“ຖ້າຫາກເຈົ້າໄດ້ຮູ້ຈັກເຮົາ”
ເຮົາພຽງແຕ່ຮູ້ເລື່ອງຂອງພຣະຜູ້ຊ່ວຍໃຫ້ລອດເທົ່ານັ້ນບໍ, ຫລືວ່າ ເຮົາກຳລັງຮູ້ຈັກພຣະອົງຢ່າງໃກ້ຊິດຫລາຍຂຶ້ນ? ເຮົາຈະມາຮູ້ຈັກພຣະຜູ້ເປັນເຈົ້າໄດ້ແນວໃດ?
ເມື່ອພຣະຜູ້ຊ່ວຍໃຫ້ລອດໄດ້ສິ້ນສຸດການເທດສະໜາຢູ່ເທິງເນີນພູ, ພຣະອົງໄດ້ເນັ້ນເຖິງຄວາມຈິງນິລັນດອນ ທີ່ວ່າ “ພຽງແຕ່ໂດຍການເຮັດຕາມພຣະປະສົງຂອງພຣະບິດາເທົ່ານັ້ນ ທີ່ຈະຊ່ວຍເຮົາໃຫ້ໄດ້ຮັບພຣະຄຸນຂອງພຣະບຸດໄດ້.”1
ພຣະອົງໄດ້ປະກາດວ່າ:
“ບໍ່ແມ່ນວ່າທຸກຄົນທີ່ເອີ້ນເຮົາວ່າ, ພຣະອົງເຈົ້າ, ພຣະອົງເຈົ້າ, ແລ້ວຈະເຂົ້າໄປໃນອານາຈັກຂອງພຣະເຈົ້າໄດ້; ເຂົ້າໄດ້ແຕ່ຜູ້ທີ່ປະຕິບັດຕາມນ້ຳພຣະໄທຂອງພຣະບິດາຂອງເຮົາ ຜູ້ຊຶ່ງຢູ່ໃນສະຫວັນ.
“ເມື່ອວັນພິພາກສາມາເຖິງ ຫລາຍຄົນຈະເວົ້າກັບເຮົາວ່າ, ພຣະອົງເຈົ້າເອີຍ, ພຣະອົງເຈົ້າເອີຍ, ພວກຂ້ານ້ອຍໄດ້ປະກາດຖ້ອຍຄຳຂອງພຣະເຈົ້າໃນນາມຂອງພຣະອົງ ພວກຂ້ານ້ອຍໄດ້ຂັບໄລ່ຜີມານຮ້າຍອອກ ແລະ ໄດ້ເຮັດການອັດສະຈັນຫລາຍປະການໃນນາມຂອງພຣະອົງບໍ່ແມ່ນບໍ?
“ເມື່ອນັ້ນ ເຮົາຈະປະກາດຕໍ່ພວກເຂົາວ່າ, ເຮົາບໍ່ເຄີຍຮູ້ຈັກພວກເຈົ້າ: ຈົ່ງຖອຍໜີໄປຈາກເຮົາເສຍ, ພວກເຈົ້າຄົນທີ່ເຮັດການຊົ່ວຮ້າຍເອີຍ.”2
ເຮົາມີຄວາມເຂົ້າໃຈຫລາຍຂຶ້ນເຖິງຄຳສອນນີ້ ຂະນະທີ່ເຮົາສະທ້ອນຄິດໄຕ່ຕອງເຖິງ ຂໍ້ຄວາມທີ່ຖືກດົນໃຈໃຫ້ແກ້ໄຂໃໝ່ນີ້. ສຳນວນຂອງພຣະຜູ້ເປັນເຈົ້າທີ່ຖືກລາຍງານຢູ່ໃນພຣະຄຣິສຕະທຳຄຳພີ ສະບັບກະສັດເຈມສ໌ ມີຄວາມໝາຍສຳຄັນ ທີ່ກ່າວວ່າ, “ເຮົາບໍ່ເຄີຍຮູ້ຈັກເຈົ້າ,” ແມ່ນຖືກປ່ຽນ ໃນການດັດແປງຂອງ ໂຈເຊັບ ສະມິດ ໃຫ້ເປັນວ່າ “ເຈົ້າບໍ່ເຄີຍຮູ້ຈັກເຮົາ.”3
ຂໍໃຫ້ພິຈະລະນາ ຄຳອຸປະມາເລື່ອງຍິງສາວບໍລິສຸດສິບຄົນ ນຳອີກ. ຂໍໃຫ້ຈຳຄືນວ່າ ຍິງສາວບໍລິສຸດທີ່ໂງ່ຈ້າ ແລະ ບໍ່ຕຽມພ້ອມຫ້າຄົນນັ້ນ ໄດ້ໄປຫາຊື້ນ້ຳມັນມາໃສ່ໂຄມໄຟຂອງພວກນາງ ຫລັງຈາກໄດ້ຍິນການເຊີນໃຫ້ເຂົ້າໄປ ແລະ ພົບເຈົ້າບ່າວ.
“ແລະ ໃນຂະນະທີ່ພວກເຂົາອອກໄປຊື້ນ້ຳມັນນັ້ນ, ເຈົ້າບ່າວກໍມາຮອດ ແລະ ຜູ້ທີ່ຕຽມພ້ອມຢູ່ແລ້ວກໍເຂົ້າໄປກັບເຈົ້າບ່າວໃນງານກິນລ້ຽງສົມຣົດ ແລະ ປະຕູກໍອັດ.
