“Ma Kumwail Esehier Ihs Ngehi”
Kitail ese duwen Sounkomouro, de e wie lalaudla atail kin wehwehkihla Ih? Ia mwoamwen atail kin kak esehla Kauno?
Ahnsou me Sounkomouro kaimwsekala sapwellime Padahk pohn Nahnao, E mahsanih duwen padahk mehlel wet me “ihte sang ni wiewia kupwuren Sahmo me emenemen kak alehdi Sapwellimen Ieroso limpoak.”1
E mahsanihier:
“Kaidehn aramas koaros me kin likwerih ie, ndinda, ‘Maing ei Kaun, Maing ei Kaun,’ me pahn pedolong nan Wehin Koht, pwe irail kan me kin kapwaiada kupwur en Semei me ketiket nanleng.
“Ni Rahnen Kadeiko eh pahn leledo, me tohto pahn ndahng ie, ‘Maing at Kaun, Maing at Kaun Se kohpadahr ni mwaromwi? ni mwaromwi se kausekihsangehr tepil kan? oh se wiadahr manaman tohto?
“A ngehi I ahpw pahn ndahng irail, ‘I sohte mwahn esei kumwail. Kumwail kohkohweisang ie, pwe I sehsei kumwail, kumwail me mouren tiahk suwed kan.”2
Kitail kak wehwehkihla mwahu iren padahk wet ni atail pahn medemedewe ehu kaweweh me wiawihong ire wet. Sapwellimen Kauno mahsen me ntingdi nan Pwuhk Sarawi en King James, [mahsanih] “I sohte douluhl ese ihs kowe,” ire wet Joseph Smith wekidala oh kaweweh me [Kauno mahsanih] “Kumwail sohte douluhl ese ihs ngei.”3
Pil tamanda mahs soi en lih meipwon ehko. Taman lih meipwon limen me pweipwei oh sohte onopada mwau kau kohla ale pilen neirail lamp kau mwurin arail rongada luhk en kohla oh tuhwong ohl me raprapahki lih me e men pwoudki.
“Nindokon ar mihmiseli nan sidohwa ko, ohl kamwohdo pa leledo. Serepein limmeno me onopadahr, ahpw iang ketilong nan kamadipw en kapwopwoudo; wenihmwen ihmwo ahpw ritidi.
“Kedekedeo, serepein teiko pwarodo. Re ahpw liklikwer sang liki, ndinda, ‘Maing, maing! Komw ketin ritingadahng kiht wenihmwen.
“A ohl kamwohdo sapeng irail, mahsanih, ‘Soh! I sehse ihs kumwail.”4
Wehwehn soai pwoatet ong emenemen kitail pil katehlapala sang ni pil ehu kaweweh tohrohr. Lepin kosoai [me nda] “I sehse ihs kumwail” me intingdier nan Pwuhk Sarawi en King James e pil wekidekla nan en Joseph Smith Kawehwe me “Kumwail sehse ihs ngei.”5
Lepin kosoai pwukat “Kumwail sohte douluhl ese ihs ngei” oh “Kumwail sehse ihs ngei” pahn wia mehn kesou ong emenemen kitail. Pwe kitail kin esehte duwen Sounkomouro, de kitail kin kalkalaudehla atail wewehkihla Ih? Ia mwomwen atail kin esehla Kauno? Iren keinemwe pwukat me wia irehkei me I men patohwan nan ai padahk wet. I luke Ngehn Sarawi en kaweid nan ansou me kitail pahn kakarongepene ire kesemwpwal wet.
Kohdo pwehn Esehla
Sises mahsani:
“Ngei me ahl, me mehlel, oh me mour: sohte emen kak kohdo rehn Semei, ahpw pwehki ngei.
“Pwe ma kumwail ese ihs ngei, kumwail pahn pil ese ihs me Semei.”6
Kitail pahn esehla Samatail Nanleng sang ni atail pahn esehla Sapwellime Ieroso.
Ehu kahrepe kesempwal en nan mour wet iei kaidehnte en esehla duen Sapwellimen Koht Ieroso ahpw en nantieng en esehla Ih. Ire kesempwal pahiou kan me kak sewesei kitail en esehla Kauno iei kalkalaudehla ahmw pwoson Ih, ideidawehn Ih, kin papah Ih, oh kamehlele Ih.
