2010–2019
Siña di Alma i Amulek
òktober 2016


Siña di Alma i Amulek

Ta mi speransa ku esnan ku a kita for di e kaminda di disipulado lo mira ku nan kurason i siña di Alma i Amulek.

Alma Hóben

Alma Hóben ta entre e personahenan di mas inolvidabel den skrituranan. Ounke e tabata e yu di un gran profeta, el a pèrdè su kaminda pa un tempu i a bira un “hòmber malbado i idolatrá.” Pa motibunan ku nos por rei solamente, el a oponé aktivamente kontra di su tata i a buska pa destruí e Iglesia. I pa motibu di su elokuensha i persuashon, e tabatin hopi éksito.1

Pero Alma su bida a kambia ora un angel di Señor a aparesé na dje i a papia ku un stèm di dònderbos. Pa tres dia i tres anochi, Alma tabata sufri ku tormenta eterno hasta ku e dolónan di un alma maldishoná. I despues, di un òf otro manera, un rekuerdo vago a trese lus den e skuridat di su mente---un bèrdat eterno, siñá pa su tata: ku Jesucristu lo bini pa ekspiá pa e pikánan di e mundu. Hopi tempu pasá Alma a rechasá tal konseptonan, pero awor su mente a tene na e konsepto aki, i humildemente i honestamente el a pone su konfiansa den Cristu su poder ekspiatorio.2

Ora Alma a spièrta for di e eksperensia aki, e tabata un hòmber kambiá. For di e momentu ei, el a dediká su bida pa deshasí e daño ku el a kousa. E ta un ehèmpel poderoso di arepentimentu, pordon, i perseverá den fieldat.

Finalmente Alma a wòrdu skohé pa sigui su tata komo e kabes di e Iglesia di Dios.

Kada habitante di e nashon nefita mester a konosé e historia di Alma. E Twitter, Instagram, i Facebook di e tempu aki lo tabata yená ku imágennan i historia tokante di dje. Probablemente e lo a aparesé regularmente riba kaft di Zarahemla Weekly i tabata tema di editorialnan i programanan spesial di ret. En breve, kisas e lo tabata e selebridat di mas konosí di su tempu.

Pero ora Alma a mira ku su pueblo tabata lubidando Dios i lanta nan mes den orguyo i kontenshon, el a skohe pa resigná for di su puesto públiko i a dediká su mes kompletamente na e saserdosio haltu di e òrdu di Dios,3 predikando arepentimentu bou di e Nefitanan.

Promé, Alma tabatin masha éksito---esei ta, te ora el a biaha pa e siudat di Ammonihah. E pueblo di e siudat tabata sa bon ku Alma no tabata nan lider polítiko mas, i nan tabatin poko rèspèt pa su outoridat di saserdosio. Nan a insult’é, ridikulis’é, i a sak’é for di nan siudat.

Desepshoná, Alma a bira bèk pa e siudat di Ammonihah.4

Pero un angel a bisé pa regresá.

Djis pensa riba esaki: a wòrdu bisá na dje pa regresá na e hendenan ku tabatin rabia riba dje i ku tabata hostil kontra e Iglesia. Tabata un asignashon peligroso i kisas riesgoso pa su bida. Pero Alma no a duda. El a regresá rápidamente.5

Alma a ayuná durante hopi dia ora el a drenta e siudat. Aya el a puntra un hende kompletamente straño si e por a duna un sirbidó di Dios algu di kome.6

Amulek

E hòmber aki su nòmber tabata Amulek.

Amulek tabata un siudadano riku , bon konosí di Ammonhah. Ounke e tabata bini for di un liña di hopi kreyente, su mes fe a mengua. Despues el a konfesá ku el a wòrdu yamá hopi biaha i e no a tende; p’esei e tabata sa tokante di e kosnan aki, tòg lo e no a [kere], p’esei el a sigui rebeldia kontra Dios.7

Pero Dios tabata preparando Amulek, i ora Amulek a konosé Alma, el yama e sirbidó di Señor den su hogar, kaminda Alma a keda pa hopi dia.8 Durante di e tempu ei, Amulek a habri su kurason pa Alma su mensahe, i un kambio maravioso a bini riba dje. For di e momentu ei padilanti Amulek no a kere solamente; pero el a bira tambe un kampion di bèrdat.

Ora Alma a sali bai atrobe pa siña bou di e pueblo di Ammonihah, e tabatin komo un di dos testigu na su banda----Amulek, un di nan mes.

E susesonan ku a sigui ta konstituí un di e relatonan di mas zut zür den tur e skrituranan. Boso por lesa tokante di dje den Alma kapítulonan 8–16.

Awe, lo mi ke pidi boso pa pensa riba dos pregunta:

Di promé: “Kiko mi por siña di Alma?”

