N̄e Kwō Ab Meļo̧kļo̧k

Iakwe in raeļep, ro jeiū im jatū. Jejeraam̧m̧an kōn iien kweilo̧k in. Eddo in aō jinointata ilo iiō in āinwōt juon eo uwaan doulul eo an Rijjilōk ro Jon̄oulruo eļap an kōttāiki eō. Juon iiō eo me eaikuj eļap kijejeto im eddōkļo̧k, wōnm̧aanļo̧k, kōn jar em̧ool n̄an Jemedwōj Ilan̄. Iaar en̄jake jar in rejtake ko an baam̧le ko, ro mōtta, im membōr ro ilo Kabun̄ in ipeļaakin laļin. Kom̧ em̧ool kōn lōmņak im jar ko ami.

Eaar wōr juon aō iien em̧m̧an n̄an ioon ro mōtta me reaorōk ippa, jet jān kar iiō ko rem̧ootļo̧k im elōn̄ Ij kab jeļā kajjieer. Kar ālkin aō ioon juon mōtta eo ejitōnbōro eo Iaar jeļā kajjien im iakwe e ilo elōn̄ iiō ko eo Iaar en̄jake im̧we bwe in kōpooj kōnono in aō rainin.

Ke komro kar ioon doon, eo mōtta eaar jiron̄ eō ilo ittino ke etto an baj en̄taan ilo mour in jetōb. Eaar en̄jake ke ej jelm̧aeiki menin, n̄an kōjerbal naan ko an, juon “ebwer kōn tōmak” im kar kōnaan bōk jipan̄ jān naan in katak ko aō. Iaar lukkun mōnōnō ke emaron̄ kar kwaļo̧k en̄jake in an im an inepata n̄an n̄a.

Eaar kwaļo̧k ke etto an ikdeelel bwe en bar en̄jake ta eo eaar en̄jake moktaļo̧k ilo jetōb im ta eo kiiō me ej lōmņak ej pojak in looji. Ke ej kōnono, Iaar lukkun ron̄jake im jar ilo m̧ool n̄an jeļā ta eo Irooj en kar kōnaan bwe in ba n̄an e.

Eo mōtta, āinwōt bolen jet iaami, eaar kajjitōk kajjitōk in ilo an alikkar im kajoor ilo al eo an Būraimāri: “Jemedwōj Ilan̄, kwoj ke lukkun pād ijene?”¹ Kom̧ maron̄ kajjitōk ejja kajjitōk in wōt, ikōnaan kwaļo̧k n̄an kom̧ naan in kapilōk eo Iaar lelo̧k n̄an eo mōtta im kōjatdikdik bwe kajjojo iaad jemaron̄ lo an kajoorļo̧k tōmak ko ad im kālet ko ami renaaj oktak n̄an erom juon rikaļoor an Jisōs Kraist em̧ool.

Ij jino ilo aō kakeememej kom̧ ke kom̧ ro nejin Jemedwōj Ilan̄ eo ej iakwe kōj im bwe iakwe eo An ejamin oktak. Ijeļā bwe lukkun en̄jake ko kōn an iakwe epen ad en̄jake ilo iien ko jej ioon apan̄ im māllejon̄, inepata ko, ak n̄e kōtōpar ko raar jab kūrm̧ool.

Jisōs Kraist ejeļā kōn apan̄ im māllejon̄ ko reļļap. Eaar aje mour eo An n̄an kōj. Awa ko An āliktata raar obrak kōn nana, ilōn̄inļo̧k jabdewōt men ko jemaron̄ lōmņaki, ak An pinmuur kōn kōj kajjojo eaar kwaļo̧k iakwe eo An errreo im utiejtata.

Ejjeļo̧k bōd, jerawiwi, ak kālet enaaj ukōt iakwe in an Anij n̄an kōj. Ejjab meļeļein m̧wil ko rejarawiwi rem̧m̧an, ak joļo̧k eddo ko ad n̄an ukweļo̧k n̄e jej kōm̧m̧an jerawiwi. Ak meļo̧kļo̧k, Jemedwōj Ilan̄ ejeļā wōn kōj im ej iakwe kōj, im aolep iien Ej pojak n̄an jipan̄ kōj.

Ke ij lōmņake jekjek eo me eo mōtta eaar pād ie, iaar lōmņak kōn mālōtlōt in eļap ej pād ilo Bok in Mormon: “Im kiiō, ro nejū m̧aan, keememej, keememej bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami; bwe n̄e devil enaaj jilkintok kōto ko an rekajoor, aaet, m̧ade ko an ilo aire, aaet, n̄e aolep wōt dekā im lan̄ rekajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄.”²

Ij kam̧ool bwe “ron̄ in būrom̧ōj im wo ejjeļo̧k jem̧ļo̧kin” ej juon jikin eo ejjeļo̧k ekōnaan pād ie. Eo mōtta eaar en̄jake ke epaakeļo̧k ron̄ in būrom̧ōj eo ejjeļo̧k jem̧ļo̧kin.

