Kawm Los ntawm Amas thiab Amulej

Ib tug nyob hauv cov vaj lug kub uas peb nco ntsoov yog Amas tus Hluas. Txawm nws yog ib tug yaj saub tus tub, tau ib ntu nws tsis ntseeg thiab yog ib tug “neeg phem heev thiab pe dab pe mlom.” Peb tsis paub vim li cas, tiam sis nws tau tawm tsam nws txiv thiab xav ua rau lub Koom Txoos puas tsuaj. Thiab vim nws muaj kuab heev thiab txawj hais lus, nws yeej ua tau raws li nws xav.¹

Tiam sis Amas lub neej hloov thaum tus Tswv ib tug tim tswv tshwm sim rau nws thiab hais lus zoo li ib lub suab xob quaj. Tau peb hnub thiab peb hmo, Amas “raug tsim txom nrog txoj kev tsim txom uas nyob mus ib txhis … twb raug tej kev mob ntawm ib tug neeg txhaum.” Ces, ib lub tswv yim ho los rau nws lub cim xeeb—yog ib qho tseeb uas nyob mus ib txhis, uas nws txiv tau qhia nws: hais tias Yexus Khetos yuav los “theej neeg ntiaj teb lub txhoj.” Amas twb xyeej tej yam zoo li no dhau los, tiam sis tam sim ntawd nws lub siab tsom ntsoov rau txoj kev xav no thiab nws txo hwj chim, tso siab rau Khetos lub hwj chim theej nws lub txhoj.²

Tom qab ntawd Amas twb hloov siab tag nrho lawm. Txij thaum ntawd, nws mob siab mus kho tej yam tsis zoo uas nws tau ua rau lwm tus. Nws yeej yog ib tug uas coj yam ntxwv zoo txog kev hloov siab lees txim, kev zam txim, thiab kev rau siab ntseeg.

Tom qab ntawd Amas yog tus uas sawv nws txiv cev ua tus thawj coj ntawm Vajtswv lub Koom Txoos.

Nyaj txhua tus hauv cov Neeg Nifias cov pej xeem paub Amas zaj dab neeg. Ntshe yog tias muaj Twitter, Instagram, thiab Facebook thaum ntawd ces yuav muaj nws zaj dab neeg thiab cov duab nyob txhua qhov chaw. Nyaj pheej muaj nws daim duab rau ntawm xov xwm Xalahelas Weekly thiab cov neeg pheej sau xov xwm txog nws. Hauv nws lub caij nyoog tej zaum nws yog tus uas muaj koob muaj npe loj tshaj plaws.

Tiam sis thaum Amas pom tias nws cov neeg tab tom tsis nco qab txog Vajtswv thiab muab hlob thiab sib cav sib ceg ntau, nws thiaj li tso nws lub luag hauj lwm rau lub tseem fwv tseg thiab nws rau siab “cia tag nrho nws tus kheej rau lub pov thawj hwj siab ntawm Vajtswv tus txheej txheem dawb huv,”³ qhia kev hloov siab lees txim rau cov Neeg Nifais.

Thaum xub thawj, Amas ua tau hauj lwm no zoo heev—mus txog thaum nws mus rau lub nroog Amonaihas. Cov neeg nyob hauv lub nroog ntawd paub zoo tias Amas tsis yog tus thawj coj ntawm lub tseem fwv, thiab lawv saib tsis taus nws txoj cai pov thawj hwj. Lawv ntxub nws, thuam nws, thiab ntiab nws tawm ntawm lawv lub nroog mus.

Amas tu siab heev, nws thiaj li ncaim lub nroog Amonaihas mus.⁴

Tiam sis ib tug tim tswv hais kom nws rov qab mus.

Cia li xav txog qhov no: tus tim tswv hais kom nws rov qab mus rau cov neeg uas ntxub nws thiab tawm tsam lub Koom Txoos. Kev txib mus li no yeej yuav tsum ceev faj thiab tej zaum nws yuav tas sim neej. Tiam sis Amas tsis tau tos. “Nws tau rov qab nrawm nroos.”⁵

Amas twb yoo mov tau ntau hnub lawm thaum nws nkag mus rau hauv lub nroog. Nyob ntawd nws thov ib tug neeg uas nws tsis paub seb nws puas kam “muab ib yam dab tsi rau Vajtswv tus tub qhe uas txo hwj chim noj.”⁶

Tus txiv neej no lub npe hu ua Amulej.

