Manuto Halin kanday Alma kag Amulek

Sa labing di-malimtan nga mga persona sa kasulatan amo si Alma ang Lamharon. Bisan nga anak sia sang bantog nga propeta, sia nagtalang sa pila ka panahon kag nangin “malaut kag madios-dioson nga tawo”. Sa mga kabangdanan nga aton lamang mapaktan, aktibo nga nagsupak sia sa iya amay kag nagtinguha sa pagguba sa Simbahan. Kag bangud sia maayo maghambal kag magbuyok, dako sia nga madinalag-on.¹

Apang ang kabuhi ni Alma nagbag-o sang ang anghel sang Ginuo nagpakita sa iya kag naghambal sa tingog subong sang daguob. Sa tatlo ka adlaw kag gab-i, si Alma “nag-antus sang kalayo sang impiyerno, … bisan sang mga kasakit sang ginpakamalaut nga kalag.” Kag dayon, bisan paano, ang diutay nga pagkadumdom nagpasanaaw sang iya nadulman nga hunahuna—ang walay katubtoban nga kamatuoran, gintudlo sang iya amay: nga si JesuCristo magaabot “agud magpasag-uli para sa mga sala sang kalibutan.” Si Alma madugay na nga nagsikway sining mga konsepto, apang karon ang iya “kaisipan nangapyot sa sining panghunahuna,” kag sia kubos, sinsero nga nagsalig sa nagapasag-uli nga gahum ni Cristo.²

Sang si Alma naggwa sa sining inagihan, bag-o na sia nga tawo. Sugod sina nga tion, sia nagdeboto sang iya kabuhi agud kay-ohon ang kapiyerdihan nga iya nahimo. Sia isa ka gamhanan nga halimbawa sang paghinulsol, kapatawaran, kag padayon nga pagkahimpit.

Si Alma sang ulihi amo ang nagbulos sa iya amay bilang pangulo sang Simbahan sang Dios.

Ang katawhan sa nasyon sang Nephite siguro nakabalo sang istorya ni Alma. Ang mga Twitter, Instagram, kag Facebook sang iya panahon siguro napuno sing laragway kag mga istorya parte sa iya. Siguro permi sia naggwa sa kober sang Zarahemla Weekly kag sia ang halambalan sang mga editoryal kag network special. Sa malip-ut nga pulong, sia siguro ang pinakalabing kilala nga celebrity sa iya panahon.

Apang sang nakit-an ni Alma ang katawhan niya nga nalimot sa Dios kag nangin bugalon kag palaaway, nagbiya sia sa palangakuan publiko kag nagdedikar sang iya kaugalingon sing “lubos sa mataas nga priesthood sang balaan nga hanay sang Dios,”³ nagawali sang paghinulsol sa tunga sang mga Nephites.

Sa una, si Alma may dakong kadalag-an—tubtob, sia nag-abot sa siyudad sang Ammonihah. Ang katawhan sinang siyudad lubos nga nakabalo nga si Alma indi na ang pinuno sa gobyerno, kag diutay ang ila pagkabig sa iya awtoridad sa priesthood. Sila nagyaguta, naghikay, kag nagpalayas sa iya paggwa sa ila siyudad.

Nagpangalisud, si Alma naglakat palayo sa siyudad sang Ammonihah.⁴

Apang ang anghel nagpabalik sa iya.

Pinsara ninyo ini: ginpabalik sia sa katawhan nga naugot sa iya kag akig sa Simbahan. Makatalagam ato kag siguro delikado sa kabuhi nga buluhaton. Apang si Alma wala magduhaduha. “Madasig sia nga nagbalik.”⁵

Si Alma nagpuwasa sa madamo nga adlaw sang sia nagsulod sa siyudad. Didto nagpangayo sia sa di-kilala nga tawo nga “hatagan ang kubos nga alagad sang Dios sang kon ano nga makaon.”⁶

Ang ngalan sining lalaki amo si Amulek.

