Kilenglahng Pwuhko, Kilenglahng Kauno
Kumwail kak kilang me Pwuken Mormon iei amwail takai lap, iei pahson en roson en pali ngenomwail?
Mary Elizabeth Rollins
Nan ahi madamadau, I kak kilang kumwail dihn mwuhr akan amwail kilikilang de rongorong kapokon lap wet wasa tei kan nan sampa. I men ehukieng kumwail soai mehlel pwoat, soai ehu me pahn kak en wia mehn karasaras oh mehn kaweid. E pahn kak kasalehwei mwomwen amwail pahn kak en karanih Koht oh kiheng uhk manaman laud en powehdi kasongosong.
Soai pwoat et iei soai en serepein pwulopwul men me kin mihmi New York, me mwohn ah sounpar silu ah pahpa mehsang ni ah kihrla nan were pwoht nan leh laud ehu. Ih, ah nohno, rie pwutak laud, oh rie serepein tikitik kosoula nan kanihmw ehu nan wein America pwe irail en mihmi rehn rien ah nohno lih oh ah pwoud. Ansou kis mwurin peneineio arail lella mwo, misineri kan oh tohweh kan en mwomwohdiso kapw ehu me apwtehn kokouda pwarekihdo nan arail wasahn kouson rohng kaperen ehu en Kopwurpwurdohn rongomwauo. Irail kosoiahieng irail duen soai en tohnleng men me wahla rekoht en mahs akan rehn kisin pwutak pwulopwul men me adaniki Joseph Smith, rekoht me e kawewehdier sang ni manaman en Koht. Ohl riemen nan pwungen me pwaredohko, iei Oliver Cowdery oh John Whitmer, me iangehr kilangki mesera dahme intingdi pohn rekoht pwukat oh Whitmer kadehe me e kolki pehkan rekoht pwukat. Rekoht wet apwtehn wiawihda oh Brother Whitmer me wa pwuhko. Eden pwuhko iei Pwuken Mormon.
Ni ansou me Mary sounpar 12 e ahpw rongada misineri kan arail koskoasoia duen pwuhko, e ahnikihdi pepehm mwahu ehu nan ah mongiong. Itarete Pwuken Mormon ah diren page, Mary inangih en wadekala. Ni ansou me Brother Whitmer mweselda, e kieng ehu pwuhko rehn Brother Isaac Morley, me wia kempoakepahn rien en Mary nohno ah pwoud oh emen kaun en mwomwodiso kapwo nan wasahu.
Mary ahpw intingihdi me: “I kohla ni imwen [Brother Morley o] … oh peki ien kilang pwuhko; [e] kieng nan pehi iet, [oh] ni ansou me I kilang, I kak kehn ineng en wadek pwuhko, met me karehda ai sohte kak uhdihsang peki reh ien wahda kohla nihmwo oh wadek. … E inda … me e ahniki kahpwal en ansou mwau en wadekala ehu ire laud, oh ekeite souleng me kilangehr, ahpw I nantihengete wen ai kak koaros ien wahda pwuhko, eri e ahpw koasoia, ‘seri, ma ke pahn kapwurehdo pwuhk wet mwohn mwengehn ni menseng en lakapw, ke pahn kak wahda.’”
Mary ahpw tangala nihmweu oh uwen eh perenkihda pwuhko eh pepehdki kerenieng pwohngo pwon wie wadawad. Ni menseng en mandahu e ahpw kapwurehla pwuhko, Brother Morley ahpw indahng, “Ahi pepehm ke sohte wadekala wehiou loale” oh “I sohte kamehlele me ke kak indahng ie ehu lepin koasoi en sang dahme ke wadekehr.” Mary ahpw kesihnenda oh kapwurehieng keieu en ire tikitik en nan Pwuken Mormon. E ahpw uhd kosoiahieng soai en soukohp Nephi. Mwurin mwo, Mary ahpw intingihdi, “E ahpw kilengdohng ie ni mesen pwuriamwei oh inda, ‘seri, wahda pwuhk wet kohla ni ihmwomwo oh kanekehla, I kak awih.’”
Ansou kis mwuri, Mary kanekehla wadek pwuhko oh ih me wia keiou en aramas en nan kanihmwo me wadekala pwuhko pwon. E ese me pwuhko pwung oh e kohsang rehn Sahm Nanleng. Ni ansou me e kin kilang pwuhko, e kin kilang Kauno.
