Engan ac Molwelah in Nguhn

Tamuhlwel ac tahmtahel sacohk wiyuck, mihsenge nga kena sramsramkihn ip yohk nuh ke molwelah nuh ke nguhnasr. Ip yohk sac fah yohkwelihk in yohk srihpac ke pacl upac ac pacl ahsor yohkwelihk raunikuhtlac.

Lwen sahflah uh pa inge, wacngihn sesr enenuh in puhla lut ke kuht liye ma palyeyuck uh sikyak. Mwet pahluh pucspucs, weluhlwacng Isaiah, Paul, Nephi, ac Mormon, liye na met nuh ke pacl upac ma fah tuhkuh,¹ lah ke lwen lasr uh facluh nohfohn fah ohkahrkahryak,² lah mwet uh “fah nunku kaclos sifacna, … wangin nunkeyen alu selos, … fah lungse mwe pwar yohk liki God,”³ ac fah eklac mwet kuhlwacnsap luhn Setuhn suc oruh orekma luhn mwet lokoalok sac.⁴ Pwacyena, nga kom “mweuni … ngun fohkfok yen engyeng uh, ac mwet leum ac wal ac ngun koluk ma leumi mwet uh.”⁵

Ke mwe lain inmahsrlon muhtuhnfacl uh yohkwelihk, ke terrorist sahngwengtoht uh mweuni mwet wowo, ac ke orekma koluk ma oasr ke ma nuh kwewa ke pisnis nuh ke kafucrmacn uh yohkwelihk ke moul uh, meac kuh in kahsrwe kuht? Meac kuh in kahsruh kais sie sesr ke ma upac lasr sifacna ac ke ma upac luhn moul ke lwen sahflah inge uh?

Mwet pahluh Lehi el luti sie ip yohk nuh ke molwelah luhn nguhn. Ma se met, nuhnkuh ke moul lal: mwet uh ahkkolukyacl mweyen luti pwacye lal fin acn Jerusalem ac el sapkihnyuck sin Leum in fahsr liki mwe kahsruhp lal ac kahinglac wi sucu lal nuh ke acn mwesis. El tuh muhta ke lohm nuknuk sac ac moul ke mongo elos konwacack ke elos som nuh ke acn ma soenna etweyucklac, ac el liye tuhlihk mukul luo nahtuhl, Laman ac Lemuel, lain mwe luti luhn Leum ac oruh ma kuluk nuh sin tamuhlwel wiyaclos Nephi ac Sam.

Kahlwem lah, Lehi el etuh mwe kihsrucng, upac, kweok, ngal, suhpwacr, ac ahsor. Tuhsruhk el fahkwack ke puhlaik ac ke tiac fuhnkihlac sie ip yohk ma ahkkahlwemyeyuck sin Leum: “Mwet uh in moul, tuh elos in kuh in engan.”⁶ Nuhnkuh! Ke kahs nuhkwewa el kuh in orekmakihn in ahkuhtweyac ohiyac ac srihpen moul lasr ke moul inge, el sulaclah kahs se engan!

Moul uh nwacnwaclah ke inkacnek sahyac ac inkacnek stuhuh, kain ma upac nuhkwewa. Kais sie sesr puhlakihn pacl ma inse toasr, puhla ahsor, ac nuhnak ahsor uh apkuhran in kuhtangkuhtlac. Tuhsruhk kuht oasr inge in engan?

Ahok! Top an pa ahok na pwacye! Tuhsruhk ma ingacn kuh fuhkah? Ac meac kuht enenuh in oruh in eis engan ma Pahpah Lucng El kena use nuh sesr uh?

Eliza R. Snow, Prestuhn Luhlahp ahkluo luhn Rilif Sosaiti, el sang sie top na wowo. Ke srihpen sap luhn acn Missouri in eislah mwet Mormon liki acn we ah, sapkihnyuck ke muhtwacwacackiyacn winter ke 1838,⁷ el ac Mwet Luhlahlfongi sahyac uh ahkkohsyeyuck in kahinglac liki state sacn ke winter sac na. Sie fong ah, sucu lal Eliza ah muhta fong se ke lohm sahk srihsrihk orekmakihnyuck sin Mwet Luhlahlfongi uh. Ma in tulokihn engyeng ke infulwacn sahk ah itucklac in orek e selos suc muhtana we met luhkwelos, na oruh oasr pat infulwacn sahk uh ma yohk fal tuh kihsrihk ngaho soko in sahslah kac. Arlac mihsrihsr, ac mongo nwaclos uh kwekwelac na pwacye.

Ke fong sac mwet 80 kuhtuh lokweni lun lohm sahk srihsrihk sac, feet 20 na sinkac nuh ke sinkac (meter 6.1 na sinkac nuh ke sinkac). Pucs selos muhta kuh tu fong na fohn se in srihke in fucsrfucsr. Lihkihnihm ah, un mukul se tuhkweni muhta ke fong uh raunweack e luhlahp se, kuhtuh selos onkihn on luhn alu uh, ac mwet sahyac an srihke in manmani pihtuctuc uh. Eliza el suhmuhslah: “Wacngihn torkahskahs kuh in lohngyuck—mwet nuhkwewa engan, ac nuhnuhnkuh ke ohiyac ah, mwet suc ac liye kuht uh sahp ac muh kuht mwet na muhtwacta pwacr sahyacn mwet ahkkohsyeyuck in som liki lohm selos.”

