Peren oh Momour en Palingehn

Riei ohl oh lih oko, rahn wet I men koasokoasoia duwen padahk ehu me kesempwal ong atail momour en palingehn. E wia padahk ehu me pahn kesempwalla nan ansou me kahpwal akan oh mwekid kelingeringer kan pahn lalaudla.

Rahnpwukat iei imwin rahn akan, eri kitail sohte pahn pwuriamweiki ma kitail kilang kokohp akan pweida. Tohto soukohp, me iangahki Aiseia, Paul, Nephi, oh Mormon, kohpada duwen ansou apwal me pahn kohdo,¹ me nan atail ahnsou sampah pwon pahn wie pingiping,² me aramas pahn roporop ong pein irail, … irail pahn sempoak, … re pahn inengieng pein arail peren laudsang kupwur en Koht,”³ oh tohto me pahn wiahla ladu en Sedan me kin wia doadoahk en me suwedo.⁴ Ni mehlel, kitail wie “pelipelian … kaun akan en wasa rotorot nan sampah, [oh] ngehn suwed kan en pahnlahng.”⁵

Nindoken pingiping en nan pwungen wehi kan ah pahn suwedla, terrorist kan kemehla me mwahu kan, oh mwersued lalaudla nan pesness kan lel nan koapworment, dahme kak seweseikitail? Dahme kak sewese emen emen kitail nan pein atail apwal akan oh kahpwal en momour nan imwin rahn pwukat?

Soukop Lehi padahk ki duwen padahk ehu me pid momour nan palingehn. Keieu, medewe irair en eh mour: Aramas kailongki pwehki ah kalohk nan Serusalem oh Kauno poahngoke en pwilikihdi ah dipwisou koaros oh wahda ah peneinei kohla nan sapwtehno. E koukouson nan impwal oh momour ki mwenge me irail kak diar nan arail seiseilok kohla wasa ieu me re sehse, oh nah pwutak riemen, Laman oh Lemuel, sapeikieng padahk en Kauno oh peieng riera pwutak kan Nephi oh Sam.

E sansal, me Lehi kehnehr kailok, pwunod, pahtou, medek, oh nsensuwed. Ahpw, e kasalehda ni eimah oh sohte peikasalki padahk ehu me Kauno mahsanih: Aramas mie, pwe irail en ahneki peren.⁶ Medewe! Nan pwungen kosoi koaros me e kak kosoia pwehn kawehwehda duwen kahrepen atail mour nan mour wet, e pilada lepin kosoi peren!

Pak tohto nan atail mour kitail kin sohte kak wia dahme kitail kin men wia, pwehki kahpwal akan. Emen emen kitail mwein lelehr nan irair me kapahtou, kamedek, oh soukoapwoaroapwoar kereniong powehdi. Ahpw kitail kohdo pwe kitail en peren?

Ei! Pasapengo iei mehlel! Ahpw ia mwomwen ah pahn wiawi? Oh dahme kitail anahne wia pwe kitail en kak alehdi pereno me Sahm Nanleng kaunopadahng kitail?

Eliza R. Snow, me wia keriemen en President Lap en Pwihn en Sawas en Lih, ehukihda pasapeng kaselel ehu. Pwehki kosonned en kemehla tohn Mwomwodiso me Missouri wiahda nan ansou kepou en pahr 1838,⁷ Eliza oh ekei Souleng sopohsang wasahu nan ansou kepeuo. Ehu pwohngo, ahn Eliza peneinei pweidi nan kisin ihmw tuhke ieu me Souleng kan kin doadoahngki. Palilaud en mehn pinahdi pwoahr nan pwungen tuhke me wia dihd ehn ihmwo solahr pwehki irail me kohdo mwohrail wiahkih tuwi, kahrehda mie pwoahr laud me kaht kakete duwaledo loale. E udahn kepou, oh kenerail mwonge ko tenla.

Pwohngo mwein aramas 80 [weliakan] keitikitikpene nan ihmwo, me lapalahki piht 20 [rieisek] square (meter 6.1 square). Palilaud en irail mwohd de kesihnen pwohngo pwon ni arail song en kakarakarih pein irail. Likio, ohl ekei kapilpene lapalahn kisiniei, oh ekei irail kokoulki koul en sarawi oh ekei karakarang kenerail pedehde me tenla. Eliza ntingihdi: “Sohte me kaulim—koaros peren, oh ma aramas en liki pahn kasawih irail re mwein pahn nda me irail pwihn en aramas me kin raparapahki peren ahpw kaidehn pwihn me alehdi kalipilip sang kepina.”

