Momes el mo er a Babier, Momes el mo er a Rubak
Sebechem el mesa Babier er a Mormon el mo dodai er kau, el mo uchul a klemerang er kau?
Mary Elizabeth Rollins
Chelsel a uldesuek, ea kumdasou er kemiu a rengalek er chelechal taem e lomes e orrenges er tia el ongdibel er sel om ngar ngii er a beluulechad. Ng soak el mo ouchais a klemerang el cheldecheduch e lobengkemiu, el cheldecheduch el sebechel di diul okesiu me a olisechakl. Ng sebechel lochotii er kau el kmo ng uangerang a bom keed er a Rubak e dirrek el mor ngii a klisichem el odngakl a ongetikaik.
Tiang a cheldechedechal a tal kekerei el ekebil, el kiei er a New York, er a uchei er a bol edei a rekil ea demal a mlad el rirechorch a bilsengel er a chelsel a klou el omuachel. Ngii me a delal, ochedal, me a merrengel a millukl el mo er a beches el basio el nga er a ta er a beluu el mo kiei lobengkel a anti me a angko er ngii. A uriul er a lekerd a telungalk er ngii, e a re remisionari me a re chedal a ikelesia er a kmal dirk mlo beches el mlokdubch el klechelid a mle er a belurir lolab a kmal klebokel el chais el kirel a Oltel a ebangkelio. Te ulechais er a klebokel el cheldecheduch el kirel a anghel e lulbang a chuodel el rekord el mo er a kekerei el chad el ngklel a Joseph Smith, e ng llechukl el ngii a ulidii e lobang a klisichel a Dios. Terung el mlo oldingel, Oliver Cowdery me a John Whitmer, a miles aikal llechukl el mle elduib er a deel el llel aikal llechukl er a irechar, ea Whitmer a mle sioning el ullereked aikal elduib el kolt er a chimal. Aikal llechukl a kmal dirk mlo merek el meketmokl, ea Brother Whitmer a ngiluu tial babier e lobengkel. A ngklel tial babier a mle Babier er a Mormon.
Sera el rengesterir a re misionari a teruich me a erung a rekil el Mary el mesaod er tial babier, e ng mle tokubets e lungil a rengul. E ng kmal mle betok a llel tial Babier er a Mormon, e ng di Mary kmal mle soal menguiu er ngii. Sera lorael a Brother Whitmer, e ng ngiluu a lecheklel tial okedeldaol el babier el mesang a Brother Isaac Morley, el mle sechelil a angko er a Mary e dirrek el mle merredel er tial beches el ikelesia.
A uriul ea Mary uluchais: “Ak mlo er a blil a [Brother Morley] … e uleker e lomes er ngii el Babier; e [ngii] a ngiluu el lolia er a a chimak, [ea] kumes er ngii, e ng kmal mlo klou a klemeriar el reng er ngak el menguiu er ngii, mak mocha oker er ngii el kmo e ng sebechek el nguu el mo remei and menguiu er ngii. … e Ngii a kmu …e ng di diak a temek el menguiu er ngii, e dirrek el ngar ngii a bebil er a rodam er ngak el direkak lesang, e ng di ak kmal mle murii el melai er ngii, meng mocha kmo, ‘rungalek, alsekum e ng sebechem el nguu tial babier el mei er a uchei er a blengur er a tutau, e ng sebechem el nguu.’”
A Mary a rirurt el mo remei e kmal mlo mechelaod er tial babier meng di milekar el tal kesus el menguiu er ngii. A bochal tutau e bo loradel er tial babier, ea Brother Morley a mocha kmul uase, “Ng locha kmal dimlak el betok a omchiluiu” me a “diak kuumerang el kmo e ng sebechem el smodii a telkib er ngii.” A Mary a mocha lomeltii a chelchedal e mocha meleklii er a chelsel a uldesuel sel kot el bades er tial Babier er a Mormon. Ng mocha ouchais er a cheldechedechal a profet Nephi. Ea uriul a Mary a milluches, “Ng ulemes er ngak e kmal mle mechas a rengul, e dulal kmo, ‘rungalek, mnguu tial babier el mo remei em lemelemii, e ng sebechek el choilau.’”
A kedeb el taem e ruriul, ea Mary a mocha merek el menguiu er tial babier e ngii a mle kot el chad er tial beluu el mocha choiuii tial rokir el babier. Ng mle medengei el kmong mle klemerang e mla er a Demad er a Babeluades. Sera lomes er tial babier, e ng ulemes er a Rubak.