Si Amulek manggaranon, kag kilala nga pumoluyo sang Ammonihah. Bisan nga naghalin sia sa malaba nga linya sang mga tumuluo, ang iya pagtuo nangin mahuyang. Sang ulihi sia nagtuad, “Ako gintawag sa madamo nga beses apang indi ako mamati; gani nabal-an ko ining mga butang, apang wala ako [magpati]; gani nagpadayon ako sa pagrebelde batok sa Dios.”⁷

Apang ang Dios naghanda kay Amulek, kag sang makita ni Amulek si Alma, gin-abiabi niya ang alagad sang Ginuo sa iya puluy-an, kon diin si Alma nagdayon sa pila ka mga adlaw.⁸ Sa tion nga ina, si Amulek nagpamati kay Alma, kag makatalanhaga nga pagbag-o ang natabo sa iya. Sugod sadto, wala lamang nagtuo si Amulek, apang nangin kampeon man sia sang kamatuoran.

Sang si Alma nagtudlo liwat sa katawhan sang Ammonihah, may upod na sia sa iya luyo—si Amulek, kasimanwa nila.

Ang mga hitabo nga nagsunod nagaunod sang isa sa pinakalabing mapait kag matam-is nga istorya sa tanan nga kasulatan. Mabasa ninyo ini sa Alma chapters 8–16.

Karon nga adlaw, luyag ko nga binagbinagon ninyo ang duha ka pamangkot:

Una: “Ano ang matun-an ko halin kay Alma?”

Ikaduha: “Paano ako subong kay Amulek?”

Tugoti ako nga magpamangkot sa nagligad, karon, kag sa palaaboton nga mga lider sang Simbahan ni JesuCristo, “Ano ang matun-an ninyo halin kay Alma?

Si Alma pinasahi nga may dulot kag makasarang nga tawo. Siguro mahapos ini isipon nga indi niya kinahanglan ang bulig bisan kay sin-o. Apang, ano ang ginhimo ni Alma sang nagbalik sia sa Ammonihah?

Si Alma nakasapo kay Amulek kag nangayo bulig sa iya.

Kag si Alma nagbaton sang bulig.

Sa ano man nga rason, kon kaisa bilang mga lider kita nagaduhaduha sa pagpangita kag magpangayo sa aton mga Amulek. Siguro abi naton mas maayo kita nga maghimo ukon nagaduhaduha kita sa pagpabudlay sa iban, ukon ginapinsar naton nga ang iban indi luyag magpartisipar. Tuman ka masami nagaduhaduha kita sa pagdapit sa katawhan nga maggamit sang mga talento nga ginhatag sang Dios sa ila kag magbuylog sa dakong buluhaton sang kaluwasan.

Hunahunaa ang Manluluwas—nagsugod bala Sia sa pagtukod sang Iya Simbahan nga nagaisahanon?

Wala.

Ang mensahi Niya indi “Atras kamo. Pagabuhaton ko ini.” Sa luyo sini amo ang “Dali, magsunod kamo sa akon.”⁹ Gin-inspirar, gindapit, gintulinan, kag dayon ginsaligan ang Iya mga sumulunod nga “magbuhat sang mga butang nga nakit-an ninyo nga ginbuhat ko.”¹⁰ Sa sining paagi, si JesuCristo nagtukod indi lang sang Iya Simbahan apang amo man sang Iya mga alagad.

Sa bisan ano man nga posisyon kamo subong nagaalagad—kon kamo isa ka presidente sang deacons quorum, stake president, ukon Area President—agud mangin madinalag-on, dapat ninyo pangitaon ang inyo mga Amulek.

Basi ini nga tawo kinaandan ukon wala makit-an sa inyo mga kongregasyon. Basi ini nga tawo daw indi luyag nga mag-alagad. Ang mga Amulek ninyo sarang bata ukon tigulang, lalaki ukon babayi, wala sang inagihan, lapyo, ukon di-aktibo sa Simbahan. Apang ang indi makit-an sa una nga paglantaw amo nga sila nagalaum sang mga pulonga halin sa inyo “Ang Ginuo nagakinahanglan sa inyo! Kinahanglan ko kamo!”

Tudok sa ila tagipusuon, madamo ang luyag nga mag-alagad sa ila Dios. Luyag nila nga mangin instrumento sa Iya mga kamot. Luyag nila nga maggarab kag magtinguha sa ila kabaskog agud ihanda ang kalibutan para sa pagbalik sang Manluluwas. Luyag nila magtukod sang Iya Simbahan. Apang nagaduhaduha sila sa pagsugod. Masami nagahulat sila nga pangabayon.

