Nogud Yufala I Fogetem

Gud aftenun ol brata mo sista. Yumi kasem blesing long konfrens ia. Fas yia blong mi olsem wan memba blong Kworom blong Olgeta Twelef Aposol i putum tingting blong mi i stap daon. I bin wan yia blong mi wok had, mi gro, mo mi prea strong long Papa we i stap long Heven. Mi bin filim ol sapot prea blong ol famli, ol fren, mo ol memba blong Jos raon long ful wol. Tangkyu from ol tingting mo prea blong yufala.

Mi gat janis tu blong mit wetem ol fren we mi laekem, sam blong ol yia we oli pas, mo plante we mi jes mitim. Afta long wan miting wetem wan fren we mi bin save mo lavem blong plante yia, we mi bin filim blong rere long toktok blong mi tedei.

Taem mitufala i mit, fren blong mi i talem long mi se hem i stap traehad. Hem i bin filim se, mo mi yusum toktok blong hem, wan hadtaem long saed blong fet mo i stap askem advaes blong mi. Mi filim glad se hem i serem ol filing mo wari blong hem long mi.

Hem i talem se hem i wet longtaem blong filim wanem hem i bin filim wan taem long spirit, mo naoia hem i ting se hem i stap lusum hemia. Taem hem i stap toktok, mi lisin gud mo prea strong blong save wanem Lod i wantem mi blong talem.

Fren blong mi, olsem we sam long yufala, i askem strong kwestin ia we i stap long singsing blong Praemeri: “Papa long Heven, ?yu yu rili stap?”¹ Long yufala we i stap askem semfala kwestin, mi wantem serem, wetem yufala, advaes ia we mi givim long fren blong mi, mo mi hop se wanwan long yufala bae i faenem se fet i kam strong moa mo yu mekem tingting bakegen blong putum ful paoa blong stap wan disaepol blong Jisas Kraes.

Taem mi stat, mi rimaenem yufala se yufala i wan boe o gel blong wan Papa long Heven we i gat lav, mo lav blong Hem i stap oltaem. Mi save se ol kaen filing blong lav ia, oli had blong yumi tingbaot taem yumi stap long medel blong ol trabol o tes blong yumiwan, o ol harem nogud mo ol drim we oli go lus.

Jisas Kraes i save ol strong trabol mo tes. Hem i bin givim laef blong Hem from yumi. Ol las aoa blong Hem oli strong, i bitim eni samting we i save andastanem, be sakrifaes blong Hem from wanwan long yumi i soemaot bigwan, klin lav we Hem i gat long yumi.

I no gat mistek, sin, o joes we bae i jenisim lav we God i gat long yumi. Hemia i no minim se fasin blong mekem sin i stret nomo, o hemia i no karemaot wok ia blong yumi mas sakem ol sin we yumi mekem. Be, yu no fogetem se Papa long Heven i save mo lavem wanwan long yumi, mo Hem i rere oltaem blong help.

Taem mi stap tingting long situesen blong fren blong mi, tingting blong mi i gobak long bigfala waes we i stap long Buk blong Momon: “Mo nao, ol boe blong mi, tingbaot, tingbaot se hem i long ston blong Ridima blong yumi, we i Kraes, Pikinini blong God, we yutufala i mas bildim fandesen blong yutufala; blong mekem se taem we devel bae i sendem aot ol strongfala win blong hem, yes, ol spia blong hem long wael win, yes, taem we ol ston blong aes blong hem mo strong win blong hem bae i foldaon long yutufala, bae i no gat paoa ova long yutufala blong pulum yutufala i go daon long bigfala hol blong sore mo sore tumas we i no gat en, from ston; long hem we yutufala i bin bildimap yutufala, we i wan sua fandesen, wan fandesen, long hem we sapos ol man oli bildimap olgeta long hem, oli no save foldaon.”²

Mi testifae se “bigfala hol blong trabol mo sore we i no gat en” i wan ples we i no gat wan i wantem stap long hem. Mo fren blong mi i filim se hem i stanap stret long maot blong hol ia.

Taem mi givim kaonsel, long ol kaen pipol olsem fren blong mi, mi lukluk gud long ol desisen blong olgeta we oli bin mekem ova ol yia we i lidim olgeta blong fogetem ol tabu eksperiens, blong nomo stap strong, mo blong gat tu tingting. Mi leftemap tingting blong olgeta, olsem we mi leftemap tingting blong yufala naoia, blong tingtingbak, speseli long taem blong trabol, taem ia we yu bin filim Spirit mo testemoni blong yu i bin strong; tingbaot ol stamba long spirit we yu bin bildim. Mi promesem yu se sapos yu mekem hemia, mo stap longwe long ol samting we i no save bildimap mo mekem testemoni blong yu i kam strong moa, o olgeta we oli stap jikim bilif blong yu, bambae ol gudfala taem ia we testemoni blong yu i bin strong bae i kambak bakegen long memori blong yu tru long prea wetem tingting we i stap daon mo fasin blong livim kakae. Mi talem stret long yu, se bae yu filim bakegen sefti mo gud filing blong gospel blong Jisas Kraes.