Kalaudehla ahmw Pwoson Ih
Kalaudehla pwoson Sises Krais sang ni atail pahn idawehn Sapwellime doadoahk de karasaras mwau kan, mahk, oh limpoak.7Kitail tepda esehla Sounkomouro sang ni atail tapiada doadoahngki kaweid en pali ngenitail oh kaskuhl kan sang ni Sapwellime padahk kan, pil lelehng ansou me kitail kin alehda oh doadoahngki ekei Sapwellime mahsen akan nan atail mour.8Ni ansou me atail pwoson Kauno kin laudla, kitail kin kamehlele Ih oh kopwoaroapwoarki Sapwellime manaman en kapwungkitaila, kamwauihkitaila, oh kakehlakaikitaila.
Pwoson mehlel iei e poahsoandasang rehn Kauno oh ansou koaros e kin kaweid kin kitail en wia me pwung. Pwoson Sises Krais iei keieu en padahk en mwomwohdiso, … me wia poahson pen me pwung koaros … oh me wia mehn doadoahk ong irail me loalokong kan koaros.”9Pwehki sang ni wiewia en idawehn iren kaweid pwung kan me Soundoro pakairkidahr iei me keieu kesempwal en alehda oh kalaudehla pwoson mehlel, “pwosonte ahpw sohte doadoahk e mehla.”10Kitail en wia “soun doadaohk en mahseno, oh kaidehn soun rongorongete.”11
Rongorong Sapwellimen Koht mahsen akan oh alehdi kisakis en pwoson Sises wia ehute pwehki “pwoson kohdo sang ni rongorong, oh rongorong sang ni Sapwellimen Koht mahsen.”12Kitail esehla Ih oh Sapwellime ngihl ni ansou me kitail kin onopki oh nantieng alehda oh doadoahngki Sapwellime mahsen en nan pwuhk sarawi kan,13kapakapieng Samatail ni Mware sang ni ineng mehlel,14oh rapahki sawas en Ngehn Sarawi.15Esehla oh alehda nan atail mour iren kaweid kan en Krais iei me kitail anahne wia mwohn atail pahn alehdi kisakis en pwosonla Ih.16
Kalaudehla atail pwoson Kauno iei ehu ahl en kaunopada en idawehn Ih.
Idawehn Ih
“Rahn ehu Sises ketiket kohla pohn oaroahr en Lehen Kalili, e ahpw ketin mahsanihada soused riemen, pirien ehu, Saimon (me adaneki Piter) oh rie me adaneki Andru; ira lalaidki ara uhk nan leho.
“Sises eri mahsanihong ira, “Kumwa kohdo iangiehla. I ahpw pahn padahkihong kumwa duwen laidih aramas akan.
“ Ni ahnsowohte ira pwilikihdi ara uhk ko oh iangala Sises.”17
Piter oh Andrew wia karasaras mwahu en rong oh idawehn Sises Krais.
Sounkomouro pil kaweid kin komwi oh ngei: “Ma emen ohl pahn idawehniedo, mweidehng en kahmahmkihla ih, oh wahda ah lohpwu, oh idawehniedo.”18En wahda ah lohpwu iei en kahmahmkihla pein ah wiewia sued kan oh soangen madamadau sued en sampa kan koaros oh kapwaiada Sapwellimen Koht kosoned akan.19
Sounkomouro poahngokier me kitail en duwehla Ih.20Eri, idawehn Koht iei kitail en pil idawehn Sapwellime karasaras kan. Kitail pousehlahte atail men esehla Koht ni ansou me kitail kin rapahki en duwehla Ih sang ni manaman en Sapwellime Tomwo.
Nan Sapwellime momour nin sampa, Sises kasalehieng kitailehr ahl me kitail en weweid loale, kahluwai kitail, oh kasaledahr karasaras mwahu. Madamadau pwung en sapwellime tiahk, unsek mehlel, oh wiewia mwahu kan koaros”21 kieng kitailehr kahrepe ehu en dadaurete oh ahl sansalamwau ehu ni atail idawehn Ih pohn ahl en wia souleng mehlel men.
Idawehn Sounkomouro pil sewesei kitail en esehda atail mour”22 kin pahrekiong kupwuren Koht. Iren kamarain wet e sohte wia mwekid sohte sansal ehu oh e sohte poasoahnkihda atail wiewia mwahu en sampa de kemwekid teikan en momour en sampaht. Ahpw keihrda en mie nan inou kan me wiawidahr en tengedi oh popouslahte me iei ahl en mour me pahn kupwurmwauih Ih.
