2010–2019
Tuh Kowos in Tiac Muhlkuhnlah
Ohktohpa 2016


Tuh Kowos in Tiac Muhlkuhnlah

Nga kwacfe kowos in esam, yohk na ke pacl upac uh, pacl se kowos puhla Nguhn ac luhlahlfongi lowos fokoko; esam pwelucng in nguhn ma kowos orwaclah.

Lwen wo, tamuhlwel ac tahmtahel sacohk an. Kuht nuh arulacna ahkinsewowoyeyuck ke toeni inge uh. Yac se emet luhk in wi U luhn Mwet Sap Singucul Luo uh arulacna oruh ngan inse puhsisacl lac. Nuh sie yac ma oruh ngan srihke yohk, kapwack, ac kalweni na pruhe, ke inse pwacye nuh sin Pahpah tuhmuhk Inkuhsrao. Nga nuh puhla pruhe in ahkkuh luhn sucu, kawuck, ac mempucr ke Alu uh ke facluh nohfohn.

Oasr pac pacl wo luhk in ohsun nuh sin kawuck sacohk, kuhtuh nga etuh tari ke yac puhs ac puhs suc nga tuhfahna ohsun nuh se. Pa tukun miting se yurin sie kawuck sacohk ma nga nuh etuh ac luhngse ke yac puhs ah ma nga moklweyuck in ahkoelah sramsram luhk mihsenge uh.

Ke kuht ohsun ah, kawuck luhk el taltal muh oasr ma se upac nuh sel. El puhla muh el puhlakihn, ke kahs lal, sie “pacl upac ke luhlahlfongi uh” ac el suk kahsruh luhk. Nga srui tuh el sruhmuhn puhla ac elyah lal sihk.

El fahk muh el arulacna ke sifilpac puhla ma el tuh puhla met ah ke nguhn ac ma el ingena puhla muh muhtwacwacack wacngihnlac. Ke el sramsram, nga porongo wo ac pruhe pwacye in etuh lah meac Leum El ke ngan fahk.

Kawuck luhk, sahp oacna kuhtuh suwos, el siyuck kihsen siyuck se ma siyuckyuck arlac kahlwem ke ohn luhn Tuhlihk Srihsrihk ah, “Pahpah Lucng, yac Kom oasr nuh pwacye?”1 Nuh suwos suc sahp siyuck ohinge, nga ke fahk nuh suwos mwe kahsruh ma nga tuh sang nuh sin kawuck luhk ah ac finsrak tuh kowos kais sie fah kuh in konwacack luhlahlfongi lowos in fokokoi ac oaru lowos in ahksasucyeyuck in kuh in mwet tuhma lutlut oaru se luhn Jisus Kraist.

Nga muhtwacwacack ke ahkacsmakihnye kowos lah kowos wen kuh acn nuhtin Pahpah luhngse se Inkuhsrao ac lah luhngse Lal uh kalweni na. Nga etuh muh kain mwe ahkacsmakihn ke luhngse inge uh upac in esam ke kowos oasr in ma upac sifacna kuh pacl elyah uh, mwe ahsor, kuh finsrak muhsahlah uh.

Jisus Kraist El etuh ke ma upac ac pacl elyah yohk uh. El tuh sang moul Lal kacsr. Sahflahiyacn moul Lal ah upaclaclac, ahluhkwelah ma kuht kuh in kahlwem, tuhsruhk kihsac Lal kacsr kais sie uh pa mwe ahkkahlwemye yohk ke luhngse nwacsnwacs Lal.

Wacngihn tahfonglac, ma koluk, kuh sulaclah uh fah ekuhllah luhngse luhn God kacsr. Tiac kalmac pa ma koluk uh lwelahyuck, ac tiac pac eislah kunohkohn lasr in auliyak ke ma koluk uh orek. Tuhsruhk nimet muhlkuhnlah, Pahpah Lucng El etuh ac luhngse kowos kais sie, ac El ahkolah pacl nuh kwewa in kahsruh.