Wanwan long yumi i mas mekem yumiwan i kam strong moa long spirit fastaem, mo afta, i mekem olgeta raon long yumi i kam strong moa. Tingting hevi long ol skripja, mo tingbaot ol tingting mo ol filing we yu gat taem yu ridim skripja. Lukluk i go long ol nara trutok tu, be mekem folem ol woning blong skripja: “Be blong lanem samting, hem i gud, sapos yumi stap mekem folem ol kaonsel blong God.”³ Go long ol miting blong Jos, speseli ol sakramen miting, mo tekpat long sakramen mo riniu ol kavenan, wetem promes ia blong oltaem tingbaot Sevya, se Spirit blong Hem bae i stap wetem yu oltaem.

Nomata wanem mistek yumi bin mekem, o hamas yumi filim se yumi no stret, yumi save blesem ol leftemap ol narawan oltaem. Yumi save go faenem olgeta wetem seves olsem hemia blong Kraes we i save helpem yumi blong filim lav blong God dip insaed long hat blong yumi.

Hem i impoten blong tingbaot strong kaonsel we i stap long Dutronome: “[Lukaot gud long hat blong yufala, nogud yufala i fogetem ol samting we ae blong yufala i bin luk, mo nogud oli aot long hat blong yufala evri dei blong laef blong yufala; be tijim olgeta, ol boe blong mi, mo ol boe blong ol boe blong mi.]”⁴

Ol joes we yumi mekem i tajem laef blong ol jeneresen. Serem testemoni blong yu wetem famli blong yu; leftemap tingting blong olgeta blong tingbaot olsem wanem oli filim taem oli bin luksave Spirit long laef blong olgeta mo blong raetemdaon ol filing ia long ol jenol mo histri blong yufalawan, blong mekem se toktok blong olgeta, bae i mekem olgeta oli tingbaot hamas Lod i bin gud long olgeta.

Bae yufala i tingbaot se Nifae mo ol brata blong hem oli bin gobak long Jerusalem blong tekem ol buk we oli wokem long bras, we i gat histri blong ol pipol blong olgeta we oli bin raetemdaon, mo tu blong oli no fogetem histri blong olgeta.

Mo tu, long Buk blong Momon, Hileman i putum nem blong ol boe blong hem folem “ol fas papa” blong olgeta blong mekem se oli no fogetem gud fasin blong Lod:

“Luk, ol boe blong mi, mi wantem se yutufala i mas tingbaot blong holem ol komanmen blong God; mo mi wantem se yutufala i talemaot long ol pipol ol toktok ia. Luk, mi bin givim long yutufala ol nem blong ol fasfala papa blong yumi we oli bin kamaot long graon blong Jerusalem; mo samting ia mi bin mekem blong taem we yutufala i tingbaot ol nem blong tufala, yutufala i save tingbaot tufala; mo taem we yutufala i tingbaot tufala, yutufala i save tingbaot ol wok blong tufala; mo taem we yutufala i tingbaot ol wok blong tufala, yutufala i save tingbaot we oli bin talem, mo tu, oli bin raetem, se oli bin gud.”

“From hemia, ol boe blong mi, mi wantem se yutufala i mekem samting we i gud, blong ol pipol i save tokbaot mo raetem long saed blong yutufala, olsem we oli bin tokbaot mo raetem long saed blong tufala tu.”⁵

Plante tedei, oli gat sem kastom ia blong givim nem blong ol pikinini blong olgeta folem ol pipol long skripja, o ol fetful bubu olsem wan wei blong leftemap tingting blong olgeta blong no fogetem histri blong olgeta.

Taem mi bon, oli givim nem ia long mi, Ronald A. Rasband. Las nem blong mi i ona long laen blong papa blong mi. Medel nem blong mi, A, i blong mi tingbaot famli laen blong mama blong mi blong Denmak.

Bigfala bubuman blong mi, Jens Anderson i blong Denmak. Mo long 1861, Lod i lidim tufala Mormon misinari i go long Jens mo An Katrin Anderson, mo oli bin presentem gospel we i kambak long tufala wetem boe blong tufala 16 yia, Andru. Olsem ia nao wan histri blong fet i stat we famli blong mi mo mi i kasem. Ol Anderson oli ridim Buk blong Momon mo baptaes sot taem afta. Long yia afta, Anderson famli i folem singaotem blong profet blong krosem Atlantik mo joenem ol Sent long Not Amerika.

Be Jens i ded long sip, be waef blong hem mo boe oli gohed i go long Sol Lek Siti, mo kasem longwe long 3 Septemba 1862. Nomata ol hadtaem blong olgeta mo hat blong olgeta we i soa, fet blong olgeta i neva muvmuv, mo semmak tu long fet blong plante afta long olgeta.

Pikja

Peinting we i stap long ofis blong Elda Rasband

Insaed long ofis blong mi, i gat wan peinting i stap⁶ we i soemaot gud saen blong rimaenem mi long fas miting ia bitwin ol bubu blong mo olgeta fas misinari. Mi gat strong tingting blong no fogetem histri blong mi, mo from nem blong mi, bambae mi tingbaot olgeta oltaem eksampol blong laef blong olgeta we oli bin fetful mo oli bin sakrifaes.

