava ona matou faaaogaina lenei meaalofa. Sa matou toso maia i fafo se tamai tapoleni, ma nonoa ona tulimanu e lua i au o foe ma isi tulimanu i vae o lo’u toalua, ia na faaloloa atu i le isi itu o le paopao. Sa feula atu e le savili le la [o le vaa] sa le’i mafaufauina, ma matou se’e atu ai loa!

Ina ua iloa mai e tamaitai talavou i isi paopao le auala na matou se’e atu ai ma le faigofie i le vai, sa vave foi loa ona latou faia a latou la sa lei mafaufauina. Sa matou lagonaina le to’a ma taliē ma le fiafia, ma le faafetai mo le toomaga mai luitau o le aso.

E pei foi o lena savili mamalu e mafai foi ona i ai se faamālō faamaoni a se uo, o se faafeiloaiga fiafia a matua, le lue mai ma le ioe o le ulu a sou tei, po o se ataata faamalosi’au a se uo faigaluega po o se uo i le a’oga, ua maua uma ai le “savili fou i a tatou la” a o tatou tauivi ma luitau o le olaga! Sa faamatalaina faapenei e Peresitene Thomas S. Monson: “E le mafai ona tatou faatonuina le matagi, ae e mafai ona tatou fetuunaia ia la. Mo le fiafia atoatoa, filemu, ma le faamalieina, tau ina ia tatou filifilia se uiga faaalia lelei.”⁷

Ua i ai i upu se mana e ofo ai, e faafiafia ai isi ma faalotovaivaia ai foi. Atonu tatou te manatuaina uma lava ni upu lē lelei na faalotovaivaia ai i tatou ma isi upu na tautalagia i le alofa na matua faagaeetia ai o tatou agaga. O le filifili e fai atu na o upu e lelei e uiga i isi—ma i—isi e siitia ma faamalosia ai i latou o siomiaina i tatou ma fesoasoani ai i isi ia mulimuli i le ala a le Faaola.

Ata

O Le su’i-limaina o le “O le a ou aumaia le malamalama o le talalelei i totonu o lo’u aiga”

A o avea a’u ma se teineitiiti i le Peraimeri, sa ou galue ma le filiga e su’i-lima se faaupuga faigofie lea e faitauina, “O le a ou aumaia le malamalama o le talalelei i totonu o lo’u aiga.” I se tasi o aoauli, a o tasu’i e i matou o teineiti ia nila i luga ma lalo i totonu o le ie, sa faamatala mai e lo matou faiaoga se tala i se teineitiiti sa nofo i luga o se maupuepue i le tasi itu o le vanu. I aoauli taitasi, sa ia matauina ai lava i luga o le maupuepue i le isi itu faafesagai o le vanu se fale o loo susulu mai ai ni faamalama auro. O lona fale sa laitiiti ma fai sina palapalā, ma sa moemiti le teineitiiti e fia nofo i lena fale matagofie e i ai faamalama auro.

I se tasi aso sa faatagaina ai le teineitiiti e tietie atu i lana uila e sopoia le vanu. Sa ia tietie atu ma le naunautai seia oo ina tau atu i le fale e auro faamalama lea ua leva tele o faamemelo i ai. Ae ina ua ia oso i lalo mai lana uila, sa ia vaaia o le fale ua tuufua ma faaleagaina, faatasi ai ma vao ua sosolo i le fanua ma faamalama masani ma palapalā. Ma le faanoanoa, sa tepa atu ai le teineitiiti i le latou fale. I lona te’i ai, sa ia vaaia ai se fale o loo i ai ni faamalama auro o loo susulu mai luga o le maupuepue mai le isi itu o le vanu, ma iloaina vave ai o lona lava ia fale!⁸

O nisi taimi, e pei foi o lenei teineitiiti, tatou te vaavaai i mea o loo i ai i isi tagata po o o latou ituaiga tagata ma lagonaina e faatauvaa atu i tatou pe a faatusatusa. Tatou te oo ina taulai atu i ituaiga tagata i luga o le Pinterest po o le Instagram po o le faanenefuina i le manatu fia tautavā i isi i totonu o o tatou aiga po o falefaigaluega. Peitai, a tatou faaaluina se taimi, e “faitau ai le tele o o [tatou] manuia,”⁹ tatou te vaaia i se vaaiga moni atu ma iloaina le lelei o le Atua i tagata uma o Lana fanau.

Pe 8 pe 108 o tatou tausaga, e mafai lava ona tatou aumaia le malamalama o le talalelei i totonu o o tatou lava siosiomaga, po o se potumautotogi i se fogafale maualuga i Manhattan, se faleoo i Meleisia, po o se faleie i Monokolia. E mafai ona tatou fuafua e tagai mo le lelei i isi ma i tulaga o siomia ai i tatou. E mafai e tamaitai talavou ma matutua teisi atu i soo se mea ona faaalia le alofa mama pe a latou filifili e faaaoga ia upu e atiae ai le toafimalie ma le faatuatua i isi.