Nan en Lehi ouraman nan Pwuhk en Mormon e kasalehda duwen ahl me kitail anahne idawehn, kahpwal akan me kitail pahn lelehng, oh men kaweid en pali ngehn akan me mie pwehn sewesei kitail en idawehn oh pwurala rehn Sounkomouro. Nantihla mwowe pohn ahl me tehtiko iei dahme E men kitail en wia. Song nemen wahntuhkeho me mih nan en Lehi ouramano oh weliakapwala ni mehlel rehn Kauno”23 iei kapai kan me E kupwurki kitail en alehdi. Eri E lukei kitail, “Kohdo, idawehn ie.”24
Kalaudehla pwoson oh ideidawehn Sises Krais wia mehn kaunop kei ong papah Ih.
Papah Ih
Ohl emen sohte kak esehla me soumas me e sohte kin papah, me wia aramas en likih men ong ih, oh me dohsang ah madamadau kan oh ineng en ah mongiong?”25
Kitail kin esehla Koht ni ansou me kitail kin papah Ih oh doadoahkehng Sapwellime wei. Ni atail kin wia met, E kin ketin kieng kitail kapai en sawas sarawi kan, kisakis en pali ngehn akan, oh kalaudehla koahiek me kitail ahniki. Kitail sohte pahn kin kelehpwla ni ansou me kitail pahn kin iang patehng Sapwellime doadoahk.
E mahsanier me E pahn kohdo mwohn mesetail kan, E pahn mih ni pali maun oh pali meing en kitail, Sapwellime ngehn pahn mihmi nan atail mohngiong, oh Sapwellime tohnleng akan pahn kapilkitailpene pwehn kasinenkitailda.”26
Kitail kin esehla Sounkomouro sang ni atail kin wia atail kak koaros en kohla wasa me E kin kupwurki kitail en kohla ie, ni ansou me kitail kin nantieng koasoia dahme E kupwurki kitail en kosoia, oh ni atail kin wiahla dahme E mwauki kitail en wiahla27Ni ansou me kitail pahn kin kieng atail madamadau unsek Reh, E kin kalaudehla atail koahiek en papah en mwausang dahme miehier. Sang ni ekis ekis kowei, atail anahn akan kin song en pahrekiongala Sapwellime anahn kan, oh Sapwellime karepeh kan kin wiahla pein atail, iei me kitail pahn kin sohte peki dahme weksang [Sapwellime] koasoandi.”28
Papah Ih anahne atail mohngiong unsek, kehl unsek, lamalam unsek, oh kehlail unsek.29 Sang ni mepwukat, papah mehteikan ni sohpeikasalki pahn kak en powehdi lamalam en aramas emen me kin men pein uhtohrkihda ah oh medemedewehte pein insene en pweida. Kitail keirda pwe kitail en poakoahng irail kan me kitail kin papah. Oh pwehki papah mehteikan iei papah Koht, kitail keirda ni atail poakoahng Ih oh riatail pwutak oh serepein kan pil laudla. Soangen limpoak wet iei kasalepen kisakis en limpoak nan palingehn, iei limpoak mehlel en Krais.30
Kitail anahne “kapakap ehng Samatail Nanleng ni kehlepen atail mohngiong unsek, peki me kitail en kak audauwudkihda Sapwellime limpoak me E ketkidohngehr koaros me wia souleng mehlel me kin idihdawehn Sapwellime Ieroso, Sises Krais. Kitail anahne kapakapki met pwehki kitail en kak wiahla seri en Koht pwe ni ansou me E pahn sapahldo kitail en duwehte Ih-pwe kitail pahn kilang Ih ni Eh duduhwehte-pwe kitail en kak ahniki koapwoaroapwoar wet oh mwakelekela duwehte Ih me mwakelekel.”31
Kitail esehla Koht ni ansou me kitail kin audauwudkihda Sapwellime limpoak.
Kamehlele Ih
E pahn kak en mengei en kin pwoson Ih, idawehn Ih, papah Ih, ahpw sohte kamehlele Ih?
I kin kapehsehieng tohn Mwomwohdiso me kin alehda kaweid oh tepin padahk kan me kin kalohk sang nan pwuhk sarawi kan oh wasa wet. Ahpw irail pil ahnikihte kahpwal en kamehlele me rongamwau mehlel pwukat me irail kin doadoahngki nan arail mour oh ni arail mwekid tei kan. E mwomwen mie arail pwoson Sounkomouro, ahpw irail sohte kamehlele me kapai kan me E inoukidahr e mie de e kak en doadoahk nan arail mour. I kin pil tuhwong riei souleng kan me kin kapwaiada arail pwukoah kan ahpw irail saikinte wiahkihla rongamwahu kopwurpwurdoht kisehn arail. Kitail esehla Koht kaidehnte sang ni atail kamehlele Ih ahpw pwehki sang ni atail kamehlele Ih oh sang ni Sapwellime inou kan me E wiadahr.