Ginadapit ko kamo nga hunahunaon yadtong ara sa inyo mga branch kag ward, sa inyo mga misyon kag stake, nga dapat tawgon agud maghulag. Ang Ginuo nagabuhat sa ila—nagahanda sa ila, nagapahumok sang ila mga tagipusuon. Pangitaa sila paagi sa paglantaw paagi sa inyo tagipusuon.

Maglab-ot sa ila. Tudloi sila. Mag-inspirar sa ila. Pangabaya sila.

Ipaambit sa ila ang mga pulong sang anghel kay Amulek—nga ang bugay sang Ginuo magaabot sa ila kag sa ila pamilya.¹¹ Basi makibot kamo nga matukiban ang isa ka maisog nga alagad sang Ginuo nga kuntani nagpabilin nga nakatago.

Samtang ang iban sa aton nagapangita sang Amulek, para sa iban ang pamangkot basi ” Paano ako subong kay Amulek?”

Basi kamo, sa nagligad nga mga tuig, nangin maluya sa inyo panaad bilang disipulo. Basi ang kasanag sang inyo pagpamatuod nagpirawpiraw. Basi nagpalayo kamo halin sa Simbahan. Basi naglas-ay kamo ukon bisan pa gani naakig. Subong sang pila sa dumaan nga Simbahan sa Ephesus, ginbiyaan ninyo ang inyo “unang gugma”¹²—ang langitnon, walay katubtoban nga mga kamatuoran sang ebanghelyo ni JesuCristo.

Basi, subong kay Amulek, nabal-an ninyo sa inyo tagipusuon nga ang Ginuo “nagtawag sa [inyo] sa madamo nga beses,” apang kamo “indi mamati.”

Wala sapayan, ang Ginuo makakita sa inyo sang subong sa Iya nakit-an kay Amulek—ang potensyal sang isa ka isganan nga alagad nga may importanteng buluhaton kag may panaksihon nga ipaambit. May ara sang pag-alagad nga kamo lang ang makahatag. Ang Ginuo nagsalig sa inyo sang Iya balaan nga priesthood, nga nagahupot sang diosnon nga potensyal agud magbugay kag magtib-ong sa iban. Magpamati sa inyo tagipusuon kag magsunod sa mga pagpabatyag sang Espiritu.

Natandog ako sa istorya sang isa ka brother nga nagpamangkot sa iya kaugalingon, “Kon ang Ginuo nagatawag, mabatian ko bala Sia?” Tawgon ko ining maayo nga brother sa ngalan David.

Si David nahaylo sa Simbahan mga 30 anyos nga nagligad. Nagmisyon sia kag dayon nag-eskwela agud mangin abogado. Samtang nagatuon kag naga-obra agud suportahan ang lamharon nga pamilya, nakasapo sia sang impormasyon parte sa Simbahan nga nagpalibog sa iya. Sa dugang nga pagbasa sining mga negatibong materyales, labi sia nga nagduda. Sang ulihi ginpangabay niya nga kuhaon ang iya ngalan sa mga record sang Simbahan.

Sugod sinang tion, subong kay Alma sa mga adlaw sang iya pagrebelde, si David nag-usik sang madamo nga tion sa pagdebate sa mga miyembro sang Simbahan, nagabuylog sa mga online nga pag-istoryahanay sa tuyo nga tilawan ang ila mga pagpati.

Tuman sia ka batid parte sini.

Isa sa mga miyembro nga nakadebate niya tawgon ko nga si Jacob. Si Jacob dalayon nga maayo kag matinahuron kay David, apang mapag-on man sia sa pagpangapin sa Simbahan niya.

Sa nagligad nga mga tinuig, si David kag Jacob nagtukod sang pareho nga pagtahud kag pag-abyanay. Ang wala mabal-an ni David amo nga si Jacob naga pangamuyo para sa iya kag himpit nga ginhimo ini kapin sa isa ka dekada. Ginbutang gani ni Jacob ang ngalan ni David para sa mga pangamuyo sa templo kag naglaum nga ang tagipusuon niya maghumok.

Sa naglipas nga panahon, inanay, si David nagbag-o. Nagsugod sia nga magdumdom nga may kahidlaw sang mga espirituhanon nga mga inagihan niya sang una, kag sa kalipayan nga nabatyagan niya sang sia isa pa ka miyembro sang Simbahan.

