Esehsang Alma oh Amulek

Nan pwungen soaipen aramas me keiou wadawad nan pwuhk sarawi, iei Alma me Pwulopwulo. Mendahte nein soukohp lapalap, e salongala kisin ansou, oh “wiahla aramas suwed oh soun pwongih dikedik en eni.” Kitail sohte nohn wewehki kahrepe, ahpw e kin pelian seme oh nantihong en kawehla Mwomwodiso. Oh pwehki ah kin kadek koasoai oh aramas kin rong dahme e koasoaia, e kin inenen pweida.¹

Ahpw mour en Alma wekila mwurin tohnleng en Kauno eh pwarehng oh mahsaniong rasehngete ngilen nan sapwe. Rahn siluh oh pwohng siluh, Alma “lokolongki katoutou soutuk,…pil pehm weirek oh lokolok en aramas lekdekla men.” Oh eri, ahpw tamanda mehkot me kamarainihada nan eh pehm lokolok wet —padahk mehlel poatopoat me e esehier sang ah pahpa: me Sises Krais pahn ketdo pwehn “tohnmeteikihla dipen sampah.” Alma wereila ah kin soikala iren padahngkan, ahpw dahme e tamandahu,” e karakarahngkihla, ngoangkiher oh uhd likih Sapwellimen Krais tomw manamano.²

Mwurinte mwo, Alma inenen wekila. Sangete mwurin ahnsouo kohla, e nantiong nan ah mour en kapwungala sapwungko me e wiadahr. E wia emen karasaras kehlail en koluhla, mahk, oh pwoson tengeteng.

Alma was eventually chosen to succeed his father as head of the Church of God.

Tohn wehin mehn Nihpahi ko uhdahn re pahn ese soaipen Alma. Ma mie Twitter, Instagram oh Facebook nan ah mwehio, e pahn direki kilel oh soaipe. Mwein e pahn pwarada pohn kilin Doaropwehn repwot en Sarahemla oh mie me pahn ntingih duwen ih, e pahn pwarada nan tv, oh kahsdo kan. Ni oaralap, elemwein ih me keieu ndand nan eh mwehi.

Ahpw ni en Alma eh kilangada me nah aramas akan arail manokelahr Koht oh pwohnmwahsohda oh uhpene, e pilada en kommoaldihsang ah pwukoah nan wehi oh poadediong ah pwukoahn samworo sarawi pahn koasoandi en Koht, ,”³ padapadahngki koluhla nanpwungen mehn Nihpai ko.

Ni tepdahu, ah doadoahko inenen pweida—lao e lella nan kahnihmw en Ahmonahia. Aramas en tohn kahnihmwo wewehkier me Alma solahr wia pwukoahn kaun lapalap en wehi, oh irail sohte wauneki ah manaman en prihstuhd me e kolokol. Re pelian, re kasarowe, oh kausalahsang nan arail kahnihmw.

Alma ahpw pahtoula kokohsang kahnihmw en Ahmonahia.⁴

Ahpw tohnleng men mahsaniong en pwurala.

Na song medewe: dene en pwurala rehn aramas ako me kailongki oh uhwong Mwomwohdiso. E uhdahn keper oh e kakete kamakamkihla. Ahpw Alma sohte masak. E “mwadangete pwurala.”⁵

Alma kin wie kaikaisihsolki rahn kei mwohn ah pidolong nan kahnihmwo. Wasahu e peki rehn aramas me e sehse men ma e kak menlau “kieng soun papah karakarahk en Koht kisin tungoal me en tungoale.”⁶

Mwaren ohl menet Amulek.

