“N̄e Koṃ ar jeḷā N̄a”

Tōmak ilo Jisōs Kraist ej atartar ioon em̧m̧an, jouj, im iakwe eo An.⁷ Jej jino jeļā kajjien Rilo̧mo̧o̧r ilo ad jino kōjerbal maron̄ ko ad ilo jetōb im idajon̄jon̄e katak ko An, m̧ae iien jej ņae jikin naan ko An ilo kōj.⁸ Ilo an eddōk ļo̧k tōmak eo ad, jej tōmak ilo E im bōk tōmak ilo kajoor in pinmuur eo An, n̄an kōmour kōj, im n̄an kōkajoor kōj.

Tōmak eo em̧ool ej pedped wōt ilo Irooj im emakijkij an tōl ļo̧k n̄an jerbal jim̧we. “Tōmak ilo Kraist [ej] pedped eo m̧oktata ilo kabun̄ in, … pedped eo an jim̧we otemjeļo̧k, … im ej pedped in jerbal eo an aolep armej otemjeļo̧k.”⁹ Kōnke jerbal ekkar n̄an pedped ko rejim̧we Rilo̧mo̧o̧r ej unjen aolep pedped otemjeļo̧k n̄an bōke im kōjerbal tōmak eo em̧o̧o̧l, “ke ejjeļo̧k jerbal, ejjeļo̧k tokjān.”¹⁰ Kom̧win “rikōm̧m̧an naan eo, im jab ri ron̄jake naan.”¹¹

Ron̄ naan in Anij im bōk menin letok eo an Jetōb kōn tōmak ilo Rilo̧mo̧o̧r rej juon wōt, āinwōt kom̧win “tōmak kōn ron̄jake, im ron̄jake kōn naan in Kraist.”¹² Jej jino jeļā E im Ainikien ilo ad ekkatak im lin̄uri naan ko An ilo jeje ko rekwojarjar,¹³ jar n̄an Jemed ilo Etan kōn bōro em̧ool,¹⁴ im pukot jipan̄ eo an Jetōb Kwojarjar.¹⁵ Ekkatak im mour kaki katak ko an Kraist ilo mour ko ad rej jibadbad eo m̧oktata n̄an bōk menin letok eo an tōmak ilo E.¹⁶

Kōjerbal Tōmak ilo Irooj ej kōppopo eo emenin aikuj n̄an ļoore E.

“Im ke Jisōs ej etetal iturin lom̧aļo in Galili, Ej lo ruo jemjein jemjatin, Saimōn etan Piter, im Andru jaten, rej door ok ilo̧jet; bwe ri eo̧n̄ōd erro.

“Im Ej ba n̄an er, Kom̧win ļoor Eō, im Inaaj likūt kom̧ ri eo̧n̄od armej.

“Im em̧ōkaj aer ilļok jān ok ko aer im ļoor E.”¹⁷

Piter im Andru rej waanjon̄ok ko rem̧m̧an n̄an ron̄ im ļoor Maajta eo.

Rilo̧mo̧o̧r ej barāinwōt katakin kwe im n̄a: “Eļan̄n̄e jabdewōt armej e kōņaan ļoor Eō, en make kaarmejjete, im bōk debwāāl eo an, im ļoor Eō.”¹⁸ N̄an bōk debwāāl eo An ej n̄an kaarmejjete aolep men otemjeļo̧k im ļōn̄ ko an laļ in im n̄an kōjparok kien ko an Irooj.¹⁹

Rilo̧mo̧o̧r eo eaar jiron̄ kōj n̄an erom̧ āinwōt E.²⁰ Aaet, n̄an ļoor Irooj im ļoor waanjon̄ak eo An. Jej jeļā wōt kajjien Irooj ilo ad pukot kajoor ilo Pinmuur eo An n̄an erom̧ āinwōt E.

Ilo tōrein kwaļo̧k ko An, Jisōs eaar kwaļo̧k iaļ eo, tōl iaļ eo, im kwaļo̧k waanjon̄ak eo em̧m̧an tata. “Juon ļōmņak ejim̧we kōn piktok, wānōk, im mour eo An”²¹ rej letok jibadbad eo ejjeļo̧k jem̧ļo̧kin im tōl eo ealikkar ilo ad ļoor E ilo iaļen rikaļooran.