A uriul er a tal buil e ng mlar ngii a tokubets el chad el mle oldingel er ngii er a blil. Ea ikakid a lullechais a Mary el kirel tial diak lobes er ngii el sils: “Sera [Joseph Smith] er a lesekak. … A uriul e ng milskak … a kmal ungil klengeltengat … e milskak a omiange el tial babier, e kmo e ng mo mesang a ta er a babier el mo er a Brother Morley. … Aki rokui el mocha melchesuar el kmo e ng ka chedal a Dios, e leng milngedecheduch e lolab a klisiich, er a chad el loba deruchall.
Ng kal kekerei el ekebil, el Mary Elizabeth Rollins, a miles a betok el bedengel a ongasireng er a klengar er ngii e mle blechoel el ngar ngii a olchotel a klemerang er ngii el kirel a Babier er a Mormon.1 Tia el cheldecheduch a kmal tokubets a belkul el mer ngak e le ngkang a anti er ngak. Ngoiak a olchotel a Mary, lobengkel a bebil er a teletael el mla dubech er a klengar er ngak, eak mla suubii el kmo ngdiak el belkul el kmo ke de ngeasek meng diak el sebeched e losiik malechub ede ngmai a olchotel a klemerang er kid er a Babier er a Mormon.
Ng Dodai er a Klaumerang er Kau
Ngar ngii a osisechakl el denguu er tial cheldechedechal a Mary. Dersta er kemiu el ngeasek el sechal, ngeasek el redil, me a rengalek a sebechemiu el mo melchesaur er a rengmiu a ikal osisiu el uai ngii. Sel monguiu er a Babier er a Mormon e moluluuch e loba klemeriar el reng el soam el mo medengei el kmong klemerang, e kau meng dirrek el sebechem el nguu sel osisiu el reng el Mary a ngiluu. Ke dirrek el mo metik el kmo sel om sioning er a Babier er a Mormon, e ke dirrek el mo melchesuar er sel osisiu el reng er a omengedaol. A Chedaol Reng a mo rutechii a rengum. Ng dirrek el sebechem el mo melchesuar er tial osisiu el reng er a omengedaol sel omrenges a olchotel a klemerang e louchais a rebebil el kirel a Babier er a Mormon. Dersta er a ikal chedaol el sioning a sebechel mekrolau el mo er a Babier er a Mormon meng mo kot el klou a belkul el olchotel a klemerang er kau.
Msall ek sodii. A Profet Joseph Smith, e lulidii a Babier er a Mormon loiak a “sengk me a klisichel a Dios,” a milsaod er a Babier er a Mormon el “kot el bleketakl el babier er a rokui el babier el ngara beluulechad, e dirrek el dodai er a klechelid er kid.”2
Sera le kot el meluches a Babier er a Mormon er a 1830, e ng betok er a Dart ma okeuid ma kleuang el milliol el llechukl a blal luches el ngara Dart ma Tacher el kakerous el omelekoi, lolecholt el kmo Babier er a Mormon a dirrek el kot el klou a belkul er a klechelid er kid. Engdi tiang ngera belkul el lekor er a dersta er kemiu?
Sel de nguu er a remeruul a lecheklel a blai,e a dodai a kot el klou a ututelel el siseball. Ng sel bad el ngara belngel me a etebtel a buadel. Ng kot el klou a ututelel er a rokui el bad le ngii a orreked er a bkul a buadel meng chelellakl, e diak el mongkangk. E dirrek el klekedellel tial siseball meng sebechel lobok, e sebeched el chengelakl er ngii.
A de nguu er a tekoi er a ebangkelio, e ng sengk me a klengeltengat el mla er a Rubak el tial kot el klou a belkul er a klechelid el klalou el Babier er a Mormon a sebeched e lorreked er ngii e menguiu er ngii. Ng sebechem el mesang a Babier er a Mormon el mo kot el klou a belkul, e mo uchul a chedaol el klisichem?
A President Ezra Taft Benson a ulmeketakl a ikel osisecheklel a Joseph Smith, Ng dilul kmo: “Ngar ngii edei el rolel ea Babier er a Mormon a mo kot el klou a belkul er a klechelid er kid. Ng sel dodai er a sioning er a Kristo. Ng sel dodai er a osisechakl. Ng sel dodai er a olchotel a klemerang er kid.”
