2010–2019
Maajun sahil ch’oolejil nimaq wi’chik xwankil chiru xnawb’al naq neke’xnaw eb’ a’an
Octubre 2016


Maajun sahil ch’oolejil nimaq wi’chik xwankil chiru xnawb’al naq neke’xnaw eb’ a’an

Ink’a’ ninnaw ma wan k’a’ruhaq sa’ li ruchich’och’ a’in li tixk’am raj sahil ch’oolejil nimaq wi’chik xwankil chiru xnawb’al naq eb’ li qakok’al neke’xnaw ru li Kolonel.

Ex was wiitz’in, toje’ yookin chixtz’ilb’al rix sa’ inch’ool li patz’om a’in: “Wi ta chixjunil li te’xnaw laa kok’al chirix li evangelio k’utb’il chiruheb’ aab’aan—laa’at li junaj chi yo’leb’aal re li nawom a’in—k’a’ru raj te’xnaw?” Li patz’om a’in wan rilom rik’in chixjunileb’ li neke’rahok, neke’tzolok, ut neke’tenq’ank reheb’ kok’al.

Ma wan junaq maatan nimaq xwankil li naru taqak’e reheb’ li qakok’al chiru jun jultikahom naxamamnak sa’ xch’ooleb’ chirix naq naqanaw naq yo’yo aj Kolol qe? Ma neke’xnaw naq naqanaw a’an? Ut aajel wi’chik ru, ma neke’xnaw xjuneseb’ rib’ naq yo’yo a’an?

Naq saajin chaq, q’axal wi’chik ch’a’aj chiru lin na’ chink’iresinkil chiru xk’iresinkileb’ li was wiitz’ineb’. Q’axal wi’chik ninb’orornak. Lin na’ naxye we naq li mas kixuwa ru, a’an naq tinkamq rub’elaj naq tinwinqilo’q. Q’axal wi’chik kiweek’asi wib’ chi yalaq b’ar.

Nanaq sa’ inch’ool jun kutan naq ch’ajomin chaq, chunchuukin sa’ jun ch’utam re li loq’laj wa’ak wochb’een lin junkab’al. Lin na’ toje’ kixk’ul chaq jun ak’il loq’laj hu. Sa’ li ak’il hu a’in wan chixjunileb’ li xaqab’anb’il hu re li Iglees ut sa’ xyi wankeb’ li perel re xtz’iib’ankil li kok’ esil.

Sa’ li ch’utam, kinpatz’ re ma tinruuq tink’am lix loq’laj hu. Xyo’oninkil naq chunchu tinkaanaq, kinixkanab’ xk’amb’al. Naq yookin chi ilok sa’ lix loq’laj hu, kink’e reetal naq xtz’iib’ahom chaq jun xna’leb’ sa’eb’ li perel re kok’ esil. Re naq laa’ex teetaw ru li k’a’ru kixtz’iib’a, tento tinye eere naq laa’in li xkab’ sa’ xyanqeb’ waqib’eb’ li kok’al ut laa’in laj Brett. Jun ajwi’ li na’leb’ tz’iib’anb’il xb’aan lin na’: “Chiwanq aakuyum rik’in laj Brett!”

Re teetaw xnimal xch’a’ajkilal lin na’ inyuwa’ sa’ xk’iresinkil li qajunkab’al, chinyehaq eere chirix jo’q’e kiqileb’ ru li santil hu jo’ junkab’al. Rajlal eq’la, lin na’ kiril ru lix Hu laj Mormon chiqu naq yooko chi wa’ak. Chiruheb’ li hoonal a’in, ch’anch’ooko li was, laj David, ut laa’in a’ut ink’a’ rik’in oxloq’ink. Ink’a’ ajwi’ yooko chi ab’ink. Yooko chaq chirilb’al ru li tz’iib’anb’il chiru xkaxon li qatzakemq.

Sa’ jun li eq’la, kiwaj xyeeb’al jun na’leb’ re lin na’. Kinye, “Na’, k’a’ut naq yookat chixb’aanunkil a’in qe? K’a’ut naq yookat chirilb’al ru lix Hu laj Mormon rajlal eq’la?” Toja’ ut naq kinye jun aatin li toj ninxutaanak wi’. Chi yaal, ink’a’ ninpaab’ naq kinye. Kinye re, “Na’, ink’a’ yookin chi ab’ink!”

Lix sumehom aj rahonel a’an jun xnimal ru hoonal sa’ lin yu’am. A’an kixye, “At walal, kinwan sa’ jun li ch’utam sa’ wi’ li Awa’b’ej Marion G. Romney kik’utuk chirixeb’ li osob’tesink neke’chal rik’in xtz’ilb’aleb’ rix li loq’laj hu. Sa’ li ch’utam a’in kink’ul jun yeechi’ihom naq wi tinwil ru lix Hu laj Mormon chiruheb’ li walal ink’ajol wulaj wulaj, ink’a’ te’sachq chiqu.” Toja’ naq kinril sa’ xnaq’ wu, ut rik’in kawilal kixye, “Ut ink’a’ texsachq chiwu!”

