2010–2019
Ha’api’i mai na roto mai ia Alama ’e o Amuleka
’Ātopa 2016


Ha’api’i mai na roto mai ia Alama ’e o Amuleka

Tē ti’aturi nei au ē, o rātou tei hahi ē i te ’ē’a o te aupipira’a e hi’o ma tō rātou ’ā’au, ’e e ha’api’i mai na roto mai ia Alama ’e ’o Amuleka.

Alama tamaiti

’O Alama tamaiti te hō’ē o te mau ta’ata ha’amana’o-roa-hia a’e i roto i te pāpa’ira’a mo’a. Noa atu ē, e tamaiti ’oia nā te hō’ē peropheta rahi, ’ua hahi tōna haere’a i te hō’ē taime ’e ’ua riro mai « ’ei ta’ata ’ino rahi ’e te ha’amori idolo ». ’Aita tātou i ’ite e aha te mau tumu, ’ua pāto’i ’ū’ana rā ’oia i tōna metua tāne ’e ’ua tītau ’ia ha’amou i te ‘Ēkālesia. E nō tōna ’aravihi i te paraparau, e manuia rahi tōna.1

Terā rā ’ua taui te orara’a o Alama ’a fā mai ai te melahi a te Fatu iāna ra ’e i te paraura’a mai iāna ma te reo o te pātiri. ’Ua hope nā ao e toru ’e nā ru’i ho’i e toru tō Alama « ha’amāuiui-ra’a-hia i te ’ati mure ’ore… i te mau ’ati o te vārua i fa’ahapahia ra ». ’E ’ua ha’amana’o a’era ’oia i te hō’ē mea tei ha’amāramarama iāna i roto i taua taime ahoaho ra—hō’ē parau mau mure ’ore, tei ha’api’ihia e tōna metua tāne : ’oia ho’i, e haere mai Iesu Mesia « ’ei tara’ehara nō tō te ao nei ». E rā ’ē te taime tō Alama pāto’ira’a i te reira mau mana’o, i teie rā taime « te tāpe’a ra [tōna] ’ā’au i taua mana’o ra » ’e ma te ha’eha’a, te pūai, ’ua tu’u ’oia i tōna ti’aturira’a i roto i te mana tara’ehara o te Mesia.2

I te matarara’a mai Alama na roto mai i teie ’ohipa i tupu, ’ua riro ’oia ’ei ta’ata fa’ahuru-’ē-hia. E mai taua taime ra, ’ua hōro’a ’oia i tōna orara’a nō te fa’a’āfaro i te ’ino tāna i rave. ’Ua riro ’oia e hō’ē ’itera’a pūai nō te tātarahapa, te fa’a’orera’a hapa ’e te ha’apa’o-tāmau-ra’a.

’Ua mā’itihia Alama i te pae hope’a nō te mono i tōna metua tāne ’ei upo’o fa’atere nō te ‘Ēkālesia a te Atua.

’Ua ’ite te nuna’a ’ati Nephi tā’āto’a i te ’ā’amu o Alama. E riro ē, ’ua ’ī roa te Twitters, te Instagrams, ’e te Facebooks i tōna ra ’anotau i te mau hōho’a ’e te mau ’ā’amu nō ni’a iāna. Penei a’e ’ua ’ite-tāmau-hia ’oia i ni’a i te ’api mātāmua nō te ve’a hepetoma o Zalahemela, ’e ’ua riro ’ei parau tumu nā te mau pāpa’i ve’a, ’e te mau natira’a ta’a ’ē. Ha’apoto noa, penei a’e ’o ’oia te ’aito nui matau-roa-hia a’e i tōna ra ’anotau.

’Ia ’ite rā Alama ē, tē ha’amo’e ra tōna mau ta’ata i te Atua ’e tē fa’ateitei ra ia rātou i roto i te te’ote’o ’e te mārō, ’ua fa’aoti ihora ’oia e vaiiho i tōna ti’ara’a mana fa’atere ’e ’ua « ha’apa’o ana’e atura ’oia i te autahu’ara’a o te ha’apa’ora’a mo’a a te Atua »,3 ma te poro haere i te tātarahapa i rotopū i te Ati Nephi.