A President Benson a millemolem lolisechakl: “A Babier er a Mormon olisechakl er kid a klemerang [e dirrek] el olchotel a klemerang er a Kristo. … E ng di ngar ngii a lemuut el bebil. Ngar ngii a klisiich er tial babier el mo ngodechii a klengar er kau sel momuchel el mo blak a rengum el mesuub er ngii. Ke mo metik a klou el klisichem el omtok a ongitikaik.”3
Sioning er Ngak
A kuk de nguu er ngak ea Babier er a Mormon a mlo kot el klou a belkul el olchotel a klemerang er ngak er a chelsel a betok el rak e dirrek el loiak a betok el teletael el mla dubech er a chelsel a klengar er ngak. A ta er a kmal mesisiich el teletael el mla dubech er a klengar er ngak a olchotel a klemerang el dilubch er serak ngeasek el missionari el mla er a omesiou er a kot el basio er ngak: el Kumamoto, Japan. Ngak me a chad el kim dak el loureor a mirael ngara tara obliil el mora tang e lolsisechakl. Ak mlo kebetech er a tal chedil mechas e luleker er kemam el mo tmuu er a blil, el domekedong er ngii el genkan er a tekoi er a Siabal. Ng milskemam a mekelkolt el ilumel leng kmal mle mekeald. Ng dirkak bok meketekt el ngara Siabal, e kmal dirk mlo merek el menguiu er a Babier er a Mormon e miluluuch el mo medengei el kmong klemerang.
Ak kmal dirk beches el ngara Siabal, e dirkak bo kungil melekoi a tekoi er a Siabal. Ea klemerang, a kumdasou e ngkal mechas a dimlak lodengei a tekoi el kulekoi. Ak mocha omuchel e lolsisechakl er ngii el kirel tial Babier er a Mormon, louchais el kirel a Joseph Smith el ngilai a llechukl er a irechar er a anghel el mle elduib er a deel e ngii a uleiud lobang a klisichel a Dios.
A kuluuchais er ngii a olchotel a klemerang er ngak er a Babier er a Mormon el kmo e ng tekingel a Dios e dirrek el ta er a sioning er a Jesus Kristo, e ng kmal mlo mesisiich a uldesuek, lobengkel a kmal lungil reng, el chedaol llechukl a smodii el kmo “e ng sel klou el deurreng el bo molchesuar er ngii.”4 Tial kulchesuar er ngii a ulchotii el mer ngak a klisichel a klemerang er tial Babier er a Mormon el kmo e ng tekingel a Dios. Se ikid tel taem, ea renguk a kmal mlo mesisiich meng mocha merberebt a iuosech er a medak er a kungedecheduch er ngikal chedil mechas er a Siabal. Ng kmal dirkak kubes er sel tokubets el reng el blo kulchesuar er ngii er sel sils.
Sioning er Kau
Dersta er kemiu a dirrek el sebechir el ngmai a sioning er tir er tial babier! Kau ke medengei el kmo tial Babier er a Mormon a milluches el kirem—e dirrek el mor tial sils er kau? Tial babier a ta er a klengeltengat er tial klechad el de ngar ngii er chelchal taem. Ng uaisei el Babier er a Mormon a milluches er a rechad er a omeluches er a irechar—el betok er tir a mle profet—e tir me a rechad er sel taem a dimlak el ngeltengat el nguu tial cherrungel el babier. Elechang e ng kmal beot er kau el ngmai a ikal chedaol llechukl el profets, prist, me a itetel a king, lullab, e mengeluolou! Ke ngeltengat el loreked er a chimam a cherungel el Babier er a Mormon. Ea ta er a profet er a Babier er a Mormon, el Moroni, a milsa chelchal taem er kid—tial sils er kau. Ng dirrek el milsekau, el ngara ues er medad el taem, er a betok el dart el rak er a memong! A Moroni a milluches:
“Momes, a Rubak a mla ocholt er ngak a meklou e ongasireng el tekoi el kirel … tial sils e likal tekoi,” el mesaod er a Babier er a Mormon, “a mo mocholt er a delongeliu.
