Olioli ma le Ola ai Faaleagaga

O’u uso e ma tuafafine pele, o le asō ou te fia talanoa atu ai i se mataupu faavae e taua i lo tatou ola ai faaleagaga. O se mataupu faavae lea o le a atili taua pe a faateleina ia mala ma mea matautia o siomiaina i tatou.

O aso nei e gata ai, e le tatau la ona faateia i tatou pe a tatou vaai atu i le faataunuuina o valoaga. O se vaega o perofeta, e aofia ai Isaia, Paulo, Nifae, ma Mamona, na muai vaaia le oo mai o na taimi faigata,¹ i o tatou aso o le a vavao le lalolagi atoa,² o le a avea tagata ma “e alolofa i latou ia i latou, … o e le lotoaiga, … o e ua tele le manao i mea faafiafia a e leai se manao i le Atua,”³ ma o le a toatele o le a avea ma auauna a Satani o e ua sapasapaia le galuega a le fili.⁴ E moni, ta te “le tau … ma alii o le pouliuli o lenei lalolagi, [faapea] ma agaga leaga i mea o i le lagi.”⁵

Ao faateleina feteenaiga i le va o malo, ao fasiotia e tagata faatupu vevesi palaaai ia tagata le sala, ma ao faateleina le avea ma mea masani ia le amio leaga i soo se mea mai pisinisi i malo, o le a se mea e mafai ona fesoasoani ia i tatou? O le a se mea e mafai ona fesoasoani ia i tatou taitoatasi ia tatou tauiviga patino ma lui faigata o le ola ai i nei aso e gata ai?

Na aoao mai e le perofeta o Liae se mataupu faavae mo le ola ai faaleagaga. Muamua, mafaufau i ona tulaga: Na sauaina o ia mo le aoao atu o le upumoni i Ierusalema ma poloaiina e le Alii ia tuua ana meatotino ma sosola atu ma lona aiga i le vao. Na nofo o ia i se faleie ma ola i mea na mafai ona maua e agai atu i se taunuuga e le mailoa, ma sa ia vaaia ona atalii e toalua, o Lamana ma Lemuelu, o fouvale agai i aoaoga a le Alii ma sauaina o laua uso o Nifae ma Sama.

E manino lava, na silafia e Liae mea faafeagai, popole, lototiga, tiga, faanoanoa, ma le faavauvau. Peitai sa ia tautino atu ma le lototoa ma aunoa ma le faatuai se mataupu faavae e pei ona faaalia e le Alii: “Ua i ai tagata, ina ia latou maua le olioli.”⁶ Vaai faalemafaufau atu! Mai upu uma na mafai ona ia faaaogaina e faamatala ai le natura ma le faamoemoega o tatou olaga iinei i le faaletino, ua ia filifilia le upu olioli!

Ua tumu le olaga i auala ‘alo ma auala muta, luitau ma tofotofoga o soo se ituaiga. Atonu ua tofu i tatou ma ni taimi o mafatiaga, tiga, ma le faanoanoa lea toetoe lava a lofituina ai i tatou. Ae ua tatou i ai iinei ina ia maua le olioli?

Ioe! O le tali o le ioe mautinoa! Ae e mafai faapefea lena mea? Ma o le a le mea e ao ona tatou faia ia maua ai le olioli lea ua faapolopolo mai e le Tama Faalelagi mo i tatou?

Na tuuina mai e Eliza R. Snow, Peresitene Aoao lona lua o le Aualofa, se tali manaia tele. Ona o le faatonuga tautaua a Misuri e faaumatia [tagata mamona], lea na tuuina atu i le amataga o le taumalulu matautia o le 1838,⁷ na latou sosola ese ai ma nisi o le Au Paia mai le sitete i lena lava taumalulu. I se tasi po, sa nonofo Eliza ma lona aiga i se tamai fale laau na faaaoga e tagata sulufai a le Au Paia. O le tele o mea na faatumu ai va o laupapa na aveesea ma faaaoga i le afi e i latou na muamua atu, o lea na matua pupu ai va o laau ma na mafai e se pusi ona tolotolo mai ai i totonu. Sa maatiati le malulu, ma na malo tiaa a latou meaai.

I lena po pe a ma le 80 tagata na faapupuu i totonu o lena tamai fale laau, e na o le 20 futu faatafafa (6.1 mita faatafafa). O le toatele na saofafai pe tutu i le po atoa e taumafai ia faamafanafana. I fafo, na faaaluina e se vaega o alii le po e potopoto ai i autafa o se afi mumu saesae, ma o nisi na usuina ni viiga ao isi na tunuina ni pateta ua aisa. Na tusia e Eliza: “Sa leai se tomumu na faalogoina—na fiafia tagata uma, ma a fua i o latou foliga, masalo semanu e faapea ni tagata ese o ni tagata o loo sailia ni mea faafiafia nai lo se vaega o tagata ua tutuliesea.”