E manuia rahi tō Alama i te ha’amatara’a—tae roa atu i te taime ’a rātere ai ’oia i te ’oire nō Amoniha. ’Ua ’ite maita’i te ta’ata nō taua ’oire ra ē, e ’ere ’o Alama fa’ahou tā rātou ti’a fa’atere poritita, ’e e ’ere ho’i rātou i te mea fa’atura roa i tōna mana autahu’ara’a. ’Ua fa’a’ino rātou iāna, ’ua fa’ainaina ’e ’ua ti’avaru iāna i rāpae i tō rātou ’oire.

Ma te ’ā’au ’oto ’ua huritua atura Alama i te ’oire nō Amoniha.4

Terā rā, parau maira te hō’ē melahi iāna ’ia ho’i.

’A feruri na i te reira :’Ua parauhia ’oia ’ia ho’i i rotopū i te mau ta’ata tei riri iāna ’e tei ’ore i au i te ‘Ēkālesia. ’Ua riro ïa ’ei fa’auera’a ’ohipa fifi ’e penei a’e o te fifi tōna ora. ’Aita rā Alama i ’ōti’ati’a « ’Ua ho’i ’oi’oi ihora ’oia ».5

I ha’apae Alama i te mā’a e rave rahi mahana ’a tomo atu ai ’oia i roto i te ’oire. I reira ’ua ani atura ’oia i te hō’ē ta’ata ’e’ē mau « e hōro’a mai ānei ’oe i te mā’a i te hō’ē tāvini ha’eha’a a te Atua ».6

Amuleka

’O Amuleka te i’oa o teie ta’ata.

E ta’ata maita’i o Amuleka ’e te mātaro-maita’i-hia i Amoniha. Noa atu ē, nō roto mai ’oia i te hō’ē ’āpapara’a ta’ata fa’aro’o, ’ua paruparu tōna iho fa’aro’o. ’Ua fa’a’ite ’oia i muri a’e ra ē, « I parauhia ho’i au i te mau taime e rave rahi, ’aita rā vau i fa’aro’o ; nō reira i ’ite au i teie mau mea ; ’aita rā vau i hina’aro e [ti’aturi], nō reira i tāmau noa ai au i te fa’aru’era’a i te Atua ».7

’Ua fa’aineine rā te Atua ia Amuleka, ’e ’ia fārerei a’era ’oia ia Alama, ’ua fāri’i ’oia i te tāvini o te Fatu i roto i tōna fare, i reira Alama i pārahi ai e rave rahi mahana.8 I roto i taua taime ra, ’ua ’īriti Amuleka i tōna ’ā’au i te parau poro’i a Alama, ’e ’ua tupu ihora te hō’ē tauira’a nehenehe i ni’a iho iāna. Nō reira ’aita o Amuleka i ti’aturi noa ; ’ua riro mai rā ‘oia ’ei ’aito nō te parau mau.

’A haere fa’ahou ai Alama e ha’api’i i rotopū i te mau ta’ata nō Amoniha, e ’ite piti tei piha’i iho iāna---o Amuleka, te hō’ē nō roto mai ia rātou iho.

’Ua riro te mau ’ohipa i tupu i muri mai ’ei hō’ē ‘ā’amu ’oto ’e te ’oa’oa ato’a i roto i te pāpa’ira’a mo’a tā’āto’a. E nehenehe ’outou e tai’o i te reira i roto i te Alama te mau pene 8--16.

I teie mahana, tē hina’aro nei au e ani atu ia ’outou ’ia feruri i nā uira’a e piti nei :

A tahi : « E aha tā’u e nehenehe e ha’api’i mai na roto mai ia Alama ? »

Te piti : « Nāhea vau e riro ai mai ia Amuleka ? »

E aha tā’u e nehenehe e ha’api’i mai na roto mai ia Alama ?