“ຫລັງຈາກນັ້ນ ພວກຍິງສາວຄົນອື່ນໆກໍມາຮອດ ແລະ ຮ້ອງວ່າ, ພຣະອົງເຈົ້າເອີຍ, ພຣະອົງເຈົ້າເອີຍ, ໂຜດໄຂປະຕູໃຫ້ພວກຂ້ານ້ອຍເຂົ້າໄປແດ່ທ້ອນ.
“ແຕ່ເພິ່ນໄດ້ຕອບວ່າ, ເຮົາບອກພວກເຈົ້າທັງຫລາຍຕາມຄວາມຈິງວ່າ, ເຮົາບໍ່ຮູ້ຈັກພວກເຈົ້າ.”4
ຄວາມສຳຄັນຂອງຄຳອຸປະມານີ້ ສຳລັບເຮົາແຕ່ລະຄົນ ກໍຖືກຂະຫຍາຍ ໂດຍການແກ້ດັດແປງໃໝ່ທີ່ຖືກດົນໃຈ. ສຳຄັນທີ່ສຸດຄື, ສຳນວນທີ່ວ່າ “ເຮົາບໍ່ຮູ້ຈັກພວກເຈົ້າ” ດັ່ງທີ່ໄດ້ລາຍງານໃນພຣະຄຣິສຕະທຳຄຳພີ ສະບັບກະສັດເຈມສ໌ ໄດ້ຖືກອະທິບາຍຢ່າງແຈ່ມແຈ້ງ ໃນການແປຂອງ ໂຈເຊັບ ສະມິດ ວ່າ “ພວກເຈົ້າບໍ່ຮູ້ຈັກເຮົາ.”5
ສຳນວນທີ່ວ່າ “ພວກເຈົ້າບໍ່ເຄີຍຮູ້ຈັກເຮົາ” ແລະ “ພວກເຈົ້າບໍ່ຮູ້ຈັກເຮົາ” ຄວນເປັນເຫດຂອງການປະເມີນຢ່າງເລິກຊຶ້ງທາງວິນຍານຂອງຕົວເຮົາເອງແຕ່ລະຄົນ. ເຮົາພຽງແຕ່ຮູ້ເລື່ອງຂອງພຣະຜູ້ຊ່ວຍໃຫ້ລອດເທົ່ານັ້ນບໍ, ຫລືວ່າ ເຮົາກຳລັງຮູ້ຈັກພຣະອົງຢ່າງໃກ້ຊິດຫລາຍຂຶ້ນ? ເຮົາຈະມາຮູ້ຈັກພຣະຜູ້ເປັນເຈົ້າໄດ້ແນວໃດ? ຄຳຖາມຈາກໃຈເຫລົ່ານີ້ຄືຄວາມເຈາະຈົງຂອງຂ່າວສານຂອງຂ້າພະເຈົ້າ. ຂ້າພະເຈົ້າຂໍເຊື້ອເຊີນຄວາມຊ່ອຍເຫລືອຈາກພຣະວິນຍານບໍລິສຸດຢ່າງຈິງໃຈ ຂະນະທີ່ເຮົາມາພິຈາລະນານຳກັນເຖິງຫົວຂໍ້ທີ່ສຳຄັນນີ້.
ການມາຮູ້ຈັກພຣະຜູ້ເປັນເຈົ້າ
ພຣະເຢຊູໄດ້ກ່າວວ່າ:
“ເຮົານີ້ແຫລະ ເປັນທາງນັ້ນ, ເປັນຄວາມຈິງ ແລະ ເປັນຊີວິດ: ບໍ່ມີຜູ້ໃດມາເຖິງພຣະບິດາເຈົ້າໄດ້, ນອກຈາກມາທາງເຮົາ.
“ບັດນີ້ເຈົ້າທັງຫລາຍຮູ້ຈັກເຮົາແລ້ວ, ແລະ ພວກເຈົ້າກໍຈະຮູ້ຈັກພຣະບິດາເຈົ້າຂອງເຮົາເໝືອນກັນ.”6
ເຮົາມາຮູ້ຈັກພຣະບິດາ ເມື່ອເຮົາມາຮູ້ຈັກພຣະບຸດທີ່ຮັກຂອງພຣະອົງ.
ຈຸດປະສົງທີ່ສຳຄັນຢ່າງໜຶ່ງຂອງຊີວິດມະຕະ ບໍ່ແມ່ນພຽງແຕ່ຈະຮຽນຮູ້ກ່ຽວກັບພຣະບຸດອົງດຽວທີ່ຖືກຳເນີດຂອງພຣະບິດາເທົ່ານັ້ນ ແຕ່ຍັງເປັນການພະຍາຍາມທີ່ຈະຮູ້ຈັກພຣະອົງ. ຂັ້ນຕອນທີ່ສຳຄັນສີ່ຂັ້ນ ທີ່ສາມາດຊ່ວຍເຮົາໃຫ້ມາຮູ້ຈັກພຣະຜູ້ເປັນເຈົ້າ ຄື ການໃຊ້ສັດທາໃນພຣະອົງ, ການຕິດຕາມພຣະອົງ, ການຮັບໃຊ້ພຣະອົງ, ແລະ ການເຊື່ອພຣະອົງ.
