Lotwelah sel Alma ac Amulek

Sie sin mwet ke ma suhmuhslah suc tiac kuh in muhlkihnyucklac uh pa Alma Fuhsr. Finne el wen nuhtin mwet pahluh wowo se, el fahsr liki inkacnek pwacye ke kihtin pacl ac el eklac sie “mwet koluk na pwacye ac sie mwet suc alu nuh sin ma sruhlwaclah.” Ke srihpac ma kuht kuh in palye na, el lain pahpah tuhmwacl ac srihke in kuhnahoslah Alu uh. Ac mweyen el arlac etuh sramsram ac kwacfe mwet uh, el oraclah kuhtanglah yohk.¹

Tuhsruhk moul lal Alma ah eklac ke sie lihpufacn luhn Leum sikyang nuh sel ac sramsram nuh sel ke puhsren puhlahl. Ke lwen tolu ac fong tolu, Alma el “puhlakihn kweok ma pahtpaht, … finne ke kweok luhn sie nguhn tuhlac.” Na, ke ohiyac se, sie kihtin mwe esam sang kahlwem nuh ke lohsr ke nuhnak lal uh—sie ma pwacye ma pahtpaht, lutiyuck sin pahpah tuhmwacl: lah Jisus Kraist El fah tuhkuh “in iwaclah ma koluk luhn facluh.” Pacl somlah ah Alma el lain mwe luti inge, tuhsruhk ingena “nuhnak [lal] sruokyac na nuhnak se inge,” ac el inse puhsisacl, inse pwacye in sang luhlahlfongi lal ke kuh in iwaclah luhn Kraist.²

Ke Alma el nguhtwaclihk liki ohiyac se inge, el mukul eklac se. E ke pacl sacn fahlac, el sang moul lal in ahkwoye ma koluk el tuh orwaclah ah. El sie srihkasrak fokoko ke auliyak, nuhnakmuhnahs, ac luhlahlfongi kalweniyuck.

Tohkoh Alma el suleyucklac in eis ma kunacn pahpah tuhmwacl in ekihn sifacn Alu luhn God.

Enenweyuck tuh mwet nuh kwewa in muhtuhnfacl Nephi ah in etuh sramsram kacl Alma ah. Kain Twitter, Instagram, ac Facebook luhn pacl lal ah ac tuh sesseslah ke petsac ac sramsram kacl. Sahp el oasr pacl nuh kwewa ke kulun Zarahemla Weekly ac oasr ma oreklac kacl ke news ac ke TV uh. In fototo, sahp el pa pwengpweng emet in pacl lal.

Tuhsruhk ke Alma el liye lah mwet lal ah muhtwacwacack muhlkuhnlah God ac inse fuhlwactyak ac akuhkuhin, el sulwaclah in fihliyac kunohkohn pwengpweng lal ac eisuhlwacng sifacna “nohfohn nuh ke pristut fuhlwact ke akwuck muhtahl luhn God,”³ in fahkwack auliyak nuh sin mwet Nephi uh.

Emet, Alma el liye oraclah wowo uh—ma oasr, nuh ke el som nuh city Ammonihah. Mwet ke city sacn elos etuh na lah Alma el tilac mwet kol lalos, ac wacngihnna ahkfuhlwact lalos ke wal lal ke pristut. Elos laenuhl, isrucnuhl, ac luhsuhlwack liki city selos ah.

Ke inse ahsor, Alma el forlah liki city Ammonihah.⁴

Tuhsruhk sie lihpufacn fahk nuh sel in fohlohk.

Motko wihn kac: el siyuckyuck in fohlohk nuh yurin mwet suc sruhngwacl ac suc ahkkolukye Alu uh. Pa sie kunohkohn sensen ac sahp sensen nuh ke moul lal. Tuhsruhk Alma el tiac tahfuhluo. “El silahklahk fohlohk.”⁵

Alma el tuh lalo ke lwen puhs ke el tuh utyak nuh ke city sac. El siyuck sin sie mwet sac we fin el kuh in “sang nuh sin sie mwet kuhlwacnsap puhsisacl luhn God mongo elan kang.”⁶

Inen mukul sac pa Amulek.

