Ne’i Galo ia te Oe

Talofa, uso e ma tuafafine pele. Ua faamanuiaina tele i tatou i lenei konafesi. Ua matua faamaualaloina a’u i lo’u tausaga muamua o se sui o le Korama a Aposetolo e Toasefululua. O se tausaga sa manaomia ai le tele o taumafaiga patino, sa i ai le tuputupu ae faaletagata lava ia ma tatalo faifai pea i le Tama oi le Lagi. Sa ou lagona ia tatalo o le lagolagosua a aiga, uo, ma tagata o le Ekalesia i le lalolagi atoa. Faafetai mo o outou manatu ma tatalo.

Sa ou maua foi le avanoa e feiloai ai i uo ou te alofa i ai, o nisi sa ou iloa mo le tele o tausaga ma le toatele sa ou feiloai i ai talu ai nei. O le maea ai o se feiloaiga ma se uo pele sa ou masani ma alofa i ai mo le tele o tausaga sa ou lagona ai le fiafia e saunia la’u lauga i le aso.

Ina ua ma feiloa, sa tautino mai e la’u uo sa tauivi o ia [faaleagaga]. Sa ia lagona sa ia oo, e faaaoga ai ana upu, i se “tulaga faigata o le faatuatua” ma saili la’u fautuaga. Sa ou lagona le faafetai sa ia faasoa mai ona lagona ma popolega ia te au.

Sa ia faailoa mai se manao tele mo mea sa ia lagona muamua faaleagaga ma mea ua ia manatu nei o le a ia misia. A o ia talanoa mai, sa ou faalogo ma le toto’a ma tatalo faatauanau ia iloa le mea e finagalo le Alii ou te tau atu.

Atonu o la’u uo, e pei o nisi o outou, sa faia se fesili faigofie ua faaupuina i le pese Peraimeri: “Le Tama e, o e i ai [moni] iina?”¹ Mo i latou atonu o loo faia lenei fesili e tasi, ou te fia faasoa atua ma outou le fautuaga na ou tuuina atu i lau uo ma faamoemoe tou te maua ai le faamalosia o le faatuatua ma faafouina lou naunautaiga e avea o se soo tuuto a Iesu Keriso.

Ou te amata i le faamanatu atu o oe o se atalii po o se afafine o se Tama oi le Lagi alofa ma e tumau pea Lona alofa. Ou te iloa e faigata le manatua o na lagona mautinoa o le alofa pe a e i ai i le lotolotoi o faigata po o tofotofoga faaletagata lava ia, lē fiafia po o manaoga ua le taunuu.

E silafia e Iesu Keriso faigata ma tofotofoga ogaoga. Na Ia tuuina mai lona soifua mo i tatou. O ona itula mulimuli sa tumu i le sauaina, e sili atu i soo se mea e mafai ona tatou malamalama i ai, ae o Lana taulaga o se faailoga silisili o Lona alofa mama mo i tatou uma.

O le a le suia e se mea sese, agasala, po o se filifiliga le alofa o le Atua mo i tatou. E le faapea la ua faatagaina ai amioga leaga, pe aveesea ai lo tatou tiute ia salamo pe a faia ni agasala. Ae aua nei galo e silafia ma alofa le Tama Faalelagi ia te outou taitoatasi, ma e saunia pea o Ia e fesoasoani mai.

A o ou mafaufau i le tulaga o la’u uo, sa ou mafaufau i le tele o le atamai o loo maua i le Tusi a Mamona: “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e tofo ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”²

Ou te molimau atu “o le vanu o le pagatia ma le malaia” o se nofoaga e leai se tasi e fia nofo ai. Ma sa lagona e la’u uo lona latalata ai i le vanu.

A ou fautuaina ni tagata, e pei o la’u uo, ou te sailia o latou faaiuga na faia i le tele o tausaga ma taitai atu ai i latou e faagalo aafiaga paia, ia vaivai, ma ia masalosalo. Sa ou fautuaina i latou, e pei ona ou fautuaina outou i le taimi lenei, ia manatua aemaise lava i taimi o faigata, le taimi na e lagona ai le Agaga ma le malosi o lau molimau; manatua ia faavae faaleagaga na e fausia. Ou te folafola atu a outou faia lenei mea, ma aloese mai mea e le fausia ma faamalosia ai lau molimau po o mea e faitioina ai au talitonuga, o le a e toe manatua i lou mafaufau na taimi pele na tuputupu ae ai lau molimau e ala i le tatalo lotomaualalo ma le anapogi. Ou te faamautinoa atu ia te oe o le a e toe lagona le saogalemu ma le mafanafana o le talalelei a Iesu Keriso.