ການໃຊ້ສັດທາໃນພຣະອົງ
ການໃຊ້ສັດທາໃນພຣະເຢຊູຄຣິດ ແມ່ນການເພິ່ງອາໄສພຣະຄຸນຄວາມດີ, ຄວາມເມດຕາ, ແລະ ພຣະຄຸນຂອງພຣະອົງ.7 ເຮົາເລີ່ມຕົ້ນມາຮູ້ຈັກພຣະຜູ້ຊ່ວຍໃຫ້ລອດ ເມື່ອເຮົາເລີ່ມຕົ້ນໃຊ້ຄວາມສາມາດທາງວິນຍານຂອງເຮົາ ແລະ ລອງໃຊ້ມັນໃນຄຳສອນຂອງພຣະອົງ, ຈົນກວ່າເຮົາຈະຮັບເອົາຄຳສອນພາກສ່ວນໃດໜຶ່ງຂອງພຣະອົງໄວ້.8 ເມື່ອສັດທາຂອງເຮົາໃນພຣະຜູ້ເປັນເຈົ້າມີເພີ່ມຫລາຍຂຶ້ນ, ເຮົາຈະໄວ້ວາງໃຈໃນພຣະອົງ ແລະ ມີຄວາມໝັ້ນໃຈ ໃນອຳນາດຂອງພຣະອົງ ທີ່ຈະໄຖ່, ປິ່ນປົວ, ແລະ ເພີ່ມຄວາມເຂັ້ມແຂງໃຫ້ເຮົາ.
ສັດທາທີ່ແທ້ຈິງນັ້ນແມ່ນການມີພື້ນຖານຢູ່ໃນພຣະຜູ້ເປັນເຈົ້າ ແລະ ເຈາະຈົງຢູ່ທີ່ພຣະອົງ ແລະ ຈະກະຕຸ້ນໃຫ້ເຮົາກະທຳຢ່າງຊອບທຳສະເໝີ. “ສັດທາໃນພຣະຄຣິດ [ຄື] ຫລັກທຳຂໍ້ທີໜຶ່ງໃນສາດສະໜາທີ່ຖືກຟື້ນຟູ, ... ເປັນພື້ນຖານຂອງຄວາມຊອບທຳທັງໝົດ ... ແລະ ເປັນຫລັກທຳແຫ່ງການກະທຳໃນມະນຸດທີ່ມີສະຕິປັນຍາທຸກຄົນ.”9 ເພາະວ່າການກະທຳທີ່ສອດຄ່ອງກັບຫລັກທຳທີ່ຖືກຕ້ອງ ທີ່ພຣະຜູ້ໄຖ່ໄດ້ປະກາດນັ້ນ ເປັນຈຸດໃຈກາງຂອງການໄດ້ຮັບ ແລະ ການໃຊ້ສັດທີ່ແທ້ຈິງ, ເພາະ “ສັດທາທີ່ບໍ່ມີການປະຕິບັດນັ້ນກໍໄຮ້ຜົນ.”10 ເຮົາຕ້ອງບໍ່ “ພຽງແຕ່ຟັງພຣະທຳຂອງພຣະເຈົ້າເທົ່ານັ້ນ, ແຕ່ຈົ່ງປະຕິບັດຕາມພຣະທຳນັ້ນຢ່າງແທ້ຈິງ.”11
ການໄດ້ຍິນພຣະຄຳຂອງພຣະເຈົ້າ ແລະ ການໄດ້ຮັບຂອງປະທານທາງວິນຍານ ຊຶ່ງເປັນສັດທາໃນພຣະຜູ້ຊ່ວຍໃຫ້ລອດແມ່ນກ່ຽວພັນກັນແທ້ໆ, ເພາະ “ຄວາມເຊື່ອເກີດຂຶ້ນໄດ້ກໍເພາະການໄດ້ຍິນ, ແລະ ການໄດ້ຍິນເກີດຂຶ້ນໄດ້ກໍເພາະການປະກາດເລື່ອງພຣະຄຣິດ.”12 ເຮົາມາຮູ້ຈັກພຣະອົງ ແລະ ສຸລະສຽງຂອງພຣະອົງເມື່ອເຮົາສຶກສາ ແລະ ຊື່ນຊົມຢູ່ກັບພຣະຄຳຂອງພຣະອົງໃນພຣະຄຳພີ,13 ອະທິຖານຫາພຣະບິດາໃນພຣະນາມຂອງພຣະອົງ ດ້ວຍເຈດຕະນາທີ່ແທ້ຈິງ,14 ແລະ ສະແຫວງຫາການເປັນເພື່ອນຂອງພຣະວິນຍານບໍລິສຸດຢູ່ຕະຫລອດເວລາ.15 ການຮຽນຮູ້ ແລະ ການນຳໃຊ້ຄຳສອນຂອງພຣະຄຣິດໃນຊີວິດຂອງເຮົາ ເປັນສິ່ງທີ່ເຮົາຕ້ອງເຮັດກ່ອນຈະໄດ້ຮັບຂອງປະທານແຫ່ງສັດທາໃນພຣະອົງ.16
ການໃຊ້ສັດທາໃນພຣະຜູ້ເປັນເຈົ້າ ແມ່ນການຕຽມພ້ອມທີ່ຈຳເປັນ ສຳລັບການຕິດຕາມພຣະອົງ.
