“Yog tias Nej Tau Paub Kuv”
Peb puas tsuas paub txog tus Cawm Seej xwb, los sis peb puas haj yam paub Nws tiag tiag? Peb ua li cas thiaj li paub tus Tswv?
Thaum uas tus Cawm Seej tab tom xaus nws Zaj Lus Qhia Nyob Pem Roob, Nws qhia qhov tseeb uas hais tias “tsuas yog thaum peb ua raws li Leej Txiv lub siab nyiam peb thiaj txais tau Leej Tub txoj kev hlub tshua.”1
Nws tshaj tawm hais tias:
“Tsis yog txhua tus uas hu kuv hais tias, tus Tswv, tus Tswv, ces yuav tau mus Ntuj Ceeb Tsheej. Tiam sis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb.
“Thaum txog hnub ntawd yuav muaj ntau leej hais rau kuv hais tias, tus Tswv, tus Tswv, peb twb tuav koj lub npe qhia Vajtswv Txoj Lus peb tuav koj lub npe ntiab dab? thiab ua ntau yam txuj ci tseem ceeb?
“Thaum ntawd kuv yuav hais rau lawv hais tias, Cov neeg siab phem, cia li khiav mus, kuv tsis paub nej.”2
Peb haj yam to taub qhov no thaum peb xav txog qhov kev tshwm sim uas tau txhais cov lus kom yog. Muaj tseeb tiag, tus Tswv txoj lus hauv Phau Vaj Lug Kub Npaiv Npaum uas Vaj Ntxwv Yakaunpaus txhais uas hais tias, “kuv tsis paub nej,” raug muab hloov thaum Yauxej Xamiv muab txhais lus ces thiaj hais tias “Nej yeej tsis tau paub kuv.”3
Cia li xav txog zaj lus piv txwv txog kaum tus hluas nkauj. Nco qab txog tsib tug hluas nkauj ruam uas tsis tau npaj siab thaum lawv mus yuav roj teeb ces thiaj hnov lawv hu kom mus ntsib tus nraug vauv.
“Thaum tsib tug uas tsis muaj tswv yim tab tom mus yuav roj lawm; tus nraug vauv txawm tuaj txog. Tsib tug muaj tswv yim uas twb xub npaj roj tseg lawm, txawm nrog tus nraug vauv mus noj tshoob hauv tsev, thiab kaw qhov rooj rau lawm.
“Tom qab ntawd tsib tug hluas nkauj uas tsis muaj tswv yim rov los txog. Lawv txawm hu hais tias, tus tswv, tus tswv, thov qhib qhov rooj rau peb.
“Tus nraug vauv teb hais tias, Kuv tsis paub nej.”4
Tej ntsiab lus rau zaj lus piv txwv no pauv peb txoj kev to taub thaum peb kawm tej kev tshwm sim tshiab. Qhov uas tseem ceeb, yog txoj kab lus uas hais tias “Kuv tsis paub nej” hauv Phau Vaj Lug Kub Npaiv Npaum uas Vaj Ntxwv Yakaunpaus txhais raug muab hloov hauv Yauxej Xamiv Kev Txhais Lus hais tias “Nej tsis paub kuv.”5
Ob kab lus “Nej yeej tsis tau paub kuv” thiab “Nej tsis paub kuv” yog ib txoj lus uas yuav tsum tog mus hauv peb txhua tus nruab siab. Peb puas tsuas paub txog tus Cawm Seej xwb, los sis peb puas haj yam paub Nws tiag tiag? Peb ua li cas thiaj li paub tus Tswv? Cov lus nug ntawm sab ntsuj plig no yog txoj ntsiab lus ntawm kuv zaj lus qhia no. Kuv taij thiab thov koj tus Vaj Ntsuj Plig Dawb Huv yuav los pab peb thaum peb kawm ua ke txog qhov tseem ceeb no.
Kawm Kom Paub
Yexus hais tias:
“Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.
“Nim no nej twb paub kuv lawm, nej yeej yuav paub kuv Txiv thiab.”6
Peb yuav paub Leej Txiv thaum uas peb paub Nws Tib Leeg Tub.