E ha’amata vau ma te ui i te feiā fa’atere ato’a o te ‘Ēkālesia a Iesu Mesia i tahito ra, i teie mahana ’e nō ananahi, « e aha tā ’outou e nehenehe e ha’api’i mai na roto mai ia Alama ? »

’Ua riro Alama ’ei ta’ata ta’a ’ē roa i te pae nō te hōro’a ’e nō te ’aravihi. E mea ’ōhie ’ia feruri ē, ’aita ’oia i hina’aro i te tauturu a te hō’ē noa a’e ta’ata. Nō reira, e aha te ’ohipa tā Alama i rave ’a ho’i fa’ahou ai ’oia i Amoniha ?

’Ua fārerei Alama ia Amuleka ’e ’ua ani iāna i te tauturu.

’E ’ua fāri’i Alama i te tauturu.

Ta’a ’ē noa atu te tumu, i te tahi taime, tātou te feiā fa’atere, ’aita tātou e hina’aro roa e ’imi ’e e ani i tō tātou mau Amuleka. Tē feruri nei paha tātou ē, e maita’i a’e te ’ohipa mai te mea ē, na tātou iho e rave, ’e ’aore rā, ’aita tātou e hina’aro e ha’ape’ape’a ia vetahi ’ē, ’ae aore rā, e fa’aoti tātou iho ē, e’ita vetahi ’ē e hina’aro e rave. Pinepine roa tātou i te fa’ataupupu ’ia ani-manihini i te ta’ata ’ia fa’a’ohipa i te mau tāreni tā te Atua i hōro’a mai ’e ’ia ’āmui mai i roto i te ’ohipa rahi nō te fa’aorara’a.

’A feruri na i te Fa’aora—’ua ha’amata ānei ’oia i te ha’amau i Tāna ‘Ēkālesia ’oia ana’e ?

’Aita.

E ’ere Tāna parau poro’i ē « fa’aea noa atu, nā’u e ha’apa’o i teie ». Teie rā Tāna parau, « haere mai, ’a pe’e mai Iā’u ».9 ’Ua fa’auru ’oia, ’ua ani manihini, ’ua ha’api’i ’e i muri iho, ’ua ti’aturi i tāna mau pipi ’ia « rave i te mau mea tā ’outou i ’ite iā’u i te ravera’a ra ».10 Na roto i te reira, ’ua patu Iesu Mesia ’eiaha i Tāna noa ‘Ēkālesia, i Tōna ato’a rā mau tāvini.

I roto i te ti’ara’a tā ’outou e tāvini nei—e peresideni ānei nō te hō’ē pupu diakono, e peresideni titi ānei, ’e ’aore rā, e peresideni ārea ānei—nō te manuia, tītauhia ia ’outou ’ia ’imi i tō ’outou mau Amuleka.

Penei a’e hō’ē ta’ata ha’iha’i roa ’e ’aore rā, ’aita e ’itehia atu i rotopū i tō ’outou mau ’āmuira’a. Penei a’e hō’ē ta’ata ’aita paha e hina’aro e tāvini, ’e ’aore rā, ’aita paha e nehenehe e tāvini. Penei a’e tō ’outou mau Amuleka e taure’are’a ’e ’aore rā, e rū’au, e tāne paha ’e ’aore rā, e vahine, e mea ’aravihi ’ore paha, ’ua rohirohi paha, ’e ’aore rā, ’aita paha e haere mai nei i te purera’a. Te mea ra ’aita ’outou e ’ite mātāmua nei ’oia ho’i te tia’i nei rātou ’ia fa’aro’o i teie mau parau na roto mai ia ’outou « te hina’aro nei te Fatu ia ’oe !, tē hina’aro nei au ia ’oe !

I roto i te hōhonura’a o tō rātou ’ā’au, e rave rahi o tē hina’aro nei e tāvini i tō rātou Atua. Tē hina’aro nei rātou ’ia riro ’ei mauha’a i roto i Tōna rima. Tē hina’aro nei rātou e tu’u i tā rātou mauha’a ’ō’oti ’e ’ia ’ō’oti ma tō rātou pūai nō te fa’aineine i te fenua nei nō te ho’ira’a mai tō tātou Fa’aora. Tē hina’aro nei rātou e patu i Tāna ‘Ēkālesia. Te ’ōti’ati’a nei rā rātou nō te ha’amata. Pinepine te taime e tia’i rātou ’ia anihia atu.