Di dos: “Kon mi ta manera Amulek?”

Kiko mi por siña di Alma?

Laga mi kuminsá puntrando tur lider di e Iglesia di Jesucristu, di pasado, aktual i futuro, “Kiko boso por siña di Alma?

Alma tabata un hòmber eksepshonalmente dotá i kapabel. Kisas lo tabata fásil pa pensa ku e no tabatin mester di yudansa di niun hende. No opstante, kiko Alma a hasi ora el a regresá pa Ammonihah?

Alma a haña Amulek i a pidié yudansa.

I Alma a haña yudansa.

Pa kualke sea e motibu, tin biaha nos komo lidernan no tin masha gana pa haña i pidi nos Amuleknan yudansa. Kisas nos ta pensa ku nos mes por hasi e trabou mihó, òf nos no tin gana pa otronan sinti inkómodo, òf nos ta asumí ku otronan lo no ke partisipá. Muchu biaha nos ta duda pa invitá hende pa usa nan talentonan duná di Dios i partisipá den e gran obra di salbashon.

Pensa riba e Salbador---El a kuminsá organisá Su Iglesia su so?

No.

Su mensahe no tabata “Hala patras. Mi mes lo hasi esaki.” Mas bien e tabata “Bini, sigui mi.”9 El a inspirá, invitá, instruí, i despues konfia Su siguidonan “pa hasi e kosnan ku boso a mira mi hasi.”10 Di e manera aki, Jesus a edifiká no solamente Su Iglesia pero Su sirbidónan tambe.

Den kualke sea e posishon ku boso ta sirbiendo awor aki---sea boso ta un presidente di quorum di diákono, un presidente di estaka, òf un Presidente di Área---pa tin éksito, boso mester haña boso Amuleknan.

E por ta un hende ku ta humilde, òf hasta invisibel den boso kongregashonnan. Un ku ta parse di no ta dispuesto òf inkapas pa sirbi. Boso Amuleknan por ta yòn òf bieu, hòmbernan òf muhernan, sin eksperensia, kansá, òf ku no ta aktivo den Iglesia. Pero loke kisas no ta bisto na promé instante ta ku nan tin hamber pa skucha di boso e palabranan “ Señor tin mester di bo!” Mi tin mester di bo!

Profundamente , hopi ke sirbi nan Dios. Nan ke ta un instrumento den Su mannan. Nan ke pusha nan sikkel i lucha ku nan forsa pa prepará e tera pa e regreso di nos Salbador. Nan ke edifiká Su Iglesia. Pero nan ta sin gana pa kuminsá. Hopi biaha nan ta warda pa puntra nan.

Mi ta invitá boso pa pensa riba esnan den boso rama i barionan, mishonnan i estakanan, ku tin nesesidat pa skucha e yamada pa aktua. Señor tabata trahando ku nan---preparando nan, i a suavisando nan kurason. Haña nan dor di mira ku boso kurason.

Aserká nan. Siña, inspirá nan. I Puntra nan.

Kompartí e palabranan di e angel na Amulek---pa e bendishon di Señor por sosegá riba nan i nan kas.11 Boso lo ta sorpresá pa diskubrí un sirbidó balente di Señor ku di otro manera lo a keda skondí.

Kon Mi Ta Manera Amulek?

Miéntras algun di nos mester ta buskando un Amulek, pa otronan e pregunta lo por ta “Kon mi ta manera Amulek?”

Kisas boso, despues di añanan, a bira ménos ferviente komo disípulo. Òf e kandela di boso testimonio a disminuí. Kisas boso a distansiá boso mes for di e kurpa di Cristu; Kisas boso a bira desilushoná òf hasta rabiá. Meskos ku algun di e Iglesia antiguo di Efesio, boso por a bandoná boso “promé amor”12——e bèrdatnan sublime i eterno di e evangelio di Jesucristu.

Kisas, meskos ku Amulek, boso sa den boso kurason ku Señor a “yama [boso] hopi biaha,” pero boso “no ke a tende.”

Sinembargo, Señor ta mira den boso lokual El a mira den Amulek---e potensial di un sirbidó balente ku un trabou importante pa hasi i ku un testimonio pa kompartí. Tin servisio ku niun otro no por duna den mes un manera. Señor a konfia boso ku Su santu saserdosio, kua tin e potensial dibino pa bendishoná i elevá otronan. Skucha ku boso kurason i sigui inspirashonnan di e Spiritu.

Biahe di Un Miembro

Mi tabata konmové pa e biahe di un hermano ku a puntra su mes, “Ora Señor yama, lo mi tende?” Lo mi yama e bon ruman aki David.