Ib lub hom phiaj tseem ceeb hauv lub neej no tsis yog kom kawm paub txog Leej Txiv Tib Leeg Tub xwb tiam sis yog kom peb yuav paub Nws zoo. Muaj plaub qhov tseem ceeb uas yuav pab peb paub tus Tswv es plaub qhov yog muaj kev ntseeg txog Nws, raws Nws qab, ua hauj lwm pab Nws, thiab rau siab ntseeg Nws.
Muaj Kev Ntseeg txog Nws
Txoj kev ntseeg Yexus Khetos yog thaum peb vam Nws tej hauj lwm, kev hlub tshua, thiab kev ua siab dav.7 Thaum peb pib kawm paub tus Cawm Seej thaum uas peb qhib peb sab ntsuj plig thiab sim Nws tej kev qhia, mus txog rau thaum peb tseg chaw cia hauv peb sab ntsuj plig rau Nws tej lus.8 Thaum uas peb txoj kev ntseeg tus Tswv loj hlob tuaj, peb tso siab rau Nws thiab cia siab rau Nws lub hwj chim uas yuav cawm, kho, thiab ntxiv dag zog rau peb.
Txoj kev ntseeg rau thiab txog tus Tswv tiag tiag yuav pab peb ua ncaj ncees. “Txoj kev [ntseeg Yexus Khetos yog] thawj txoj ntsiab cai hauv txoj kev teev ntuj, … lub hauv paus hauv ntsis rau txhua yam kev ncaj ncees … thiab yog txoj ntsiab cai uas ua rau tib neeg ua ub ua no.”9 Vim hais tias thaum ua raws li tej ntsiab cai tseeb uas qhia txog tus Txhiv Dim yog qhov uas pab tau peb txais thiab muaj kev ntseeg vim, “kev ntseeg thaum tsis ua tej hauj lwm yeej tsis muaj qab hau.”10 Peb yuav tsum ua cov neeg uas “ua raws li txoj lus, tsis yog cov uas hnov tej lus xwb.”11
Txoj kev hnov Vajtswv txoj lus thiab txais qhov txiaj ntsim ntawm sab ntsuj plig uas yog kev ntseeg tus Cawm Seej yeej nyob ua ke, vim “kev ntseeg los thaum peb mloog lus, thiab hnov Vajtswv txoj lus.”12 Peb yuav pib paub Nws thiab Nws lub suab thaum peb kawm thiab khaws Nws cov lus hauv cov vaj lug kub twj ywm hauv peb nruab siab,13 mob siab thov Vajtswv los ntawm Nws lub npe,14 thiab nrhiav kom tau tus Vaj Ntsuj Plig Dawb Huv uas peb tus khub.15 Txoj kev kawm txog thiab ua neej nyob raws li Khetos cov lus qhuab qhia yog tej yam peb yuav tsum ua peb thiaj yuav tsim nyog tau txoj kev ntseeg Nws.16
Txoj kev muaj kev ntseeg txog tus Tswv yog qhov uas yuav pab tau peb raws Nws qab.
Raws Nws Qab
“Thaum Yexus tab tom taug ntug dej Hiav Txwv Kalilais, nws pom ob kwv tij uas yog, Ximoos (tus uas hu ua Petus) thiab nws tus kwv Adales, nkawd tab tom muab vas ntaus ntses hauv hiav txwv.
“Yexus hais rau nkawd hais tias, Neb cia li nrog kuv mus, kuv yuav qhia kom neb paub mus nrhiav neeg.
“Tam sim ntawd nkawd txawm tso plhuav nkawd ob lub vas tseg thiab nrog Yexus mus.”17
Petus thiab Adales yog ob tug yam ntxwv txog txoj kev mloog lus ces thiaj raws tus Xib Hwb qab.