Tokālik Rilo̧mo̧o̧r eaar bar kōņaan bwe jen bōk “juon jeļāļo̧kjeņ eweepān n̄an tōl [mour] ko ad”²² ekkar n̄an ankilaan Anij. Kain jeļāļo̧kjeņ rot in ejjab ilo ittino̧ im ejjab pedped wōt ioon wūjwaan ko an mour in. Ijoke, dim im pen rej m̧ōttan wōt iaļen bujen eo ej tōlļo̧k n̄an iaļen mour eo ej kam̧ōņōņōik E.

Ettōņak eo an Liai ilo Bok in Mormon ej kalikar iaļ eo jej aikuj in ļoore, kapan̄pan̄ ko jenaaj iooni, im menin jipan̄ ko an jetōb ko repād n̄an jipan̄ kōj n̄an ļoore im itok n̄an Rilo̧mo̧o̧r. Bun̄ m̧aanļo̧k ilo iaļ eo eaidin̄ im eaidik ej en̄in ta eo Ej kōņaan bwe jen kōm̧m̧ane. Edjon̄e leen wōjke eo im jino lukkuun “oktak n̄an Irooj”²³ rej kōjeram̧m̧an ko Ej kōņaan bwe jen būki. Kōn menin, Ej akweļap n̄an kōj, “Itok, ļoor Eō.”²⁴

Jim̧or kōjerbal tōmak im ļoor Jisōs Kraist rej kōppopo ko remenin aikuj n̄an jerbal n̄an E.

“Bwe ekōjkan an juon armej jeļā m̧aajta eo eaar jab jerbal n̄an e, ak eo ej juon ruwamāejet n̄an e, im ej ettoļo̧k jān ļōmņak ko im jibadbad ko an būruōn?”²⁵

Jej lukkuun jeļā kajjien Irooj ilo ad jerbal n̄an E ilo aelōn̄ in kiin̄ eo An. Ilo ad kōm̧m̧an āindein, Ej lukkuun kōjeram̧m̧an kōj kōn eļap jipan̄, menin letok ko an jetōb, im ļap jen jon̄an. Jejjab make iaad ilo ad jerbal ilo jikin kallip in An.

Eaar kwaļo̧k, “Bwe Inaaj etal im̧aanļo̧k m̧okta jān kom̧. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧.”²⁶

Jej jeļā kajjien Rilo̧mo̧o̧r ilo ad kōm̧m̧an ijo em̧m̧antata ippād n̄an ilo̧k n̄an ijo Ej kōņaan bwe jen ilo̧k ie ļo̧k, ilo ad kajieon̄ in ba ta eo Ej kōņaan bwe jen ba, im ilo ad erom̧ ta eo Ej kōņaan bwe jen erom.²⁷ Ilo ad leļo̧k kam̧m̧oolol im pedped wōt ilo E, Ej kōkajoor ļo̧k kōj n̄an jerbal em̧m̧an ļo̧k jen kar m̧okta. Jidik kōn jidik, kōņaan ko ad rejjejet n̄an kōņaan ko An, im jibadbad eo An ej ad jibadbad, kain men eo jen “jamin naaj kajjitōk men eo āinjuon n̄an [Ankilaō].”²⁸

Jerbal n̄an E ej kitbuuj kōn aolepen būruwōd, maron̄, ļōmņak, im kajoor.²⁹ Kōn menin, ļōmņak in jerbal n̄an ro jet ej bōkļo̧k ļōmņak kōn kōj make im piktokin armej eo ilo kōj. Innām ej ļapļo̧k ad iakwe ro jej jerbal n̄an er. Im kōnke jerbal n̄an ro jet ej jerbal n̄an Anij, en ļapļo̧k ad iakwe E im ro jeid im jatid. Kain iakwe in ej itok jen menin letok eo an jetōb kōn iakwe, aaet iakwe eo em̧ool an Kraist.³⁰

“Kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist; bwe kom̧in maron̄ erom m̧aan ro nejin Anij; bwe n̄e Enaaj waļo̧k jenaaj āinwōt E, bwe jenaaj lo E ilo lukkuun nememen; bwe jen maron̄ bōk kōjatdikdik in; bwe jān maron̄ karreo em̧ool āinwōt E erreo.”³¹

Jej jeļā kajjien Irooj n̄e jej obrak kōn iakwe eo An.

Ekkar ke n̄an kōjerbal tōmak ilo E, ļoor E, jerbal n̄an E, ak jejjab tōmak E?