Ke nga motko ohiyac se luhn kawuck luhk ah, nga nuhnkuh ke lahlmwetmwet yohk ma konweyuckyak ke Puk luhn Mormon: “Ac inge, wen nuhtihk, esam, esam lah ke fin yot luhn Mwet in Molwelah lasr, suc pa Kraist, Wen nuhtin God, pa kowos enenuh in muhsahelah pwelucng lowos; tuh ke devil el ac suhpwaclah eng upac lal, ahok, sikucl lal nuh ke eng for uh, ahok, ke aes kwekwe raun nuhkwewa lal ac pahkah upac lal fah srihngihl kowos, ma inge ac fah wacngihn kuh la fowos in iskowosi nuh ten nuh ke inahlok luhn suhpwacr ac ongaiyac ma wacngihn sahflahiyac, ke srihpen yot se ma kowos muhsahyak fac, suc pa sie pwelucng pwacye, sie pwelucng ma fin mwet uh muhsah fac elos tiacna kuh in puhtatlac.”2

Nga fahkwack tuh “inahlok luhn suhpwacr ac ongaiyac ma wacngihn sahflahiyac uh” pa sie acn ma wacngihn mwet ke muhta we. Ac kawuck luhk el puhla muh el fototo nuh kac.

Ke nga tuh sramsram in kahsruh nuh sin mwet uh, oacna kawuck luhk, nga siyuck ke sulaclah lalos ke puhlan pacl ma oruh elos in muhlkuhnlah ma puhlweyuck muhtahl, in muhnahs, ac in tahfuh luo. Nga kwacfelos, oacna nga kwacfe kowos ingena, in esam, yohk na ke pacl upac uh, pacl se kowos puhla Nguhn ac luhlahlfongi lowos fokoko; esam pwelucng in nguhn ma kowos orwaclah. Nga olwelah muh kowos fin oruh ohinge, ac tiac oruh ma ma tiac muhsaheack ac ahkkweye luhlahlfongi lowos kuh ma ahksrihkye luhlahlfongi lowos an, pacl sacohk ingoh ma luhlahlfongi lowos kuh na fah sifilpac fohlohk nuh ke esam lowos ke pruhe puhsisacl ac lalo. Nga fahkwack pwacye lah kowos fah sifilpac puhla ohiyac wo luhn wosasuc luhn Jisus Kraist.

Kais sie sesr enenuh in ahkkweye kuht sifacna ke ma luhn nguhn emet na ahkkweye mwet raunikuhtlac. Kwacna motko ke ma suhmuhslah, ac esam nuhnak ac puhla ma kowos puhla ke kowos riti. Suk pac ma pwacye sahyac, tuhsruhk lohng mwe ahksensen se inge ke ma suhmuhslah: “Tuhsruhk etwacack uh wo elos fin porongo kaiyuck luhn God.”3 Wi miting luhn Alu, yohk na toeni ke kuhfa luhn Leum, ac ipeis ke kuhfa luhn Leum ac ahksasucye olweacng uh, weacng olwelah in esam Mwet Lahngo pacl nuh kwewa, Nguhn Lal in muh oasr yuruwos pacl nuh kwewa.

Finne fuhkah tahfonglac kuht oraclah kuh ohiyacn sesuwohs kuht puhla kacsr sifacna uh, kuht kuh pacl nuh kwewa in ahkinsewowoye ac sruhkwack mwet sahyac. In kahsrwelos ke ohiyacn kuhlwacnsap luhn Mwet Kristin uh kuh in kahsruh kuht puhla luhngse yohk luhn God ke insiyacsr.

Yohk srihpac in esam mwe kahsruh kuh konweyuckyak ke Deuteronomy: “Kowos in arulana taran ac karinganang tuh kowos in tia mulkunla ma kowos sifacna liye ke motowos, ke lusen moul lowos nufon. Srumun nu sin tulik nutuwos ac nu sin tulik nutin tulik nutuwos.”4

Fihlin pacl uh moklweyuck ke sulaclah lasr. Fahkwack luhlahlfongi lowos nuh sin sucu lowos; kwacfe elos in esam lah elos puhla fuhkah ke elos akihlen Nguhn in moul lalos ac in sihmihs puhla inge ke mwe sihm ac ke sramsram mahtuh lalos sifacna tuh kahs lalos in kuh, ke enenweyuck, in oruh elos in esam lah Leum El arulacna wo nuh selos.

Kowos fah esam, lah Nephi ac tamuhlwel wiyacl ah elos fohlohk nuh ke acn Jerusalem in eis puhlwet pras ah ma nwenyuck ma sihmlac mahtuh luhn mwet lalos, ke ip tuh elos in tiac muhlkuhnlah ma mahtuh lalos.