E tatau ia i tatou ona faamalosia muamua i tatou lava faaleagaga ona faamalosia ai lea o i latou o siomiaina i tatou. Mafaufau loloto e le aunoa i tusitusiga paia, ma manatua manatu ma lagona na e oo i ai a o e faitauina. Saili atu foi i isi punavai o le upumoni, ae ia mulimuli i lenei lapataiga mai tusitusiga paia: “Peitai e lelei le aoaoina peafai latou te faalogologo i fautuaga a le Atua.”³ Auai i sauniga Lotu, aemaise le sauniga faamanatuga, ma aai ma feinu i le faamanatuga ma faafou feagaiga, e aofia ai le folafolaga ia manatua pea le Faaola, ina ia faatasi pea le Agaga ma outou.

Po o a mea sese sa tatou faia po o ni lē atoatoa tatou te lagonaina, e mafai lava ona tatou siitia ma faamanuiaina isi. O le aapa atu ia i latou i auaunaga faaKeriso e mafai ona fesoasoani ia i tatou e lagona le loloto o le alofa o le Atua i o tatou loto.

E taua le manatua o le fautuaga mamana o loo maua i le Teuteronome: “Ia e matua faaeteete lava ia te oe, ne’i galo ia te oe nei mea na iloa ai e ou mata, ne’i te’a ese ai lou loto i aso uma o lou olaga, a ia e faailoa atu i lau fanau, ma le fanau a lau fanau.”⁴

E aafia augatupulaga i filifiliga tatou te faia. Faasoa atu lau molimau i lou aiga; uunaia i latou ia manatua le auala na latou lagona ai ina ua latou iloaina le Agaga i o latou olaga ma ia faamaumau na lagona i api talaaga ma talaaga faaletagata lava ia ina ia mafai e o latou lava upu, ona faamanatu ia i latou le lelei o le Alii ia i latou.

Tou te manatua, sa toe foi atu Nifae ma ona uso i Ierusalema e aumai papatusi apamemea sa i ai talaaga na faamaumauina e o latou tagata, ina ia le galo ia i latou lo latou tuanai.

I le Tusi a Mamona foi, sa faaigoa ai e Helamana ona atalii i o latou “uluai matua” ina ia latou le faagaloina le agalelei o le Alii:

“Faauta, ou atalii e, ou te manao ia oulua manatua e tausi poloaiga a le Atua: … Faauta, ua ou tuu atu ia te oulua igoa o o tatou uluai matua, o e na o mai i fafo mai le laueleele o Ierusalema; ma ua ou faia lenei mea ina a oulua manatua o oulua igoa ia oulua manatua ai i laua; ma a oulua manatua i laua ia oulua manatua a laua galuega; ma a oulua manatua a laua galuega ia oulua iloa ai ua taua, ma ua tusia foi, e faapea na lelei.

“O lea, ou atalii e, ou te manao ina ia oulua faia le mea ua lelei, ina ia taua ma tusia e uiga ia te oulua, e pei ona taua ma tusia e uiga ia te i laua.”⁵

E toatele tagata i le vaitaimi lenei e i ai le tu masani e tasi o le faaigoaina o o latou fanau i toa o tusitusiga paia po o tuaa faamaoni o se auala e uunaia ai i latou ina ia latou le faagaloina lo latou tupuaga.

Ina ua ou fanau mai, sa tuuina mai ia te au le igoa o Ronald A. Rasband. E faamamaluina e lou faaiu le laina o tuaa o lou tama. O le mataitusi ogatotonu A sa tuuina mai ia te au e faamanatu mai ia te au ia faamamalu ia tuaa Tenimaka a lou tina sa i ai le igoa Anderson.

O le tama o le tamamatua o le tama o lou tina o Jens Anderson sa sau mai Tenimaka. Ma i le 1861 na taitai atu ai e le Alii ni faifeautalai Mamona i le aiga o Jens ma Ane Catherine Anderson, lea na faailoa atu ai e faifeautalai ia i laua ma le la tama e 16 tausaga, o Andrew, le talalelei toefuataiina. O lea na amata ai loa le talatuu o le faatuatua lea ua faamanuiaina ai a’u ma lo’u aiga. Sa faitau e le aiga o Anderson le Tusi a Mamona ma papatisoina i se taimi puupuu mulimuli ane. O le tausaga na sosoo ai, sa usitaia e le aiga o Anderson se valaau a se perofeta ia laasia le Atlantic ma auai faatasi ma le Au Paia i Amerika Matu.

O le mea na faanoanoa ai, na maliu Jens i luga o le vasa, ae na faaauau pea lona toalua ma le atalii i le Vanu o Sate Leki, ma taunuu ai i le aso 3 Setema, 1862. E ui i o latou faigata ma mafatiaga, sa lei maluelue lo latou faatuatua, ma e faapena foi le faatuatua o le toatele o a latou fanau.

I lo’u ofisa o loo tautau ai se atavali⁶ lea e i ai se faamanatu faafaatusa matagofie o lena uluai feiloaiga i le va o o’u tuaa ma na faifeautalai tuuto anamua. Sa ou naunau lava ia aua nei galo o’u tuaa, ma ona o lo’u igoa o le a faavavau ai pea ona ou manatuaina lo latou talatuu o le faamaoni ma le ositaulaga.