ການຕິດຕາມພຣະອົງ
“ແລະ ຂະນະທີ່ພຣະເຢຊູກຳລັງຍ່າງໄປຕາມແຄມທະເລສາບຄາລີເລນັ້ນ, ພຣະອົງກໍເຫັນສອງອ້າຍນ້ອງທີ່ເປັນຄົນຫາປາ, ຜູ້ໜຶ່ງຊື່ວ່າຊີໂມນ, (ຍັງມີຊື່ອີກວ່າ ເປໂຕ) ແລະ ນ້ອງຊາຍຂອງເພິ່ນຊື່ວ່າ ອັນເດອາ, ພວກເພິ່ນກຳລັງຖິ້ມມອງຫາປາລົງໃນທະເລສາບ.
“ພຣະເຢຊູກ່າວແກ່ພວກເພິ່ນວ່າ, ຈົ່ງຕາມເຮົາມາ ແລະ ເຮົາຈະສອນພວກເຈົ້າໃຫ້ເປັນຜູ້ຫາຄົນ.
“ໃນທັນໃດນັ້ນ ພວກເພິ່ນກໍປະມອງໄວ້ ແລະ ຕິດຕາມໄປກັບພຣະອົງ.”17
ເປໂຕ ແລະ ອັນເດອາ ເປັນຕົວຢ່າງທີ່ເຂັ້ມແຂງ ຂອງການໄດ້ຍິນ ແລະ ການຕິດຕາມພຣະອາຈານ.
ພຣະຜູ້ຊ່ວຍໃຫ້ລອດກໍແນະນຳທ່ານ ແລະ ຂ້າພະເຈົ້ານຳອີກວ່າ: “ຖ້າຜູ້ໃດຢາກຕາມເຮົາມາ, ໃຫ້ຜູ້ນັ້ນຕັດສິດຂອງຕົນ, ຮັບແບກຫາບໄມ້ກາງແຂນຂອງຕົນ ແລ້ວຕິດຕາມເຮົາມາ.”18 ທີ່ຈະຮັບແບກຫາບໄມ້ກາງແຂນຂອງຕົນ ຄືການປະຕິເສດຕົວເອງຈາກຄວາມບໍ່ເປັນເໝືອນດັ່ງພຣະເຈົ້າທຸກຢ່າງ ແລະ ຕັນຫາລາຄະຂອງໂລກທັງໝົດ ແລະ ຮັກສາພຣະບັນຍັດຂອງພຣະຜູ້ເປັນເຈົ້າ.19
ພຣະຜູ້ຊ່ວຍໃຫ້ລອດໄດ້ສັ່ງໃຫ້ເຮົາກາຍເປັນເໝືອນດັ່ງພຣະອົງ.20 ດັ່ງນັ້ນ, ການຕິດຕາມພຣະຜູ້ເປັນເຈົ້າຮ່ວມດ້ວຍ ການເຮັດຕາມຕົວຢ່າງຂອງພຣະອົງ. ເຮົາມາຮູ້ຈັກພຣະຜູ້ເປັນເຈົ້າຢ່າງຕໍ່ເນື່ອງເມື່ອເຮົາສະແຫວງຫາທີ່ຈະເປັນເໝືອນດັ່ງພຣະອົງ ຜ່ານອຳນາດແຫ່ງຫານຊົດໃຊ້ຂອງພຣະອົງ.
ໃນການປະຕິບັດສາດສະໜາກິດຂອງພຣະອົງ, ພຣະເຢຊູໄດ້ສະແດງໃຫ້ເຫັນເສັ້ນທາງ, ໄດ້ນຳທາງນັ້ນ, ແລະ ໄດ້ເປັນຕົວຢ່າງທີ່ດີພ້ອມ. ຄວາມຄິດທີ່ຖືກຕ້ອງເຖິງບຸກຄະລິກລັກສະນະ, ຄວາມດີພ້ອມ, ແລະ ຄຸນສົມບັດຂອງພຣະອົງ21 ຈັດໃຫ້ເຮົາມີຈຸດປະສົງອັນເປັນນິດ ແລະ ການຊີ້ນຳທີ່ແຈ່ມແຈ້ງ ຂະນະທີ່ເຮົາຕິດຕາມພຣະອົງໄປໃນເສັ້ນທາງແຫ່ງການເປັນສານຸສິດທີ່ອຸທິດຕົນ.
ການຕິດຕາມພຣະຜູ້ຊ່ວຍໃຫ້ລອດຍັງເຮັດໃຫ້ເຮົາສາມາດໄດ້ຮັບຄວາມຮູ້ແທ້ນຳອີກວ່າ ວິທີທີ່ເຮົາດຳລົງຊີວິດຂອງເຮົານັ້ນ22 ແມ່ນສອດຄ່ອງກັບພຣະປະສົງຂອງພຣະເຈົ້າ. ຄວາມຮູ້ດັ່ງກ່າວບໍ່ແມ່ນຄວາມລຶກລັບທີ່ບໍ່ເປັນທີ່ຮູ້ໄດ້ ແລະ ບໍ່ແມ່ນເຈາະຈົງໃສ່ແຕ່ການໄຕ່ຕາມຫາທາງໂລກຂອງເຮົາ ຫລື ເປັນຄວາມຫ່ວງໃຍທຳມະດາທາງຊີວິດມະຕະ. ແຕ່ເປັນຄວາມກ້າວໜ້າທີ່ໝັ້ນຄົງ ແລະ ສະໝ່ຳສະເໝີຢູ່ໃນເສັ້ນທາງແຫ່ງພັນທະສັນຍາ ທີ່ເປັນເສັ້ນທາງແຫ່ງຊີວິດທີ່ເຮັດໃຫ້ພຣະຜູ້ເປັນເຈົ້າພໍພຣະໄທ.
