Hingpit nga Kalipay ug Espirituhanon nga Pagsugakod

Mga kaigsoonan, karon gusto kong maghisgot og usa ka baruganan nga mahinungdanon sa atong espirituhanon nga pagsugakod. Usa kini ka baruganan nga mahimong mas importante lamang kon ang mga trahedya ug mga pagtuis nga naglibut kanato modaghan

Kini ang ulahing mga adlaw, mao nga walay usa kanato ang angay nga masurprisa kon makakita kita og panagna nga natuman. Daghan kaayong mga propeta, lakip ni Isaias, Pablo, Nephi, ug Mormon, nakakita nang daan nga moabut ang makuyaw nga mga panahon,¹ nga sa atong panahon ang tibuok kalibutan magkaguliyang,² nga ang mga tawo “magamahigugmaon man sa ilang kaugalingon, … walay pagbati sa paghigugma, … nagahigugma sa kalipayan inay sa Dios,”³ ug nga daghan ang mahimo nga sulugoon ni Satanas kinsa mosuporta sa buhat sa kaaway.⁴ Sa pagkatinuod, kamo ug ako “[na]kigdumog … batok sa mga labawng agalon niining mangitngit nga kalibutan karon, [ug] batok sa mga dautan nga espirituhanong panon diha sa mga dapit sa kalangitan.”⁵

Samtang nagkagrabe ang mga panagbangi tali sa mga nasud, samtang ang talawan nga mga terorista mopatay sa mga inosente, ug samtang ang korapsyon sa tanan gikan sa patigayon hangtud sa gobyerno mas nagkakomon, unsay makatabang kanato? Unsay makatabang sa matag usa kanato diha sa atong kaugalingong mga problema ug sa lisud nga mga hagit sa pagpuyo niining ulahing mga adlaw?

Si propeta Lehi mitudlo og usa ka baruganan alang sa pagsugakod sa espirituhanong paagi. Una, ikonsiderar ang iyang mga kahimtang: Gigukod siya tungod sa pagsangyaw sa kamatuoran diha sa Jerusalem ug gisugo sa Ginoo sa pagbiya sa iyang mga kabtangan ug paglayas kuyog sa iyang pamilya ngadto sa kamingawan. Nagpuyo siya sa ka tolda ug nabuhi sa bisan unsang pagkaon nga makit-an diha sa dalan padulong sa wala hibaloi nga destinasyon, ug iyang nakita ang duha sa iyang mga anak nga lalaki, si Laman ug Lemuel, nga misukol batok sa mga pagtulun-an sa Ginoo ug miatake sa ilang mga igsoong si Nephi ug Sam.

Klaro, si Lehi nahibalo sa oposisyon, kabalaka, kaguol, kasakit, kasagmuyo, ug kasubo. Apan maisugon ug walay pagpanagana siyang mipahayag sa usa ka baruganan nga gipadayag sa Ginoo: “Ang mga tawo naingon, nga unta sila makabaton og hingpit nga kalipay.”⁶ Hunahunaa! Sa tanang mga pulong nga mahimo niyang gamiton sa paghulagway sa matang ug katuyoan sa atong kinabuhi dinhi sa mortalidad, iyang gipili ang mga pulong nga hingpit nga kalipay!

Ang kinabuhi puno sa mga pagtipas ug kapakyasan, mga pagsulay ug mga hagit sa tanang matang. Malagmit ang matag usa kanato dunay mga panahon nga ang kaguol, kasakit, ug kawalay paglaum halos mosanap kanato. Unya ania kita dinhi aron makabaton og hingpit nga kalipay?

Oo! Ang tubag usa ka lanog nga oo! Apan sa unsang paagi kana posible? Ug unsay kinahanglan natong buhaton aron maangkon ang hingpit nga kalipay nga giandam sa Langitnong Amahan alang kanato?

Si Eliza R. Snow, ikaduha nga Kinatibuk-ang Presidente sa Relief Society, mihatag og makapaikag nga tubag. Tungod sa salawayong mando sa pagpatay diha sa Missouri, gihatag sa pagsugod sa grabing tingtugnaw sa 1838,⁷ siya ug ang ubang mga Santos napugos sa pagbiya sa dapit niana gayud nga tingtugnaw. Usa ka gabii, ang pamilya ni Eliza natulog sa usa ka gamayng troso nga payag nga gigamit sa mga Santos nga refugee. Kadaghanan sa tapak sa kal-ang sa mga troso gipanguha na ug gigamit isip sugnod niadtong nag-una kanila, mao nga dunay mga lungag sa kal-ang sa mga troso nga dagko kaayo nga pwedeng maagian og iring. Tugnaw kaayo kadto, ug ang ilang pagkaon mikaging.