Mwurin sounpwung ehu, aramas kesemwpwal men pwaredo nihmweu. Iet me Mary intingihdier duen rahno: “Ni ansou me [Joseph Smith] kilangiehda e kilengdohngie mesen mehlel. … Mwurin seken ehu de riau e … kieng ie kapai laud ehu … oh kieng ie kisakis en nainkihla pwuhko, oh inda me e pahn kieng Brother Morley ehu [koapi]. … Kiht koaros kehn me ih ohlen Koht, pwehki e koasoaiki manaman, oh emen me ahniki mweimwei.”
Serepein pwulopwul menet, Mary Elizabeth Rollins, kilangada manaman tohto nan ah mour oh kin kalapw kolokol ah kadehdehn Pwuken Mormon.1 Soai pwoat et kiheng ie ire kesemwpwal ehu pwehki serepein menet wia ahi kapahmen en nohno kahlap sang dihn ahi pahpau pahpa kahlapoko. Sang ni en Mary karasaras, patehng ekei wiewia kesemwpwal kan nan ai mour, I diarada me emen sohte anahne en udahn pwulopwul pwehn rapahki oh alehdi pein ah kadehde duwen Pwuken Mormon.
Takai Lap en Amwail Kadehde
Emenemen kumwail pahn mie amwail pepehm sang nan soai en Mary. Ong emenemen kumwail pwutak pwulopwul kan, serepein pwulopwul kan, oh serih kan kak ahniki soangen pepehm me e ahnikio. Ni ansou me kumwail wadek Pwuken Mormon oh kapakapki ni ineng mehlel ma e mehlel, kumwail pahn pil alehdi soangen pepehmohte me Mary alehdi nan ah mongiong. Kumwail pahn pil diar ni amwail pahn kesihnenda oh kadehde Pwuken Mormon, kumwail pahn pehmada me e mehlel oh pwung. Ngehn Sarawi pahn koasoaieng amwail mongiong kan. Kumwail pahn pil pehmada soangen pepehmohte me e udahn mehlel ni ansou me kumwail pahn rong en mehteikan arail kadehde Pwuken Mormon. Ehu ehu kadehde sarawi pwukat kak kahluwa Pwuken Mormon en wiahla poahsoan pen amwail kadehde.
Mweidehng ie ien kawewehda. Soukohp Joseph Smith, me kawewehdi Pwuken Mormon sang ni kisakis oh manaman en Koht, kawewehdahr me Pwuken Mormon iei pwuhk me keieu pwung pohn sampah, oh me wia poahsoan en atail lamalam.”2
Sang ni tepin Pwuken Mormon ah wiawihda nan pahr 1830, sipele pwuhk 174 wiawihda oh kawewehdier ni lokaia 110 , kasaledahr me Pwuken Mormon wihwiahte poahsoan en atail lamalam. Ahpw e pahn ia wewehn met ong kumwail?
Ong ni kawewehn soun pilahn en kawada ihmw akan, e wia takai ehu me kin wia poahson en mehn katenge wenihmw kehlail kan. Iei me wia mehn lok ehu me kin mihmi nan werenge oh keieu mih powehn wenihmw kehlail kan. Iei me keieu kesemwpwal nan pwungen takai kan pwehki e kin koledi pali koaros en wenihmw wet oh perehsang en mwerpeseng. Oh iei me wia poahson teng en wenihmw wet en kak ritida sang pah pwehn wia wasahn pidolong oh pidoih.
Ong ni kawewehn rongamwau wet, iei kisakis ehu oh kapai sang Koht me iei mehn katengepen atail lamalam iei mehkot ehu me kitail kak doahke oh kolokol iei Pwuken Mormon oh me kumwail kak kol oh wadek. Kumwail pahn kak alehda Pwuken Mormon en wia amwail mehn utuht, amwail mehn sawas en kakehlaili palingenomwail?
Pireseden Ezra Taft Benson kawewehda duwen en Joseph Smith padahk kan. E koasoaia me: “Mie soahng siluh me Pwuken Mormon kasalehda me iei e wia poahsoan en atail lamalam. Iei e wia poahsoan pen atail kadehde Krais. Iei e wia poahsoan pen atail padahk kan. Iei e wia poahsoan pen atail kadehde.”