Sa faamatala e Elder Jeffrey R. Holland se alii talavou sa taufaalili i ai lana tupulaga i le taimi o ona tausaga a’oga. I ni nai tausaga mulimuli ane, sa ia masii ese, ma auai i le militeli, sa a’otauina, ma sa toaga i le Lotu. I lea vaitau o lona soifuaga na faailogaina i ni aafiaga matagofie ma faamanuiaina.

I le mavae ai o ni tausaga, sa ia toefoi atu i lona nuu moni. Peitai, sa mumusu tagata e taliaina lona tuputupu a’e ma mea ua ia ausia. Ia i latou, o ia lava lea tuai “e faapea ma faapea,” ma sa latou taulimaina o ia i lena lava ala. Na i’u lava ina mouese atu lenei alii lelei i se atalafoia o lona tagata faamanuiaina sa i ai e aunoa ma le mafai ona faaaogaina o ana taleni ofoofogia na atiaeina e faamanuiaina ia i latou sa faifai ma ua toe teenaina foi o ia.¹⁰ Oka se ma’umau, mo ia faapea ai foi ma le nuu!

Sa aoao mai le Aposetolo o Peteru, “Ia muamua i mea uma ona maua e outou o le alofa [mama] naunau o le tasi i le tasi, aua o le alofa [mama] e ufiufi ai agasala e tele.”¹¹ O le alofa [mama] naunau, o lona uiga o le “lotoatoa,” e faaalia e ala i le faagaloina o mea sese ma aleu o le isi tagata nai lo le faatautee pea i ai po o le manatuaina pea o mea sese a isi i le tuanai.

O la tatou matafaioi ma le avanoa o le taliaina lea o mea ua faaleleia i tagata uma a o tatou tauivi ia avea e pei o lo tatou Faaola, o Iesu Keriso. Oka se faagaeetia o le vaaia o le malamalama i fofoga o se tasi ua malamalama i le Togiola a Iesu Keriso ma o loo faia ni suiga moni i lona olaga! O faifeautalai e lagonaina le olioli o le vaaia o se tagata liliu mai o ulu atu i vai o le papatisoga ona ulufale atu ai lea i faitotoa o le malumalu, o ni molimau ia o faamanuiaga o le faatagaina—ma le uunaia—o isi ia sui. O tagata o le ekalesia e talileleia tagata liliu mai o e atonu na le’i manatu i ai o ni sui o le malo e mauaina le faamalieina tele i le fesoasoani ia i latou ia lagona le alofa o le Alii. O le matagofie tele o le talalelei a Iesu Keriso o le moni lea o le alualu i luma e faavavau—e le gata ua faatagaina i tatou ia sui mo le lelei atu ae uunaia foi, ma poloaiina, ia faaauau pea ona tulitulimatagauina le faaleleiga atili, ma ia i’u ai i le atoatoa.

Na fautua mai Peresitene Thomas S. Monson: “I ni auala faatauvaa se selau, ua i ai ia te outou uma le tiute o le alofa mama. ... Nai lo le faamasino atu ma faitioina e le tasi le isi, ia tofu maua e i tatou le alofa mama o Keriso mo i latou o loo tatou malaga faatasi i lenei faigamalaga o le olaga. Tau ina ia tatou iloaina o loo faia e tagata taitoatasi le mea sili na te mafaia e taulima ai luitau e oo atu i o [latou] ala, ma tau ina ia tatou tauivi ia faia le mea sili tatou te mafaia e fesoasoani atu ai.”¹²

O le tagata e i ai le alofa mama, e onosai, agalelei ma faamalieina. O le alofa mama na te faamuamuaina isi, e lotomaualalo, e amiopulea, e tagai mo le lelei i isi, ma olioli pe a faia e se tasi ni mea lelei.¹³

E pei o ni uso (ma tuagane) i Siona o le a tatou tuuto ea e “galulue faatasi uma … e fai soo se mea lelei ma tatau, e faafiafia ai tagata uma i le suafa [o le Faaola]”?¹⁴ Faatasi ai ma le alofa ma faamoemoega sili, e mafai ona tatou tagai ma taliaina le matagofie o loo i ai i isi tagata, e faatagaina ma uunaia ai le alualu i luma? E mafai ea ona tatou olioli i mea e ausia e isi a o faaauau pea ona galulue e agai atu i a tatou lava mea e faaleleia?

Ioe, e mafai ona tatou aumaia le malamalama o le talalelei i totonu o o tatou fale, o a’oga, ma falefaigaluega pe afai tatou te tagai mo mea lelei i isi ma faasoa atu ae aua le vaavaai masei. Oka se faatumuliaina o lo’u loto i le faafetai pe a ou mafaufau atu i le salamo ua mafai e ala i lo tatou Faaola, o Iesu Keriso mo i tatou uma ua agasala ma le mautinoa i lenei lalolagi le atoatoa ma faigata i nisi taimi!

Ou te molimau atu a o tatou mulimuli i Lana faataitaiga atoatoa, e mafai ona tatou mauaina le meaalofa o le alofa mama, lea o le a tatou maua ai le olioli tele i lenei olaga atoa ai ma le faamanuiaga folafolaina o le ola e faavavau faatasi ma lo tatou Tama o i le Lagi. I le suafa o Iesu Keriso, amene.