O le lipoti a Eliza e faatatau i lena afiafi vaivai ma taufaamatau na matua foliga ai o loo lelei mea uma. Sa ia tautino mai: “O se po fiafia tele lena po. Ua na o le au paia e mafai ona maua le fiafia i lalo o soo se tulaga.”⁸

O le mea lena! E mafai ona maua e le au paia le fiafia i lalo o soo se tulaga. E mafai ona tatou lagona le olioli e tusa lava pe le o lelei le aso, se vaiaso, po o se tausaga!

O o’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o o tatou olaga.

Afai o le taulaiga o tatou olaga e i le fuafuaga o le faaolataga a le Atua, lea faatoa uma ona aoaoina ai i tatou e Peresitene Thomas S. Monson, ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma. Tatou te lagonaina i le taimi o le Kerisimasi pe a tatou usuina le pese, “Le lalolagi ia fiafia.”⁹ Ma e tatou te lagonaina i le tausaga atoa. Mo le Au Paia o Aso e Gata Ai, o Iesu Keriso o le olioli lea!

O le mafuaaga lena e tuua ai e o tatou faifeautalai o latou aiga ina ia talai atu Lana talalelei. E le o lo latou sini le faateleina o le aofai o tagata o le Ekalesia. Ae, o a tatou faifeautalai e aoao atu ma papatiso¹⁰ ia aumai le olioli i tagata o le lalolagi!¹¹

E pei lava foi ona ofo mai e le Faaola le filemu lea e “silisili lava i mea uma e manatu i ai,”¹² Na Ia ofoina mai foi le malosi faateleina, loloto, ma le lautele o le olioli lea e tetee ai i tulaga faaletagata po o le malamalama faaletino. Mo se faataitaiga, e le mafai ona e lagona le olioli pe a mafatia lau tama i se ma’i e leai se togatifi, po o ua leai sau galuega po o ua faalata oe e lou toalua. Peitai o le olioli tonu lava lena o loo ofoina mai e le Faaola. O Lona olioli e faifai pea, ma faamautinoa mai o tatou “puapuaga o le a nao sina minute laitiiti”¹³ ma faapaiaina mo lou manuia.¹⁴

E faapefea la, ona tatou maua lena olioli? E mafai ona tatou amata i le “vaavaai atu ia Iesu o le na te taitaiina ma le na te faaatoatoaina le faatuatua”¹⁵ “i mafaufauga uma.”¹⁶ E mafai ona tatou tuuina atu le faafetai mo Ia i a tatou tatalo ma i le tausia o feagaiga na tatou osia ma Ia faapea ma lo tatou Tama Faalelagi. Ao avea ai ma atili moni lo tatou Faaola ia i tatou ma pe a tatou augani atu mo Lona olioli ina ia tuu mai ia i tatou, o le a faateleina ai lo tatou olioli.

O le olioli e mamana, ma o le taulai atu i le olioli e aumai ai le mana o le Atua i o tatou olaga. E pei o mea uma, o Iesu Keriso o lo tatou faataitai sili, “o le na onosai i le satauro,… ona o le olioli sa tuu i ona luma.”¹⁷ Mafaufau i lena mea! Ina ia mafai ona Ia onosaia aafiaga aupito i faigata e lei onosaia muamua i le lalolagi, na taulai atu ai lo tatou Faaola i le olioli!

Ma o le a le olioli lea sa tuu i Ona luma? E mautinoa lava na aofia ai le olioli i le faamamaina, faamaloloina, ma le faamalosia o i tatou; o le olioli i le totogiina mo agasala a tagata uma o le a salamo; o le olioli o le a mafai e oe ma a’u ona toe foi atu—i le mama ma le agavaa—e nonofo ma o tatou Matua Faalelagi ma aiga.

A tatou taulai i le olioli lea o le a oo mai ia i tatou, po o i latou tatou te alolofa i ai, o le a le mea e mafai ona tatou onosaia lea e foliga lofituina, tiga, taufaafefe, le talafeagai, pe foliga e le mafai?