Presiden Benson pil doula oh kaskuhlkin kitail: “Pwuken Mormon padahkiong kitail me mehlelo [oh] kadehdehki duwen Krais. … Ahpw miehte soahng kei. Mie manaman ehu nan pwuhko me pahn kak sewesei kumwail nan amwail mour ni ansou me kumwail pahn tepida mehlelieng amwail kaskuhlki pwuhk wet. Kumwail pahn diar manaman laud en powehdi kasongosong kan. … Kumwail pahn diar manaman en mihmihdi nan ahl me inen oh tehtikitiko.”3
Peihn Ahi Kadehde
Ong peihn ngei, Pwuken Mormon wiahier poahsoan en ai kadehde pahr kei samwalahro oh sang ni kemwekid kan me I kin lelehng. Ehu kemwekid me kakehlailiala ai kadehde wiawi ansou me I wia misineri pwulopwul men tepin wasa I wia ai doadoahk: Kumamoto, Sapahn. Ngei oh iengeio kin kohla padahk ni ehu ihmw kolahng ni ehu. I tuwongedi lih laud men me kadekehng kiht oh kasamwoh kihtolong ni wasahn pidelong en nimwehu, iei me irail mehn Sapahn kan kin kahdaniki genkan. E kiskisehkin kit pihl lomwlomwur nan rahn karakar o. I saik wereila Sapahn oh I ahpwtehn kanekehla wadek Pwuken Mormon oh kin wie kapakapki ien ese mehnia me mehlel.
Pwehki ahi kapw nan Sapahn, I sohte nohn ese lokaiahn Sapahn. Ni mehlel, I sohte leme me lih menet wewehki dahme I koaskoasoaia. I tepida padahkieng duwen Pwuken Mormon, kawewehieng ia mwomwen Joseph Smith ah alehdi rekoht en mahs pwukat sang rehn tohnleng men oh kawewehdi sang ni manaman en Koht.
Ni ansou me I wiahng ahi kadehde me Pwuken Mormon iei mahsen en Koht oh iei ehu kadehdehn Sises Krais, I alehdi pepehm laud me iangahki pepehm ehu me kasenamwau oh meleilei, me iren pwuhk sarawih kan kin kaweweh me loalomw unsek direkihla ngehn sarawi.” 4 Pepehm wet kamanahiengiehier me Pwuken Mormon iei mahsen en Koht. Ni ansouo, ai pepehm kan koaros udahn kehlail karedahr pilen mesei dirala nan mesei kan ni ansou me I koaskoasoi ieng nohno kahlap en Sapahn menet. I sohte kak manokehla pepehm mwahu me I ahnikihdi rahno.
Pein Amwail Kadehde
Emenemen kumwail pil kak alehdi pein amwail kadehde duwen pwuhk wet! Ke ese me Pwuken Mormon e intingda ong kumwail—oh ong nan amwail ansou? Pwuhk wet iei ehu kapai kan en mour me kitail kin kahdaniki irair en unseklahn ansou.Itarete Pwuken Mormon e intingdahsang rehn irail soun inting en mahs akan—pali laud en irail wia soukohp ekei—irail oh aramas en arail ansouo sohte anihkihdi ansou mwau en iang nainiki pwuhko pwon.Met e mengei ong kumwail en alehdi rekoht sarawih kan koaros me soukohp akan, samworou kan, oh nanmwarki kan sohsohki, kolokol, oh apwahpwalih! Kumwail paiamwahu pwehki kumwail kolokol nan pehmwail Pwuken Mormon ni eh unseklahr. Kaperenpeu, emen soukohp en nan Pwuken Mormon, me iei Moroni, Moroni intingihdier me: e kilangehr atail ansou—de amwail ansou. Oh e pil kilang kumwailehr, nan eh ouremen akan, sounpar epwikihkei samwalahro!
“Kilang, Kauno ketin kasalehiong ie mehkot kesemwpal oh kopwuriamwei kan … ni rahno ansou me mepwukat,” me wewehki Pwuken Mormon, “pahn kohdo ong kumwail.