Nianang gabhiona mga 80 ka tawo ang nagpunsisok sulod nianang gamay nga payag, nga 20 lang ka pye kwadrado (6.1 metro kwadrado). Kadaghanan naglingkod o nagbarug sa tibuok gabii aron magpabiling init. Sa gawas, usa ka grupo sa mga lalaki nagpalabay sa gabii nga nag-alirong sa nagdahunog nga kalayo, nga ang pipila nanganta og mga himno ug ang uban nagsugba sa mikaging nga mga patatas. Si Eliza mirekord: “Walay usa ka reklamo ang nadungog—ang tanan malipayon, ug kon ibase sa mga panagway, ang mga langyaw tingali magtuo nga grupo kami sa mga naglingaw-lingaw imbis nga grupo sa katawhan nga gi-abug sa gobernador.”

Ang report ni Eliza nianang makapaluya, makapakurog sa bukog nga kagabhion positibo kaayo. Mideklarar siya: “Sadya kaayo kadto nga gabii. Walay lain gawas sa mga santos ang mahimong magmalipayon sa bisan unsang kahimtang.”⁸

Mao kana! Ang mga santos mahimong magmalipayon sa bisan unsang kahimtang. Mahimo kitang mobati og kalipay bisan og bati ang atong adlaw, bati ang semana, o bisan bati ang tuig!

Mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

Kon ang sentro sa atong kinabuhi anaa sa plano sa Dios sa kaluwasan, nga gitudlo ni Presidente Thomas S. Monson, ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabut gikan ug tungod Kaniya. Siya ang tinubdan sa tanang kalipay. Mobati kita niini panahon sa Pasko sa dihang manganta kita og, “Kalipay sa kalibutan, ang Ginoo miabot na.”⁹ Ug ato kining mabati sa tibuok tuig. Alang sa mga Santos sa Ulahing mga Adlaw, si Jesukristo mao ang hingpit nga kalipay!

Mao kana nganong ang atong mga misyonaryo mobiya sa ilang mga panimalay aron sa pagsangyaw sa Iyang ebanghelyo. Ang ilang tumong dili mao ang pagdugang sa gidaghanon sa mga miyembro sa Simbahan. Hinoon, ang atong mga misyonaryo nagtudlo ug nagbunyag¹⁰ aron sa pagdala og kalipay ngadto sa mga tawo sa kalibutan!¹¹

Sama nga ang Manluluwas mitanyag og kalinaw nga “lapaw sa tanang pagpanabut,”¹² Siya usab mitanyag og gikusgon, giladmon, ug gilapdon sa kalipay nga lapas sa tawhanong pangatarungan o mortal nga panabut. Sama pananglit, daw dili posible nga mobati og kalipay kon nag-antus ang inyong anak og walay kaayohan nga sakit o kon nawagtangan kamo sa inyong trabaho o kon giluiban kamo sa inyong kapikas. Apan mao gayud kana ang kalipay nga gitanyag sa Manluluwas. Ang Iyang kalipay makanunayon, nagsiguro kanato nga ang atong “mga kasakitan sulod lamang sa mubo nga higayon”¹³ ug ipahinungod ngadto sa atong kaayohan.¹⁴

Nan, sa unsang paagi kita makaangkon niana nga kalipay? Makasugod kita pinaagi sa “[pag]tutok kang Jesus nga mao ang mag-uugmad ug maghihingpit sa atong pagtuo”¹⁵ “sa matag hunahuna.”¹⁶ Makapasalamat kita Kaniya diha sa atong mga pag-ampo ug pinaagi sa pagsunod sa mga pakigsaad nga atong gihimo uban Kaniya ug sa atong Langitnong Amahan. Samtang ang Manluluwas nag-anam sa pagkahimong tinuod ngari kanato ug samtang mangamuyo kita nga ang Iyang kalipay ihatag ngari kanato, modako ang atong kalipay.

Ang kalipay gamhanan, ug ang pagtutok sa kalipay modala sa gahum sa Dios diha sa atong kinabuhi. Sama diha sa tanang butang, si Jesukristo mao ang atong labing halangdong ehemplo, “nga tungod sa kalipay nga gibutang sa iyang atubangan miantus sa krus.”¹⁷ Hunahunaa kana! Aron Iyang malahutay ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa kalipay!

Ug unsa man ang kalipay nga giandam diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug takus—aron nga mopuyo uban sa atong Langitnong mga Ginikanan ug mga pamilya.

Kon motutok kita sa kalipay nga moabut kanato, o ngadto niadtong atong gimahal, unsay atong malahutay nga karon ingon og bug-at, sakit, makahadlok, dili makiangayon, o imposible gayud?

Usa ka amahan nga naa sa sitwasyon sa espirituhanong kakuyaw nagtutok sa kalipay nga sa katapusan mahimong limpyo ug takus diha sa Ginoo—ang kalipay nga maluwas gikan sa kahasol sa konsensya ug kaulaw—ug ang kalipay nga makabaton og kalinaw sa hunahuna. Kana nga pagtutok mihatag kaniya og kaisug nga mokumpisal sa iyang asawa ug bishop mahitungod sa iyang problema sa pornograpiya ug sa iyang pagkamaluibon. Nagbuhat na siya karon sa tanan nga gitambag sa iyang bishop nga iyang buhaton, naningkamot uban sa tibuok niyang kasingkasing nga mahibalik ang pagsalig sa iyang asawa.

