2010–2019
“Ke Kowos Etweyuc Tari”
Ohktohpa 2016


“Ke Kowos Etweyuc Tari”

Yac kuht etuh Mwet Lahngo muhkwena, kuh kuht ahkyohkye in etwacllah? Kuht ac etwacllah Leum fuhkah?

Ke Mwet Lahngo El ahksahfye Luti lal Finohl uh, El ahkyohkye ma pwacye ma pahtpaht uh lah “ke oruh muhkwena kena luhn Pahpah pa mwet se kuh in eis pahkomuhta luhn Wen.”1

El fahkwack:

“Tia mwet nukewa ma pangonyu ‘Leum, ‘Leum ac fah ilyak nu in Tokosrai lun kusrao, a elos na su oru ma lungse lun Papa tumuk inkusrao.

“Ke Len in Nununku ac tuku, mwet puspis ac fah fahk nu sik, ‘Leum, ‘Leum! Kut tuh fahkak kas lun God inem, ac sisla demon puspis inem, ac oru ma usrnguk puspis?

“Na nga ac fahk nu selos, ‘Nga tiana etekowos. Fahla likiyu, kowos mwet koluk.”2

Kahlwem lasr ke luti se inge yohkwelihk ke kuht motko sie atac sasuc nuh ke ma ingacn. Yohk srihpac tuh, pohloh kahs luhn Leum fwackyuck ke Pwacpuhl King James Version an, “Nga tiana etekowos,” tuh eklac ke Joseph Smith Translation nuh ke “Kowos tiacna etweyuc.”3

Motko pac ke puhpuhlyuck ke virgin singucul ah. Esam lah virgin lahlfon ac tiac ahkolah limekohsr ah som in eis oil nuh ke lahm lalos tukun lohngwack solsol in som ac ohsun nuh sin mwet pihsrlac sac.

“Ac ke elos som, mwet pisrla el tuku. Mutan limekosr ma lalmwetmwet uh welul utyak nu ke kufwen marut uh.

“Tok, na mutan limekosr saya elos tuku, ac fahk, ‘Leum! ‘Leum! Ikasla nu sesr!’

“Na mwet pisrla el fahk, ‘Tia ku! Nga tia etekomtal!’”4

Kalmeyacn puhpuhlyuck soko inge nuh sesr kais sie ahkyohkyaclihk ke siepacna atac moklweyuck. Yohk liki nuh kwewa, pohloh kahs, “Nga tia etekomtal” ke fwackyuck lun Pwacpuhl ke King James Version an ma ahkpwacyeiyucklac ke Joseph Smith Translation nuh ke “Kowos tiac etweyuc.”5

Pohloh kahs “Kowos tiacna etweyuc” ac “Kowos tiac etweyuc” enenuh in pa srihpac se kuht in sifacna liye insiyacn kais sie sesr uh. Yac kuht etuh Mwet Lahngo muhkwena, kuh yac kuht ahkyohkye in etwacllah? Kuht ac etwacllah Leum fuhkah? Kihsen siyuck ke nguhna uh pa srihpac yohk ke pweng luhk uh. Nga ngihsre na pwacye kahsruh luhn Nguhn Muhtahl ke kuht in tuhkweni motko sifac yohk srihpac se inge.

In Etwaclah

Jisus El fahk:

“Nga pa inkanek, ac pwaye, ac moul; wangin mwet som nu yurin Papa fin tia ke nga.

“Inge ke kowos eteyu tari, kowos fah oayapa etu Papa tumuk.”6

Kuht ac etwacllah Pahpah ke kuht ac etwacllah Wen Kuloh Nahtuhl.

Sie srihpac yohk emet ke moul in mahno uh el tiac in lutlut muhkwena ke Wen Sefanna nuhtin Pahpah tuhsruhk oacyacpac kwacfweacng in etwacllah. Step yohk ahkosr emet ma kuh in kahsrwe kuht in etuh Leum pa ahkyohkye luhlahlfongi in El, Ukwacl, Kuhlwacnsapwacl, ac luhlahlfongi in El.

Ahkyohkye Luhlahlfongi in El

Ahkyohkye luhlahlfongi ke Jisus Kraist wiwina orekma wo, pahkomuhta, ac luhngse kuhlwacng Lal.7Kuht muhtwacwacack in etuh Mwet Lahngo ke kuht orekmakihn kuh luhn nguhnasr ac srihke ke mwe luti Lal, ne ke kuht kuh in eis ma ingacn nuh ke moul lasr sie ip ke kahs Lal uh.8Ke luhlahlfongi lasr ke Leum uh yohkwelihk, kuht luhlahlfongi in El ac puhlah wo ke kuh Lal in molwelah, onwelah, ac ahkfokokoye kuhtlac.