Amiulek emen ohl kepwehpwe, emen tohn Ahmonahia ndand men. Mendahte sangete mahs ah peneinei kin kehlail nan arail pwoson, pein ah kadehde luwetala. Mwuhr e ahpw wehkada nda, “Pak tohto Kauno kin malipe ie oh I sohte kin rong, eri I ese duwen mepwukat, ahpw I pil [sohte kamehlele]; eri I ahpw uselahte kangohdiong Koht.”⁷

Ahpw Koht ketin kakaunop Amiulek, oh ni ehn Amiulek tuhwong Alma e kasamwohlong sapwellimen Sapwellimen Kauno ladu nan imwe, wasa me Alma mihmihki rahn kei.⁸ Nan ahnsou pwuko, Amiulek ritingada ah mohngiong ong padahngkan en Alma, oh lapalahn wekila wiawihong. Sang mwo kohla, Amulek kaidehnte kamehlelehte, ahpw e pil wiahla soun doarepen me mehlelo.

Ahnsou me Alma pwurala oh padahk ong men Ahmonaiah ko, miehier nah keriemen en sounkadehde uh limwah iei—Amiulek, me tohn wasahu.

Soaipen irair kan me wiawi mwuhr me soai pwoat kaperen oh pil kansensuwed nan iren pwuhk sarawi kan. Kumwail kak wadek duwe nan pwuhk enAlma irelaud 8–16.

Rahnwet, I men peki rehmwail en medewe peidek riahu pwukat:

Keieu: “Dahme I kak esehsang Alma?”

Keriau: “Ia mwomwen ahi duwehte Amulek?”

Ien idek mahs rehn sounkaweid kan koaros en mahs de kumwail me kakaun met nan Mwomwohdiso en Sises Krais, I patohwan, “Dahme komw kak esehsang Alma?

Alma ohl koahiek mehlel men. Mwein e pahn mengei en medemedewe me e sohte kin anahne sawas. Ahpw, dahme e wia ni ahnsou me e pwurala Ammoniah?

Alma diar Amiulek oh peki sawas reh.

Oh Alma alehdi sawas.

Ong ni kahrepe kei, ekeipak kitail, nin duwen kaun kei kin peikasalki en rapahki oh peki sawas. Mwein kitail medemedewe me kitail kak pein kelehpwki atail doadoahk, de suwedki kediropwe aramas, de wiahki me aramas teikan sohte pahn men sawas. Kitail nohn masakala en luke aramas en doadoahngki arail koahiek me Koht-ketkiongirailehr pwe irail en patehng doadoahk kesemwpwal en kamour wet.

Medewe Sounkomouro —E kelehpwki kawada Sapwellime Mwomwodiso?

No.

E sohte mahsanih kumwail sepit mahs I kak pein wia met. Ahpw e mahsanih “Kohdo idawehniehla.”⁹ E ketin kamarain, luhk, kaweid oh eri likih me ideidawehn ko “kumwail alasang mehkan me kumwail kilangie I wia.”¹⁰ Ih duwen, Sises Krais kakehlada Sapwellime Mwomwodiso oh pil Sapwellime soun papah ko.

Nan pwukoah sohte lipilipil me komw wie papahki—ma ke wia pwukoahn preseden en pwihn en dihken, preseden en steik, de Preseden en Area—kumwail anahne rapahkihda aramas duwehte Amiulek pwe kumwail en pweida.

E kakete mehmen me aktikitik de sohte sansal nanpwungamwail. E kakete emen me mwomwen sohte inengieng de sohte kak en papah. Elemwein noumwail Amiulek kan mwein pwulopwul de mah, ohl de lih, saikinte papah pak ehu, pwang, de sohte kin iang sarawi. Ahpw dahme komw sohte kasawiada mahs me re udahn kaskasik arail men pein rongasang kumwail lepin mahsen pwukat, “Kauno ketin anahnei komwi! Ngehi pil anahnei komwi!”

Deep down, many want to serve their God. They want to be an instrument in His hands. They want to thrust in their sickle and strive with their might to prepare the earth for the return of our Savior. They want to build His Church. But they are reluctant to begin. Often they wait to be asked.

