2010–2019
Kanaiong Dehr Manokehla
Oakotohpe 2016


Kanaiong Dehr Manokehla

I kangoange kumwail en tamanda, ahpw mehlel nan ansou apwal akan, ni amwail kin pehm Ngehno oh amwail kadehde kan kehlail, tamataman pahson en pali ngehn me kuwail kauwadahr.

Mwurin souwas mwahu, riei ohl oh lih ako. Ia wen kapai en atail ehupene nan kapokonlap wet. Keiou en pahr me I wiahla emen tohn Pwihn en Wahnparon Ehk-riemeno wia mehkot me I inenen kesemwpwal ongie . E wia pahr en kakehlail, kakairada, oh I kin poadidiong kapakap ni ngidingid ong Sahm Nanleng. I kehn utuht en kapakap akan en peneinei, kempoakepahi kan, oh tohn Mwomwohdiso nan sampah pwon. Kalahngan en amwail kadek lamalam oh kapakap kan.

I pil ahniki ahnsou mwahu en tuhwong kempoakepahi kesemwpwal kan, ekei I ese sang mahs oh ekei I apwtehn tuhwong. Mwurin ai tuhwong emen iengei me I kin ese oh poakpoake sangete mahs me I kehn ien kaunopkihda ahi kapahrek en rahnwet.

Ni aht tuhpene, kempoakepahio kadilehngie me mie mehkot me katoutouialahr . E kehn me e tengalahr loale, ien doadoahngki dahme e indahu, “luwetelahn pwoson” oh anahne ahi kaweid. I kalahnganki ah kak ehukiongie ah iren pepehm kan oh iren kapwunod kan.

E ehukiongie uwen e tihwokilahr en pwurehng kehn Ngehn Sarawi duwehte mwoweo me e medemedewe me e wie sosohralasangehr. Ni eh wie kosokosoi, I wie rongorong mwahu oh wie kapakapki loallei ien kak ese dahme Kauno pahn kupwurki ien inda.

Kempoakepahiko, mwein duwehte ekei kumwail, me kin peidengki peidek wet me mih nan koul en Praimeri, “Maing Sahm Nanleng, mehlel komwi ketiket men?”1 Ong kumwail me pahn peidengki iren peidekohte, I pil men ehukiong kumwail peneu me I ehukiong kempoakepahio oh koapworopworki me amwail pwoson pahn kehlailda oh kumwail pahn pwurehng ngoangki mehlelieng wia tohnpadahk en Sises Krais.

I pahn tepki sang ni ahi pahn katamankin kumwail me kumwail iei seri en Sahm Nanleng me limpoak oh Sapwellime limpoak sohte kin sohrala. I ese me soangen pepehm en limpoak en koaloalomwahu wet kin apwal en katamanda nan ahnsou me ke mih nan ahmw kapwunod kan, kahpwal kan, insensuwed de dahme ke men wia me sohte pweida.

Sises Krais ketin mwahngiher duwen kahpwal oh songosong laud kan. E meirongkier Sapwellime mour ong kitail. Kaimwiseklahn Eh mour kalokolok mehlel, laudsang uwen me kitail kak wehwehki, ahpw Eh tohnmeteikihla Sampwellime mour pwehki emenemen kitail me kasalepen Sapwellime limpoak unsek.

Sohte sapwung ehu, dihp de pilipil pahn wekidala Sapwellimen Kauno limpoak. Met sohte wehwehki me Kauno kupwur pereniki dihp, de pil kihsang atail pwukoah en koluhkihla dipetail. Ahpw dehr manokehla, Samatail Nanleng ketin mwahngih oh ketin poakohng emenemen, oh E ketin awiawih ahnsou koaros en sewese kitail.