Aua lava nei galo, pe fesiligia, pe le amanaiaina ni aafiaga patino, paia faaleagaga. O le mamanu a le fili o le aveesea mai lea o i tatou mai molimau faaleagaga, ao le finagalo o le Alii o le faamalamalama ma faagauai atu i tatou i Lana galuega.

Sei ou faasoa atua se faataitaiga patino o lenei upumoni. Ou te manatua lelei se taimi na ou maua ai se uunaiga i se tali o se tatalo faatauanau. Na manino ma malosi le tali. Peitai, na ou toilalo e faatino i le taimi lava lea le uunaiga, ma i le mavae ai o se taimi sa amata ona ou mafaufau pe na moni le lagona sa ou maua. Atonu na i ai foi nisi o outou na pa’ū atu i lena faatosinaga a le fili.

I nai aso mulimuli ane, sa ou ala ae ai ma lenei mau malosi i lo’u mafaufau:

“E moni, e moni, Ou te fai atu ia te oe, afai e te manao i se isi molimau, liliu ane lou mafaufau i le po na e tagi mai ai ia te a’u i lou loto. …

“Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?”⁷

Sa pei o fetalai mai le Alii, “Ia, Ronald, ua uma ona ou tau atu le mea e tatau ona e faia. Fai loa!” E ese lo’u faafetai mo lena aoaiga ma le taitaiga alofa! Na vave ona faamafanafanaina a’u e ala i le uunaiga ma mafai loa ona agai i luma, i le iloaina i lo’u loto ua tali mai la’u tatalo.

Ou te faasoa atua lenei aafiaga, uso e ma tuafafine, e faailoa atu ai le vave ona galo i o tatou mafaufau ma le ala e taitaia ai i tatou e aafiaga faaleagaga. Ua ou aoao e faataua ia taimi “nei galo ia te a’u.”

I la’u uo, ma i latou o e mananao e faamalosia o latou faatuatua, ou te tuuina atu lenei folafolaga: a tou ola ai ma le faatuatua i le talalelei a Iesu Keriso ma usitai i ana aoaoga; o le a puipuia ma tuputupu ae a outou molimau. Ia tausi feagaiga na tou osia, tusa lava po o a amioga a i latou o loo siomiaina outou. Ia avea ma matua, uso ma tuafafine, matua matutua, aunts, uncles, ma uo filiga o e faamalosia e pele ia te outou ma se molimau patino ma faasoa atu aafiaga faaleagaga. Ia tumau faamaoni ma tutumau, e tusa lava pe a oo mai afa o masalosaloga e osofaia tou olaga e ala i amioga a isi. Saili le mea lena e faagaeetia ma faamalosia oe faaleagaga. Aloese mai taulaga taufaasese ua ta’ua o “upumoni” lea ua matua faigofie ona salalau atu, ma manatua e tusi i lalo ou lagona o le “alofa, olioli, o le filemu, o le onosai, o le mataalofa, o le agalelei, o le faamaoni, o le agamalu, [ma le] le gaoia.”⁸

I le lotolotoi o afa malolosi o le olaga, aua nei galo lou tupuaga paia o se atalii po o se afafine o le Atua po o lou taunuuga e faavavau ia toe foi atu i se aso e nonofo faatasi ma Ia, lea e sili atu nai lo se isi lava mea e ofo mai e le lalolagi. Manatua upu alofa ma le matagofie a Alema: “Faauta, ou te fai atu ia te outou, ou uso e, afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?”⁹

Ia i latou uma o e lagona le tatau ona faamalosia o lo latou faatuatua, ou te aioi atu ia te outou, aua nei galo! Faamolemole aua nei galo.

Ou te molimau atu o Iosefa Samita o se perofeta o le Atua. Ou te iloa na ia vaai ma talanoa ma le Atua le Tama ma Lona Alo, o Iesu Keriso, e pei lava ona ia tusia i ana lava upu. E ese lou faafetai i le lei galo ia te ia ona tusia o lena aafiaga, ina ia tatou iloa uma ai lana molimau.

Ou te molimau faamaoni atu i le Alii o Iesu Keriso. O loo soifua o Ia; ou te iloa o loo soifua o Ia ma o loo tu i le ulu o lenei Ekalesia. Ua ou iloa nei mea mo au lava, saoloto mai soo se isi lava leo po o molimau, ma ou te tatalo o le a le galo lava ia te oe upumoni paia e faavavau—muamua ma le sili o i tatou o atalii ma afafine o ni Matua Faalelagi soifua ma alolofa, e na o le pau o la finagalo o lo tatou fiafia e faavavau lea. Ou te molimau atu ai i nei upumoni i le suafa o Iesu Keriso, amene.