Tus Cawm Seej kuj qhia koj thiab kuv hais tias: “Yog leej twg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaub lig nrog kuv mus.”18 Qhov uas hais tias kwv yus tus ntoo khaub lig txhais tau hais tias txwv tsis pub yus tus kheej ua tej yam uas Vajtswv tsis ua thiab txhob ntshaw dab tsi hauv ntiaj teb thiab ua raws nraim li Vajtswv cov lus txib.19
Tus Cawm Seej ntuas peb kom peb yuav rais los mus ua neeg zoo li Nws.20 Yog li ntawd, txoj kev raws tus Tswv qab kuj yog txoj kev yoog Nws tus yam ntxwv thiab. Peb yuav haj yam paub tus Tswv thaum peb siv lub hwj chim los ntawm Nws txoj Kev Theej Txhoj los pab peb rais los mus ua neeg zoo li Nws.
Thaum Nws qhuab qhia hauv ntiaj teb no, Yexus tau ua yam ntxwv, tau coj kev, thiab tau ua ib qho piv txwv zoo. “Thaum paub tseeb txog Nws tus cwj pwm, txoj kev ua zoo tag nrho, thiab tus yam ntxwv” 21 pab tau peb paub txog txoj ntsiab cai thiab coj tau peb kev thaum peb raws Nws qab ua Nws ib tug thwj tim.
Txoj kev raws tus Cawm Seej qab pab peb paub zoo seb [peb puas ua raws] li Vajtswv lub siab nyiam hauv lub neej no.22 Qhov uas yus paub tej no yog ib yam uas peb kawm tau thiab tsis yog xav txog tej yam hauv lub neej no xwb. Tiam sis, txoj kev maj mam taug kev ua raws li tej kev khi lus hauv lub neej no kom Nws zoo siab rau peb.
Lihais txoj kev ua npau suav hauv Phau Ntawv Maumoos qhia tseeb seb peb yuav tsum taug txoj kev twg, peb yuav muaj tej kev cov nyom zoo li cas, thiab peb txais tau tej kev pab ntawm sab ntsuj plig dab tsi uas yuav pab peb raws tus Cawm Seej qab thiab los cuag Nws. Txoj kev thawb mus tom ntej taug txoj kev ti thiab nqaim yog qhov uas Nws xav kom peb ua. Txoj kev saj cov txiv ntawm tsob ntoo thiab rais los mus ua neeg “uas hloov siab los ntseeg tus Tswv tiag tiag”23 yog tej koob hmoov uas Nws xav kom peb yuav txais. Yog li ntawd, Nws thiaj hu hais tias, “Cia li nrog kuv mus.”24
Txoj kev ntseeg txog thiab raws Yexus Khetos qab yog tej yam uas peb yuav tsum ua peb thiaj yuav txawj ua hauj lwm pab Nws.
Ua Hauj Lwm Pab Nws
“Vim ib tug tib neeg ua li cas thiaj yuav paub tau tus Tswv uas nws tsis tau ua hauj lwm rau, thiab tus uas yog ib tug qhua rau nws, thiab nyob deb ntawm tej kev xav thiab ntawm tej uas nws lub siab nyiam?”25
Peb haj yam paub tus Tswv thaum peb ua hauj lwm pab Nws thiab ua hauj lwm hauv Nws lub nceeg vaj. Thaum peb ua li no, Nws foom koob hmoov rau peb los saum ntuj ceeb tsheej los, muab tej txiaj ntsim ntawm sab ntsuj plig, thiab pab peb haj yam muaj tswv yim. Peb yeej tsis nyob peb ib leeg xwb thaum peb ua hauj lwm hauv Nws lub vaj.