Amulej yog ib tug neeg nplua nuj, uas muaj npe nyob hauv lub nroog Amonaihas. Txawm nws poj koob yawm txwv yog cov ntseeg los, nws tsis tshua muaj siab ntseeg lawm. Nws lees hais tias, Vajtswv tau hu kuv “ntau zaus thiab kuv tsis kam mloog li; yog li ntawd kuv tau paub txog tej yam no, tiam sis kuv tsis xav [ntseeg]; yog li ntawd kuv tau ntxeev siab tawm tsam Vajtswv [mus ntxiv].”⁷

Tiam sis Vajtswv tab tom npaj Amulej, thiab thaum nws ntsib Amas, nws tos txais tus Tswv tus tub qhe los nyob hauv nws lub tsev, es Amas nyob ntawd tau ntau hnub.⁸ Thaum lub sij hawm ntawd, Amulej qhib siab rau Amas zaj lus, thiab nws hloov siab ntau heev. Txij thaum ntawd los, Amulej ntseeg, thiab nws kuj tiv thaiv kev ntseeg.

Thaum Amas mus qhia cov neeg nyob hauv Amonaihas, nws muaj ib tug tim khawv ntxiv nyob ntawm nws ib sab—yog Amulej, ib tug uas yog lawv cov neeg.

Tej yam uas muaj tom qab yeej yog zaj uas zoo siab thiab tu siab kawg nyob hauv phau vaj lug kub. Nej nyeem tau nyob hauv Amas tshooj 8–16.

Hnub no kuv xav nug nej ob lo lus nug:

Lo lus thib ib: “Kuv kawm dab tsi los ntawm Amas?”

Lo lus thib ob: “Kuv zoo li Amulej li cas?”

Kuv xav nug tag nrho cov thawj coj ntawm Yexus Khetos lub Koom Txoos thaum yav tas los, tam sim no, thiab cov uas yuav ua thaum yav tom ntej hais tias, “Nej yuav kawm dab tsi los ntawm Amas?”

Amas yeej yog ib tug uas kawm txawj kawm ntse thiab muaj txuj ci heev. Tej zaum yooj yim rau peb xav tias nws tsis tas muaj leej twg pab nws. Txawm li ntawd los, Amas tau ua li cas thaum nws rov qab mus rau Amonaihas?

Amas nrhiav tau Amulej thiab thov kom nws pab.

Thiab Amas tau txais kev pab.

Tej lub sij hawm, peb cov thawj coj tsis tshua xav nrhiav thiab thov cov zoo li Amulej. Tej zaum peb xav tias peb ua tau zoo dua yog peb ua peb tus kheej, los yog peb tsis xav tab kaum lwm tus, los sis peb xav tias lwm tus tsis xav koom tes nrog peb. Feem ntau peb tos kom caw tib neeg siv tej txuj ci uas Vajtswv tau foom pub rau lawv thiab koom tes ua txoj hauj lwm cawm seej no.

Cia li xav txog tus Cawm Seej—Nws puas tau txhim tsa Nws lub Koom Txoos Nws tus kheej xwb?

Tsis tau.

Nws tsis tau hais tias, “Nyob twj ywm. Kuv mam li ua qhov no.” Tiam sis Nws twb hais tias “Los, nrog kuv mus.”⁹ Nws tshoov lawv lub siab, caw, qhia, thiab tso siab rau Nws cov pab coj “ua tej uas nej tau pom kuv ua lawm.”¹⁰ Yexus Khetos ua li no kom txhawb nqa Nws lub Koom Txoos thiab txhawb nqa Nws cov tub qhe.

Txawm nej ua hauj lwm dab tsi hauv lub koom txoos no los—txawm nej yog pawg dikas tus thawj tswj hwm, ceg txheem ntseeg tus thawj tswj hwm, los yog Cheeb Tsam tus Thawj Tswj Hwm—yog nej yuav ua tau, nej yuav tsum nrhiav tau ib tug zoo li Amulej.

Tej zaum yog ib tug uas nej tsis tshua paub nyob hauv nej pawg ntseeg. Tej zaum yog ib tug uas zoo li nws tsis txaus siab ua los sis nws xav tias nws ua tsis tau. Cov uas zoo li Amulej tej zaum yog neeg hluas, neeg laus, txiv neej, poj niam, tsis paub txog ntau yam, yog neeg nkees, los sis tsis tshua muaj siab ntseeg lub Koom Txoos. Tiam sis tej zaum nej tsis paub thaum xub thawj hais tias lawv cia siab tias lawv yuav hnov nej hais tej lus no “Tus Tswv xav tau nej! Kuv xav tau nej!”