Usa ka batan-ong babaye nagtutok sa kalipay nga magpabiling putli sa sekswal nga paagi, aron sa pagtabang kaniya sa paglahutay sa mga pagbiay-biay sa mga higala samtang mibiya siya gikan sa usa ka sikat ug makapadani, apan kuyaw sa espirituhanong paagi, nga sitwasyon.

Usa ka tawo nga kanunayng mopakaubos sa iyang asawa ug mangasaba sa iyang mga anak nagtutok sa kalipay nga mahimong takus nga makabaton sa Espiritu Santo isip iyang kanunayng kauban. Kana nga pagtutok midasig kaniya sa pagsalikway sa kinaiyanhon nga tawo,¹⁸ diin kanunay siya nga nagpadala, ug mihimo sa gikinahanglan nga mga kausaban.

Usa ka minahal nga kauban bag-o lang misulti kanako sa iyang bug-at nga mga pagsulay sa milabayng dekada. Miingon siya, “Nakat-on ko sa pag-antus—uban sa kalipay. Ang akong pag-antus nabuntog sa hingpit nga kalipay ni Kristo.”¹⁹

Unsa man ang malahutay ninyo ug nako samtang motutok kita sa kalipay nga “gibutang sa … atubangan” nato?²⁰ Unsa nga paghinulsol ang mahimo dayon nga posible? Unsang nga kahuyang ang mahimong kalig-on?²¹ Unsa nga pagpanton ang mahimong panalangin?²² Unsa nga mga kasagmuyo, gani mga trahedya, ang mahimong atong kaayohan?²³ Ug unsa nga mahagitong pagserbisyo ngadto sa Ginoo ang mahimo natong mahatag?²⁴

Samtang makugihon kitang motutok diha sa Manluluwas ug dayon mosunod sa Iyang sumbanan sa pagtutok sa kalipay, kinahanglan natong likayan ang mga butang nga makabalda sa atong kalipay. Nahinumdom mo ni Korihor, ang anti-Kristo? Nagsulti og daghang mga bakak mahitungod sa Manluluwas, si Korihor miadto og lain-laing mga dapit hangtud nga gidala siya sa atubangan sa usa ka high priest kinsa nangutana kaniya: “Ngano nga ikaw naglibut-libut aron sa pagtuis sa mga paagi sa Ginoo? Ngano nga ikaw nagtudlo niini nga mga katawhan nga walay Kristo, aron sa pagsumo sa ilang mga kalipay?”²⁵

Bisan unsa nga mosupak ni Kristo o sa Iyang doktrina mobalda sa atong kalipay. Naglakip kana sa mga pilosopiya sa tawo, nga daghan kaayo diha sa internet ug sa mga blog, nga nagbuhat sa unsa gayud ang gibuhat ni Korihor.²⁶

Kon motan-aw kita diha sa kalibutan ug mosunod sa mga pormula niini sa kalipay,²⁷ dili gayud kita makaila og hingpit nga kalipay. Ang dili matarung mahimong mosinati og daghang mga emosyon ug mga pagbati, apan dili gayud sila makasinati og hingpit nga kalipay!²⁸ Ang hingpit nga kalipay usa ka gasa alang sa matinud-anon.²⁹ Mao kini ang gasa nga moabut gikan sa tinuyo nga paningkamot sa pagpuyo og matarung nga kinabuhi, sama sa gitudlo ni Jesukristo.³⁰

Siya mitudlo kanato unsaon sa pagkaangkon og hingpit kalipay. Kon mopili kita sa Langitnong Amahan nga maoy atong Dios³¹ ug kon atong mabati ang Pag-ula sa Manluluwas nga miepekto sa atong kinabuhi, mapuno kita sa kalipay.³² Matag higayon nga moamuma kita sa atong kapikas ug mogiya sa atong mga anak, matag higayon nga mopasaylo kita og tawo o mangayo sa ilang pagpasaylo, atong mabati ang hingpit kalipay.

Matag adlaw nga kamo ug ako mopili sa pagsunod sa celestial nga mga balaod, matag adlaw nga motuman kita sa atong mga pakigsaad ug motabang sa uban sa pagbuhat sa ingon, maato ang hingpit nga kalipay.

Patalinghugi kini nga mga pulong sa Salmista: “Ang Ginoo gibutang ko sa kanunay sa atubangan nako: tungod kay ania siya sa akong tuong kamot, ako dili matarug. … Sa [Iyang] presensya anaa ang kahingpitan sa kalipay.”³³ Samtang kini nga baruganan makulit diha sa atong mga kasingkasing, ang matag adlaw mahimong usa ka adlaw sa kalipay ug kamaya.³⁴ Sa ingon ako mopamatuod sa sagradong pangalan ni Jesukristo, amen.