ຄວາມຝັນຂອງລີໄຮໃນພຣະຄຳພີມໍມອນບອກເຖິງເສັ້ນທາງທີ່ເຮົາຄວນຕິດຕາມ, ການທ້າທາຍທີ່ເຮົາຈະປະເຊີນໜ້າ, ແລະ ແຫລ່ງທາງວິນຍານທີ່ມີໄວ້ໃຫ້ເພື່ອຊ່ວຍເຫລືອເຮົາໃນການຕິດຕາມ ແລະ ການເຂົ້າມາຫາພຣະຜູ້ຊ່ອຍໃຫ້ລອດ. ການມຸ້ງໄປໜ້າໃນເສັ້ນທາງທີ່ຄັບແຄບຄືສິ່ງທີ່ພຣະອົງປະສົງໃຫ້ເຮົາເຮັດ. ການຊີມລົດຊາດຂອງໝາກໄມ້ຂອງຕົ້ນໄມ້ ແລະ ການມາ “ປ່ຽນໃຈເຫລື້ອມໃສໃນພຣະຜູ້ເປັນເຈົ້າ”23 ເປັນພອນທີ່ພຣະອົງປະສົງໃຫ້ເຮົາໄດ້ຮັບ. ສະນັ້ນ, ພຣະອົງຈຶ່ງເຊື້ອເຊີນເຮົາວ່າ, “ຈົ່ງຕາມເຮົາມາ.”24
ການໃຊ້ສັດທາ ແລະ ການຕິດຕາມພຣະເຢຊູຄຣິດເປັນການຕຽມພ້ອມທີ່ຈຳເປັນສຳລັບການຮັບໃຊ້ພຣະອົງ.
ການຮັບໃຊ້ພຣະອົງ
“ເພາະແມ່ນໃຜຈະຮູ້ຈັກນາຍຜູ້ເຂົາບໍ່ເຄີຍຮັບໃຊ້ ແລະ ຊຶ່ງເປັນຄົນແປກໜ້າສຳລັບເຂົາ, ແລະ ຢູ່ໄກຈາກຄວາມນຶກຄິດ ແລະ ເຈດຕະນາຂອງໃຈເຂົາ?”25
ເຮົາຈະມາຮູ້ຈັກພຣະຜູ້ເປັນເຈົ້າຫລາຍຂຶ້ນເມື່ອເຮົາຮັບໃຊ້ພຣະອົງ ແລະ ທຳງານຢູ່ໃນອານາຈັກຂອງພຣະອົງ. ເມື່ອເຮົາເຮັດດັ່ງນີ້, ພຣະອົງຈະປະທານພອນໃຫ້ເຮົາຢ່າງເພື່ອແຜ່ ດ້ວຍຄວາມຊ່ວຍເຫລືອຈາກສະຫວັນ, ຂອງປະທານທາງວິນຍານ, ແລະ ຄວາມສາມາດທີ່ເພີ່ມທະວີຂຶ້ນ. ເຮົາຈະບໍ່ຖືກປະໃຫ້ຢູ່ຕາມລຳພັງ ເມື່ອເຮົາເຮັດວຽກງານໃນສວນອະງຸ່ນຂອງພຣະອົງ.