Subong kay Alma, si David wala malimot sing lubos sa mga kamatuoran sang ebanghelyo nga ginbaton niya sang una. Kag subong kay Amulek, nabatyagan ni David nga ang Ginuo nagalab-ot sa iya. Si David karon isa na ka partner sa law firm—mataas nga posisyon sa iya obra. Kilala sia bilang kritiko sang Simbahan, kag tuman ang iya bugal agud magpangabay nga batunon liwat.

Wala sapayan, padayon nga nabatyagan niya ang pagbutong sang Manugbantay.

Ginsunod niya ang kasulatan “Kon sin-o sa inyo ang kulang sa kaalam, tugoti sia nga magpamangkot sa Dios, nga nagahatag sing maalwan sa tanan nga tawo, kag wala nagapangakig; kag ini igahatag sa iya.”¹³ Nagpangamuyo sia, “Mahal nga Dios, luyag ko nga mangin Santos sa Ulihing Mga Adlaw liwat, apang may mga pamangkot ako nga nagakinahanglan sang mga sabat.”

Nagpamati sia sa mga hutik sang Espiritu kag sa inspiradong mga sabat halin sa mga abyan nga wala gid niya ginhimo sang una. Isa kag isa, ang iya mga pagduda nangin pagtuo, tubtob sang ulihi nabal-an niya, nga sa liwat, mabatyagan niya ang pagpamatuod parte kay JesuCristo kag sa Iya ginpanumbalik nga Simbahan.

Sinang tion, nabal-an niya nga sarang niya lutuson ang iya bugal kag maghimo sang bisan ano nga kinahanglan agud makabalik sa Simbahan.

Sang ulihi, si David nabunyagan kag naghulat agud ang iya mga bugay mapanumbalik.

Malipayon ako nga magpahayag nga sining nagligad nga tag-init, ang mga bugay ni David ginpanumbalik sa iya. Lubos sia karon nga nagapartisipar sa Simbahan kag nagaalagad bilang manunudlo sang Gospel Doctrine sa ila ward. Ginabaton niya ang kada oportunidad nga maghambal sa iban parte sa iya pagbag-o, agud kay-ohon ang kapiyerdihan nga gintuga niya, kag magpamatuod parte sa ebanghelyo kag Simbahan ni JesuCristo.

Palangga kong mga kautoran, palangga kong mga abyan, maglab-ot kita, magpangita, mag-inspirar, kag magsalig sa mga Amulek sa aton mga ward kag mga stake. Madamo sang mga Amulek sa Simbahan karon nga adlaw.

Basi may kilala kamo nga isa. Basi kamo ini.

Basi ang Ginuo nagahutik sa inyo, nagabuyok sa inyo nga magbalik sa inyo una nga gugma, maghatag sang inyo mga talento, kag takus nga maggamit sang inyo priesthood, kag mag-alagad nga ululupod sa inyo isigka-Santos sa pagpalapit kay JesuCristo kag sa pagtukod sang ginharian sang Dios diri sa duta.

Ang pinalangga nga Manluluwas nakabalo kon diin kamo. Kilala Niya ang mga tagipusuon ninyo. Luyag Niya nga luwason kamo. Sia magalab-ot sa inyo. Buksi lang ninyo ang inyo tagipusuon sa Iya. Ginalauman ko nga yadtong mga nagtalang halin sa banas sang pagkadisipulo—bisan sa pila lamang ka mga degree—magbinagbinag parte sa kaayo kag grasya sang Dios, maglantaw paagi sa ila mga tagipusuon, manuto halin kanday Alma kag Amulek, kag mamati sa makapabag-o sing kabuhi nga mga pulong sang Manluluwas: “Dali, magsunod kamo sa akon.”

Ginabuyok ko kamo nga sundon ang Iya tawag, kay pat-ud nga mabaton ninyo ang padya sang langit. Ang bugay sang Ginuo magatupa sa inyo kag sa inyo pamilya.¹⁴

Sa sini ako nagasaksi kag nagabilin sang akon bugay sa inyo bilang Apostoles sang Ginuo sa ngalan ni JesuCristo, amen.