Ntau tus neeg xav ua hauj lwm rau Vajtswv. Lawv xav ua cuab yeej nyob hauv Nws txhais tes. Lawv xav rau siab thiab siv dag zog kom npaj neeg ntiaj teb tos tus Cawm Seej rov qab los. Lawv xav txhawb nqa Nws lub Koom Txoos. Tiam sis lawv tsis paub yuav pib li cas. Feem coob lawv tos kom lwm tus thov lawv.

Kuv caw nej xav txog cov nyob nej ceg ntseeg thiab pawg ntseeg, nyob hauv nej qhov chaw tshaj tawm txoj moo zoo thiab ceg txheem ntseeg, thiab txog cov uas xav hnov Vajtswv hu lawv los ua hauj lwm. Tus Tswv twb tshoov lawv lub siab lawm—npaj lawv lub siab, ua rau lawv lub siab mos muag. Saib los ntawm nej lub siab kom nrhiav tau lawv.

Ncav tes pab lawv. Qhia lawv. Tshoov lawv lub siab. Thov lawv.

Qhia lawv txog tus tim tswv tej lus rau Amulej—hais tias tus Tswv cov koob hmoov yuav los rau lawv thiab lawv tsev neeg.¹¹ Tej zaum nej yuav xav tsis thoob vim nej nrhiav tau tus Tswv ib tug tub qhe uas tsis muaj leej twg paub txog.

Txawm peb ib txhia yuav tsum nrhiav Amulej los, tej zaum ib txhia yuav tsum nug hais tias, “Kuv zoo li Amulej li cas?”

Tej zaum, tom qab ntau xyoo, nej tsis tshua rau siab ua ib tug pab coj. Tej zaum nej zaj lus tim khawv tsis tshua muaj zog. Tej zaum nej tsis koom nrog cov ntseeg Khetos lawm. Tej zaum nej poob siab los yog chim siab. Zoo li ib txhia ntawm lub Koom Txoos hauv Efexus thaum ub, nej twb tso nej “thawj txoj kev hlub” tseg¹²—uas yog tej yam tseeb nyob mus ib txhis ntawm Yexus Khetos txoj moo zoo.

Tej zaum zoo li Amulej, nej paub hauv nej lub siab hais tias tus Tswv tau “hu [nej] ntau zaus” tiam sis nej “tsis kam mloog.”

Txawm li ntawd los, tus Tswv saib nej zoo li Nws saib Amulej—yog ib tug tub qhe uas muaj ib txoj hauj lwm tseem ceeb ua thiab ib zaj lus tim khawv hais rau lwm tus. Muaj tej hauj lwm uas tsis muaj leej twg ua tau zoo ib yam li nej. Tus Tswv tau muab Nws lub pov thawj hwj dawb huv rau nej, qhov uas muaj hwj chim foom koob hmoov thiab txhawb nqa lwm tus. Cia li qhib siab mloog thiab ua raws li tus Ntsuj Plig tej kev tshoov siab.

Ib tug kwv tij lub neej tau tshoov kuv lub siab, tus uas tau nug nws tus kheej tias, “Thaum tus Tswv hu rau kuv, kuv puas yuav hnov?” Kuv yuav hu tus kwv tij no ua David.

David hloov siab los ntseeg lub Koom Txoos tau 30 xyoos tas los. Nws tau mus ua tub txib ces kawm ua ib tug kws lij choj. Thaum nws kawm ntawv thiab ua hauj lwm txhawb nqa nws tsev neeg, nws nrhiav tau cov xov xwm txog lub Koom Txoos uas ua rau nws ua xyem xyav. Nws yim nyeem tej yam no uas hais tsis zoo txog lub Koom Txoos, nws yim txhawj xeeb heev. Ces nws thov kom muab nws lub npe tshem ntawm lub Koom Txoos cov ntawv ceev xwm txheej mus.

Txij thaum ntawd los, ib yam li Amas thaum nws ntxeev siab, David siv sij hawm ntau sib cav nrog cov mej zeej ntawm lub Koom Txoos, sib tham online kom tawm tsam lawv txoj kev ntseeg.

Nws txawj sib cav nrog lwm tus.

Muaj ib tug mej zeej uas nrog nws sib cav tswv yim hu ua Jacob. Jacob yeej ua siab zoo thiab saib taus David, tiam sis nws yeej tiv thaiv lub Koom Txoos thiab.

Tau ntau xyoo, David thiab Jacob ntaus phooj ywg zoo thiab ib leeg saib taus ib leeg. Tiam sis David tsis paub hais tias Jacob thov Vajtswv pab David thiab nws rau siab thov tau kaum xyoo tawm. Nws yeej sau nws tus phooj ywg lub npe rau daim ntawv thov Vajtswv nyob hauv tus Tswv lub tuam tsev thiab cia siab tias David lub siab yuav mos muag.