Ahn Eliza repoht en pwohng kapwang oh kaloko me iei koapwoaroapwoar laud mie. E koasoia: “Pwohngo wia pwohng kaperen. Soulengte me kak ahneki peren nan irair koaros.”⁸

Ih mwomwehn mwo! Souleng kan kak peren nan irair koaros. Kitail kak peren mehndahte ma atail rahno, de wihko, de pahro sakanakan!

Riei ohl oh lih akan, peren me kitail kin pehm sohte kin sang irair en atail mour ahpw e kin kohsang dahme kitail medewe me kesempwal ong atail mour.

Ahnsou me atail mour kin pahrekieng sapwellimen Koht pilahn en komouro, me Preseden Thomas S. Monson padahkiong kitail, oh Sises Krais oh Sapwellime rongamwaho, kitail kak kehn peren medahte dahme wiewiawi—de sohte wiawi—nan atail mour. Peren kin kohsang Reh. Ih me utuhn peren koaros. Kitail kin kehn nan Kirismas ansou me kitail kin koulki, Peren ong sampah, Kauno ketdohr.”⁹ Oh kitail kak kehn nan pahro pwon. Ong Souleng en Imwin-rahn akan, Sises Krais ketkihdo peren!

Ihme kahrehda neitail misineri kan kin mweselsang imwarail kan oh kalohk ki Sapwellime rongamwahu. Arail doadoahk kaidehn irail en katohtowehla tohn Mwomwohdiso. Ahpw, irail en padahk oh pepdais¹⁰ pwe en wahdo peren ong aramas en sampah!¹¹

Duwehte Sounkomouro ah ketkihdo popohl me kitail sohte kak wehwehki,”¹² E pil ketkihdo peren laud, loal, oh kehlail me loalokong en aramas sohte kak wehwehki. Karasepe, E mwomwen apwal kumwail en peren ahnsou me noumwail seri men lokolok ki soumwahu me sohte kak kamwahula, de ahnsou me kumwail sohla doadoahk, de ma amwail pwoud pitihkumwaildi. Ahpw ih pereno me Sounkomouro ketkihdo. Sapwellime peren me poatoapoat oh kiheng kitail koapwoaroapwoar me atail lokolok pahn kisin ansou kiste”¹³ oh e pahn wiahla kamwahupetail.¹⁴

Eri, ia mwomwen atail pahn alehdi pereno? Kitail kak tepkihda kilenglahng Sises me wia poahson en pwoson oh imwilahn pwoson”¹⁵nan atail madamadau unsek.”¹⁶ Met wewehki me kitail pahn peki Sapwellime sawas nan mehkoaros me kitail anahne, nan ansou koaros. Oh kitail pahn kalapw kapinga Ih nan atail kapakap kan oh sang ni kolokol inou kan me kitail wiahieng Ih oh Samatail Nanleng. Ni atail pahn mehlelkihla Sounkomouro oh ni atail pahn peki Sapwellime pereno en ketkihdo, atail peren pahn keirda.

Peren udahn manaman kehlail, oh nantihong peren pahn wahdo Sapwellimen Koht manaman nan atail mour kan. Nan mehkoaros, Sises Krais iei atail soun kahlmengi keieu kesempwal, e ketin kanengamahieng pohn lohpwuo pwe kitail en kak peren.”¹⁷ Mede dahme e wia! Pwe en kak kanengamahieng lokokol me keieu kamedek pohn sampah, atail Soundoro medemedewe peren!

Oh soangen peren dah me kaunopdahr ong Ih? Mehlel e iangahki peren en kamwakele, kamwahuiala, oh kakehlakahla kitail; peren en pwainla dipen koaros me pahn koluhla; peren me pahn kahrehda kitail en kak pwurala reh—mwakelekel oh warohng—momour rehn atail Nohno oh Pahpa Nanleng oh peneinei kan.

Ma kitail pahn medemedewe peren me pahn kohdohng kitail, de irail me kitail poakohng, dahme kitail pahn kanengamah loale me met mwomwen kahpwal, kamedek, kamasepwehk, sapahrek, de mwomwen apwal en powehdi?