ພຣະອົງໄດ້ປະກາດວ່າ ພຣະອົງຈະອອກໜ້າເຮົາ. ພຣະອົງຈະຢູ່ທາງຂວາມືເຮົາ ແລະ ທາງຊ້າຍມືເຮົາ. ພຣະວິນຍານຂອງພຣະອົງຈະຢູ່ໃນໃຈເຮົາ, ແລະ ທູດຂອງພຣະອົງຈະຢູ່ອ້ອມຮອບເຮົາ, ເພື່ອຄ້ຳຊູເຮົາໄວ້.26
ເຮົາມາຮູ້ຈັກພຣະຜູ້ຊ່ວຍໃຫ້ລອດ ເມື່ອເຮົາເຮັດສຸດຄວາມສາມາດທີ່ຈະໄປໃນບ່ອນທີ່ພຣະອົງປະສົງໃຫ້ເຮົາໄປ, ຂະນະທີ່ເຮົາພະຍາຍາມທີ່ຈະກ່າວສິ່ງທີ່ພຣະອົງປະສົງໃຫ້ເຮົາກ່າວ, ແລະ ເມື່ອເຮົາກາຍເປັນຜູ້ຄົນທີ່ພຣະອົງປະສົງໃຫ້ເຮົາກາຍເປັນ.27 ເມື່ອເຮົາຍອມຮັບຄວາມເພິ່ງພາທັງໝົດຂອງເຮົາໃນພຣະອົງຢ່າງນອບນ້ອມ, ພຣະອົງຈະຂະຫຍາຍຄວາມສາມາດຂອງເຮົາ ທີ່ຈະຮັບໃຊ້ດ້ວຍປະສິດທິພາບຫລາຍຂຶ້ນ. ເທື່ອລະເລັກເທື່ອລະນ້ອຍ, ຄວາມປາດຖະໜາຂອງເຮົາຈະສອດຄ່ອງຢ່າງສົມບູນຄົບຖ້ວນກັບພຣະປະສົງຂອງພຣະອົງ, ແລະ ພຣະປະສົງຂອງພຣະອົງກໍຈະກາຍເປັນຈຸດປະສົງຂອງເຮົາ, ແລ້ວເຮົາຈະ “ບໍ່ຂໍສິ່ງທີ່ກົງກັນຂ້າມກັບພຣະປະສົງ [ຂອງພຣະອົງ] ເລີຍ.”28
ການຮັບໃຊ້ພຣະອົງຮຽກຮ້ອງ ໃຈ, ພະລັງ, ຄວາມຄິດ ແລະ ກຳລັງທັງໝົດຂອງເຮົາ.29 ດັ່ງນັ້ນ, ການຮັບໃຊ້ຄົນອື່ນຢ່າງບໍ່ເຫັນແກ່ຕົວເອົາຊະນະແນວໂນ້ມທີ່ເຫັນແກ່ຕົວຂອງມະນຸດທີ່ມີຈິດໃຈທຳມະດາ. ເຮົາຈະຮັກຄົນທີ່ຮັບໃຊ້ຫລາຍຂຶ້ນ. ແລະ ເພາະວ່າການຮັບໃຊ້ຄົນອື່ນກໍເປັນການຮັບໃຊ້ພຣະເຈົ້າ, ເຮົາກໍຈະຮັກພຣະອົງ ແລະ ອ້າຍເອື້ອຍນ້ອງຂອງເຮົາຫລາຍຂຶ້ນ. ຄວາມຮັກດັ່ງກ່າວຈະສະແດງໃຫ້ປະຈັກເຖິງຂອງປະທານທາງວິນຍານແຫ່ງຄວາມໃຈບຸນ, ຊຶ່ງເປັນຄວາມຮັກອັນບໍລິສຸດຂອງພຣະຄຣິດ.30
“ຈົ່ງອະທິຖານຫາພຣະບິດາດ້ວຍສຸດພະລັງແຫ່ງໃຈ, ເພື່ອທ່ານຈະເຕັມໄປດ້ວຍຄວາມຮັກນີ້, ຊຶ່ງພຣະອົງປະທານໃຫ້ທຸກຄົນຊຶ່ງເປັນຜູ້ຕິດຕາມທີ່ແທ້ຈິງຂອງພຣະເຢຊູຄຣິດ, ພຣະບຸດຂອງພຣະອົງ; ເພື່ອທ່ານຈະໄດ້ກາຍເປັນບຸດຂອງພຣະເຈົ້າ; ເມື່ອພຣະອົງສະເດັດມາ ເຮົາຈະເປັນເໝືອນດັ່ງພຣະອົງ, ເພາະວ່າເຮົາຈະເຫັນພຣະອົງຢ່າງທີ່ພຣະອົງເປັນຢູ່ນັ້ນ, ເພື່ອເຮົາຈະມີຄວາມຫວັງນີ້; ຄືເຮົາຈະຖືກເຮັດໃຫ້ບໍລິສຸດຄືກັນກັບພຣະອົງທີ່ບໍລິສຸດ.”31
ເຮົາມາຮູ້ຈັກພຣະຜູ້ເປັນເຈົ້າ ເມື່ອເຮົາເຕັມໄປດ້ວຍຄວາມຮັກຂອງພຣະອົງ.
ການເຊື່ອພຣະອົງ
ມັນເປັນໄປໄດ້ບໍທີ່ຈະໃຊ້ສັດທາໃນພຣະອົງ, ຕິດຕາມພຣະອົງ, ຮັບໃຊ້ພຣະອົງ, ແຕ່ບໍ່ເຊື່ອພຣະອົງ?
ຂ້າພະເຈົ້າຮູ້ຈັກສະມາຊິກ ຜູ້ທີ່ຍອມຮັບຄຳສອນ ແລະ ຫລັກທຳທີ່ມີຢູ່ໃນພຣະຄຳພີ ແລະ ທີ່ຖືກປະກາດຈາກແທ່ນປາໄສນີ້ ວ່າເປັນຄວາມຈິງ. ແຕ່ເຂົາເຈົ້າມີບັນຫາທີ່ຈະເຊື່ອວ່າ ຄວາມຈິງແຫ່ງພຣະກິດຕິຄຸນເຫລົ່ານີ້ກ່ຽວພັນໂດຍສະເພາະໃນຊີວິດ ແລະ ສະຖານະການຂອງເຂົາເຈົ້າ. ເຂົາເຈົ້າເບິ່ງຄືວ່າມີສັດທາໃນພຣະຜູ້ຊ່ວຍໃຫ້ລອດ, ແຕ່ເຂົາເຈົ້າບໍ່ເຊື່ອວ່າພອນທີ່ພຣະອົງໄດ້ສັນຍາໄວ້ນັ້ນມີໄວ້ໃຫ້ເຂົາເຈົ້າ ຫລື ວ່າຈະນຳໃຊ້ໄດ້ໃນຊີວິດຂອງເຂົາເຈົ້າ. ຂ້າພະເຈົ້າຍັງໄດ້ພົບເຫັນອ້າຍເອື້ອຍນ້ອງຄົນອື່ນນຳອີກ ຜູ້ທີ່ບັນລຸໜ້າທີ່ຂອງຕົນ ແຕ່ພຣະກິດຕິຄຸນທີ່ຖືກຟື້ນຟູແລ້ວຍັງບໍ່ໄດ້ເປັນຄວາມຈິງທີ່ມີຊີວິດຊີວາ ແລະ ການປ່ຽນແປງໃນຊີວິດຂອງເຂົາເຈົ້າ. ເຮົາມາຮູ້ຈັກພຣະຜູ້ເປັນເຈົ້າເມື່ອເຮົາບໍ່ພຽງແຕ່ເຊື່ອໃນພຣະອົງ ແຕ່ເຊື່ອພຣະອົງ ແລະ ເຊື່ອໃນສິ່ງທີ່ພຣະອົງໄດ້ສັນຍາໄວ້ໃຫ້.