Nan Kadehde Kapw, pahpa men peki rehn Sounkomouro en kamwauiahla ah tungoal seri. Sises eri sapengki:
Ma komw sohte pahn kamehlele, soahng koaros pahn pweida reh me kin kamehlele.
“Oh ni ansouohte pahpahn serio ahpw sengiseng loudkihla oh inda, Koht, I kamehlele; sewesei ie pwe ien dehr sohte kamehlele.”32
Pak tohto I kin medemedewe duwen en pahpao ah pekpeko: “Sewesei ie pwe ien kak dehr sohte kamehlele.” I men ese ma sou en ohlo ineng en pek sawaso sou wia tepin sawas en sewese ih kamehlele me Sises iei ih me atail Soundor oh kamehlele Sapwellime manaman en kamwauiala soumwau kan. E mwein esehier me Krais iei Sapwellimen Koht Ieroso. Ahpw mweihn e anahne sawas en kak kamehlele me Sapwellimen Kaun lapalapo manaman en kamwauiala soumwau kan iei me kak en sang pein Ih oh kak en kapaida ah tungoal pwutak. E mwein kak en kamehlele Krais ni oaralap ahpw sohte kamehlele Krais ni pisetik oh kin wewehki Ih.
Kitail kin kalap kadehde me kitail ese me mehlelo, ahpw peidek me kin kalap kohieng kitail iei ma kitail kamehlele dahme kitail ese.
Tiahk sarawi kan me kin wiawi sang irail prihsduhd kan me ahniki mweimwei udahn e kesempwal ong atail kamehlele Sounkomouro, kitail en esehla Ih, oh, me keieu kesempwal kamehlele dahme kitail ese.
Melkisedik prihsduhd kin kaweid rongamwahu wet oh kolokol kih kan en doadoahk sarawi kan me kin sohte sansal nan wehio, oh me pil iangahki kih kan en eripit en Koht.
Eri manaman sarawi kan iei me sansal nan tiahk sarawi kan en Melkisedik Prihsduhd.”33
Kitail kamehlele oh esehla Koht ni ansou me kih kan en eripit en Koht sansalada sang rehn Melkisedik Prihsduhd kan ni arail langahda wenihmw oh kamengei ong kitail en alehdi manaman sarawi kan nan atail mour. Kitail kamehlele oh esehla Sounkomouro ni ansou me kitail kin idawehn Ih sang ni atail kin alehda oh mehlehlieng atail pwoson tiahk sarawi kan oh kalaudehla atail idawehn Sapwellime karasaras akan nan atail mour.34 Kitail kamehlele oh esehla Krais ni ansou me kitail pein pehm wekidekla kan, kamwauhla, kakehlepe, oh mwakelekel en Sapwellime Tomw en Dihp. Kitail kamehlele oh esehla Kaun lapalapo ni ansou me Sapwellime mahsen akan mihla nan loaletail”35 oh iei me intingdi nan atail madamadau kan oh mohngiong kan36oh kitail kihlahsang dipatail kan koaros pwe kitail en esehla Ih].”37
Kamehlele Ih iei likih me Sapwellime kapai tohto kan pahn mie oh mweimweiong en emenemen eh mour oh peneinei kan. Kamehlele Ih ki ngenitail unsek38pahn pweida sang ni atail pahn wenla mwowe nan ahl en inou kan me wiawidahr, mweidehng atail koasoandih kan Reh, oh kiong Ih ah ansou ong kitail. Kamehlele Ih—alehda ni mehlel Sapwellime manaman oh inou kan—kasamwo madamadau kan, meleilei oh popohl nan atail mour.
Inou oh Kadehde
Ehu rahn, koaros pahn kelipwikihdi oh pekmahngki”39 me Sises iei me Krais. Nan rahn kaselel wo, kitail pahn ese me E mwahngi eden emenemen kitail. Oh I kadehde oh inouki me kitail kak en sohte ese duwen Koht ahpw kitail pahn esehla Ih sang ni atail pahn kakehlaka atail pwoson, idawehn, papah, oh kamehlele Ih. I kadehde mepwukat ni mwaren Sises Krais me sarawi, amen.