Ma sihmlac sel Eliza ke fong ullac, arlac mihsrihsr sacn arlac oasr finsrak. El sruhmuhn: “Fong na engan se pa ingacn. Wacngihn mwet sahyac mwet luhlahlfongi kuh in engan ke ohiyac nuh kwewa.”⁸

Pa inge! Mwet luhlahlfongi uh kuh in engan ke ohiyac nuh kwewa. Kuht kuh in puhla engan finne sie lwen koluk, sie wik koluk, kuh finne sie yac koluk!

Tamuhlwel ac tahmtahel sacohk wiyuck, engan kuht puhla uh tiac ma wiwina ohiyacn moul lasr tuhsruhktuh wiwina ma kuht lohacng nuh kac ke moul lasr uh.

Ke kuht fihliyac moul lasr uh nuh ke plwacn in molwelah luhn God, ma Prestuhn Thomas S. Monson el tuhfahna luti kuht kac, ac Jisus Kraist ac wosasuc Lal, kuht kuh in puhla engan finne meac sikyak—kuh tiac sikyak—ke moul lasr uh. Engan tuhkuh Sel ac ke srihpacl. El pa orwaclah engan nuh kwewa. Kuht puhla ma inge ke pacl luhn Christmas ke kuht on, “Joy to the world, the Lord is come.”⁹ Ac kuht kuh in puhla ma inge ke yac nuhkwewa. Nuh sin Mwet Luhlahlfongi ke Lwen-sahflah uh, Jisus Kraist pa engan!

Pa oruh misineri lasr uh fahsr liki lohm selos uh in luti wosasuc Lal. Finsrak lalos tiac pa in ahkpuhsye nacmpuh ke mempucr luhn Alu uh. Tuhsruhk, misineri lasr uh luti ac pacptais¹⁰ in sang engan nuh sin mwet fin facluh uh!¹¹

Oacna Mwet Lahngo El sang mihs ma “yohk liki ma mwet uh ku in kalem kac,”¹² El oacyacpac sang sie kuh, loal, ac loes ke engan ma mwet uh tiac kuh in etuh kuh kahlwem kac ke moul in mahno uh. Nuh ke srihkasrak, kuht tiac puhla muh kuht kuh in puhla engan ke tuhlihk nuhtuwos uh kweok ke mas yohk, kuh wacngihnlac orekma lom kuh ke ma tomom kuh kiyom lain kom. Tuhsruhk pwacyena ma inge pa engan ma Mwet Lahngo El use. Engan Lal tiac ekyek, ahkkweye kuht lah ma upac lasr fah orek ke pacl na fototo¹³ ac fah eklac ahkwoye kuht.¹⁴

Fuhkah, na, kuht kuh in eis engan sac? Kuht kuh in muhtwacwacack ke “suilya na Jesus, su kol kut ac aksuwosye lulalfongi lasr”¹⁵ ke nuhnak nuhkwewa.¹⁶ Kuht kuh in sang kuloh Kacl ke pruhe lasr ac ke karihngihn olwelah kuht oraclah Yohrohl ac Pahpah tuhmasr Inkuhsrao. Ke Mwet Lahngo lasr El mwet na pwacye se nuh sesr ac ke kuht siyuck ke engan Lal in ituckuh nuh sesr, engan lasr fah yohkwelihk.

Engan uh fokoko, ac in lohacng nuh ke engan uh use kuh luhn God nuh ke moul lasr uh. Oacna ke ma nuhkwewa, Jisus Kraist pa srihkasrak wo emet, “A ke sripen engan su el akwot nu kac, el pilesrala mwekin lun misa fin sahkseng.”¹⁷ Nuhnkuh kac! Elan kuh in oruh ma upac emet fin facluh, Mwet Lahngo lasr El nuhnkuh yohk ke engan!

Ac fuhkah engan ma fihliyucki ye muhtahl? Pwacyena weacng engan ke ahknwacsnwacsye, ahkkweye, ac ahkfokokoye kuht; engan ke moli ma koluk luhn mwet nuhkwewa suc auliyak; engan se ma oruh kuht in kuh in fohlohk nuh lohm ah—nwacsnwacs ac suwohs—in moul yurin Pahpah Ninac Inkuhsrao kiyacsr ac sucu lasr.

Kuht fin nuhnkuh suwohs ke engan ma fah tuhkuh nuh sesr, kuh nuh selos suc kuht luhngse, meac kuht kuh in kampare kac ma ingena luhman upaclac, kweok, ahksahngweng, suhfal, kuh tiac kuh in orek?