Tē ani manihini nei au ia ’outou ’ia feruri i te mau ta’ata i roto i tā ’outou mau ’āma’a, i roto i tā ’outou mau misiōni, e mau titi, o tē hina’aro nei ’ia fa’aro’o i te hō’ē pi’ira’a ’ia rave i te ’ohipa. ‘Ua rave te Fatu i te ’ohipa i piha’i iho ia rātou—nō te fa’aineine ia rātou, nō te tamarū i tō rātou ’ā’au. ’A ’ite atu ia rātou ma te ’imira’a ma tō ’outou ’ā’au.

E fa’atoro i te rima ia rātou. ’A ha’api’i ia rātou. ’A fa’auru ia rātou. ’A ui ia rātou.

’A fa’a’ite ia rātou i te mau parau a te melahi i ni’a ia Amuleka—’ia vai ho’i te ha’amaita’ira’a a te Fatu i ni’a iho ia rātou ’e tō rātou ’utuāfare.11 E māere ’outou ia ’itehia ia ’outou te hō’ē tāvini itoito a te Fatu o te vai tāpuni noa ’ahiri ’aita i parauhia.

« Nāhea vau e riro ai mai ia Amuleka ? »

Tē ’imi nei te tahi pae o tātou i te hō’ē Amuleka, ’āre’a te tahi pae ra te uira’a ē « Nāhea vau e riro ai mai ia Amuleka ? »

Penei a’e i roto i te roara’a o te tau ’ua paruparu ri’i ’outou i roto i tō ’outou ti’ara’a pipi. Penei a’e ’ua mohimohi ri’i te ’ama o tō ’outou ’itera’a pāpū. Penei a’e ’ua fa’aātea ri’i ’outou ia ’outou i te tino o te Mesia. Penei a’e ’ua mā’ino’ino paha ’outou ’e ’aore rā, ’ua riri ’outou. Mai te tahi nō te ‘Ēkālesia ’a Ephesia i tahito ra, ’ua fa’aru’e ’outou i tei « here-mātāmua-hia12 e ’outou—te mau parau mau nehenehe ’e te mure ’ore o te ‘evanelia a Iesu Mesia.

Penei a’e, mai ia Amuleka, ’ua ’ite ’outou i roto i tō ’outou ’ā’au ē, ’ua « pi’i te Fatu ia [’outou] e rave rahi taime », « ’aita rā ’outou i fa’aro’o ».

’Ātīrā noa atu, ’ua ’ite te Fatu i roto ia ’outou i te mea Tāna i ’ite i roto ia Amuleka—te pūai o te hō’ē tāvini itoito i roto i te ravera’a i te hō’ē ’ohipa faufa’a ’e ma fa’a’ite i te hō’ē ’itera’a pāpū. Tē vai ra te tāvinira’a e ’ore roa e ti’a i te hō’ē ta’ata ’ē ’ia rave hō’ē ā huru ravera’a. ’Ua ti’aturi te Fatu ia ’outou na roto i Tōna autahu’ara’a mo’a, tei mau i te pūai hanahana nō te ha’amaita’i ’e nō te fa’ateitei ia vetahi ’ē. ’A fa’aro’o i tō ’outou ’ā’au ’e ’a pe’e i te mau muhumuhu a te Vārua.

Te tere o te hō’ē melo

’Ua putapū roa tō’u ’ā’au i te tere o te hō’ē taea’e tei ui iāna iho, « ’ia pi’i ana’e mai te Fatu, e fa’aro’o ānei au ? ». E pi’i au i teie taea’e maita’i o Davida.

’Ua fa’afāriuhia Davida i roto i te ‘Ēkālesia fātata e 30 matahiti i teie nei. ’Ua rave ’oia i te hō’ē misiōni ’e i muri iho ’ua haere i te ha’api’ira’a ture. ’A haere noa ai ’oia i te ha’api’ira’a ’e ’a rave ai i te ’ohipa nō te fa’a’amu i te hō’ē ’utuāfare ’āpī, ’ua fāri’i ’oia i te tahi mau ha’amāramaramara’a nō ni’a i te ‘Ēkālesia tei fa’atapitapi i tōna mana’o. Rahi noa atu tāna tai’ora’a i teie mau parau tano ’ore, rahi noa ato’a atu tōna ta’a-’ore-ra’a. I te pae hope’a ’ua tītau a’era ’oia ’ia tapūhia tōna i’oa i roto i te parau melora’a o te ‘Ēkālesia.