Neva fogetem, kwestinim, o no wantem save long ol tabu eksperiens long spirit. Plan blong enemi, hem i blong pulumaot yumi long ol witnes blong spirit, be tingting blong Lod i blong givim laet, mo blong yumi joenem wok blong Hem.

Bae mi serem wan eksampol blong miwan long saed blong trutok ia. Mi rimemba gud wan taem we mi bin kasem wan toktok blong Spirit we i ansarem wan strong prea blong mi. Ansa ia i bin klia mo i gat paoa. Be, mi no mekem folem stret afta we mi harem toktok ia, mo afta wan longfala taem, mi bin stat blong askem miwan sapos wanem we mi bin filim i ril o no. Sam long yufala i bin foldaon long giaman ia blong enemi tu.

Sam dei afta, mi wekap mo tingbaot ol paoa ves ia long skripja :

“I tru, i tru, mi talem long yu, sapos yu wantem gat wa moa witnes, pulum tingting blong yu i gobak long naet ia we yu bin krae long mi insaed long hat blong yu, se bae yu mas save se olgeta samting ia oli tru.

“?Olsem wanem? ?Mi no bin givim wan filing blong pis long maen blong yu long saed blong poen ia? ?Wanem moa witnes yu save gat bitim hemia we i kam long God?”⁷

I olsem se Lod i stap talem: “Naoia Ronald, mi talem finis long yu wanem yu nidim blong mekem. !Naoia yu go mekem!” !Mi glad tumas mi save akseptem blong Hem i stretem mi mo lidim mi! Toktok blong Spirit ia i mekem hat blong mi i go daon mo mi bin save muv i go fored, mo mi save insaed long hat blong mi se i gat ansa long prea blong mi.

Mi serem eksperiens ia, ol dia brata mo sista, blong soem olsem wanem maen blong yumi i kwik blong fogetem samting, mo olsem wanem ol eksperiens long saed blong spirit oli lidim yumi. Mi bin lanem blong holemtaet ol kaen taem olsem, “nogud mi fogetem.”

Long fren blong mi, mo long evriwan we i wantem gat moa fet, mi givim promes ia long yufala: taem yufala i stap laef mo stap fetful long gospel blong Jisas Kraes, mo obei ol tijing blong hem, bae testemoni blong yufala bae i gat proteksen mo bae i gro. Kipim ol kavenan we yufala i bin mekem, nomata ol aksen blong olgeta raon long yufala. Kam ol papa mo mama, brata mo sista, bubu, anti, anggel, mo fren we i wok strong, i mekem narawan i kam strong moa wetem ol testemoni blong yufalawan, mo i serem ol eksperiens blong spirit. Stap fetful mo no muv, iven sapos ol strong win blong tu tingting oli tekova long laef blong yufala tru long ol aksen blong ol narawan. Lukaotem samting ia we i leftemap yufala mo mekem yufala i strong long saed blong spirit. Stap longwe long ol giaman ofring we oli singaotem trutok, we oli fulap i stap, mo tingbaot blong raetemdaon ol filing blong “lavem ol man, stap glad, gat pis long tingting, gat [longfala tingting], gat sore, gat fasin we i gud, gat fet, no stap flas mo stap kwaet.”⁸

Long medel blong ol strong win blong laef we oli bigwan moa, no fogetem tabu histri blong yufala olsem wan boe o wan gel blong God, o no fogetem tabu ples we bae yufala i gobak long hem blong laef wetem Hem, we i bitim eni samting we wol ia i save givim. Tingbaot ol kaen toktok blong Alma: “Mo nao luk, mi talem long yufala, ol brata blong mi, sapos yufala i bin gat wan jenis we i hapen long hat, mo sapos yufala i wantem blong singim singsing blong lav blong pemaot man, bae mi askem: ?yufala i save filim samting ia naoia?”⁹

Long evriwan we i filim nid blong fet blong olgeta i mas kam strong moa, mi plis long yufala: !Yufala i no foget! Plis, yufala i no foget.

Mi talem witnes blong mi se Josef Smit i wan profet blong God. Mi save se hem i bin luk mo toktok wetem God, we i Papa, mo wetem Pikinini blong Hem, Jisas Kraes, semmak olsem we hem i bin raetemdaon long toktok blong hemwan. Mi glad tumas se hem i no bin fogetem blong raetem eksperiens ia, blong yumi evriwan i save testemoni blong hem.

Mi talem tabu witnes blong mi long saed blong Masta Jisas Kraes. Hem i stap laef; mi save se Hem i stap laef mo stanap long hed blong Jos ia. Ol samting ia, mi save miwan, mo i no nara voes o witnes i talem, mo mi prea se bae yufala mo mi, bae i neva fogetem ol tabu trutok we oli no save finis—be faswan ia nao se yumi ol boe mo gel blong Papa mo Mama long Heven we Tufala i stap laef mo gat lav, we Tufala i wantem yumi hapi blong taem we i no save finis. Abaot ol trutok ia, mi testifae olsem long nem blong Jisas Kraes, amen.