N̄e ij rojan̄ kajjojo, āinwōt eo mōtta, ij lo bwe kālet ko aer raar kōm̧m̧ane ilo iiō ko rekar tōlļo̧k er n̄an meļo̧kļo̧k en̄jake ko aer rekwojarjar, n̄an majņoļo̧k, im n̄an pere. Iaar rojan̄ er, ilo aō rojan̄ kom̧ kiiō, n̄an keememej, eļaptata ilo iien ko reppen, n̄e kwoj en̄jake Jetōb im ami naan in kam̧ool rekajoorļo̧k; keememej pedped ko an jetōb ko emōj ami ejaaki. Ij kallim̧ur bwe eļan̄n̄e kwoj kōm̧m̧ane menin, kajekdoon men ko me rejjab kalōk im kōkajoorļo̧k naan in kam̧ool ko ami ak ej kajirere kōn tōmak eo am, iien ko reaorōk n̄e naan in kam̧ool eo am ej kajoorļo̧k enaaj kakeememej eok ilo kōlmenļo̧kjeņ eo am kōn jar ilo ettā im jitlo̧k. Ij kallim̧ur kom̧ bwe bar juon alen kom̧ naaj en̄jake jokņe im en̄jake ko rem̧m̧an kōn gospel eo an Jisōs Kraist.

Kajjojo iaad jej aikuj moktata kōkajoor jetōb ko ilo kōj make innem kōkajoorļo̧k ro ipeļaakid. Lōmņak kōn jeje ko rekwojajar aolep iien, im keememej lōmņak im en̄jake ko kwar en̄jaki ilo am riit jeje ko rekwojarjar. Pukōt m̧ool ko jet barāinwōt, ak eo̧ron̄ naan in jān jeje ko rekwojarjar: “Ak n̄an jeļā em̧m̧an eļan̄n̄e rej eo̧ron̄ tōl an Anij.”³ Pād ilo iien jar ko, eļaptata iien kwojkwoj eo, im bōk mōttan kwojkwoj eo im kōkāāl bujen ko, ekoba kallim̧ur eo n̄an keememej Rilo̧mo̧o̧r iien otemjej im bwe Jetōb eo An en maron̄ pād ippāer.

Jekdoon ta bōd ko kwoj kōm̧m̧ani ak ad en̄jake ad jab wānōk, jemaron̄ kōjeraam̧m̧an im kōketak ro jet aolep iien. Jipan̄ er ilo wāween eo an Kraist eo emaron̄ jipan̄ kōj en̄jake iakwe eo an Anij em̧ūlaļ ilo buruōd.

Elukkun aorōk n̄an keememej kajoor in kapilōk in eo ej pād ilo Duteronomi: “Kanooj kōjparok am, n̄e kwō ab meļo̧kļo̧k men ko mejam̧ raar loi, im n̄e rab jako jān būruom̧ raan ko otemjej in am mour; a kwōn kwaļo̧k n̄an ro nejim̧ im n̄an ro jibwōm̧.”⁴

Epepen ko rej ioon apan̄ kōn wōt kālet ko jej kōm̧m̧ani. Kwaļo̧k am naan in kam̧ool n̄an baam̧le eo am; kapilōk er n̄an keememej wāween aer en̄jake n̄e rej kile Jetōb ilo mour ko aer im n̄an rekooti en̄jake ko ilo bok im bwebwenato in mour ko aer make bwe naan ko aer make remaron̄, n̄e emenin aikuj, enaaj bōktok n̄an kōlmenļo̧kjeņ ko aer wāween an em̧m̧an Irooj n̄an er.

Kwonaaj keememej, Nipai im būratōr ro an ro raar jepļaak n̄an Jerusalem n̄an bōk pileij brass ko repād ie bwebwenato in armej ro aer, bwe ren jab meļo̧kļo̧k ta ko raar bōk jikier etto.