Mai taua taime ra, mai ia Alama i tōna ra tau ’ōrurehaura’a, ’ua pau te taime rahi o Davida i te tama’i ’e te mau melo o te ‘Ēkālesia, i roto ato’a i te mau ’āparaura’a na ni’a i te itenati, ma te ’ōpua i te fa’ahapa i tō rātou ti’aturira’a.

E mea ’aravihi roa ’oia i roto i taua mau ’ohipa ra.

Hō’ē o te mau melo tāna i tama’i tē parau nei au ē, o Iakoba. ’Ua fa’a’ite tāmau noa o Iakoba i te maita’i ’e te fa’atura ia Davida, terā rā ’ua vai pa’ari noa ’oia i roto i tāna pārurura’a i te ‘Ēkālesia.

I roto i te roara’a o te tau, ’ua vai te fa’atura te tahi ’e te tahi ’e te auhoara’a i rotopū ia Davida ’e ’o Iakoba. Te mea i ’ore e ’itehia e Davida maori rā, ’ua pure o Iakoba nō Davida ’e ’ua rave i te reira ma te ha’apa’o maita’i hau atu i te ’ahuru matahiti te maoro. ’Ua tu’u ato’a ’oia i te i’oa o tōna hoa nō te pure i roto i te hiero o te Fatu ’e ’ua ti’aturi ē, e tamarūhia te ’ā’au o Davida.

I te roara’a o te tau, ’ua taui marū noa o Davida. ’Ua ha’amata ’oia i te ha’amana’o ma te au māite i te mau ’itera’a vārua i fāri’ihia e āna i te hō’ē tau ra, ’e ’ua ha’amana’o ’oia i te ’oa’oa tāna i ’ite ’a riro ai ’oia ’ei melo nō te ‘Ēkālesia.

Mai ia Alama, ’aita i mo’e-pau-roa-hia ia Davida te mau parau mau o te ‘evanelia tāna i fāri’i i te hō’ē tau. E mai ia Amuleka, ’ua ’ite Davida i te fa’atorora’a mai te Fatu i Tōna rima iāna. I teie rā taime, e rave ’ohipa Davida i roto i te hō’ē piha tōro’a pāruru—e tōro’a fa’ahiahia roa. ’Ua tu’i tōna ro’o ’ei ta’ata fa’a’ino i te ‘Ēkālesia, ’e ’aita ’oia e tae e ani ’ia fa’aho’i-fa’ahou-hia mai ’oia i roto i te ‘Ēkālesia, nō te rahi o tōna ’ā’au te’ote’o.

Noa atu rā i te reira, ’ua tāmau noa ’oia i te ’ite i te umera’a a te Tia’i mamoe.

’Ua tai’o ’oia i roto i te Bībīlia ’utuāfare : « Tē ’ere ra rā te hō’ē o ’outou i te ’ite, e ani ’oia i te Atua ra, ’o tei hōro’a hua mai i te maita’i i te ta’ata ato’a ra, ma te pāto’i ’ore ; ’e e horo’ahia mai tāna ».13 ’Ua pure ’oia, « e te Atua here e, tē hina’aro nei au ’ia riro fa’ahou ’ei Feiā Mo’a i te mau Mahana Hope’a nei, terā rā e mau uira’a tā’u o tā’u e hina’aro nei ’ia pāhonohia mai ».

’Ua ha’amata a’era ’oia i te fa’aro’o i te muhumuhu a te Vārua ’e i te mau pāhonora’a fa’auruhia a te mau hoa, mai tei ’ore ā i na-reira-hia na e āna. ’Ua huri tāta’ihō’ē tōna mau fea’a ’ei fa’aro’o, e tae roa atu i te taime ’a ’ite ai ’oia ē, e nehenehe fa’ahou tāna e fāri’i i te hō’ē ’itera’a pāpū nō ni’a ia Iesu Mesia ’e Tāna ‘Ēkālesia i fa’aho’ihia mai.