Nws tshaj tawm hais tias, “Kuv yuav mus ua nej ntej. Kuv yuav nyob ntawm nej sab xis thiab nyob ntawm nej sab laug, thiab kuv Leej Ntsuj Plig yuav nyob hauv nej tej siab, thiab kuv cov tim tswv nyob ib puag ncig nej, los txhawb nqa nej.”26
Peb kawm paub tus Cawm Seej thaum peb ua zoo npaum li peb ua tau es mus rau qhov chaw uas Nws xav kom peb mus, thaum peb sim hais tej lus uas Nws xav kom peb hais, thiab rais los mus ua neeg zoo li Nws xav kom peb ua.27 Thaum peb lees paub tias peb vam Nws, ces Nws thiaj pab peb haj yam txawj ua hauj lwm zoo dua. Nyob nyob ces, peb thiaj muaj lus siab xav ua raws li Nws lub siab nyiam, thiab Nws tej ntsiab cai hloov los ua peb tej ntsiab cai, xwv kom peb “yuav tsis thov tej yam uas tsis yog raws li [Nws] lub siab nyiam.”28
Peb yuav ua hauj lwm pab Nws kawg siab, kawg ntsws, kawg plab, kawg plawv.29 Yog li ntawd, txoj kev tsis ua neeg qias dub es ua hauj lwm pab lwm tus neeg yuav tawm tsam lub siab phem uas tib neeg feem coob muaj. Peb thiaj li hlub cov neeg uas peb ua hauj lwm pab. Thiab vim hais tias ua hauj lwm pab lwm tus neeg yeej yog txoj kev ua hauj lwm pab Vajtswv, peb thiaj li hlub Nws thiab peb cov kwv tij thiab nkauj muam. Thaum muaj kev hlub no peb tau lub txiaj ntsim uas yog kev siab hlub, uas yog kev hlub dawb paug ntawm Yexus Khetos.30
“Thov Leej Txiv tag nrho lub zog ntawm lub siab, xwv kom nej yuav muaj txoj kev hlub no puv npo, txoj uas nws tau muab rau tag nrho cov uas raws qab tiag ntawm nws Leej Tub, Yexus Khetos; xwv kom nej yuav rais tau los mus ua Vajtswv tej tub; kom thaum nws yuav tshwm los peb yuav zoo li nws, vim peb yuav pom nws zoo li uas nws yog; kom peb yuav muaj txoj kev cia siab no; kom peb yuav raug ua kom dawb huv tib yam li nws twb dawb huv.”31
Peb paub tus Tswv thaum peb muaj Nws txoj kev hlub puv nkaus peb lub siab.
Rau Siab Ntseeg Nws
Peb ntseeg puas tau txog Nws, raws Nws qab, ua hauj lwm pab Nws, tiam sis tsis rau siab ntseeg Nws?
Kuv paub txog cov mej zeej hauv lub Koom Txoos uas txais cov lus qhuab qhia thiab tej ntsiab cai hauv cov vaj lug kub thiab cov lus uas hais ntawm lub sam thiaj no. Tab sis mas lawv tseem tsis tshua ntseeg txoj moo zoo tej kev tseeb yog tej yam uas lawv nruab tau rau hauv lawv lub neej thiab tej yam uas lawv tab tom raug. Zoo nkaus li lawv ntseeg tus Cawm Seej, tiam sis lawv tsis ntseeg hais tias lawv txais tau tej koob hmoov uas Nws cog tseg los sis hais tias Nws nyob hauv lawv lub neej. Kuv kuj ntsib ib co kwv tij thiab muam uas ua hauj lwm hauv lub koom txoos tiam sis lawv tseem tsis tau xav hais tias txoj moo zoo uas raug muab txum tim rov qab los no yog ib yam uas tseem muaj sia nyob thiab pauv tau lawv lub neej tiag tiag. Peb los paub tau tus Tswv thaum uas peb ntseeg txog Nws thiab thaum peb ntseeg Nws thiab Nws tej kev cog lus tseg.
Nyob hauv Phau Tshiab, ib leej txiv tau thov tus Cawm Seej los kho nws tus me nyuam. Yexus teb hais tias:
“Yog leej twg ntseeg, kuv yeej ua tau txhua yam huv tib si.
“Tam sim ntawd tus me tub leej txiv hais tias, Kuv ntseeg tiam sis tsis txaus, thov koj pab kom kuv muaj kev ntseeg ntxiv.”32
Kuv tau xav txog leej txiv txoj kev thov no ntau ntau zaus lawm: “Thov koj pab kom kuv muaj kev ntseeg ntxiv.” Kuv xav paub seb tus txiv neej ntawd txoj kev thov puas tsis yog taij thov kom nws muaj kev ntseeg txog Yexus uas ua peb tus Txhiv Dim thiab Nws lub hwj chim los kho neeg xwb. Tej zaum nws twb lees paub hais tias Yexus Khetos yog Vajtswv Tib Leeg Tub. Tiam sis tej zaum nws xav tau kev pab kom nws yuav ntseeg tias tus Xib Hwb zoo lub hwj chim yuav kho tau thiab tias Nws yeej yuav pab foom koob hmoov rau nws tus tub thiab. Tej zaum nws twb ntseeg Yexus lawm tiam sis tsis tau ntseeg tias Yexus yuav pab tau nws tiag tiag.