Ni ei wie medmedewe en kempoakepahio kahpwalo, e kohdo nan ahi madmadau padahk kaselel me mih nan Pwuhk en Mormon: “ Oh met, nei pwutak kan, tamataman, tamataman me pohn paipalap en atail Soundoar, iei me Sises Krais, Sapwellimen Koht, me kumwail pahn kawada ie amwail poahsoan; pwe ni ahnsou me tepelo pahn kadaredo kisinieng kehlail, iei, eh elipip kan, iei, ni ahnsou me ais takai oh melimel kehlail pahn mweridi pomwail, sohte eh manaman en kaloweikumwaildi nan pwunod mwuledek oh lokolok kokohlahte, pwehki paipalapo me kumwail poasoanda powe, iei poahsoan kehlail ehu, me ma aramas pahn poahsoanda powe sohte kak pwupwudi.”2

I kadehde me sohte mehmen me men mihmi nan“nsensuwed laud oh apwal kokohlahte.” Oh kempoakepahio lemeleme me ih me e wiahier.

Ni ei kin sewese emen aramas duwehte kempoakepahio, I kin diarada arail pilipil kan me re kin wiahda sounpar samwalahr ko me kin karehda arail manokehla pepehm sarawihko, me kin kaluwetihiraila oh ahnkilhla peikasal. I kin koangoangei irail, duwehte ahi koangoangehi kumwail met, en tamanda, ni mehlel nan ahnsou apwal akan, ansou me kumwail kin kehn Ngehn Sarawi oh amwail kadehde kin kehlail; tamtaman poahsoan en palingehn me kumwail kawadahr. I inoukiong kumwail ma kumwail pahn wia met, kalekeikumwailsang mehkan me sohte kin kakairada oh kakehlaka amwail kadehde de me kin wekidala amwail lamalam, kumwail pahn pwurehng tamanda pepehm kansenemwahuko sang ni amwail pahn aktikitikla kapakap oh kaisihsol. I inoukiong kumwail me kumwail pahn pwurehng kehn limpoak en rongamwahu en Sises Krais.

Emen emen kitail pahn pein kakehlailih pali ngenitail oh pil irail kan me mihmi mpatail. Medemedewe pwuhk sarawi rahn koaros, , oh tamtamanda madamadau oh pepehm kan me ke kin alehdi ansou me kumwail kin wadawado. Pil rapahki ire mehlel tei kan, ahpw kanahieng kehkehlihk wet sang nan pwuhk sarawi: “Ahpw en loalokongala pahn mwahu ma irail kin rong sapwellimen Koht kaweid.”3 Towehda mihting en sarawi kan, ahpw mehlel mihting en kamadipw sarawi, oh tungoale kamadipw sarawi oh kakapwa amwailinou kan, iangahki inou en tamataman Sounkomouro ahnsou koaros, pwe Sapwellime Ngehno en kak ketiket rehmwail.

Sohte lipilipil soangen dihp dah me kitail wiahda de uwen souunsek me kitail pepehm, ahnsou koaros kitail kak kapai oh sewesehda mehtei kan. Pohnese irail nan doadoahk en Krais kak seweseikitail en kehn limpoak en Koht loaletail.

E inenen kesempwal en kin tamataman padahk manamano nan Deuderonomi: “Ahpw kumwail pahn kanahieng, pwe kumwail dehr manokehla ire kesempwal akan me kumwail pein kadehdehkiher masamwail kan. Kumwail dehpa mweidohng re en sohrasang nan kapehdamwail erein amwail mour. A kumwail pahn kin koasoiaiong noumwail seri kan oh nein noumwail seri kan.”4

Dih en mwuri kan pahn lipwalipwkihda atail pilipil kan. Ehukiong ahmw peneinei ahmw kadehde; koangoangehkin irail en kin tamtaman arail kehn ahnsou me re kasawiada Ngehno nan ar mour oh ren intingihedi pepehmkan nan neirail pwuhk oh pein arail poadoapoad pwe pein arail kosoi kan en kak, ahnsou anahnepe, en katkatamanki ia uwen mwahu en Kauno ong irail.

Kumwail pahn taman me Nihpahi oh rie pwutak ko ar pwurala Serusalem pwe irail en ale prahs pleitko ko me audaudki poadoapoad en arail pahpa kalahp ko, pwe ren deh manokehla wasa re kohsang ie.

