2010–2019
Sega na Reki Levu Cake Ena Kena Kilai ni Ra sa Kila
Okotova 2016


Sega na Reki Levu Cake Ena Kena Kilai ni Ra sa Kila

Au sega ni kila ke dua na ka ena vuravura oqo ena rawa ni vakavu marau kei na reki vakalevu cake ni da kila ni ra sa kila na iVakabula na luveda.

Kemuni na taciqu kei na ganequ, au sa vakasamataka tiko mai vagumatua na taro oqo: “Kevaka e sa vu mai vei iko na veika era sa kila ena kosipeli na luvemu—me nodra ivurevure duadua ga—ena vakacava na levu ni nodra kila?” Na taro oqo e sa baleti ira taucoko era dau lomana, tubera, ka vakayarayarataki ira na gone.

E tiko li e dua na isolisoli levu cake eda rawa ni solia vei ira na luveda mai na dua na ivakananumi e tara vakatitobu na lomadra ni da kila ni sa bula na noda Dauveivueti? Era kila tiko ni da sa kila? Ka bibi sara, era sa mai kila vakataki ira ni bula o Koya?

Niu se gonetagane voli, au a gone lailai vadrecike duadua me susuga o tinaqu. E a sinai qai vutucoqa na noqu yamekemeke. E tukuna vei au o tinaqu ni nona rere levu duadua oya niu na sega ni bula meu tamata qase. Au sa yamekemeke saraga vakasivia.

Au nanuma na noqu dabe voli niu se gonetagane ena dua na soqoni ni sakaramede vata kei na neitou matavuvale. A se qai ciqoma saraga o tinaqu e dua na ivota vou ni ivolanikalou. Na ivota vou oqo a cokoti vata kina na ivolayavu ni cakacaka taucoko ena dua ga na ivola, ka toka e lomadonu na pepa e so me baleta na volavola.

Donuya na soqoni, au a kerea keu rawa ni taura toka na nona ivolanikalou. Ena vakanuinui niu na vakarokoroko cake kina, a solia mai vei au o koya. Niu vakadikeva na nona ivolanikalou, au raica rawa ni a vola o koya e dua na nona takete ena iwase ni volavola. Me vakayavutaki vinaka na nona takete, au tukuna mada vei iko ni o au na ikarua ni ono na gone ka sa yacaqu o Brett. A vola o tinaqu, ena peni damudamu, e dua ga na takete: “Yalovosota tiko vei Brett!”

Me ivakadinadina tale mo ni vukei kina ni kila vakavinaka na bolebole e rau sotava na noqu itubutubu ena susugi ni neitou matavuvale, meu tukuna mada vei kemuni na ivakarau ni neitou wili ivolanikalou vakamatavuvale. Ena veimataka, ena wilika o tinaqu na iVola i Momani kivei keitou ena gauna ni katalau. Donuya na gauna oqo, au na dabe vakanomodi vata kei tuakaqu, o Dave, ia vakasabalia tu. Meu tukuna vakaidina sara, keirau a sega ni vakarorogo voli. Keirau a wilika tiko na vosa ena iolo ni kakana ni katalau.

Kena itinitini, dua na mataka, au sa navuca meu veivosaki kei noqu na. Au kaya, “Cava na vuna o cakava tiko kina vei keitou na ka oqo? Cava na vuna o wilika tiko kina na iVola i Momani ena veimataka?” Au a qai kaya e dua na ka kau sa madua ni vakaraitaka. Na kena dina, au a sega ni vakabauta niu a tukuna. Au tukuna vua, “Na, au sa sega ni vakarorogo!”

E a dua na gauna bibi ena noqu bula na veika a sauma mai ena loloma o koya. E kaya o koya, “Luvequ, au a tiko ena dua na soqoni ka vakatavulica kina o Peresitedi Marion G. Romney na veivakalougatataki ni wili ivolanikalou. Donuya na soqoni oqo, au a ciqoma e dua na yalayala ni kevaka au na wilika na iVola i Momani kivei ira na luvequ ena veisiga, au na sega ni vakayali ira.” A qai raici au mai vakadodonu o koya, ka kaya ena yalo e guta vakalevu, “Au na sega ni vakayali iko!”