Luhlahlfongi pwacye uh tuhkuh ac oreklac ke Leum ac pacl nuh kwewa mokle mukwikwi suwohswohs. Luhlahlfongi ke Kraist pa ip yohk se emet ke alu etweyuck, … pwelucng ke ma suwohswohs nuh kwewa … ac ip yohk ke mukwikwi luhn mwet lahlmwetmwet nuh kwewa.”9Ke srihpen mukwikwi fal nuh ke ip yohk suwohs uh Mwet Molwelah El ahkkahlwemye lah pa ip yohk emet ke eisyacn ac ahkyohkyeyacn luhlahlfongi pwacye uh, “luhlahlfongi sahyacn orekma wacngihn srihpac.”10Kuht enenuh in “mwet oruh orekma uh, ac tiac lohng muhkwena.”11

In lohng kahs luhn God ac eis mwe sang ke nguhn in luhlahlfongi ke Mwet Lahngo el kuhpahsr fototo, ke srihpen “luhlahlfongi tuhkuh ke lohng, ac lohng tuhkuh ke kahs luhn God.”12Kuht ac aetuhilac nuh Sel ac puhsrwacl ke kuht lutlut ac ipeis kahs Lal ke ma suhmuhslah uh,13pruhe nuh sin Pahpah ke Inel ke inse pwacye,14ac suk nuh ke wi luhn Nguhn Muhtahl.15In lutlut ac kapsra nuh ke moul lasr mwe luti luhn Kraist pa sie ma enenuh met liki in eis mwe sang ke luhlahlfongi in El.16

Ahkyohkye luhlahlfongi ke Leum el sie ahkolah fal in ukwe Leum.

Ukwe Leum

“Ke Jesus el fahsr pe Lulu Galilee, elliye tamulel se, sie pa Simon su pangpang Peter, ac Andrew ma lel, ke eltal orekmakin nwek in patur.

“Jesus El fahk nu seltal, Fasru wiyu ac nga fah luti komtal ouiyen paturi mwet.

“In pacl sana eltal filiya nwek natultal ac welul som.”17

Peter ac Andrew pa mwet srihkasrak fokoko ke lohng ac ukwe Mwet Kol.

Mwet Lahngo El oacyacpac luti kom ac nga: “Kutena mwet fin lungse wiyu, el enenu in lafwekunul sifacna, srukak sakseng lal ac fahsr tukuk.”18In sruhkwack sahkseng luhn sie mwet pa in lahfwekihn komlac sifacna ke ma koluk nuh kwewa ac ma luhngse luhn facluh nuh kwewa ac in liyacacng masap luhn Leum.19

Mwet Lahngo El kai kuht in eklac oacna El.20Tuh ohinge, in ukwe Leum weacng pac srihkasrak Lal. Kuht kalweni in etwaclah Leum ke kuht suk kuh ke Iwaclah Lal in eklac oacna El.

Ke luti Lal fin facluh ah, Jisus El ahkkahlwemye inkacnek uh, kol inkacnek uh, ac fihliyac srihkasrak suwohs uh. “Sie nuhnak suwohs ke atacl, ma suwohs lal, ac ohiyac lal uh”21 sang srihpac ne tok ac kolyuck kahlwem ke kuht ukwacl ke inkacnek luhn mwet tuhma lutlut oaru uh.

In ukwe Mwet Lahngo oacyacpac oruh kuht in eis sie etwacack pwacye lah ohiyacn moul kuht moulkihn uh insese nuh ke kena luhn God.22Kain etwacack ingacn pa ma lukmac etweyuck ac tiac pa ma mwe lohacng yohk ke ma luhn facluh kuh ma sikyak ke moul uh. Sahyacna, oraclah wo ac kalweniyuck ke liyacacng olwelah uh pa inkacnek luhn moul ma wo nuh Sel.

Mwemwe lal Lehi ke Puk luhn Mormon ahkuhtweyac inkacnek kuht enenuh in ukwe uh, ma upac kuht fah sun uh, ac kahsruh luhn nguhn ma oasr in kahsrwe kuht in ukwe ac tuhkuh nuh yurin Mwet Lahngo. Fahsr nuh met ke inkacnek suwohs ac ohsrihksrihk pa ma El ke kuht in oruh uh. Ipeis fahko ke sahk soko ah ac “eklac forlah na pwacye nuh sin Leum”23pa mwe insewowo El kena nuh sesr in eis. Ohinge, El suli kuht in, “Fahsruh, ukweyuc.”24

Kwewana ahkyohkye luhlahlfongi ac ukwe Jisus Kraist pa ahkolah fal nuh ke kuhlwacnsuhpwacl.