O se tasi o tamā i se tulaga lamatia faaleagaga na taulai atu i le olioli o le faamamaina ma ia agavaa ma le Alii—o le olioli o le saoloto mai le tausalaina ma le maasiasi—ma le olioli o le mauaina o le filemu o le mafaufau. O lena taulaiga na tuuina atu ai ia te ia le lototoa e tau atu ai i lona toalua ma le epikopo lona faafitauli i ponokalafi ma lona le faamaoni. O loo ia faia nei mea uma na fautuaina ai o ia e lona epikopo e fai, taumafai ma lona loto atoa ia toe maua le faatuatuaga a lona toalua pele.

Na taulai atu se tamaitai talavou i le olioli o le tumau ai i le mama mai feusuaiga ina ia fesoasoani ia te ia e onosaia ia tauemuga a uo ao ia savali ese mai se tulaga lauiloa ma taufaaosooso, ae matautia faaleagaga.

O se tamaloa e masani ona faalumaina lona toalua ma soona lafo ni upu mataga i lana fanau na taulai atu i le olioli ia agavaa ia avea le Agaga Paia ma ona soa tumau. O lena taulaiga na uunaia o ia e tuu ese le tagata natura,¹⁸ lea sa masani ona ia gauai atu i ai, ma ia faia ni suiga manaomia.

Na ta’u mai ia te a’u e se uo mamae ona tofotofoga mamafatu i vaitausaga e lua ua mavae atu. Fai mai o ia, “Sa ou aoao ia mafatia ma le olioli. Na tofatumoanaina o’u puapuaga i le olioli ia Keriso.”¹⁹

O le a se mea ta te mafai ona onosaia ao tatou taulai atu i le olioli lea ua “tuu i o [tatou] luma”?²⁰ O le a le tulaga salamo o le a mafai ona faia? O a vaivaiga o le a avea ma malosiaga?²¹ O a ni aoaiga o le a avea ma se faamanuiaga?²² O a faanoanoaga, e oo lava i mala, o le a avea ma o tatou lelei?²³ Ma o a auaunaga faigata a le Alii o le a mafai ona tatou tuuina atu?²⁴

Ao tatou taulai atu ma le maelega i le Faaola ma mulimuli i Lana mamanu o le taulai atu i le olioli, e tatau ona tatou aloese mai mea e mafai ona faalavelave i lo tatou olioli. Manatua Korioa, le aneti-Keriso? Sa faia e Korioa le tele o faamatalaga pepelo e uiga i le Faaola, na alu atu Korioa i lea nofoaga ma lea nofoaga seia oo ina aumai o ia i luma o le faitaulaga sili o le na fesiligia o ia: “Aisea ua e fealuai ai e faapiopio ala o le Alii? Aisea ua e aoao atu ai i lenei nuu o le a leai se Keriso, e taofi ai lo latou olioli?”²⁵

Soo se mea e tetee ia Keriso po o Lana aoaoga faavae o le a taofia lo tatou olioli. E aofia i lena mea ia filosofia a tagata, lea e tele i luga o le initoneti ma poloka, lea e tutusa lava ma mea na faia e Korioa.²⁶

Afai tatou te vaai atu i le lalolagi ma mulimuli i ona mamanu mo le fiafia,²⁷ tatou te le iloaina lava le olioli. E ono maua e tagata le amiotonu le tele o lagona ma faalogona, ae latou te le mauaina lava le olioli!²⁸ O le olioli o se meaalofa mo le au faamaoni.²⁹ O se meaalofa e sau mai le taumafai ma le leai o se mafaufau i ai ia ola i se olaga amiotonu, e pei ona aoao mai e Iesu Keriso.³⁰

Na Ia aoao i tatou ia maua le olioli. Afai tatou te filifilia le Tama Faalelagi e avea ma o tatou Atua³¹ ma pe a tatou lagona le aoga o le Togiola a le Faaola i o tatou olaga, o le a faatumulia i tatou i le olioli.³² O taimi uma lava tatou te tausia ai o tatou taitoalua ma taialaina a tatou fanau, o taimi uma lava tatou te faamagalo atu ai i se tasi pe tapa se faamagaloga, tatou te lagona le olioli.

O aso uma ta te filifili ai ia ola i tulafono faaselesitila, o aso uma tatou te tausia ai a tatou feagaiga ma fesoasoani i isi ia faia lena lava mea e tasi, o le a avea mo tatou le olioli.

Faalogo i upu a le fai Salamo: “Ou te tuu Ieova i o’u luma e le aunoa; aua o i lo’u itu taumatau o ia, e le faagaeetia ai lava a’u. … O i [Lona] luma le fiafia e malie ai.”³³ Ao tamauina lenei mataupu faavae i o tatou loto, o le a mafai ona avea aso taitasi ma aso o le olioli ma le fiafia.³⁴ Ou te molimau atu ai i le suafa paia o Iesu Keriso, amene.