Amulek el sie mwet kahsruhp, pwengpweng fin acn Ammonihah. El finne ma ke sucu suc luhlahlfongi pacl loes, luhlahlfongi lal sifacna uh muhnahslah. Tohkoh el taltal, “Nga pahngonyuck pacl pucspucs ac nga tiac ke lohng; ke ma inge nga etuh ke ma inge, tuhsruhk nga tiac [luhlahlfongi]; ke ma inge nga fahfahlac na in lain God.”⁷

Tuhsruhk God El nuh ahkoellah na Amulek, ac ke Amulek el ohsun nuh sel Alma, el pain mwet kuhlwacnsap luhn Leum nuh in lohm sel, yen Alma el muhta we ke lwen puhs.⁸ Ke pacl sacn, Amulek el ikacslah insiyacl nuh ke pweng lal Alma, ac eklac na wowo se tuhkuh nuh facl. Ke pacl sacn fahlac, Amulek el tiacna luhlahlfongi muhkwena, tuhsruhk el oacyacpac mwet loangwelah ma pwacye se.

Ke Alma el sifilpac som luti inmahsrlon mwet Ammonihah ah, oasr mwet loh se ahkluo yohrohl—Amulek, sie sin mwet lalos.

Ma orek tohkohyang uh orwaclah soko sin sramsram ma kwewana ahsor ac engan emet ke ma suhmuhslah nuh kwewa uh. Kowos kuh in riti kac ke Alma sapta 8–16.

Mihsenge, nga ke siyuck suwos in motko kihsen siyuck luo:

Ma se met: “Meac nga kuh in lotwelah sel Alma?”

Ahk luo: “Ngwac oacna Amulek fuhkah?”

Lwelah ngan muhtwacwacack ke siyuck sin mwet kol nuh kwewa somlah, ingena, kuh pacl fahsruh ke Alu luhn Jisus Kraist, “Meac kowos kuh in lotwelah sel Alma?”

Alma el sie mwet na suhmaht ac kuh in oruh ma. Sahp ac fihsrwacsr in nuhnkuh muh el tiac enenuh kahsruh luhn kuhtwena mwet. Finne ohinge, meac Alma el oruh ke el fohlohk nuh Ammonihah ah?

Alma el konwaclack Amulek ac siyuck sel ke kahsruh.

Ac Alma el is kahsruh.

Ke oacna sie srihpac, kuhtuh pacl uh kuht mwet kol uh tahfuh luo in suk ac siyuck sin mwet Amulek lasr uh. Sahp kuht muh kuht kuh in muhkwena oruh wo likina kuht fin siyuck nuh sahyac, kuh kuht tahfuh luo in oruh in upac nuh sin mwet sahyac, kuh kuht muh mwet sahyac fah tiac luhngse wi. Puhslaclac pacl kuht tahfuh luo in suli mwet in orekmakihn talan lalos ma ituckyang sin God ac wi orekma wowo luhn molwelah.

Motko ke Mwet Lahngo—yac El muhkwena muhtwacwacack akiyac Alu Lal?

Moh.

Pweng Lal ah tiac pa “Taran. Nga fah oruh.” Sahyacna pa “Fahsruh, fahsr tukuk.”⁹ El kwacfe, suli, luti, na luhlahlfongi mwet fahsr tohkohl uh in oruh ma elos liye el oruh.¹⁰ Ohinge, Jisus Kraist El muhsaheack tiac Alu Lal muhkwena tuhsruhk mwet kuhlwacnsap Lal pac.

Ke oacna sie ma kunowos ingena uh—finne kowos sie prestuhn ke u luhn tikin, prestuhn luhn stek, kuh Prestuhn luhn Eria se—in oraclah wo, kowos enenuh in konwacack mwet Amulek lowos uh.

Sahp ac kuh in sie mwet puhsisacl kuh tiac akihlenyuck ke un mempucr lowos. Sahp ac kuh in sie mwet suc luhman tiac luhngse kuh tiac kuh in kuhlwacnsap. Mwet Amulek lowos an sahp ac fuhsr kuh mahtuh, mukul kuh muhtwacn, srihk etuh la, ullac, kuh suhkwac wi Alu. Tuhsruhk ma sahp tiac akihlenyuck ke liyeyuck emet uh pa elos finsrak in lohng kahs inge suwos “Leum El enenuh kom! Nga enenuh kom!”

Ke insiyaclos, puhs mwet elos ke kuhlwacnsapuh God lalos. Elos ke orekmakihnyuck in pahol. Elos ke orekmakihn mitmit ac kosracni ke kuhiyaclos nohfohn in ahkolah facluh nuh ke fohlohk luhn Mwet Lahngo lasr. Elos ke muhsaheack Alu Lal. Tuhsruhk elos tahfuh luo in muhtwacwacack. Elos kwacna tuhpan in siyuckyuck selos.