Duwehte, nan Pwuhk en Mormon, Helaman kiheng eden nah pwutangko mwaren “ arail pahpa kahlapoko” pwe irail en dehr manokehla Sapwelimen Kauno kupwur kalahngan:

Kilang, nei pwutak ko, Sang nan loaleietI men kumwa pahn kapwaiada kosonned en Koht… Kilahng, I kahdanikin kumwa mwaren ahi pahpa kalahapoko me kohdosang s Seruselem; oh kahrepen ai wie met pwe ahnsou me kumwa pahn tamataman edemwah kan kumwa pahn tamanirahda; oh ni ahnsou me kumwal pahn tamanirahda kumwa ahpw pahn tamanda ara wiewia kan; oh ni ahnsou me kumwa pahn tamanda ara wiewia kan kumwa pahn esehda dahme aramas akan kin koasoia, oh e pil ntingdier, , me ira aramas mwahu.

Eri, nei pwutak ko, I mwahuki kumwa en wia me mwahu, pwe aramas en kin koasoia kin kumwa, oh pil ntingdi duwen kumwa, soahngohte me aramas kin koasoia oh nting duwen ira.”5

Tohto aramas rahn pwukat me kin ahniki soangen tiahk wet kadaniki neirail serihkan eden aramas wadawadkan nan pwuhk sarawi kan de arail keinek me pwoson kan en wia mehn kakehlaparai oh irail en dehr manokehla arail tiahk.

Ni ahi ipwidi, Irail kihongie edei Ronald A. Rasband. Ahi last name kohsang ni keinek en ahi pahpau. Ahi midel name A kohiengie ien tamatamanki en ahi nohno Danish Anderson keinek..

En ahi pahpa kahlap ah pahpa kahlap, Jens Anderson mehn Denmark. Oh nan pahr 1861 Kauno kadarala misineri riemen nan imwen Jens oh Ane Cathrine Anderson, wasa mesneri ko kapehsehieng irail oh neira pwutak Andrew me sounpar 16, duwenrongamwahu me kapwurpwurdohu. Peneinei en Anderson wadekehr Pwuhk en Mormon oh mwuri irail pepdaisla . Mwurin pahro, peneinei en Anderson idawehn kaweid en soukohp en kotehla sehd en Atlantic pwehn iang towehda Souleng ko nan America.

Me kansensuwed, Jens mehlahte pohn sohpo nan arail seseiloak, ahpw ah pwoud oh neira pwutako doudouluhlahte lelnan Wahu en Salt Lake, ira lella September  3, 1862 . Mendahte arail kahpwal kan oh arail pahtou, arail pwoson oh pwoson en totohn kadaudokerail sohte sohrala.

Kilel
Mahlen nan en Elder Rasband ohpiso

Mie mahlen ehu langalang nan ahi ohpiso6me kolokol mehn ketemen kaselel en keieun mihting nan pwungen ahi pahpa/nohno kahlap ko oh mesneri pwerisengko. I koasonedier me I sohte pahn manokehla tiahk en ahi keinek, oh pwehki edeio I sohte pahn manokehla poadopoad en arail pwoson oh tohnmetei.

Dehr manokehla, peidek, de pohnsehsela, kaweid en ngehn sarawiome pein kumwail kehnehr . Sehden songisong en kihsang kitail dahme ngeno kin kaweid kin kitail, ansou me Kauno kin kupwurki ketkiong kitail kamarain en wia Sapwellime doadoahk.

Ien ehukiong kunwail mahs pein ahi karasaras mehlelpwoat. I inenen tamatamante ahnsou me I alehdi pasepengpen ahi kapakap ni ngidingid me kamwakidada loaleiet. Pasepengo me sansal oh inenen kehlail. Ahpw, I sohte mwadangete kapwaiada iren pasepeng en ei pepehmo, oh mwurin ahnsou kei, I tepda medemedewe ma dahme I kehno mehlel ieu. Ekei kumwail mwein pil lelohngehr soahngen widing en Sehdan wet.