Feem ntau peb hais lus tim khawv txog tej yam uas peb paub tias muaj tseeb, tiam sis tej zaum lo lus nug tseem ceeb dua rau peb txhua tus yog seb peb puas ntseeg tej yam uas peb paub.
Tej kab ke dawb ceev uas ua hauv lub pov thawj hwj lub hwj chim yog tej yam uas peb yuav tsum ua kom muaj kev ntseeg txog tus Cawm Seej, kawm paub Nws, thiab, thaum kawg, ntseeg tej yam uas peb paub lawm.
Thiab lub pov thawj hwj [Mekhixedes] no tswj hwm txoj moo zoo thiab tuav tus yuam sij ntawm tej txuj ci neeg paub tsis txog ntawm lub nceeg vaj, uas twb yog tus yuam sij ntawm txoj kev paub txog Vajtswv.
Yog li ntawd, nyob rau hauv tej kab ke ntawd, thiaj pom lub hwj chim ntawm Vajtswv tshwm sim.33
Peb ntseeg thiab los paub tus Tswv uas ua tus yuam sij qhib qhov rooj rau txoj kev paub txog Vajtswv uas Nws siv los ntawm lub Pov Thawj Hwj Mekhixedes thiab qhov no pab tau peb txais yuav vajtswv lub hwj chim hauv peb lub neej. Peb ntseeg thiab los paub tus Cawm Seej thaum peb raws Nws qab es txais thiab rau siab ntso ua txhua kab ke dawb ceev thiab haj yam txais yuav nws tus meej yim rau ntawm peb lub ntsej muag.34 Peb ntseeg thiab los paub Yexus thaum peb txais txoj kev hloov hlo, kev kho, kev ntxiv zog, thiab lub hwj chim uas hloov peb kom ua neeg dawb huv los ntawm Nws txoj Kev Theej Txhoj. Peb ntseeg thiab los paub tus Xib Hwb zoo thaum uas “lub hwj chim ntawm nws txoj lus [pib hlav tuaj] hauv peb nruab siab,”35 es raug sau cia hauv peb lub paj hlwb thiab lub siab,36 thiab peb “muab tag nrho [peb] tej kev txhaum tso pov tseg kom peb thiaj yuav paub [Nws].”37
Txoj kev rau siab ntseeg Nws yog thaum peb tso siab plhuav lees paub tias Nws tej koob hmoov yeej yuav los thiab pab peb lub neej thiab peb tsev neeg. Txoj kev rau siab ntseeg Nws tag siab tag ntsws38 los thaum peb thawb mus lawm tom ntej ua raws li peb tej kev khi lus, ua raws li Nws lub siab nyiam, thiab ua tej yam uas Nws xav kom peb ua thiab ua raws caij raws nyoog. Txoj kev rau siab ntseeg Nws—lees paub Nws lub hwj chim thiab tej kev cog lus—yuav pab peb muaj tswv yim, kev thaj yeeb nyab xeeb thiab kev zoo siab los rau hauv peb lub neej.
Kev Cog Lus thiab Zaj Lus Tim Khawv
Ib hnub twg yav tom ntej, “txhua lub hauv caug yuav txhos thiab txhua tus nplaig yuav lees paub 39 tias Yexus yog tus Khetos tiag tiag. Thaum txog hnub uas muaj hmoov ntawd, peb yuav paub tias Nws paub peb txhua leej txhia tus lub npe. Thiab kuv ua tim khawv thiab cog lus hais tias tsis yog hais tias peb yuav paub txog tus Tswv xwb tiam sis peb yuav paub Nws thaum peb muaj kev ntseeg txog, raws qab, ua hauj lwm pab, thiab rau siab ntseeg Nws. Kuv ua tim khawv li no los ntawm Yexus Khetos lub npe dawb ceev, amees.