A suwaka na utoqu na nona vosa. Dina ga ni tu na noqu malumalumu e so, sa yaga meu vakabulai! A vakatavulica vei au o koya na dina tawamudu niu sa dua na luvena tagane na Tamada Vakalomalagi dauloloma. Au vulica se vakacava sara na ituvaki, e sa yaga o au. Oqo e sa dua na gauna maucokona kivua e dua na gonetagane lailai malumalumu.

Au vakavinavinaka tawamudu kivua na agilosi o tinaqu kei ira taucoko na agilosi ka lomani ira vakamaucokona na gone, dina ga ni tu na nodra malumalumu. Au vakadinata deivaki ni o ira taucoko na sisita—au na kacivi ira “agilosi”—era sa tina e Saioni, se ra vakawati ka vakasucu gone se sega ni ra donuya na veika e sotavi ena vuravura oqo.

Ena vica na yabaki sa oti a vakaraitaka na Mataveiliutaki Taumada: “Na bula vakatina e sa volekata na bula vakalou. E sa ilesilesi cecere ka tabu duadua me na qarava na kawatamata. E sa vakatokai koya ka doka na kena veikacivi kei na veiqaravi tabu me taravi ira ga na agilosi.”1

Au sa vakavinavinakataki ira na agilosi ena Lotu raraba ka vakatakila ena doudou kei na kauwai na dina tawamudu kivei ira na luvena na Tamada Vakalomalagi.

Au vakavinavinakataka na isolisoli ni iVola i Momani. Au kila ni sa dina! E umani tu kina na taucoko ni kosipeli i Jisu Karisito. Au sega mada ni kila e dua ka sa wilika vagumatua voli na iVola i Momani ena veisiga ena lomana taucoko ka vakabauta na Karisito me sa vakayalia na nona ivakadinadina ka lutu tani. Na yalayala vakaparofita nei Moronai e vakabibitaka na idola me kilai kina na dina ni veika kecega—oka kina na tikori ni sasaga meda raica vakamatata ka vorata na veicavilaki ni vunica. (Raica na Moronai 10:4–5.)

Au vakavinavinakataka talega na loloma ni Tamada Vakalomalagi kei na Luvena, o Jisu Karisito. A vakarautaka na iVakabula na ivakaraitaki maucokona ni noda bula voli ena dua na vuravura malumalumu ka tawamacala. “Eda sa lomani koya ena vuku ni sa taumada na nona loloma vei keda”(1 Joni 4:19). E sa sega ni kinoci rawa na Nona lomani keda. Sa noda itokani dina duadua o Koya. Na Nona buno “sa vaka na tiri ni dra” me baleti iko kei au talega (Luke 22:44). A vosoti ira na tawaveivosoti voli. A lomani ira na tawadauloloma. A kitaka na ka e sega ni rawa ni kitaka rawa na tamata vakayago: A vakarautaka o Koya e dua na Veisorovaki me ulabaleta kina na ivalavala ca, na mosi, kei na tauvimate ni kawatamata taucoko.

Baleta na Veisorovaki i Jisu Karisito, sa rawa ni da bula ena yalayala ni vakacava sara na noda sasaga dredre voli, sa rawa ni da vakanuinui tu ga vei Koya, “sa kaukauwa me ia na veivakabulai” (2 Nifai 31:19). Baleta na Nona Veisorovaki, sa rawa ni noda na reki, vakacegu, bula marau, kei na bula tawamudu.