Mwurin rahn kei, I pa pirkihda iren mahsen kaselel kei sang nan iren pwuhk sarawi pwukat nan ahi madmadau:

Mehlel, mehlel, I indaiong kumwail, ma kumwail inengieng alehdi kalaudpenamwail kadehde, tamanda pwohng me kumwail kapakap ongie sang nan amwail mohngiong kan. …

Ahi koasoaia mepwukat sohte kamalailaidi amwail madmadau kan? Mie kadehde me kak kohieng uhk me kehlail sang me kohsang rehn Koht?”7

Duwehte me ma Kauno mamahsanih, “Met, Ronald, I indahionguhkehr dahme ke anahne wia. Na wia met!” Iawen ahi pahn kalahnganki Sapwellime limpoak me kapwungie oh kaweidie!” I mwadangete nsenamwahula sang ni pepehmo oh kakehr wenla mwowe, ni ei wehwehkier nan ahi mohngiong me ahi kapakap pasepenglahr.

I ehukiong kumwail dahme I eselahret, l riei ohl lih akan, pwehn kasalehiong kumwail ia uwen mwadang en atail madamadau eh kin manokehla oh mwomwen ngehno kin kaweid kitail. I esehla kesempwaliki soangen ansou pwukat I sohte pahn manokehla.”

Ohng kempoakepahi kan, oh ong koaros me inengieng en kakehlada arail pwoson, I inoukiong kumwail:ni amwail pahn loalopwoatohng momourki rongamwahu en Sises Krais oh alehda padahngkan, amwail kadehde pahn silasildi, oh e pahn keirda. Kapwaiada inou sarawi kan me kumwail wiadahr, mehndahte wiewia kan en irail akan limwahmwail. Nantiong pwersek nan amwail pwukoah kan en nohno pahpa, pirien, nohno pahpa kahlap, ahndi, ullap, oh soangen kempoakepen aramas me kin kakehlaka peneinei sang ni amwail kadehde oh amwail kin ehukiong amwail ahnsou sarawi kan. Kumwail en loalopwoat oh wenlahte mwowe, mendahte peikasal kan me kohieng kumwail pwehki wiewia kan en aramas teikan. Kumwail en rapahki soang kan me pahn kamarainih kumwail oh me pahn kakehlada palingenamwail. Liksang likamw “me mwomwen mehlel kan” me kin pwarada wasa koaros, oh kumwail en tamataman ntingidi amwail iren pepehm en “limpoak, peren, popohl, kanengamah, kadek, loalopwoat, opampap, oh liksang me suwed.”8

Nanwerengen ahnsou me keieu apwal kan, kumwail dehr manokehla amwail sohso sarawi nin duwen Sapwellimen Koht pwutak de serepein kei de amwail koasoandi soutuk en pwurala rehn Koht, me siksang mehkoaros me kitail kak alehsang sampah wet. Tamataman mahsen en koaloalomwahu oh kaselel kan en Alma: Kilang, I ndahiong kumwail, rieikan, ma kumwail pehmehr wekidekala ieu nan amwail mohngiong kan, oh ma kumwail pemadahr pwe kumwail en koulki limpoak en komour, I men idek, dah, kumwail kakehr pehmada met?”9

Ong koaros me kin pehm anahnepen arail pwoson en kakehlada, I peki rehmwail ni ngidingid: dehr manokehla! Menlau dehr manokehla.

I kadehde me Joseph Smith wia soukohp emen en Koht. I ese me e kilang oh lokaiahng Koht Sahm oh Sapwlellimehu, Sises Krais, nin duwen me e intingiedi nan pein ah koasoi. Ia uwen ahi kalahnganki eh sohte manokehla en intingihedi dahme wiawiohng, pwe kitail koaros en ese ah kadehde.

I kadehdehki duwen Kauno Sises Krais. E ketin ieias; I ese me E ketin ieias oh me moangemoange Mwomwodiso wet. Mepwukat I ese ong pein ngehi, tohrohr sang ngihl de sounkadehde teikan, oh I kapakapki me ngehi oh kumwailsohte pahn manokehla me mehlel poatopoat sarawi kan—keieu, me kitail me sapwellimen Koht Sahm oh Ihn Nanlehng pwutak oh serepein kei, me kin ketin kupwurki te kitail en ahniki peren soutuk. I kadehdehki mehlel pwukat ni mwaren Sises Krais, ahmen.