ໃນພຣະຄຳພີໃໝ່, ພໍ່ຄົນໜຶ່ງໄດ້ທູນຂໍໃຫ້ພຣະຜູ້ຊ່ວຍໃຫ້ລອດປິ່ນປົວລູກຂອງລາວ. ພຣະເຢຊູໄດ້ຕອບວ່າ:
“ທຸກສິ່ງເປັນໄປໄດ້ສຳລັບຜູ້ທີ່ເຊື່ອ.
“ໃນທັນໃດນັ້ນ ພໍ່ຂອງເດັກນ້ອຍນັ້ນໄດ້ຮ້ອງໄຫ້ທັງນ້ຳຕາໄຫລ ກ່າວວ່າ, ໂຜດຊ່ວຍຂ້ານ້ອຍໃຫ້ມີຄວາມເຊື່ອຫລາຍກວ່ານີ້ແດ່ທ້ອນ.”32
ຂ້າພະເຈົ້າໄດ້ຄິດໄຕ່ຕອງຫລາຍເທື່ອເຖິງການທູນຂໍຂອງພໍ່ຄົນນີ້ທີ່ວ່າ: “ໂຜດຊ່ວຍຂ້ານ້ອຍໃຫ້ມີຄວາມເຊື່ອຫລາຍກວ່ານີ້ແດ່ທ້ອນ.” ຂ້າພະເຈົ້າຄິດຖ້າຫາກວ່າເຈດຕະນາຂອງການທູນຂໍຊາຍຄົນນັ້ນບໍ່ແມ່ນພຽງແຕ່ຈະຊ່ວຍໃຫ້ລາວເຊື່ອໃນພຣະເຢຊູວ່າເປັນພຣະຜູ້ໄຖ່ຂອງເຮົາ ແລະ ໃນອຳນາດທີ່ຈະປິ່ນປົວຂອງພຣະອົງເທົ່ານັ້ນ. ລາວອາດໄດ້ຍອມຮັບແລ້ວວ່າພຣະຄຣິດເປັນພຣະບຸດຂອງພຣະເຈົ້າ. ແຕ່ບາງທີລາວຕ້ອງການຄວາມຊ່ວຍເຫລືອທີ່ຈະເຊື່ອວ່າອຳນາດການປິ່ນປົວຂອງພຣະອາຈານ ສາມາດເປັນເລື່ອງສ່ວນບຸກຄົນໄດ້ ແລະ ເປັນສ່ວນຕົວທີ່ມັນຈະໃຫ້ພອນລູກຊາຍທີ່ຮັກຂອງລາວເອງໄດ້. ລາວອາດໄດ້ເຊື່ອໃນພຣະຄຣິດໂດຍທົ່ວໄປ ແຕ່ບໍ່ໄດ້ເຊື່ອພຣະຄຣິດໂດຍສະເພາະ ແລະ ໂດຍສ່ວນຕົວ.
ເຮົາມັກຈະເປັນພະຍານເຖິງສິ່ງທີ່ເຮົາຮູ້ວ່າຈິງ, ແຕ່ບາງເທື່ອຄຳຖາມທີ່ສຳຄັນສຳລັບເຮົາແຕ່ລະຄົນແມ່ນວ່າ ເຮົາເຊື່ອສິ່ງທີ່ເຮົາຮູ້ຫລືບໍ່.
ພິທີການສັກສິດທີ່ຖືກດຳເນີນໂດຍສິດອຳນາດທີ່ຖືກຕ້ອງແມ່ນຈຳເປັນສຳລັບການເຊື່ອພຣະຜູ້ຊ່ວຍໃຫ້ລອດ, ການມາຮູ້ຈັກພຣະອົງ, ແລະ ໃນທີ່ສຸດ, ການເຊື່ອສິ່ງທີ່ເຮົາຮັບຮູ້.
ຖານະປະໂລຫິດ [ແຫ່ງເມນຄີເສເດັກ] ປະຕິບັດພຣະກິດຕິຄຸນ ແລະ ຖືຂໍກະແຈແຫ່ງຄວາມລຶກລັບ ຂອງອານາຈັກ, ແມ່ນແຕ່ ຂໍກະແຈແຫ່ງຄວາມຮູ້ຂອງພຣະເຈົ້າ.