Nga suli kowos in nuhnkuh kwaclos ke pracns ac ward lowos an, ke misin ac stek lowos an, suc enenuh in lohng pahng in mukwikwi uh. Leum El orekma yohrohlos—ahkoeloslac, ahkfihsracsrye insiyaclos. Konwaclosyak ke suk ke insiyowos.

Ahsrwelah paho nuh selos. Lotwelos. Kwacfelos. Siyuck selos.

Akacsruhi yohrohlos kahs luhn lihpufacn nuh sel Amulek—lah mwe insewowo luhn Leum fah puhtati nuh faclos ac lohm selos.¹¹ Sahp kowos ac lut in konwacack sie mwet kuhlwacnsap oaru luhn Leum suc sahyacn suk lowos ah fah wihklac na.

Ke kuhtuh sesr uh enenuh in suk ke sie Amulek, nuh sin mwet sahyac uh sahp kihsen siyuck uh pa “Nga oacna Amulek fuhkah?”

Sahp kowos oruh, tukun kuhtuh yac, muhnahslah oaru lowos in mwet tuhma lutlut. Sahp kuh luhn luhlahlfongi lowos an srihkeni. Sahp kowos ahkloesye kowoslac sifacna liki monun Kraist. Sahp wacngihnlac luhlahlfongi lowos kuh finne kasrkuhsrak. Oacna kuhtuh Alu mahtuh ke acn Ephesus, sahp kowos som liki luhngse se emet lowos an¹²—ma pwacye wolacna, ma pahtpaht ke wosasuc luhn Jisus Kraist.

Sahp, oacna Amulek, kowos etuh insiyowos muh Leum El “pahngon [kowos] pacl pucspucs” tuhsruhk kowos “tiac ke lohng.”

Finne ohinge, Leum El liye keiwos ma El liye kacl Amulek—kuh se in eklac mwet kuhlwacnsap puhlaik suc oasr sie orekma na yohk srihpac la in oruh ac sie fahkwack luhlahlfongi in akacsruhi. Oasr kuhlwacnsap ma wacngihn mwet sahyac kuh in oruh oacna kom. Leum El luhlahlfongi kom ke pristut muhtahl Lal, ma sruok kuh wolacna in ahkinsewowoye ac sruhkwack mwet sahyac uh. Porongo ke insiyowos ac ukwe pihrihkyuck luhn Nguhn

Nga tuh pihrihkyuck ke fuhfahsryucsr luhn sie tamuhlwel suc siyuck sel sifacna, “Ke Leum El pahng, yac ngwac lohng?” Nga fah pahngon tamuhlwel wowo se inge David.

David el eklac nuh ke Alu uh apkuhran in yac 30 somlah ah. El oruh sie misin ac na el wi pac lutlut ke masap. Ke el lutlut ac orekma in kahsruh sie sucu fuhsr, el etwacack kuhtuh ma ke Alu uh ma fohs sel. Ke el riti yohk mwe ahkkoluk inge, yohkwaclihk fohsack lal. Sahflahiyac ah el siyuck tuh inel in itucklac liki record luhn Alu uh.

Ke pacl sacn fahlac, oacna Alma ke pacl lain lal, David el eis pacl yohk in akuhkuhin yurin mempucr luhn Alu uh, sramsram ke internet in kuh in srihke luhlahlfongi lalos.

El arulacna suhmaht kac.

Sie sin mempucr ma el akuhkuhin yohroh uh nga fah pahngon Jacob. Jacob el kwacna kuhlwacng ac suhnakuhnuhl David, tuhsruhk el oacyacpac kuh ke loango Alu uh.

Ke yac puhs, David ac Jacob yohkwaclihk suhnak nuh sie sin sie ac kawuckyak. Ma David el nihkihn uh pa lah Jacob el nuh pruhe na kacl David ac oaru in oruh ohinge loes liki yac singucul. El sang pac inen kawuck se lal an nuh ke pruhe ke tempuhl luhn Leum ac finsrak tuh sie lwen insiyacl David in fah fihsracsrlah.

Ke lusen pacl loes, kahkahsrihk na, David el eklac. El muhtwacwacack in esam ke insewowo ohiyac luhn nguhn ma el tuh puhla ah, ac el esam engan el tuh puhla ke el mempucr luhn Alu uh.