Sie pahpah ke pacl upac in nguhn el lohacng nuh ke engan ke nwacsnwacs ac suwohs ye muhtuhn Leum—engan se ke sukohsohk liki mwacta ac auli—ac engan se in eis mihslac ke nuhnak. Nuhnak wowo se inge sang nuh sel puhlaik in fahkwack nuh sin muhtwacn kiyacl ac pisap lal ke oruh lal ke petsac koluk ac ke lain masap luhn tiac kosro lal. Ingena el oruh ma nuhkwewa pisap lal sruhmuhn nuh sel in oruh, el srihke ke insiyacl nohfohn in sifilpac eis luhlahlfongi sin muhtwacn sacohk kiyacl.

Sie muhtwacn fuhsr el lohacng nuh ke engan in nwacsnwacs ke tiac kosro in kahsrwel in muhtweng na kawuck ma isrucnucl ke el fahsr liki sie pacl ma mwet luhngse ac kwacfe ma kosro, tuhsruhk koluk nuh ke nguhn.

Sie mukul suc kwacna ahkkolukye muhtwacn kiyacl ac sramsram muhlat nuh sin tuhlihk nahtuhl el lohacng nuh ke engan in nwacsnwacs in eis Nguhn Muhtahl pacl nuhkwewa. Nuhnak se inge ahkkweyacl in sislah mwet luhngse ma luhn facluh,¹⁸ ma el oruh pacl pucspucs, ac el oraclah eklac enenweyuck uh.

Sie kawuck fahk nuh sihk ke pacl upac lal ma lusen yac longoul ah. El fahk, “Nga lotwelah fuhkah in kweok ke engan. Kweok luhk itucklac sihk ke srihpen engan luhn Kraist.”¹⁹

Kuh meac kom ac nga kuh in muhtweng ke kuht lohacng nuh ke engan ma fihliyucki “ye muhtahsr?”²⁰ Auliyak fuhkah ma kuh in sikyak kac? Mwe muhnahs lasr uh ac fokokoi fuhkah?²¹Kahs in auliyak uh eklac fuhkah nuh ke mwe insewowo?²² Mwe ahsor fuhkah, finne ma upac fuhkah, fah eklac ma wo nuh sesr?²³ Ac kuhlwacnsap upac fuhkah se kuht ac kuh in sang nuh sin Leum?²⁴

Ke kuht oaru in lohacng nuh ke Mwet Lahngo ac na ukwe atac Lal in lohacng nuh ke engan, kuht enenuh in forlah liki ma lain engan lasr. Yac kowos esamuhl Korihor, mwet lain Kraist? Fahkwelihk ma stuhuh ke Mwet Lahngo, Korihor el fahsr ke acn nuh ke acn nwe ke el ituckyang nuh sin prist fuhlwact suc siyuck sel: “Efuh kom forfor ahkkolukye ohiyac luhn Leum? Efuh kom luti mwet inge lah ac fah wacngihn Kraist, in ahklusrohngtwenye engan lalos?”²⁵

Kuhtwena ma lain Kraist kuh mwe luti Lal fah ahklusrohngtwenye engan lasr. Wiwina lahlmwetmwet luhn mwet, ma yohk oasr ke internet ac ke ma sramsram oacna blog, ma oruh oacna ma Korihor el oruh ah.²⁶

Kuht fin ngwetacng nuh facluh in suk mwe kahsruh nuh ke engan,²⁷ kuht fah tiac etuh engan. Mwet tiac suwohswohs uh fah puhlakihn kuhtuh puhla in nuhnak ac puhla in mahno, tuhsruhktuh elos fah tiac puhlakihn engan!²⁸ Engan uh sie mwe sang nuh sin mwet luhlahlfongi.²⁹ Pa mwe sang se ma tuhkuh ke srihke pwacye in moul suwohs, oacna lutiyuck sin Jisus Kraist.³⁰

El luti kuht ohiyac in engan. Ke kuht sulaclah Pahpah Inkuhsrao in God lasr³¹ ac ke kuht kuh in puhla Iwaclah luhn Mwet Lahngo orekma ke moul lasr uh, kuht ac sesseslah ke engan.³² Pacl nuhkwewa kuh ahkkweye mukul tuhmwacsr kuh muhtwacn kiyacsr ac kol tuhlihk nahtuhsr, pacl nuhkwewa kuht sang nuhnak muhnahs nuh sin mwet se kuh siyuck selos ke nuhnak muhnahs, kuht kuh in puhla engan.

Lwen nuhkwewa ma kowos ac nga sulaclah in moulkihn masap celestial, lwen nuhkwewa ma kuht karihngihn olwelah lasr ac kahsruh mwet sahyac in oruh pac, engan uh ma lasr.

Loacng nuh ke kahs inge sin mwet sihmihs Psalm: “Nga pula na mu Leum God El oasr yuruk pacl e nukewa; El apkuran, ac wangin ma ac fah mokleyu. … Ke kom apkuran nu sik, insiuk arulacna engan.”³³ Ke ip yohk se inge oasr ke insiyacsr, kais sie lwen kuh in lwen in engan.³⁴ Nga fahkwack luhlahlfongi ke ine muhtahl luhn Jisus Kraist, amen.