Emen pahpa me mih nan irair keper en palingehn medewe peren en kak pwurehng mwakelekelda oh pwungla rehn Kauno—peren en saledek sang namenek—oh peren en ahneki popohl nan madamadau. Madamadauo kahrehda ah kehlail en wehkehng ah pwoudo oh pisopo ni mehlel me pid duwen ah kahpwal en kilang kilel oh kasdo suwed oh pitihdi ah pwoud. Met e wihwia soahng koaros me ah pisopo kaweidki en nannantihong wia ah kak koaros en alehdi likilik sang ah pwoud kesemwpwal.

Emen lih medewe peren en mour mwakelekel, ni ah kanengamahiong ansou me iengeh kan kouruhrki, ansou me e kohkohlahsang mwekid me ndand oh suwed, ahpw wia irair keper ong palingehne.

Ohl emen me sohte kin kesempwalki ah pwoud oh kalapw lipwoare nah seri kan medewe peren en kak warohng Ngehn Sarawi pwe en kalapw ieiang. Madamadauo kahrehda eh kak pwilikihda udahn luwet en aramas,¹⁸ me e kin kalapw pwupwidi loale, oh wekidala ah wiewia.

Emen kempoakepahi kesemwpwal apwtehn indahng ie duwen kahpwal laud akan me e lelehng nan pahr riesek kei samwalahro. E koasoaia, “I esehla ni ai kin nantiong—kin mie popohl. Ahi nantiong koaros kin pweida sang ni popohl en Krais.”¹⁹

Dahme kumwail oh ngehi kak kanengamahiong loale, ni atail pahn medemedewe peren me mih mwohtail?²⁰ Soangen koluhla dah me kak wiawi? Soangen luwet dah me pahn wiahla kakehlpetail?²¹ Soangen penou dah me pahn wiahla kapai?²² Soangen kansensuwed de kahpwal dah me pahn wiahla kamwahupetail?²³ Oh soangen papah loaloapwoat dah me kitail kak kihong Kauno?²⁴

Ni atail pahn loaloapwoatieng medewe Sounkomouro oh idawehn Sapwellime wiepen medemedewe peren, kitail anahne soikala mehkot me pahn kakete kediropwahla atail peren. Taman Korihor, me uhong-Krais? Ni ah lahlahwe Sounkomouro, Korihor kohla wasa tohto lau e lella rehn samoro lapalap me kalelapak reh: Dahme ke kohkohseli oh lahlahwehki koasondi en Kauno? Dahme ke kalohngki me sohte Krais, pwe e pahn kediropwahla arail pereperen?”²⁵

Soang koaros me kin uhong Krais de Sapwellime padahk pahn kedirapwa atail peren. Met iangahki padahk en aramas en sampah, me tohto nan internet, me wia dahme Korihor wiahiero.²⁶

Ma kitail pahn kilang sampah oh idawehn arail wiepen alehdi peren,²⁷ kitail sohte pahn ese peren mehlel. Me suwed kan kak kehn tohto pepehm kan, ahpw irail sohte pahn ese peren mehlel!²⁸ Peren iei kisakis ong me loaloapwoat kan.²⁹ E wia kisakis me kin kohdohng irail me kin mehlelki arail nannantihong mourki mour pwung, nin duwen dahme Sises Krais kaweidki.{ .³⁰

E padahkihong kitail ia mwomwen atail kak peren. Ahnsou me kitail pahn pilada Sahm Nanleng en wia atail Koht³¹ oh ahnsou me kitail kak kehn sapwellimen Sounkomouro Tomw nan atail mour, kitail pahn audaudki peren.³² Ansou koaros me kitail pahn apwalih atail pwoud oh kaweid neitail seri kan, ansou koaros me kitail pahn mahk ong emen de peki mahk , kitail kak kehn peren.

Rahn koaros me kumwail oh ngehi pahn pilada momourki kosonned en wein celestial, rahn koaros me kitail kolokol atail inou kan oh sowese mehtei kan en pil wia duwehte, kitail pahn ahneki pereno.

Rong mahsen en Melkahkahwet: “I koasonehdi Kauno en mihmi mwohi: pwehki E ketiket ni palimoun en pehi, I sohte pahn mwekit. … Nan mwolen [Kauno] iei wasa peren unsek.”³³ Ma padahk wet e pahn tengediong nan atail mongiong kan, rahn koaros kak wia rahn kaperen.³⁴ I kadehdehki mepwukat ni lengileng kapai en Sises Krais, ahmen.