Sij hawm dhau mus, es David pib hloov siab. Nws pib nco txog thaum nws hnov tus ntsuj plig dhau los, thiab nws nco qab txog kev zoo siab uas nws muaj thaum nws yog ib tug mej zeej ntawm lub Koom Txoos.

Ib yam li Amas, David tsis tau hnov qab txog txoj moo zoo uas thaum yav tas los nws coj. Thiab zoo li Amulej, David paub tias tus Tswv ncav tes rau nws. Nim no David yog ib tug kws lij choj hauv ib lub koom haum lij choj—yog ib txoj hauj lwm loj heev. Nws muaj npe vim nws yog ib tug uas tawm tsam lub Koom Txoos, thiab nws muab hlob ntau dhau kom thov rov qab los koom.

Txawm li ntawd los, nws tseem hnov tus Tswv Yug Yaj hu nws.

Nws txiav txim siab ua raws li nqe vaj lug kub “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li.”¹³ Nws tau thov hais tias, “Vajtswv, kuv xav rov qab los ua ib tus Neeg Ntseeg hauv Hnub Nyoog Kawg, tiam sis kuv muaj lus nug uas yuav tsum teb ua ntej.”

Nws pib mloog tus Ntsuj Plig lub suab thiab nws cov phooj ywg tej lus teb zoo dua li yav dhau los. Ces nws txoj kev ua xyem xyav hloov los ua txoj kev ntseeg zuj zus, mus txog thaum nws xav tias nws paub tias Yexus Khetos thiab Nws lub Koom Txoos uas tau muab txum tim rov qab los muaj tseeb.

Thaum ntawd, nws paub tias nws yuav muaj peev xwm kov yeej nws txoj kev muab hlob thiab ua txhua yam nws yuav tsum ua kom rov qab los koom lub Koom Txoos.

Thaum kawg, David tau ua kev cai raus dej ces suav txog hnub uas yuav muab nws cov koob hmoov txum tim rov qab los rau nws.

Kuv zoo siab qhia nej tias thaum lub caij ntuj sov no, tau muab David cov koob hmoov txum tim rov qab los rau nws. Nws rov qab koom tes pab hauv lub Koom Txoos thiab ua hauj lwm ua ib tug xib hwb qhia txoj Moo Zoo Lus Qhuab Qhia nyob hauv nws pawg ntseeg. Nws siv txhua lub sij hawm hais lus rau lwm tus txog nws txoj kev hloov siab, kho tej yam uas nws tau ua rau lwm tus mob, thiab ua tim khawv txog txoj moo zoo thiab Yexus Khetos lub Koom Txoos.

Kuv cov kwv tij, kuv cov phooj ywg, xav kom peb nrhiav, qhia thiab tso siab rau cov zoo li Amulej nyob hauv peb pawg ntseeg thiab ceg txheem ntseeg. Muaj ntau tus Amulej nyob hauv lub Koom Txoos niaj hnub no.

Tej zaum nej paub txog ib tug zoo li nws. Tej zaum nej yog ib tug zoo li nws.

Tej zaum tus Tswv tau ntxhi lus rau nej, yaum kom nej rov qab los, siv nej tej txuj ci, tsim nyog siv nej lub pov thawj hwj, thiab koom nrog cov Neeg Ntseeg ua hauj lwm ua ke kom los cuag Yexus Khetos thiab txhawb nqa Vajtswv lub nceeg vaj.

Peb tus Cawm Seej paub nej zoo li cas. Nws paub nej lub siab. Nws xav cawm nej. Nws yuav ncav tes tos txais nej. Cia li qhib nej lub siab rau Nws. Kuv cia siab hais tias cov uas tsis taug kev li ib tug pab coj ntxiv lawm—txawm yog ib qho me ntsis xwb los—kuv cia siab tias nej yuav xav txog Vajtswv txoj kev zoo thiab kev tshav ntuj, siv nej lub siab saib, kawm los ntawm Amas thiab Amulej, thiab mloog tus Cawm Seej tej lus uas hloov tau nej lub neej hais tias: “Los nrog kuv mus.”

Kuv yaum kom nej ua raws li Nws txoj kev hu, vim nej yuav txais koob hmoov nyob saum ntuj ceeb tsheej. Tus Tswv cov koob hmoov yuav los nyob rau nej thiab nej tsev neeg.¹⁴

Kuv ua tim khawv li no thiab foom koob hmoov rau nej ua tus Tswv ib tug Thwj Tim, los ntawm Yexus Khetos lub npe zoo, amees.