Ki’ok li raatin tz’aqal sa’ waam. Us ta inmajelal, k’ulub’ejin chi kole’k! A’an kixk’ut chiwu li junelikil yaal naq laa’in jun li ralal li qaChoxahil Yuwa’ aj rahonel. Kintzol naq maak’a’ naxye b’ar wankin, wan intz’aq. A’an a’in jun hoonal tz’aqal chaab’il choq’ re jun li ch’ajom moko tz’aqal ta re ru.

Tinb’antioxinq chi junelik xb’aan lin na’ ut chixjunileb’ li ani neke’xraheb’ li kok’al chi tz’aqal re ru, us ta lix majelaleb’. Ninpaab’ chi anchal inch’ool naq chixjunileb’ li hermana—“li anjel” tinye reheb’—a’aneb’ na’b’ej sa’ Zion, maak’a’ naxye ma sumsuukeb’ malaj ma neke’wan xkok’aleb’ sa’ ruchich’och’ a’in.

Junjunqeb’ li chihab’ chaq anajwan li Xb’eenil Awa’b’ejil kixyaab’asi: “Li na’b’ejil jwal nach’ rik’in li choxahilal. A’an li k’anjel q’axal taqenaq ut loq’ re li winqilal. A’an naxk’e naq li ani naroxloq’i li loq’laj b’oqb’al ut k’anjel a’in wan xna’aj chixk’atqeb’ li anjel.”1

Ninb’antioxin xb’aaneb’ li anjel sa’ li Iglees li neke’xyaab’asi li junelikil yaalil na’leb’ rik’in xkawilal xch’ooleb’ ut rahok reheb’ li ralal xk’ajol li qaChoxahil Yuwa’.

Ninb’antioxin xb’aan li maatan nawb’il ru jo’ lix Hu laj Mormon. Ninnaw naq yaal! Wan chi sa’ lix tz’aqalil lix evangelio li Jesukristo. Ink’a’ ninnaw ru anihaq li k’eeb’il xch’ool chirilb’al ru lix Hu laj Mormon wulaj wulaj rik’in saq ruhil rajom ut rik’in xpaab’aal chirix li Kristo li nasach xch’olob’ahom xch’ool ut naxjalb’ehi rib’. Li profeetil raatin laj Mormon naxk’am chaq xlaawil xnawb’al lix yaalalil chixjunil li k’a’aq re ru—jo’ li seeb’al chixk’eeb’al reetal ut chixtz’eqtaanankil li aaleek re li xik’ na’ilok qe. (Chi’ilmanq Moroni 10:4–5.)

Ninb’atioxin ajwi’ xb’aan li qaChoxahil Yuwa’ aj rahonel ut li Ralal, li Jesukristo. Li Kolonel kixk’ut chi tz’aqal chanru tento toowanq sa’ jun li ruchich’och’ moko tz’aqal ta re ru ut moko tiik ta. “Laa’o nokorahok xb’aan naq a’an koxra xb’een wa” (1 Jwan 4:19). Ink’a’ naru taab’ismanq lix rahom choq’ qe. A’an li qamiiw q’axal wi’chik tz’aqal re ru. A’an kitiqob’ak “kama’ ninqi tz’uqul chi kik’ ” choq’ eere ut choq’ ajwi’ we (Lukas 22:44). A’an kixkuy xmaak li ani ink’a’ k’ulub’ejeb’ chi kuye’k xmaak. A’an kixraheb’ li ani ink’a’ k’ulub’ejeb’ chi rahe’k. A’an kixb’aanu li k’a’ru moko naru ta taab’aanumanq xb’aan yalaq ani chik: A’an kixtoj rix li maak re xq’axb’al ru li k’etok aatin, li rahilal, ut li yajel re chixjunil li winqilal.

Xb’aan lix tojb’al rix li maak kixb’aanu li Jesukristo, naru taawanq qayu’am rik’in li yeechi’ihom naq us ta li qach’a’ajkilal, junelik naru taawanq qayo’onihom rik’in a’an, “li kaw xmetz’ew chi kolok” (2 Nefi 31:19). Xb’aan lix tojb’al rix li maak li kixb’aanu, naru taqak’ul li sahil ch’oolejil, li tuqtuukilal, ut li yu’am maak’a’ roso’jik.