Ijeļā jet iaan membōr ro ilo Kabun̄ in me rej bōk m̧ool eo an katak ko im pedped ko rej waļo̧k ilo jeje ko rekwojarjar im kwaļo̧ki jān lo̧katok in. Im aaet epen aer tōmake m̧ool ko an gospel in rej iook ļo̧k mour ko aer im jekjek ko aer. Āinwōt n̄e ewōr aer tōmak ilo Rilo̧mo̧o̧r, ak rejjab lōke kōjeram̧m̧an ko An me ekar kallim̧ur kaki n̄an er ak repojak n̄an er ak remaron̄ kōjerbali ilo mour ko aer. Iaar bar lo ro jeiū im jatū ro raar kōm̧m̧ani jerbal ko aer ilo tiljek ak raar jab lukkun mour kōn katak ko an gospel in me emōj an jepļaaktok. Jej jeļā kajjien Irooj ilo ad jab tōmak wōt ilo E ak bar tōmak ilo E im ilo naan ko An.

Ilo Kallim̧ur Ekāāl, juon jemen eaar kajjitōk ippān Rilo̧mo̧o̧r n̄an kemour ajri eo nejin. Jisōs eaar uwaak: Jisōs eaar uwaak:

“Eo ej tōmak ej maron̄e men otemjej.

“Im e ṃōkaj an jemen ajri eo laṃōj im ba, “Ij tōmak; Kwōn jipañ eō kōn aō jab tōmak.”³²

Elōn̄ alen aō kōļmenļo̧kjeņ kōn kajjitōk in an juon baba: “Jipan̄ eō kōn aō jab tōmak.” Ij ļo̧kjenaō n̄e akweļap eo an em̧m̧aan in eaar jab bwe n̄an jipan̄ tōmak eo an ilo Jisōs āinwōt ad Ripinmuur im ilo kajoor in kemour eo An. Emaron̄ kar jeļā bwe Kraist ej Nejin Anij. Ak bōlen eaikuj kar jipan̄ n̄an tōmak ilo kajoor in kemour eo an Maajta ilo m̧ool en kar āindein n̄an kajjojo im bwe juon make en kar kōjeram̧m̧an eo nejin ejitōn bōro. Emaron̄ in kar tōmak ilo Kraist ak jab tōmak ilo Kraist ilo lukkuunin im piktokin.

Ekkā ad kam̧ool kōn ta eo jej jeļā em̧ool, ak bōlen kajjitōk eo ekkar n̄an kōj ej n̄e jej tōmak kōn ta eo jejeļā.

Kain̄i ko rekwojarjar kar kōm̧m̧ani kōn mālim eo an priesthood rej aorōk n̄an tōmak ilo Rilo̧mo̧o̧r, jeļā kōn E, im, āliktata, tōmak ta eo jej jeļā.

“Priesthood eo an Melkisedek ej kwaļo̧k gospel eo im kabwijer kii eo an menin ittiņo̧ an aelōn̄ in kiin̄ eo, aaet kii eo an jeļāļo̧kjeņ an Anij.

“Kōn menin, ilo kain̄i ko ie, kajoor in āinwōt anij ej waļo̧k.”³³

Jej tōmak im jeļā kajjien Irooj ilo an kii in jeļāļo̧kjeņ an Anij jerbal ilo Priesthood eo an Melkesidek n̄an kōpeļļo̧k kōjem ko im kōm̧m̧an bwe en pidodo n̄an ad kajjojo bōk kajoor in anij ilo mour ko ad. Jej tōmak im jeļā kajjien Rilo̧mo̧o̧r ilo ad ļoor E ilo ad būki im kōjparok kain̄i ko rekwojarjar im ilo ad bōk Nememen ilo kōj.³⁴ Jej tōmak im jeļā kajjien Kraist ilo ad en̄jake oktak eo ad make, mour eo ad make, kajoor eo ad make, im kwojarjar in Pinmuur eo An ekajoor. Jej tōmak im jeļā kajjien Maajta eo kōn “kajoor in naan eo An [ej ekkat] ilo kōj,”³⁵ im kar jeje ilo kōļmenļo̧kjeņ im būruwōd,³⁶ im jej “juļo̧k aolep jewo̧wiwi ko [ad] n̄an jeļā [E].”³⁷

Tōmak ilo E kōn lōke bwe kōjeram̧m̧an ko An rellōn̄ ren pād im rekkar n̄an mour ko ad kajjojo im baam̧le ko. Tōmak ilo E kōn aolepen ad³⁸ ej itok jen ad bun̄ m̧aanļo̧k ilo iaļen bujen in, wūjelepļo̧k ad n̄an E, im leļo̧k iien ko ad n̄an E. Tōmak E—būki ilo m̧ool kallim̧ur ko ilo kajoor eo An—bōktok ineem̧m̧an im aenōm̧m̧an n̄an mour ko ad.