Oacna Alma, David el tiacna muhlkuhnlah nohfohnna ma pwacye ke wosasuc el tuh sruok ke sie pacl ah. Ac oacna Amulek, David el puhla kahsruh luhn Leum nuh sel. Ingena David el sie partner ke sie law firm—sie orekma pwengpweng. Akihlenyuck el oacna sie mwet ahkkolukye Alu uh, ac upaclac orekma nuh sin mwet lal in siyuck in sifilpac ituckyang ine nuh ke Alu uh.

Finne ohinge, el kalweni na in puhla ulyuck luhn Mwet Shepherd.

El luhlahlfongi na pwacye ma suhmuhslah ma “Kutena suwos fin enenu in akyokye lalmwetmwet lal, enenu elan pre nu sin God, su ac fah sang nu sel.”¹³ El pruhe, “God sacohk, nga ke sifilpac Mwet Luhlahlfongi ke Lwen-sahflah, tuhsruhk oasr kihsen siyuck luhk ma enenuh top uh.

El muhtwacwacack in porongo mahmah luhn Nguhn ac in eis top pihrihkyuck sin kawuck lal ke ohiyac ma el soenna puhla met. Kais sie na fahsr, tahfuh luo lal uh eklac nuh ke luhlahlfongi, nwe ke el akihlen muh, sifilpac, el kuh in puhla sie fahkwack luhlahlfongi ke Jisus Kraist ac ke Alu fohlohkyak Lal.

Ke pacl sacn, el etuh muh el ac kuh in kuhtanglah inse fuhlwact lal ac oruh oacna sie ma enenweyuck in kuh in sifilpac ahokkihnyucklac nuh ke Alu uh.

Tohkoh, David el utyak nuh ke kof in pacptais uh na muhtwacwacack acwac lwen nwe ke na el kuh in eis mwe insewowo lal in ahksasucyeyucklac.

Nga engan in fahk lah ke summer tari ah, mwe insewowo lal David ah sifil ituckayng nuh sel. El sifilpac wi mukwikwi nuh kwewa ke Alu uh ac kuhlwacnsap oacna mwet luti ke Mwe Luti luhn Wosasuc ke ward lal an. El orekmakihn pacl wowo nuh kwewa in sramsram nuh sin mwet sahyac uh ke eklac lal, in ahkwoyelah koluk el tuh orwaclah ah, ac in fahkwack luhlahlfongi ke wosasuc ac Alu luhn Jisus Kraist.

Tamuhlwel sacohk wiyuck, kawuck sacohk luhk, lwelah kuht in suk, konwacack, mokle, ac luhlahlfongi ke mwet oacna mwet Amulek ke ward ac stek lasr uh. Puhs mwet oacna mwet Amulek ke Alu uh mihsenge.

Sahp kowos etuh sie. Sahp kowos pa sie.

Sahp Leum El nuh mahmah na nuh suwos, kwacfe kowos in fohlohk nuh ke luhngse se emet lowos ah, sang talan lowos, orekmakihn pristut ke suwohs, ac kuhlwacnsap siskacn Mwet Luhlahlfongi wiyowos in fototoeni nuh yurin Jisus Kraist ac muhsaheack tohkohsrahi luhn God inge fin facluh.

Mwet Lahngo sacohk lasr El etuh acn kowos oasr we. El etuh insiyowos. El ke moli kowoslac. El fah kahsrwe kowos. Ikucslah insiyowos nuh Sel na. Pa mwe finsrak luhk tuh elos suc tuh fahsr liki inkacnek luhn mwet tuhma lutlut—finne kais kuhtuh na—fah motko ke ma wo ac pahkotwen luhn God, liye ke insiyaclos, lotwelah sel Alma ac Amulek, ac lohng kahs in ekuhllah moul uh luhn Mwet Lahngo: “Fahsruh, fahsr tukuk.”

Nga kwacfe kowos in topuk pahng Lal, tuh pwacye lah kowos fah eis mwe insewowo luhn inkuhsrao. Mwe insewowo luhn Leum fah puhtati nuh fowos ac lohm suwos.¹⁴

Ke ma inge nga fahkwack luhlahlfongi ac fihliyac yuruwos mwe insewowo luhk oacna sie Mwet Sap luhn Leum ke inen Jisus Kraist, amen.