I taua taime ra, ’ua ’ite ’oia ē, e upo’oti’a mau ’oia i ni’a i tōna te’ote’o ’e e rave ho’i i te mau mea ato’a e tītauhia nō te fāri’i fa’ahou iāna i roto i te ‘Ēkālesia.

I te pae hope’a, ’ua tomo Davida i roto i te pape nō te bāpetizora’a ’e ’ua ha’amata i te tai’o i te mahana e fāri’i fa’ahou ai ’oia i tōna mau ha’amaita’ira’a.

Tē ’oa’oa nei au ’ia fa’a’ite atu ē, i teie tau māhanahana i ma’iri iho nei, ’ua fa’aho’i-fa’ahou-hia te mau ha’a’maita’ira’a o Davida. E mea ’āpiti itoito fa’ahou mai ’oia i roto i te ‘Ēkālesia ’e tē tāvini nei ’ei ’orometua ha’api’i nō te feiā pa’ari i roto i te ha’api’ira’a sābati i roto i tāna pāroisa. E rave ’oia i te mau rāve’a ato’a nō te paraparau ia vetahi ’ē nō ni’a i tōna tauira’a, nō te rapa’au i te ’ino tāna i rave, ’e nō te fa’a’ite i te ’itera’a pāpū nō ni’a i te ‘evanelia ’e te ’Ēkālesia a Iesu Mesia.

’Ōpanira’a

E au mau taea’e ’e e au mau hoa here, e mata na tātou i te ’imi, te fa’auru ’e te ti’aturi i ni’a i te mau Amuleka i roto i tā tātou mau pāroisa ’e te mau titi. E rave rahi Amuleka i roto i te ‘Ēkālesia i teie mahana.

’Ua ’ite paha ’outou i te hō’ē. Penei a’e ’outou te hō’ē.

Penei a’e ’ua muhumuhu mai paha te Fatu ia ’outou, ’ua tūra’i mai paha ia ’outou ’ia ho’i fa’ahou i tei herehia e ’outou i te mātāmua ra, ’ia hōro’a i tō ’outou mau tāreni, ’ia fa’a’ohipa i te autahu’ara’a ma te ti’amā, ’e ’ia tāvini i piha’i iho i tō ’outou mau hoa Feiā Mo’a nō te ha’afātata atu ia Iesu Mesia ’e nō te patu i te bāsileia o te Atua.

’Ua ’ite tō tātou Fa’aora here tei hea ’outou. ’Ua ’ite ’oia i tō ’outou ’ā’au. Tē hina’aro nei ’oia e fa’aora ia ’outou. E toro mai ’Oia i tōna rima ia ’outou. A ’īriti noa i tō ’outou ’ā’au Iāna. Tē ti’aturi nei au ē, o rātou tei hahi ē i te ’ē’a o te aupipira’a—noa atu e mea iti roa—e māta’ita’i rātou i te maita’i ’e te aroha o te Atua, e hi’o ma tō rātou ’ā’au, e ha’api’i mai na roto mai ia Alama ’e ’o Amuleka, ’e e fa’aro’o ho’i i te mau parau a te Fa’aora o te taui i te orara’a : « ’A haere mai, ’a pe’e mai iā’u ».

Tē fa’aitoito nei au ia ’outou ’ia ha’apa’o i Tāna pi’ira’a ra, e mea pāpū maita’i ē, e ’ō’oti ’outou i te mau mea nō te ra’i ra. E vai mai te ha’amaita’ira’a a te Fatu i ni’a iho ia ’outou ’e i ni’a iho i tō ’outou fare.14

Te fa’a‘ite pāpū nei au i te reira ’e te vaiiho nei au i ta’u ha’amaita’ira’a i ni‘a ia ’outou ’ei ’āpōsetolo na te Fatu, na roto i te i‘oa o Iesu Mesia, ’āmene.