A kaya o Peresitedi Boyd K. Packer: “Vakavo ga na iwiliwili ni tamata e lailai sara ka riba tani ki na veivakarusai, e sega na itovo tudei, vakatotogani, vakaduiduile, ivalavala ca, vuki tani, se cakacala e vagalalataki mai na yalayala ni veivosoti vakataucoko. O ya na yalayala ni veisorovaki i Karisito.”2

Dua na ka veivakurabuitaki duadua ena ivolaitukutuku ni bula ni tamata oya na veisiko vakailesilesi ni iVakabula kivei ira na vakatawana makawa na vanua o Amerika. Raitayaloyalotaka mada ena nomu vakasama na ituvaki ni bula kevaka eda a tiko ekea. Niu sa mai vakasamataka vagumatua na Nona kauwai loloma ka malumu me baleti ira na ilala Yalododonu oya ka sokomuni ena valetabu, au sa railesuvi ira na gone yadua kau sa lomana vakalevu cake mai na bula vakaikoya. Au sa tovolea meu vakasamataka na iwalewale au na vakila ena qarauni ni noda lalai, meu vakadinadinataka vakaiau na nona sureti ira yadua na gone na iVakabula me ra lako mai Vua, meu vakadinadinataka na dodoliga ni iVakabula, meu duri tu ni ra lako vakayadua mai na gone, ka vakila na mawe e so ena Ligana kei na Yavana, ka qai raici ira yadua me ra tucake ka vakadinadinataka ni sa bula o Koya! (Raica na 3 Nifai 11:14–17; raica talega na 17:21; 18:25.) Me ra na vuki na luveda ka kaya, “Na, Ta, o Koya!”

iVakatakilakila
iVakabula vata kei ira na gone

Au sega ni kila ke dua na ka ena vuravura oqo ena rawa ni vakavu marau kei na reki vakalevu cake ni da kila ni ra sa kila na iVakabula na luveda, me kilai ni ra sa kila “na sala me bokoci kina na nodra ivalavala ca.” O ya na vuna vei keda na lewe ni Lotu, “eda vunautaki Karisito” ka vakadinadinataki Karisito kina (2 Nifai 25:26).

  • O ya na vuna eda masu vata kina kei ira na luveda ena veisiga.

  • O ya na vuna eda wili ivolanikalou vata kina kei ira ena veisiga.

  • O ya na vuna eda vakatavulici ira kina me ra qaravi ira na tani, me rawa ni ra ciqoma na veivakalougatataki ni nodra kunei ira ni ra vakayali ira ena veiqaravi kivei ira na tani (raica na Marika 8:35; Mosaia 2:17).

Ni da soli keda ki na veivalavala rawarawa oqo ni bula vakatisaipeli, eda sa vakaukauwataki ira na luveda ena loloma ni iVakabula vata kei na veidusimaki kei na veitaqomaki vakalou ni ra vavaca yani na veicagi drakidrakita ni vunica.

Na kosipeli sa baleta vakaidina na dua. E sa baleta e dua na sipi ka yali (raica na Luke 15:3–7); e sa baleta e dua na marama ni Samaria ena mata ni wai (raica na Joni 4:5–30); e sa baleta e dua na gone cidroi (raica na Luke 15:11–32).

Ka sa baleta e dua na tagane lailai ka tukuna ni sega ni vakarorogo voli.

E sa baleti keda vakayadua—ni da sa malumalumu voli—meda duabau vata kei na iVakabula me vaka e sa duabau vata kei Tamana o Koya (raica na Joni 17:21).

Au vakadinadinataka ni tiko e dua na Tamada Vakalomalagi dauloloma, ka kilai keda ena yacada! Au vakadinadinataka ni o Jisu Karisito sa Luvena bula na Kalou bula. Sa i Koya na Luvena Duabau Ga ka noda Mata na Tamada. Au vakadinadinataka talega ni sa yaco duadua ga na veivakabulai ena Yacana—ka sega tale ni dua na sala.

Sa noqu masu ni da na solia na lomada kei na ligada ena nodra vukei taucoko na luvena na Tamada Vakalomalagi mera kilai Koya ka mera vakila na Nona loloma. Ni da cakava, sa yalataka vei keda o Koya na reki kei na bula marau tawamudu ena bula oqo kei na bula sa bera mai. Ena yaca i Jisu Karisito, emeni.

iDusidusi

  1. “Message of the First Presidency,” ena Ripote ni Koniferedi, Oko. 1942, 12–13; a wilika o Peresitedi J. Reuben Clark Jr.

  2. Boyd K. Packer, “The Brilliant Morning of Forgiveness,” Ensign, Nov. 1995, 20.