David a kombertí na Iglesia algun 30 aña pasá. El a sirbi mishon i despues a bai skol di lei. Miéntras e tabata studiando i traha pa mantené su famia hóben, el haña algun informashon tokante Iglesia ku a konfundié. Mas el a lesa e materialnan negativo aki, mas preokupá e tabata bira. Eventualmente el a pidi pa kita su nòmber for di registronan di Iglesia.

For di e tempu ei, meskos ku Alma den su tempu di rebeldia, David a pasa gran kantidat di tempu diskutiendo ku miembronan di Iglesia, partisipá den kòmbersashonnan online ku e meta pa desafiá nan kerensianan.

E tabata masha bon den esaki.

Un di e miembronan ku e tabatin debate ku n’e lo mi yama Jacob. Jacob tabata semper amabel i respetuoso ku David, pero e tabata firme tambe den su defendementu di Iglesia.

Durante di e añanan, David i Jacob a desaroyá rèspèt i amistat mutuo pa otro. Loke David no tabata sa ta ku Jacob tabata hasi orashon pa David i a sigui asina fielmente pa mas di un dékada. El a hasta pone nòmber di su amigu pa orashon den e tèmpelnan di Señor i a spera ku David su kurason lo por a suavisá.

Despues di tempu, poko poko, David a kambia. El a kuminsá kòrda ku afekto e eksperensianan spiritual ku un tempu e tabatin, i el a rekordá e felisidat ku el a sinti ora e tabata un miembro di Iglesia.

Meskos ku Alma, David no a lubidá kompletamente e bèrdatnan di evangelio ku un tempu el a aseptá. I meskos ku Amulek, David a sinti Señor ta saka man na dje. Awor e tabata un partner den un ofisina di abogado----un trabou prestigioso. El a desaroyá un reputashon komo kritiko di e Iglesia, i e tabatin demasiado orguyo pa pidi pa wòrdu tumá atrobe.

Sinembargo, el a sigui sinti e trèkmentu di e Wardadó.

El a kere di kurason e skritura “Si kualke un di boso falta sabiduria, puntra Dios, ku ta duna tur hende sin límite, sin tira nada na nan kara, i e lo wòrdu duná na dje.”13 El a puntra, “Estimado Dios, mi ke ta un Santu di Delaster dia atrobe, pero mi tin pregunta ku tin mester di kontesta.”

El a kuminsá skucha na e susuronan di e Spiritu i na kontestanan inspirá di amigunan, manera nunka promé. Un tras di otro, su dudanan a kambia pa fe, te porfin el a realisá ku, un biaha mas, e por a sinti un testimonio di Jesucristu i Su Iglesia restourá.

Na e momentu ei, e tabata sa ku e lo ta kapas pa vense su orguyo i hasi lokual ta nesesario pa wòrdu aseptá bèk den Iglesia.

Eventualmente, David a drenta e awanan di boutismo i despues a kuminsá konta e dianan te ora ku e por a haña su bendishonnan restourá.

Mi ta felis pa bisa ku e verano ku a pasa, David su bendishonnan a wòrdu restourá na dje. Atrobe e ta partisipando kompletamente den Iglesia i ta sirbi komo maestro di Doctrina del Evangelio den su bario. E ta tuma kada oportunidat pa papia ku otronan di su transformashon, pa drecha e daño ku el a kousa, i pa duna testimonio di e evangelio i e Iglesia di Jesucristu.

Konklushon

Mi kerido hermanonan mi kerido amigunan, laga nos sali buska, haña, inspirá, i konfia den e Amuleknan den nos barionan i estakanan. Tin hopi Amulek den Iglesia awendia.

Kisas boso konosé un. Kisas boso ta un.

Kisas Señor a susurá na boso, urgi boso pa regresá na boso promé amor, kontribuí boso talentonan, ehersé e saserdosio dignamente, i sirbi huntu ku boso kompañeronan Santu den yega mas serka di Jesucristu i edifiká e reino di Dios aki na tera.

Nos Salbador stimá sa unda boso ta. E konosé boso kurason. E ke reskatá boso. E lo saka man na boso. Djis habri boso kurason p’e. Ta mi speransa ku esnan ku a kita for di e kaminda di disipulado----hasta un tiki so---lo kontemplá e bondat i grasia di Dios, mira ku nan kurason, siña di Alma i Amulek, i tende e palabranan ku ta kambia bida di e Salbador: “Bini, sigui mi.”

Mi ta urgi boso pa hasi kaso na Su yamada, tin sigur ku boso lo risibí e rekompensa di shelu. E bendishon di Señor lo sosegá riba boso i boso kas.14

Di esaki mi ta testifiká i ta laga mi bendishon komo un Apòstel di Señor den e nòmber di JesuCristu, amèn.