Barāinwōt, ilo Bok in Mormon, Hilamōn eaar etōņake etan laddik ro nejin ālkin “ro jimaan” bwe en jab meļo̧kļo̧k em̧m̧an ko an Irooj:

“Lo, ro nejū m̧aan, ikōņaan bwe kom̧in keememej n̄an kōjparok kien ko an Anij. … Lo, iaar lewōj n̄an kom̧ āt ko etan ro jemād im jined m̧oktata ro raar diwōjtok jān āneen Jerusalem; im men in iaar kōm̧m̧an bwe n̄e kom̧ij keememej āt ko etami kom̧ maron̄ keememej er; im n̄e kom̧ij keememej er kom̧ maron̄ keememej jerbal ko aer; im n̄e kom̧ij keememej jerbal ko aer kom̧ maron̄ jeļā ekōjkan ba ennaan in, im barāinwōt kar jeje, bwe raar em̧m̧an.

“Kōn menin, ro nejū m̧aan, ikōņaan bwe kom̧in kōm̧m̧an men eo em̧m̧an, bwe ren maron̄ ba kōn kom̧, im barāinwōt jeje, em̧ool āinwōt kar ba im jeje kōn er.”⁵

Elōn̄ rainin rej kōm̧m̧an ejja manit in wōt n̄an etōņake ajri ro nejier ālkin ro jimmaer ro raar peran im tiljek ilo jetōb āinwōt juon wāween n̄an kapilōk er bwe ren jab meļo̧kļo̧k jolet ko aer.

Ke iaar lotak, kar etōņak eō Ronald A. Rasband. Last name eo aō ej n̄an kautiej etan bwij eo an ro jimaaō. Leta eo ioļap A kar letok n̄an eō bwe in keememej n̄an kautiej bwij eo an jinō jān Denmark.

Eo jimaan jimaan jimaaō jān jait eo an jinō Jens Anderson ekar itok jān Denmark. Ilo 1861 Irooj eaar tōl ruo mijinede n̄an m̧weo imōn Jens im Ane Cathrine Anderson, ijo raar jino kwalo̧k n̄an er im laddik eo nejier 16 an iiō, Andrew, kōn gospel eo emōj an jepļaaktok. Jān iien eo jolet eo an tōmak eaar jino ejaak im eaar kōjeraam̧m̧an baam̧le eo aō. Baam̧le eo an Anderson raar riiti Bok in Mormon im raar peptaij tokālik. Iiō eo tokālik, baam̧le eo an Anderson raar eo̧ron̄ kūr eo an rikanaan bwe ren dibuki Atlantic n̄an kobaļo̧k ippān ro Rikwojarjar ilo Tueon̄ in Amedka.

Kaburomōjmōj eo, Jens eaar mej ilo wa eo ilometo, ak kōrā eo pāleen im laddik eo nejin raar etal wōt n̄an Salt Lake Valley, rekar tōparļo̧k ilo Jeptōmba 3, 1862. Kōjekdoon men ko reppen im an rub buruōer, tōmak eo aer eaar kajoor wōt, im barāinwōt tōmak eo an elōn̄ ro ineer.

Ilo opiij eo aō ewōr juon pija ej etoto⁶ pijain juon kōkaļļe eo elukkun aibojoj kōn jinoin kweilo̧k eo an ro jibū etto im mijinede ro etto. Elukkun pen ippa bwe in meļo̧kļo̧k jolet e aō, im kōn eta Inaaj keememej n̄an indeeo jolet eo aer kōn tiljek im kaarmajet.

Lale kwar meļo̧kļok, kajjitōkin, ak kajekdoon en̄jake ko am make, im en̄jake ko rekwojarjar an jetōb. Jerbal an Rikapo eo ej n̄an kamad kōj jān kam̧ool ko an jetōb, ak Irooj ej ikdeelel n̄an kōmeram im kōjerbal kōj ilo jerbal in An.

Ikōnaan kwaļo̧k juon aō waanjon̄ak kōn m̧ool in. Ij keememej juon tōre ke iaar en̄jake im̧we in uwaak in jar eo aō ekajoor. Uwaak eo eaar alikkar im kajoor. Ijoke, iaar likjab in kōm̧m̧ane ta eo unoojdikdik an jetōb ej im̧we eō kake, im ālkin jet iien, iaar jino lōmņak eļan̄n̄e ta eo iaar en̄jake ekar m̧ool. Jet iaami emaron̄ mōj ami kar po kōn m̧oņ ko an rikapo eo barāinwōt.