Kuhlwacnsapwacl

“Tuh sie mwet ac etuh fuhkah mwet kol se suc el soenna kuhlwacnsapuh, ac sue sie mwet sac nuh sel, ac el loeslac liki nuhnak ac kena luhn inisacl?”25

Kuht ac muhtwacwacack in etwaclah Leum na pwacye ke kuht kuhlwacnsapwacl ac orekma ke tohkohsrahi Lal. Ke kuht oruh oacna, El ac ahkinsewowoye kuht ke kahsruh wolacna, mwe sang luhn nguhn, ac ahkyohkye kuh. Kuht tiacna muhkwena ke kuht orekma ke imac in grape Lal uh.

El fahkwack lah el fah som ye muhtahsr, El fah oasr ke lacpoh lacyot ac lacsac lasr uh, Nguhn Lal fah oan insiyacsr, lihpufacn Lal fah raunikuhtlac in sruhkkuhtyak.26

Kuht ac etwaclah Mwet Lahngo ke kuht oruh kuhiyacsr in som nuh ke acn El ke kuht in som nuh we, ke kuht kwacfweacng in fahk ma El ke kuht in fahk, ac ke kuht eklac ma El ke kuht in eklac nuh kac.27Ke kuht fahkwack na pwacye enenuh yohk lasr nuh Sel, El ac ahkyohkye kuh lasr in kuhlwacnsap yohk liki met ah. Kais kuhtuh, kena lasr uh fah suwohs likina met ah nuh ke kena Lal, ac srihpac Lal uh eklac srihpac lasr, pa oruh kuht fah “tiac ke ma lain kena [Lal] uh.”28

In kuhlwacnsapwacl enenuh nguhnasr, kuhiyacsr, nuhnkwacsr, fokokoiyacsr kwewa.29Pa oruh, kuhlwacng in kuhlwacnsapuh mwet sahyac kuhtanglah atac insefuhlwact ac srohwohsr luhn mwet luhngse ma luhn facluh. Kuht kapkapwack in luhngse mwet suc kuht kuhlwacnsapuh. Ac ke srihpen kuhlwacnsapuh mwet sahyac uh pa kuhlwacnsapuh God, kuht kapkapwack in luhngse El ac tamuhlwel ac tahmtahel wiyacsr yohk. Kain luhngse sacn sie mwe fahkwack ke mwe sang luhn nguhn ke luhngse muhtahl, suc pa luhngse nwacsnwacs luhn Kraist.30

“Pruhe nuh sin Pahpah ke kuhiyen insiyowos nohfohn, tuh kowos kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist; tuh kowos in kuh in wen nuhtin God; tuh ke Elac fah sikme kuht fah oacna El, tuh kuht ac fah liyacl oacna El uh; tuh in oasr finsrak se inge yohrohsr; tuh kuht in kuh in ahknwacsnwacsyeyucklac oacna ke El nwacsnwacs.”31

Kuht ac muhtwacwacack in etuh Leum ke kuht nwacnwaclah ke luhngse Lal uh.

Luhlahlfongi in El

Yac ma kuh se in ahkyohkye luhlahlfongi in El, ukwacl, kuhlwacnsapwacl, tuhsruhk tiac luhlahlfongi in El?

Nga etuh mempucr ke Alu uh suc eis muh pwacye mwe luti ac ip yohk lun ma suhmuhslah uh ac fahkwack ke acn in sramsram se inge. Tuhsruhktuh upac nuh selos in luhlahlfongi lah ma pwacye luhn wosasuc uh kapsrweyuck yohkna nuh ke moul lalos ac nuh ke ohiyaclos. Oacna in oasr luhlahlfongi lalos ke Mwet Lahngo, tuhsruhk elos tiacna luhlahlfongi lah mwe insewowo uliyucklac Lal uh oasr nuh selos kuh kuh in sikyak ke moul lalos. Nga ohsun pac nuh sin tamuhlwel ac tahmtahel suc ahkfalye kunohkohn lalos ke ohiyac wo uh tuhsruhk suc wosasuc fohlohkyak uh soenna sie ma pwacye fokoko ac eklac ke moul lalos uh. Kuht ac etwaclah Leum ke kuht tiac luhlahlfongi in El muhkwena tuhsruhk luhlahlfongwel pac ac ma pwacye Lal uh.