Li Awa’b’ej Body K. Packer kixye: “Naru taakuye’q xmaak yalaq b’aanuhom, yib’ ruhil k’aytesink-ib’, po’resink ch’oolej, k’etok paab’ank, malaj maak. Ka’ajwi’ junjunq li alalb’ej re li sachk ink’a’ naru taakuye’q xmaak. A’an a’an lix yeechi’ihom lix tojb’al rix li maak li kixb’aanu li Kristo.”2

Jun reheb’ li k’anjel q’axal xnimal ru sa’ chixjunil li uxb’il sa’ ruchich’och’ a’an naq li Kolonel kirula’ani li najter tenamit sa’ li ch’och’ America. K’oxlahomaq sa’ lee k’a’uxl chanru li wank aran. Naq nintz’il rix sa’ ink’a’uxl lix rahom ut lix k’anjel re ch’olanink choq’ re li ch’uut aj Santil Paab’anel li ch’utch’uukeb’ sa’ li santil ochoch, nink’oxla ajwi’ chirixeb’ li kok’al li ninra q’axal wi’chik chiru lin yu’am. Xinyal inq’e chixk’oxlankil chirix rilb’aleb’ li qakok’al, rilb’al qajunes li Kolonel chixb’oqb’aleb’ li junjunq li al chi chalk rik’in, rilb’al li ruq’ li Kolonel ye’b’il naq li junjunq chi ch’ina al ut ixqa’al kolxch’e’ xk’ob’olal li ruq’ ut li roq, jo’kan ajwi’ rilb’aleb’ chi xaqxookeb’ chixch’olob’ankil xyaalal naq yo’yo! ! (Chi’ilmanq 3 Nefi 11; chi’ilmanq ajwi’17:21; 18:25.) Ut naq li qalal qak’ajol te’xye qe, “Na’, Yuwa’, a’an a’an li Kolonel!”

Jalam-uuch
Li Kolonel rik’ineb’ li kok’al

Ink’a’ ninnaw ma wan k’a’ruhaq sa’ li ruchich’och’ a’in li tixk’am raj sahil ch’oolejil nimaq wi’chik xwankil chiru xnawb’al naq eb’ li qakok’al neke’xnaw ru li Kolonel, xnawb’al naq neke’xnaw “b’ar taaruuq te’iloq re te’isiiq lix maakeb’.” Xb’aan a’in naq, jo’ komon sa’ li Iglees, “nokojultikan chirix li Kristo” ut naqach’olob’ xyaalal li Kristo (2 Nefi 25:26).

  • Xb’aan a’in naq nokotijok qochb’eeneb’ li qalal qak’ajol wulaj wulaj.

  • Xb’aan a’in naq naqileb’ ru li loq’laj hu qochb’eeneb’ wulaj wulaj.

  • Xb’aan a’in naq naqak’ut chiruheb’ li k’anjelak chiru ras riitz’ineb’, re naq te’ruuq chireechaninkileb’ li osob’tesink re xkolb’aleb’ xyu’am rik’in naq neke’xsach xyu’ameb’ sa’ k’anjelak chiruheb’ li ras riitz’in’ (chi’ilmanq Markos 8:35; Mosiah 2:17).

Naq taqak’e qib’ sa’ xyu’aminkil li na’leb’ a’in re tzolomil, naqak’e xwankilaleb’ li qalal qak’ajol rik’in lix rahom li Kolonel ut rik’in li choxahil xb’eresinkileb’ ut xkolb’aleb’ naq neke’xik chiru li kawil iq’ re li xik’ na’ilok qe.

Tz’aqal yaal li naxye li evangelio chirix li jun. A’an wan rilom rik’in li jun karneer sachenaq (chi’ilmanq Lukas 15:3–7); wan rilom rik’in li ixq aj Samaria sa’ li yo’leb’aal ha’ (chi’ilmanq Jwan 4:5–30); a’an wan rilom rik’in li alalb’ej sachenaq (chi’ilmanq Lukas 15:11–32).

Ut a’an wan rilom rik’in jun li al li maare tixye naq ink’a’ yoo chi ab’ink.

A’an wan rilom qik’in chiqajunjunqal—us ta wan qamajelal—re junaqo rik’in li Kolonel jo’ naq junaqeb’ a’an ut lix Yuwa’ (chi’ilmanq John 17:21).

Ninch’olob’ xyaalal naq wan jun li qaChoxahil Yuwa’ aj rahonel li naxnaw li qak’ab’a’chiqajunjunqal. Ninch’olob’ xyaalal naq li Jesukristo a’an li yo’yookil Ralal li yo’yookil Dios. A’an li Junaj Chirib’il ut laj Aatinanel chiqix rik’in Yuwa’b’ej. Ninch’olob’ ajwi’ xyaalal naq li kolb’a-ib’ nachal rik’in ut sa’ xk’ab’a’ lix k’ab’a’—ut maak’a’ chik junaq b’e.

Lin tz’aam a’an naq taqaq’axtesi li qach’ool ut li quq’ re xtenq’ankil chixjunileb’ li ralal xk’ajol li qaChoxahil Yuwa’ re te’xnaw ru a’an ut te’reek’a lix rahom. Naq taqab’aanu a’in, a’an naxyeechi’i qe li sahil ch’oolejil maak’a’ roso’jik sa’ li ruchich’och’ a’in ut sa’ li chalel. Sa’ xk’ab’a’ li Jesukristo, amen.

Eb’ li raqalil

  1. “Message of the First Presidency,” sa’ Conference Report, Oct. 1942, 12–13; ilb’il ru xb’aan li Awa’b’ej J. Reuben Clark Jr.

  2. Boyd K. Packer, “The Brilliant Morning of Forgiveness,” Ensign, Nov. 1995, 20.