I lukei kumwail en medewe irail akan nan amwail branch kan oh ward kan, nan ahmwail misin kan oh steik kan, me anahne rong pwukoah doadoahk pwehn tepda mwekid. Kauno ketin doadoahkehr rehrail, kaunop irailehr, karakarahkialahr mohngiongirail kan. Rapahkinirailki ahmw mohngiong en.

Rapahkinirailda. Padahkih irail. Kamarain irailda. Peki rehrail.

Ehukiong irail mahsen en tohnleng me kohieng Amiulek—me kapahi en Kauno pahn kohdiong pohrail oh nan imwerail.¹¹ Mwein komw pahn pwuriamweiki omwi pahn diarada soun papah loalopwoat en Kauno me sohte pahn sansal ma komw sohte rapahki.

Ni ekei kitail konehng en repen aramas duwehte Amiulek, a ohng ekei kitail peideko konehng duwe met “Ia duwen ahi duwehte Amiulek?

Elemwein, erein ireklahn pahr kei, ke solahr nohn nsenohki omw pwukoahn tohnpadahk men. Mwein omw kadehde ekis luwetala. Mwein komw dohsangehr Krais. Mwein mie me kansensuwedih komw de komw lingeringer. Mwein komw duwehte ekei irail ako nan Mwomwohdiso en kawao nan Episos, me kohkohsang”¹²—padahk mehlel poatopoat en rongamwahu en Sises Krais me re kin tepin pwungki.

Pwehn karasahiong Amiulek, komw mwahngiehr nan mohngiongomw me Kauno “ekehkerehr pak tohto” apw komw “sohte men rong.”

Eri, dahme Kauno mahsaniadahr rehmwail pil duwehte dahme E mahsaniada rehn Amiulek—iei soun papah lelepek me mie amwail doadoahk kesemwpwal en wia oh iangahki amwail ehuki kadehde. Mie soahngen papah ohte me komwihte me koahiengki wia. Kauno ketkihong kumwail Sapwellime prihstuhd sarawi, me kitail kak doadoahngki pwehn kapaiada oh kakehlada aramas teikan. Rongki ahmw mohngiong en oh idawehn sin ngihl tikitik en Ngehn Sarawio.

E sair ie pwehki mour en riatail ohl emen me pein peidengki iren peidek wet, “Ma Kauno pahn malipeie, I pahn rong?” I pahn koasoia David riatail ohl mwahu menet.

David iangala Mwomwohdiso wet sounpahr 30 samwalahro. E wia doadoahk en misineri oh ahpw kohla skuhl en wiahla lawyer. Ni ahnsou me e kin sukusukuhl oh wie doadoahk en apwalih eh peneinei tikitik, e diarada padahng kei duwen Mwomwohdiso wet me e pingkihda. Ni eh wadwadek padahk likamw pwukat e tepda pwunodkihda. Kedekedeo e kihsang ede sang nan rekohd en Mwomwohdiso.

Sang ahnsowo kohla, duwehte Alma ni ahnsou me e kin ketihwo, David kin kalapw akamaihong tohn Mwomwohdiso wet, lokolokaihong aramas nan internet ni arail men song arail pwoson.

E kin samanihong wia doahk wet.

Emen tohn mwomwohdiso me e kin akamaiong me iei Jacob. Ahnsou koaros Jacob kin kadek oh kin wauneki David, ahpw e pil kehlail nan ah doare Mwomwohdiso.

Mwurin pahr kei, David oh Jacob tepier wauneki emenemen oh re kempoakepahla. Dahme David sehse, me Jacob kin kapakapki David oh kin poadidiheng ah kapakap wereilahr. E kin intingediong eden kempoakepahu ong kapakap nan tehnpas sarawi en Kauno oh kin koapworopworki me mohngiong en David pahn karakarahkala.

Erein ahnsou reireio, David kin ekis ekis wie wekila. E tepda tamanda ia uwen mwahu en ah kehn Ngehn Sarawio mahs, oh e ahpw tamanda ia uwen eh kin peren ahnsou me e tohn mwomowhdiso wet.