Ke Wuhlweacng Sasuc an, sie pahpah siyuck sin Mwet Lahngo in onwelah tuhlihk se nahtuhl. Jisus el topuk:

“Aok, kom sifacna fin ku! Ma nukewa ku nu sel su lulalfongi.

“In pacl sacna papa sac wowoyak ac fahk nu sel, Nga lulalfongi, tu soenna fal, kasreyu akyokye lulalfongi luk uh!”32

Nga motko pacl puhs nguhsr se luhn pahpah se inge: “Kahsrweyuc ahkyohkye luhlahlfongi luhk uh.” Nga nuhnkuh fin srihke ke nguhsr luhn mwet uh tiac ma in kahsrwel na luhlahlfongi lah Jisus pa Mwet Molwelah lasr uh ac ke kuh in onwelah Lal. Sahp el ahkkahlwemye tari lah Kraist pa Wen nuhtin God. Tuhsruhk sahp el enenuh kahsruh in luhlahlfongi pwacyena kuh in onwelah luhn Mwet Kol kuh in ma se na ac nuh sin kais sie in kuh in ahkinsewowoye wen kuloh nahtuhl sifacna. El kuh in luhlahlfongi Kraist tuhsruhk tiac Kraist na kuh Kraist sifacna.

Kuht kwacna fahkwack luhlahlfongi ke ma kuht etuh muh pwacye, tuhsruhk sahp kihsen yohk emet nuh sesr kais sie pa lah kuht luhlahlfongi ma kuht etuh uh.

Akwuck muhtahl uh oreklac ke wal pwacye luhn pristut uh fal nuh ke luhlahlfongi Mwet Lahngo, muhtwacwacack in etwacllah, ac yohkna, luhlahlfongi ma kuht etuh uh.

“Melchizedek Pristut karihngihn wosasuc uh ac sruok ki lukmac ke tohkohsrahi uh, finne ki nuh ke etwacack luhn God.

“Ohinge, kuh ke ma luhn God ahkkahlwemyeyuck ke akwuck luhn Melchizedek Pristut.”33

Kuht luhlahlfongi ac muhtwacwacack in etwaclah Leum ke ki in etwacack luhn God lutiyuck ke Melchizedek Pristut ikucslah sruhngluhl ac oruh kuh nuh sesr kais sie in eis kuh ke ma luhn God ke moul lasr uh. Kuht luhlahlfongi ac muhtwacwacack in etwaclah Mwet Lahngo ke kuht Ukwacl ke eis ac luhlahlfongi in liyacacng akwuck muhtahl uh ac ahkyohkye in eis ohiyacl ke atacsr.34Kuht luhlahlfongi ac muhtwacwacack in etwaclah Kraist ke kuht sifacna puhlakihn eklac, unweyucklac, ahkkweyeyuck, ac kuh nwacsnwacs ke Iwaclah Lal. Kuht luhlahlfongi ac muhtwacwacack in etwaclah Mwet Kol ke “kuh luhn kahs lal [kapkapwack] yohrohsr,”35sihmlac ke nuhnak lasr ac insiacsr,36 ac ke kuht fah “tohllah nohfohn ma koluk [lasr] in etuh [Leum].”37

In luhlahlfongwel pa in luhlahlfongi lah mwe insewowo pucspucs Lal oasr ac kahsruh ke kais sie moul lasr ac sucu lasr uh. In luhlahlfongwel ke nguhnasr nohfohn38 ke kuht fahsr nuh met ke inkacnek in olwelah uh, fuhlweack nohfohn kena lasr nuh Sel, ac sang nuh ke ma yohk emet ac pacl Lal nuh sesr. In luhlahlfongwel—esacl oacna kuh ac olwelah pwacye Lal—suli motkweyac, mihs, ac engan nuh ke moul lasr uh.

Olwelah ac Fahkwack Luhlahlfongi

Ke sie lwen tok, “intwe nuhkwewa fah kotkoto. ac lohoh nuhkwewa fah taltal”39 lah Jisus pa Kraist. Ke lwen wolacna se ingacn, kuht ac fah etuh lah El etuh kais sie sesr ke ine. Ac nga lohoh ac olwelah lah kuht kuh in tiac etuh na ke Leum tuh oacyacpac etwacllah ke kuht ahkyohkye luhlahlfongi, ukwacl, kuhlwacnsapwacl, ac luhlahlfongwel. Nga fahkwack luhlahlfongi ke ma inge ke inen Jisus Kraist, amen.