“Momes, ak mengedecheduch er kau el di uai om ngar medak, e ng di chalechub e ng diak. Engdi momes, a Jesus Kristo a ulecholt er kau el mer ngak, eak medengei a omoruul.”5
A bo dolngeseu er tial Babier er a Mormon el mo kot el klou a belkul el olchotel a klemerang er kid, eak meskemiu a siotai. Ak dirk mlo medengei el kmo chelsel a betok el beluu er a beluulechad, ea re ngeasek a mengoit a kmeed el euid el sikang e lomes a TV, computer, me a dengua.6 Ea bo domdasou er ngii, e ng sebechem el telkib el mo ngodech? Ng sebechem el metechei a ikel temem el lomes a ikakid el tekoi er a beluulechad, Internet, klekoul, malechub el televisiong—el bai menguiu er a Babier er a Mormon? Alsekum ea ikel kulsuub a ngar ngii a ungil luchul, e ng sebechem el di beot el metik a temem er a bekl sils el mesuub er a Babier er a Mormon alsekum e ng di teruich el bung er a tal sils. E sebechem el mesuub er ngii er sel rolel e ng sebechem el mo seuam el meruul er ngii e mo medengelii—altang ngara dengua er kau malechub e ng babier. A President Russell M.Nelson a dirk ulmeklatk, “Ng diak el kired el rulii a omengiued er a Babier er a Mormon el ko er a uall ngerachel, el di uaia omolim a kmal mekngit a azi er ngii el kar el moreched e lomerkakl er ngii me bol merek.”7
E mor kemiu a re mekekerei el ngalek, e ng sebechem el menguiu e lobengkel a demam ma delam, demam el rubak ma delam el mechas, malechub e ng chad el betik a rengum er ngii. Alsekum e ke menguiu e ng mo meringel er kau el medengei , e molemolem el mo er a ongingil. A kumes er kau e loltirakl a ikel okesiul a Mary. A kumes er kau el semeriar e losiik a temem me a diak a cherrodech er ngii el basio el menguiu er a Babier er a Mormon. A kumes er kau el metik a nger, melchesiu a ulekrael, e nguu a olchotel a klemerang er kau er a Babier er a Mormon me a olchotel a klemerang er a Jesus Kristo. Sel momes er tial babier, e komes er a Rubak.
Ke mo menguiu er a ikal llechukl er tial okedeldaol el babier e mo medengelii a betik er a rengum el Osobel, Rubak el Jesus Kristo, er a rokui el llel. Ng daitai el sebechem el mo metik er a Ngklel e lulsbechall er a bek 1.7 el bades.8 Ng dirrek el Kristo meng di Ngii el sioning er a klemerang er chelchal uriul-klebesei, louchais el kmo, “Alsekum ea Rubak el Dios er kau a kiei e ng klemerang.”9
Ng kmal lungil a renguk er a siotai me a yaksok el kmo Rubak a mla meskid loiak a profet Moroni el me er a dersta er kid—e dirrek el mo er a rokui el chad el menguiu er a Babier er a Mormon. Ak mo mengesimer el menguiu er tial siotai me a yaksok e mo odekiar a olchotel a klemerang er ngak: “E sel omngai a ikal tekoi [Babier er a Mormon], eak murii er kau el mo oker er a Dios, el Diak a Ulebengelel el Chedam, el ngara ngklel a Kristo, alsekum ea ikal tekoi a diak el klemerang; e alsekum e koker e lobang a ngariou el reng, el meral blak a rengum, el ngar ngii a klaumerang er kau er a Kristo, e ng mo ochotii a klemerang lekor kau, lobang a klisichel a Chedaol Reng.”10
A kulecholt er a klemerang er ngak el kirel a Oltel a ebangkelio er a ikal uriul klebesei e dirrek el kirel a Babier er a Mormon el kmo meral olengchelel a Oluut. Ng di uaia tekoi er tial babier el lumekellomes er a teruich ma erung a rekil el kekerei el ekebil el mo orkedii tial oltel a Ikelesia er a Jesus Kristo el kmeed el erul dart el rak er a mla memong, a klemerang el bo betik er ngii a mo mesebechakl e omeklomes er kau er a di osisiu el blekeradel. Ng mo melisiich er a klaumerang er kau, mekekii a rengum e lobang a llomes, e kudmeklau el kirel a ngarmedad el taem el kau a diak el sebechem el mo medengelii.
Chelsel a ikal llel tial babier, e ke mo medengelii a diak a ulebengelel beltik el reng me a chetiteokl el krasia er a Dios. Sel molasm el mo oltirakl a ulsisechakl el bom betik er ngii er a chelsel, ea deurreng er kau a mo klou, a klaumedengei er kau a mobtois, ea nger el mosiik el mo er a betok el longarm er a klechad er chelchal taem a obok el kirem. A ikang ak sioning, loba renguk el rokir me a bedengek, el ngar a ngklel a Jesus Kristo, amen.