Oacyacpac, ke Puk luhn Mormon, Helaman el sang inen tuhlihk mukul nahtuhl in oacna inen “pahpah tuhmwaclos emet” tuh elos in tiac muhlkuhnlah woiyacn Leum:

“Liye, wen nuhtihk, nga kena tuh kowos in esam in liyacacng masap luhn God; ac nga kena tuh kowos in fahkwack nuh sin mwet uh kahs inge. Liye, nga usot nuh suwos inen pahpah tuhmwacsr emet suc tuhkuh liki acn Jerusalem; ac ma inge nga oraclah tuh ke kowos esam inewos kowos kuh in esamuhlos; ac ke kowos esamuhlos kowos in kuh in esam orekma lalos; ac ke kowos esam orekma lalos kowos in kuh in etuh lah fuhkah ne tuh fwack, ac oacyacpac sihmlac, lah elos wo.

“Ke ma inge, wen nuhtihk, nga kena tuh kowos in oruh ma wo, tuh in fwack keiwos, ac oacyacpac sihmlac, finne oacna ke fwack ac sihmlac kaclos.”5

Puhs mwet mihsenge uh oasr atac lalos oacna ohinge in sang inen tuhlihk nahtuhlos oacna inen mwet wo ke ma suhmuhslah kuh mwet mahtuh oaru in tuh sie ohiyacn ahkacsmakihnyaclos in tiac muhlkuhnlah ma mahtuh lalos.

Ke nga tuh isuslac ah, ituckyang nuh sihk ine Ronald A. Rasband. E sahflah luhk uh ma ke mwet in sucu luhn pahpah tuhmuhk ah. Lwacta A sacn ituckyang nuh sihk in ahkacsmakihnyeyuc ke sucu Denmark luhn ninac kiyuck ah suc pa Anderson.

Pahpah mahtuh tuhmwacn pahpah mahtuh tuhmuhk ah Jens Anderson el sie mwet Denmark. Ac ke 1861 Leum El kol misineri Mormon luo nuh ke lohm sin Jens ac Ane Cathrine Anderson, yen misineri inge elos ahkkahlwemye nuh selos ac nuh sin tuhlihk mukul yac 16 nahtuhlos, Andrew, nuh ke wosasuc fohlohkyak uh. Na pa muhtwacwacack sie fahsriyacn luhlahlfongi suc ma ahkinsewowoye sucu luhk. Sucu Anderson ah elos riti Puk luhn Mormon ac tuh pacptaislac pacl sa tohkoh. Yac se tohkoh ah, sucu Anderson elos ahkos sap sin mwet pahluh in tuhpallah meoa Atlantic in wi mwet luhlahlfongi fin acn North America.

Mwe ahsor se, Jens el misac ke meoa ah, tuhsruhk muhtwacn kiyacl ac tuhlihk mukul nahtuhl ah kalweni som nuh ke Salt Lake Valley, oai ke September 3, 1862. Finne oasr ma upac lalos ac kweok insiyac lalos, luhlahlfongi lalos ah tiacna muhnahslah, ac ohinge pac ke luhlahlfongi luhn puhs sin mwet in fihl nahtuhlos.

Petsac
Petsac ke ohfohs lal Elder Rasband

Ke ohfohs luhk ah oasr sie petsac6 ma petsaciyucklac arlac wo mwe acsmak se ke toeni se emet inmahsrlon mwet mahtuh luhk ac misineri oaru inge ah. Nga insacnweacng in tiac muhlkuhnlah ma mahtuh luhk, ac ke srihpen inek nga fah esam nwe tok sramsram kwaclos ke luhlahlfongi ac kihsac uh.

Nimet muhlkuhnlah, kihsen siyuck, kuh pihlesruh na ma puhlweyuck sifacna, muhtahl luhn nguhn uh. Plwacn luhn mwet lokoalok sac pa in oruh kuht in tiac lohacng nuh ke mwe lohoh sin nguhn, tuhsruhk kena luhn Leum pa in oruh kuht kahlwem ac wi orekma Lal.

Lwelah ngan sruhmuhn srihkasrak se luhk sifacna ke ma pwacye inge. Nga esam suwohs sie pacl ma nga moklweyuck in top nuh ke sie pruhe yohk. Top uh kahlwem ac fokoko. Finne ohinge, nga tiac sa mukwikwi ke pihrihkyuck luhk, ac tukun puhlan pacl se nga muhtwacwacack motko lah ma nga puhla uh pwacye. Sahp kuhtuh suwos tuh kiacpweyucklac pac sin mwet lokoalok uh.

Kuhtuh lwen tohkoh, nga nguhtwaclihk ke fuhs fokoko inge in nuhnak luhk ma Leum El ahkacsmakihnyacl Oliver Cowdery

lah el fin kena sifilpac eis mwe lohoh, el enenuh in sang nuhnak lal nuh ke fong se ma el pruhe insiyacl.

