Wacngihn Engan Yohk Likina in Etuh Lah Elos Etuh

Tamuhlwel ac tahmtahel, nga motko tuhfahna tari siyuck se inge: “Fin ma nuh kwewa tuhlihk nuhtum an etuh ke wosasuc uh tuhkuh sum me—in kowos pa acn sefanna elos eis we—luhpahkah ma elos ac etuh? Siyuck soko inge ma nuh selos nuh kwewa ma luhngse, luti, ac pihrihk tuhlihk uh.

Wacngihn mwe sang yohk ma kuht kuh in sang nuh sin tuhlihk nahtuhsr likina sie esam loal ac fokoko lah kuht etuh lah Mwet Lahngo lasr el moul. Kuh eltahl etuh lah kuht etuh? Ac yohk srihpac liki, kuh elos nuh etuh selos sifacna lah El moul?

Ke nga sie tuhlihk fuhsr, nga pa tuhlihk fuhsr se nahtuhl ninac ma upac emet in tuhfweyucklac uh. Kuhiyuck ahluhkwelah ma fal. Ninac kiyuck el fahk nuh sihk lah fosrngah yohk se emet lal pa nga ac tiac moul sun moul in mwet fuhsr luhk uh. Nga ingurilac.

Nga esam sie pacl ah ke nga sie tuhlihk mukul fuhsr ke nga muhta ke sie tuhkweni in kuhfa luhn Leum wi sucu lasr ah. Ninac kiyuck ah tuhfahna eis sie set sasuc in ma suhmuhslah se. Set sasuc se inge oracni nohfohn puk in ma suhmuhslah uh nuh ke puk sefanna, ac ke infulwac ah oasr pwepuh lain mwe sihm mwe acsmak.

Ke tuhkweni sac, nga siyuck lah nga kuh in sruokyac ma suhmuhslah nahtuhl ah. Finsrakkihn muh ac kahsrweyuc in muhta mihslac, el use nuh sihk. Ke nga olang liye ma suhmuhslah nahtuhl ah, nga liye lah el suhmuhslah mwe finsrak se lal ke acn in sihm mwe acsmak sac. In sang ip nuh ke ahkuhtweyac ke finsrak lal, nga enenuh in fahk nuh suwos lah nga ahkluo sin tuhlihk ohnkohsr ac inek pa Brett. Ninac kiyuck ah suhmuhslah, ke sihm sruhsrah, finsrak sefanna: “Mongfihsracsr nuh sel Brett!”

In tahfwelah ke sie akucl in kahsrwe kom kahlwem ke ma upac ma pahpah ac ninac kiyuck oasr kac in tuhfahlah sucu lasr, ngan fahk nuh suwos ke rit ma suhmuhslah luhn sucu lasr uh. Kais sie lututacng, ninac kiyuck riti Puk luhn Mormon nuh sin sucu lasr ke pacl in mongo ke lututacng uh. Ke pacl se inge, tuhlihk mukul mahtuh wiyuck, Dave, ac nga muhta mihslac tuhsruhk tiacna oruh in muhtahl. In suwohs na pwacye, kuht tena lohacng. Eltahl riti na ma sihmlac ke pack in cereal ah.

Sahflahiyac, sie lututacng ah, nga sulaclah in suwohswohsacng nuh sel ninac. Nga fahkwacng, “Ninac, efuh kom oruh ma se inge nuh sesr? Efuh kom riti Puk luhn Mormon lututacng nuh kwewa?” Na nga oraclah fahk se ma nga mwekihn in fahk ah. Pwacyeiyac ah, nga tiac luhlahlfongi lah nga fahk. Nga fahk nuh sel, “Ninac, nga tiacna lohacng!”

Top ke luhngse lal pa sie pacl yohk srihpac ke moul luhk. El fahk, “Wen nuhtihk, nga tuh oasr ke sie toeni ma Prestuhn Marion G. Romney el luti ke mwe insewowo ma tuhkuh ke ritiyacn ma suhmuhslah uh. Ke toeni se inge, nga tuh eis sie olwelah muh fin nga riti Puk luhn Mormon nuh sin tuhlihk nuhtihk lwen nuh kwewa, nga fah tiac fuhlweloslac nuh ke ma koluk.” Na el ngwetma nuh ke muhtuhk ac, ke otwelah na pwacye lal, fahk, “Na nga fah tiac fihlikomlac!”

Kahs lal fakihsyac insiyuck. Finne nga tiac suwohs, nga yohk srihpac in moliyucklac! El lutiyuc sie ma pwacye ne tok lah nga sie tuhlihk nuhtin Pahpah Inkuhsrao luhngse se. Nga lotwelah lah finne meac oasr sihk, nga yohk srihpac in moullac. Pacl na wowo se luhn sie tuhlihk mukul sesuwohs.

Nga tarilacna ne tok ke ninac kiyuck ac mwet sahyac ma luhngse tuhlihk uh ke pwacye, finne elos tiac suwohs. Nga luhlahlfongi ke kuh lah muhtwacn nuh kwewa—nga fah pahnglolos “li-pufacn”—pa ninac ke Zion, lah elos pahyuck kuh tiac kuh isus fahko ke moul se facluh inge.