ສະນັ້ນ, ໃນພິທີການດັ່ງກ່າວ, ອຳນາດຂອງຄວາມເປັນເໝືອນພຣະເຈົ້າຈະສະແດງໃຫ້ປະຈັກ.33
ເຮົາເຊື່ອ ແລະ ມາຮູ້ຈັກພຣະຜູ້ເປັນເຈົ້າເມື່ອຂໍກະແຈແຫ່ງຄວາມຮູ້ຂອງພຣະເຈົ້າຖືກປະຕິບັດຜ່ານຖານະປະໂລຫິດແຫ່ງເມນຄີເສເດັກ ເປີດປະຕູ ແລະ ເຮັດໃຫ້ມັນເປັນໄປໄດ້ສຳລັບເຮົາແຕ່ລະຄົນ ທີ່ຈະໄດ້ຮັບອຳນາດຂອງຄວາມເປັນເໝືອນພຣະເຈົ້າໃນຊີວິດຂອງເຮົາ. ເຮົາເຊື່ອ ແລະ ມາຮູ້ຈັກພຣະຜູ້ຊ່ວຍໃຫ້ລອດເມື່ອເຮົາຕິດຕາມພຣະອົງ ໂດຍການຮັບເອົາ ແລະ ຮັກສາພິທີການສັກສິດຢ່າງຊື່ສັດ ແລະ ມີເງົາຂອງພຣະອົງໄວ້ໃນໃບໜ້າຂອງເຮົາຫລາຍຂຶ້ນ.34 ເຮົາເຊື່ອ ແລະ ມາຮູ້ຈັກພຣະຄຣິດເມື່ອເຮົາປະສົບກັບອຳນາດແຫ່ງການປ່ຽນແປງ, ການປິ່ນປົວ, ການເພີ່ມພະລັງ ແລະ ການຊຳລະລ້າງຂອງການຊົດໃຊ້ຂອງພຣະອົງ. ເຮົາເຊື່ອ ແລະ ມາຮູ້ຈັກພຣະອາຈານເມື່ອ “ອຳນາດຂອງພຣະຄຳຂອງພຣະອົງ [ອອກຮາກ] ຢູ່ກັບເຮົາ”35 ແລະ ຖືກບັນຈຸໄວ້ໃນຈິດໃຈ ແລະ ຫົວໃຈຂອງເຮົາ36 ແລະ ເມື່ອເຮົາ “ປະຖິ້ມບາບ [ຂອງເຮົາ] ທັງໝົດເພື່ອຈະໄດ້ຮູ້ຈັກ [ພຣະອົງ].”37
ການເຊື່ອພຣະອົງຄື ການໄວ້ພຣະໄທວ່າພອນຢ່າງຫລວງຫລາຍຂອງພຣະອົງກໍມີໄວ້ໃຫ້ ແລະ ນຳໃຊ້ໄດ້ໃນຊີວິດສ່ວນບຸກຄົນ ແລະ ຄອບຄົວຂອງເຮົາ. ການເຊື່ອພຣະອົງດ້ວຍສຸດຈິດວິນຍານຂອງເຮົາ38 ຈະມີມາຂະນະທີ່ເຮົາມຸ້ງໄປໜ້າ ຢູ່ໃນເສັ້ນທາງແຫ່ງພັນທະສັນຍາ, ມອບປະສົງຂອງເຮົາໃຫ້ພຣະອົງ, ແລະ ຍອມຮັບຄວາມສຳຄັນ ແລະ ເວລາຂອງພຣະອົງສຳລັບເຮົາ. ການເຊື່ອພຣະອົງ—ຍອມຮັບວ່າອຳນາດ ແລະ ຄຳສັນຍາຂອງພຣະອົງຈິງ—ເຊື້ອເຊີນທັດສະນະມຸມມອງ, ຄວາມສະຫງົບ ແລະ ຄວາມສຸກ ໃຫ້ເຂົ້າມາສູ່ຊີວິດຂອງເຮົາ.
ຄຳສັນຍາ ແລະ ປະຈັກພະຍານ
ໃນວັນຂ້າງໜ້າ, ທຸກຫົວເຂົ່າຈະຄຸລົງ, ແລະ ທຸກລີ້ນຈະສາລະພາບ39 ວ່າພຣະເຢຊູຄືພຣະຄຣິດ. ໃນວັນທີ່ປະເສີດນັ້ນ, ເຮົາຈະຮູ້ວ່າພຣະອົງຮູ້ຈັກຊື່ຂອງເຮົາແຕ່ລະຄົນ. ແລະ ຂ້າພະເຈົ້າເປັນພະຍານ ແລະ ໃຫ້ສັນຍາວ່າ ເຮົາບໍ່ສາມາດພຽງແຕ່ຮູ້ເລື່ອງຂອງພຣະຜູ້ເປັນເຈົ້າເທົ່ານັ້ນ ແຕ່ຈະມາຮູ້ຈັກພຣະອົງນຳອີກ ເມື່ອເຮົາໃຊ້ສັດທາໃນພຣະອົງ, ຕິດຕາມພຣະອົງ, ຮັບໃຊ້ພຣະອົງ, ແລະ ເຊື່ອພຣະອົງ. ຂ້າພະເຈົ້າເປັນພະຍານເຖິງສິ່ງເຫລົ່ານີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.