“Kilang, I koasoai ong kumwail duwehte me kumwail mihmi rehi, ahpw kumwail sohte mihmi rehi. Ahpw kilang Sises Krais me ketin kasaledohngiehier duwen kumwail oh I ese duwen amwail wiewia.”5
Pwehn sewese Pwuken Mormon wiahla poahsoan en amwail kadehde, I lukehieng uhk luhk ehu. Iahpwtehn esehda me irail me pwulopwul kan kin kilkilang kasdo, kampuhder, oh kisin delepwohn kan kerenieng awa isu nan rahn ehu. 6Pwehn wia mehn madamadau, ke kak wiahda ekis kisin wekdeklahn? Ke pahn kak wekidala ansou kan me ke kin doadoahngki mehn kapehseh kan, indernet, mwadong, de kasdo, ong ni wadwadek Pwuken Mormon? Ma e pahn pwungehng kaskuhl kan me I esehier, ke pahn kak diar ahmw ansou nan ehu ehu rahn akan en kaskuhlki Pwuken Mormon itarete ma pil minit 10 rahn ehu. Oh ke kak kaskuhlki ni mwohmw ehu me pahn mweidehng uhk ken kak pereniki oh wewehkihla—pahn kak pohn noumw dipisou en wai kan de sang ni pwuhko. Presiden Russell M. Nelson apwtehn kaweidkin kitail me “Kitail sohte konehng wiahki me wadek Pwuken Mormon wia doadoahk laud ehu me duwehte atail kin tugnoal wini me kitail kin wiahkinte ehu kadalehla eri e mwahuer.” 7
Ong ekei kumwail seri tikitik kan, kumwail kak iangih amwail pahpa oh nohno, pahpa oh nohno kahlap, de irail kempoakepahmwail kan wadawad. Ma ehu ire laud, ire tikitik, de wasahkis wiahda kahpwal ehu me pahn karehiong amwail pahn sohla men wadawad, kumwail doula nan ire teikan. I kak kilang me kumwail pahn alasang en Mary karasaraso. I kak kilang amwail perendahr oh men rapahki ansou mwau oh wasa me meleilei pwe kumwail en wadek Pwuken Mormon. I kilang me kumwail diaradahr pasapeng kan, kaweid, oh alehdier peihn amwail kadehde pen Pwuken Mormon oh kadehde pen Sises Krais. Ni amwail kilenglahng pwuhko, kumwail kilenglahng Kauno.
Kumwail pahn wadekedi ireh kan en nan pwuhk kesemwpwal wet oh tuhwongedi amwail Sounkomouro, Kaun Sises Krais, kerenieng nan page koaros. E sansal me Sapwellime ahd doadoahk kerenieng nan 1.7 en ire tikitik koaros.8 Pil peihn Krais kadehdehda duwen mehlel koaros en imwin rahn akan, “Ni ahi wia amwail Kaun oh Koht ieias met mehlel.” 9
I inenen kapingki mehlel luhk oh inou me Kauno ketkidohr sang rehn soukohp Moroni ong emenemen kumwail—oh ong koaros me kin wadek Pwuken Mormon. I pahn ididihier met sang ni ai pahn wadekada luhk oh inou oh pil kapatahieng ai kadehde: “Ni ansou me kitail kin alehdi mepwukat [Pwuken Mormon], kitail anahne peki rehn Koht Sahm Nanleng, ni mwaren Sises Krais, ma mepwukat mehlel. Ma kitail pahn peki ni mongiong mehlel, ineng mehlel, ahniki pwoson Krais, E pahn kasalehieng kitail me mehlelo sang ni manaman en Ngehn Sarawi.”10
I wia ahi kadehde duwen Kopwurpwurdohn rongamwahu en imwin rahn akan oh iei Pwuken Mormon me wia dipwisoun kadehdeh Kopwurpwurdo wet. Pil duwehte mahsen kan en pwuhk wet eh kamwakid serepein sounpar-12-en alehda kopwurpwurdohn Mwomwohdisohn Sises Krais kerenieng pahr riau ngeder kei samwalahro, me mehlelo me kumwail pahn kak diar wasahu pahn kak kakehlaihli kumwailda oh kamwakid kumwailda ni soangen mwohmwohte. Irail pahn kakehlakahla amwail pwoson, kadirehkihla palingenimwail ki marain, oh kaunop kumwaildahng nan ansou kan me kokohdo me peihn kumwail sohte kak kohpada.
Nan ehu ehu tehn pwuhko, kumwail pahn diar limpoak en Koht me sohte imwi oh Sapwellime lingan me dei sang dahme kitail wewehki. Ni ansou me kumwail pahn nantieng idawehn padahng kan me kumwail diar mwo, amwail peren pahn laudla, amwail wehwe pahn laudla, oh pasapeng kan me kumwail rapahki ong kahpwal tohto kan me mour wet kieng kumwail pahn ritidahng kumwail. Ni amwail pahn kilenglahng pwuhko, kumwail kilenglahng Kauno. Pwuken Mormon iei me kasalehda mahsen en Koht. Iei met me I kadehdehki, ni ai mongiong oh ngeni unsek, ni mwaren Sises Krais, amen.