Jet raan tokālik, kar kairuj eō kōn kajoor in eoon in ilo kōlmenlo̧kjeņ eo aō:

“Em̧ool, em̧ool, Ij ba n̄an eok, eļan̄n̄e kwōj kōņaan juon kam̧ool eļapļo̧k, keememej ilo ļōmņak bon̄ōn eo kwaar kūr n̄an Eō ilo būruōm̧. …

“Iaar jab kwaļo̧k aenōm̧m̧an n̄an am ļōmņak kōn menin ke? Ta kam̧ool eļapļo̧k kwo maron̄ bōke jān Anij?”⁷

Ekar āinwōt n̄e Irooj ej kōnono, “Kiiō, Ronald, Iaar ba n̄an eok kadede ta eo kwoj aikuj kar kōm̧m̧ane. Kiiō kwon kōm̧m̧ane!” Iaar lukkun mōnōnō kōn an kajim̧we im tōl eō ilo iakwe! Iaar kajju en̄jake aenōm̧m̧an itok jān im̧we an jetōb im kar wōnm̧aanļo̧k wōt, ilo aō jeļā ilo buruō ke jar eo aō emōj uwaake.

Iaar kwaļo̧k en̄jake in n̄an kwaļo̧k jon̄an an mōkaj an kōlmenļo̧kjeņ ko ad maron̄ meļo̧kļo̧k im wāween an jetōb tōl kōj. Iaar ekkatak n̄an kaorōk iien rōt kein, “n̄e ab kwon meļo̧kļo̧k.”

N̄an eo mōtta, im aolep ro rekōnaan bwe ren kōļapļo̧k tōmak ko aer, Ij lewaj n̄an kom̧ kallim̧ur in: n̄e kwoj tiljek ilo am mour kōn gospel eo an Jisōs Kraist im mour wōt kōn katak ko an, naaj kōjparok naan in kam̧ool eo am, im enaaj eddōkļo̧k. Kōjparok bujen ko kwar kōm̧m̧ani, jekdoon makūtkūt ko ipeļaakim. Kwon juon mama im baba ro retiljek, būratōr im sister, būbū im jimma, aunty, im uncle, im ro mōttam ro rej kōkajoor ro rej iakwe er kōn naan in kam̧ool ko aer make im kwaļo̧k en̄jake in jetōb ko aer. Tiljek wōt im dim, men̄e kwoj ioon kabwerer ko ilo mour eo am itok jān kōm̧m̧an ko an ro jet. Pukōt ta eo enaaj kōketak im kōkajoorļo̧k eok ilo jetōb. Kabōjrak am leļo̧k menin leļo̧k ko reriab im likūt āinwōt “m̧ool” me epidodo aer ajeded, im keememej n̄an je en̄jake ko am kōn “yokwe, lan̄lōn̄, aenōm̧m̧an, meanwōd, jouj, em̧m̧an, tiljek, ineem̧m̧an, [im] jatōr.”⁸

Ilo ad iion apan̄ ko reļļap ilo mour in, jab meļo̧kļo̧k jolet eo am ekwojarjar āinwōt juon eo nejin Jemedwōj Ilan̄ ak mejān kajjik eo am indeeo n̄an juon raan kwonaaj jepļaak im mour Ippān, eo enaaj em̧m̧anļo̧k jān jabdewōt men ko laļin en kar litok. Keememej jouj in naan ko an Alma: “Im kiiō lo, ij ba n̄an kom̧, ro jeiū im jatū, eļan̄n̄e kom̧ ar imminene kōn juon oktak in bōro, im eļan̄n̄e kom̧ ar en̄jake n̄an al, al in iakwe em̧ool in pinmuur, ikōņaan kajjitōk, kom̧ maron̄ ke en̄jake kiiō?”⁹

N̄an aolep ro rej aikuj bwe tōmak ko aer ren kajoorļo̧k, Ij akweļape kom̧, jab meļo̧kļo̧k! Jouj jab meļo̧kļo̧k.

Ij kwaļo̧k aō kam̧ool bwe Josep Smith eaar juon rikanaan an Anij. Ijeļā eaar lo im kōnono ippān Anij Jemān im eo Nejin, Jisōs Kraist, āinwōt an kar je ilo naan ko an make. Eļap aō mōnōnō bwe eaar jab meļo̧kļo̧k n̄an je en̄jake in an, bwe jen maron̄ jeļā naan in kam̧ool eo an.

Ij kwaļo̧k aō kam̧ool em̧ool kōn Irooj Jisōs Kraist. Ej mour; Ijeļā ke Emour im ej jutak ilōn̄tata ilo Kabun̄ in. Men kein ijeļā kōn n̄a make, juon eo ej jutak make iaan kōn ainikien make ak an kam̧ool, Ij jar bwe kwe im n̄a jamin meļo̧kļo̧k m̧ool ko rekwojarjar an mour indeeo—eļaptata an aorōk bwe jej ro nejin Jemedwōj im Jinedwōj Ilan̄ ro rej iakwe kōj, ro rej ikdeelel n̄an mōnōnō eo ad indeeo. Kōn m̧ool kein ij kam̧ool ilo etan Jisōs Kraist, amen.