Leum El ahkacsmakihnyacl Oliver lah El tuh sang mihs nuh ke insifacl ke ma se. El fahk lah wacngihn mwe lohoh ma el kuh in eis ma kuh liki ma se sin God.7

Oacna Leum El fahk, “Inge, Ronald, Nga tuh fahk nuh sum tari lah meac kom enenuh oruh. Ingena oruh!” Nga tarilacna ke ahksuwohsyeyuck ac kolyuck ke luhngse ohinge! Nga sa na ahkmihsyeyuck ke moklweyuck ah ac tuh kuh in fahsr nuh met kac, etuh insiyuck tuh pruhe luhk uh toplac.

Nga sruhmuhn srihkasrak se inge, tamuhlwel ac tahmtahel sacohk, in ahkkahlwemye lah nuhnak lasr uh kuh in arlac sa muhlkuhnlah ac lah ma puhlweyuck luhn nguhn uh kuh in kol kuht fuhkah. Nga etwaclah in sekoi kain pacl inge “tuh ngan tiac muhlkuhnlah.”

Nuh sin kawuck luhk, ac nuh sin mwet nuhkwewa suc luhngse ahkyohkye luhlahlfongi lalos, nga olwelah ohinge: ke kowos oaru in moulkihn wosasuc luhn Jisus Kraist ac ahkos mwe luti kac uh, luhlahlfongi lowos fah loangweyuck ac fah kapwack. Karuhnganwacng olweacng kowos nuh orwaclah, finne fuhkah mukwikwi luhn mwet raunikowoslac an. Oruh in pahpah ninac, tamuhlwel ac tahmtahel, pahpah ninac mahtuh, aunt, uncle, ac kawuck oaru suc ahkkweye mwet luhngse an ke fahkwack luhlahlfongi ac sruhmuhn ma puhlweyuck luhn nguhn. Kalweni na oaru ac fokoko, finne ke tahfuh luo uh oasr in moul lowos ke srihpen mukwikwi luhn mwet sahyac. Suk ma ac luti ac ahkkweye kowos ke ma luhn nguhn. Sensenkihn mwe sang kikiacp ke ma fwack tuh “pwacye” suc ma fihsrwacsr in fahk, ac esam in sihmihs puhla lowos ke “lungse, engan, misla, mongfisrasr, kulang, orekma wo, pusisel, [ac] sifacna leum fac.”8

Ke pacl upaclaclac luhn moul uh, nimet muhlkuhnlah mwe usrui muhtahl lowos in wen kuh acn nuhtin God kuh moul nwe tok lowos in tuh sie lwen fohlohk ac muhta Yohrohl, suc ma ahluhkwelah kuhtwena ma facluh kuh in use. Esam kahs kuhlwacng luhn Alma: “Liye, nga fahk nuh suwos, mwet wiyuck, kowos fin puhlakihn ayaol luhn insiyac, ac kowos fin puhlakihn in onkihn on ke luhngse moliyucklac, ngwac siyuck, yac kowos kuh in puhla inge?”9

Nuh sin mwet nuh kwewa suc enenuh luhlahlfongi lalos in ahkkweyeyuck, nga siyuck suwos, nimet muhlkuhnlah! Nuhnak muhnahs met muhlkuhnlah.

Nga fahkwack luhlahlfongi tuh Joseph Smith el sie mwet pahluh luhn God. Nga etuh el liye ac sramsram nuh sin God Pahpah ac Wen Nahtuhl, Jisus Kraist, oacna el sihmihs ke kahs lal. Nga tarilacna muh el tiacna muhlkuhnlah in sihmihs ke ma inge, tuh kuht nohfohn in etuh ke luhlahlfongi lal.

Nga fahkwack suwohs luhlahlfongi luhk ke Leum Jisus Kraist. El moul; Nga etuh El moul ac tu ke sifacn Alu se inge. Ma inge nga etuh sihk sifacna, tiacna ma ke kuhtwena puhsra kuh lohoh sahyac, ac nga pruhe tuh nga kowos fah tiacna muhlkuhnlah ma pwacye ma pahtpaht inge—yohk srihpac emet uh lah kuht wen ac acn nuhtin Pahpah Ninac moul ac luhngse Inkuhsrao, suc ke na engan ma pahtpaht lasr. Ke ma pwacye inge nga fahkwack ke inen Jisus Kraist, amen.