David duwehte Alma, e sohte manokehla douluhl duwen rongamwahu pwung me mwowehu e kin kehlail. Pil David duwehte Amiulek, Kauno kin loalloalehte. David miher nan pelien doadoahk en pwihn en lawyer kei me kin alle pweipwei mwahu. E wialahr soun kawe Mwomwohdiso, oh e nohn keptakai en pekihda en kapwurehdo ede nan Mwomwodiso.

Ahpw, e kin wie doudoulahte kekehn doadoahk en Silepen sihp.

E sair ih dahme e wadekada nan pwuhk sarawi: Ma emen rehmwail anahne erpit, a en kapakap oh peki rehn Koht, oh Koht ahpw pahn ketkiong pwe Koht me kupwursapan oh kalahngan ong aramas koarusie.¹³ E kapakap, “Maing Koht, I men pwuralahng Souleng en Imwin Rahn, ahpw mie ahi iren peidek kei me I anahne pasepengpe.”

E tepda rong ngilen mwenginengen en Ngehno oh pasepeng kamarain en kempoakepahkan, me e sohte kin pehm mwowehu. Ekis ekis, ah peikasal weliankihdi pwoson, lao e tehkada, me e kakehr pwurehng kehn kadehdehn Sises Krais oh Sapwellime Mwomwodiso kapwurpwurdo.

Nan ahnsouo, e ese me e kak powehdi ah pwohnmwahso oh wia dahme en kak pwehn pwuredohng nan Mwomwodiso.

Kedkedeho, David apw pidelongehr nan pihl en pepdais oh eri tepda perenkihda wie kasikedo eh pahn pwurehngehr alehdi ah kapahi kan.

I inenen pereniki en pakairki me nan summer o, kapahi en David kapwurpwurdohngehr. Met e pwurehngehr kehlail nan Mwomwodiso oh kin papah en sounpadahk en Padahk en Rongamwahu nan ah ward. E kin pereniki ahnsou mwahu koaros en ehuki duwen ah weliakapwala, pwehn kamwahuwiala ohla kan me e wiadahr, oh kadehdehda duwen rongamwahu oh Mwomwohdiso en Sises Krais.

Riei ohl ako oh kempoakepahi ko, kitail en rapahki, kilangada, kamarain, oh kehlki me pahn wia doadoahk en Amiulek kan nan atail ward oh steik kan. Mie Amiulek tohto nan atail Mwomwohdiso rahnpwukat.

Mwein komw pahn mwahngih emen. Mwein komwi emen.

Ele Kauno kin mwengenenginiong komwi, koangoangehkin komwi en pwurala rehn me komw tepin poakohng, koadoahkiada omwi koahiek kan, warohngla doadoahngki prihstuhd, oh lelepekehng papah rehn riomw soulengkan en karanihala Sises Krais oh kawada wehin Koht.

Atail Sounkomour limpoak ketin mwahngih dahme kumwail mih loale. E ketin mwahngih mohngiongomwail. E ketin kupwuriki en doareikumwaila. E pahn ketin sowesei kumwail. Ihte ritingada amwail mohngiong kan ong Ih. Iei ahi koapwoaropwoar me irail akan me pireksang ahl en tohnpadahk,—mehnda ma pil ekiste—pahn medewehieng kamwahupe oh kalahngan en Koht, kilangki mohngiongerail kan, esehla sang Alma oh Amiulek, oh karonge mahsen en kaweliakapw en Sounkomouro: “Kohdo, iangiehla.”

I koangoangehkin kumwail en rong mwahu Sapwellime luhko, pwe mehlel kumwail pahn alehdi kapahi en nanleng. Kapahi en Kauno pahn kohdiong pohmwail oh nan imwemwail.¹⁴

Mepwukat I kadehdehda oh kihong kumwail ahi kapai nin duwen Wahnpoaron en Kauno ni lengleng kapai en Sises Krais, ahmen.