Kuhtuh yac somlah ah Prestuhnsi Se Met fahkwack: “In ninac se el apkuhran nuh sin God. Pa kuhlwacnsap fuhlwact, muhtahl se emet ma mwet uh kuh in oruh uh. Oruh muhtwacn ma ahkfuhlwactye ac kuhlwacnsuhpuh pahng muhtahl se inge in oacna lipufacn uh.”¹

Nga tarilacna ke lihpufacn nuh kwewa ke Alu uh ma puhlaik ac ke luhngse fahkwack ma pwacye ne tok nuh sin tuhlihk nuhtin Pahpah Inkuhsrao.

Nga tarilacna ke mwe sang pa nuh ke Puk luhn Mormon uh. Nga etuh el pwacye! El nwacnwack fohnlah luhn wosasuc luhn Jisus Kraist. Nga tena fosrngah ke elos ma oaru in riti Puk luhn Mormon kais sie lwen, ke sie kena in etuh na pwacye, ac ke luhlahlfongi ke Kraist suc wacngihnlac luhlahlfongi lalos ac puhtatlac. Olwelah ke kahs in pahluh lal Moroni ac sikyak wi top nuh ke in etuh fuhkah ma pwacye ke ma nuh kwewa uh weacng eisyacn kuh se ma in akihlen ac kosraclah kikiacp luhn devil uh. (Liye Moroni 10:4–5.)

Nga oacyacpac tarilacna ke Pahpah Inkuhsrao luhngse se ac ke Wen Nahtuhl, Jisus Kraist. Mwet Lahngo el use srihkasrak na wowo se lah ac moul fuhkah ke sie facluh na sesuwohs ac tiac fal. “Kut lungse, mweyen God El lungse kut meet” (1  John 4:19). Luhngse Lal nuh sesr yohk koflahna in srihkasrakuh. El kawuck pwacye se emet lasr. Fiyoh “kacl uh tultul oana srah” ke srihpom ac ke srihpuck (Luke 22:44). El nuhnak muhnahs nuh selos ma koflah eis nuhnak muhnahs. El luhngse elos ma sruhngwacyuck. El oruh ma mwet uh koflah in oruh: El use sie Iwaclah in kuhtanglah ma koluk, kweok, ac mas luhn mwet nuh kwewa.

Ke srihpen Iwaclah luhn Jisus Kraist, kuht kuh in moul ke sie olwelah muh finne fuhkah kwacfweacng lasr uh, kuht kuh in pacl nuh kwewa eis finsrak in El, “suc kuh in molwelah” (2 Nephi 31:19). Ke srihpen Iwaclah Lal, kuht kuh in eis engan, mihs, insewowo, ac moul ma pahtpaht.

Prestuhn Boyd  K. Packer el fahk: “Sahyaclos ma arulacna puh ma sulaclah devil uh, fah wacngihn elah, wacngihn pahlah, wacngihn lihkkeke, wacngihn orekma koluk, wacngihn forlah, wacngihn ma koluk in kosraclah olwelah fohnlah luhn nuhnak muhnahs. Pa ingacn olwelah se ma wi iwaclah luhn Kraist uh.”²

Sie sin ma sikyak wolacna ke sramsram mahtuh luhn mwet uh pa muhtwacta in luti luhn Mwet Lahngo nuh yurin mwet fin acn Macrke met ah. Petsacelah in nuhnak lom an lah oacna fuhkah fin kom oasr we. Ke nga motko luhngse Lal ac nuhnak Lal ke u in mwet luhlahlfongi tuhkweni ke tempuhl sac, nga nuhnkuh ke kais sie tuhlihk suc nga luhngse yohk likina moul uh sifacna. Nga tuh srihke in petsacelah lah nga ac puhla fuhkah in liye tuhlihk fuhsr nahtuhsr uh, in sifacna mwet loh ke Mwet Lahngo el suli kais sie tuhlihk in tuhkuh nuh Yohrohl, in mwet loh ke poun Mwet Lahngo el saplaklac, in liye pacl se kais sie tuhlihk, kais sie, kahkahsrihk puhla iken kihnet ke Pahol ac ke Niyacl, na in liye kais sie selos tu ac etuh lah El moul! (Liye 3 Nephi 11:14–17; oacyacpac liye 17:21; 18:25.) In oruh tuhlihk nahtuhsr uh in forlah ac fahk, “Ninac, Pahpah, pa inge Mwet Lahngo!”

Petsac

Mwet Lahngo yurin tuhlihk

Nga nihkihn lah oacna oasr ma ke facluh se inge kuh in use insewowo yohk ac engan likina in etuh lah tuhlihk nahtuhsr uh etuh ke Mwet Lahngo, in etuh lah elos etuh “lah meac pwelucng elos kuh in ngwet nuh kac tuh in iyucklac ma koluk lalos.” Pa ingacn srihpac, ke mempucr luhn Alu, “kuht luti kacn Kraist,” ac kuht fahkwack ke Kraist (2  Nephi 25:26).

• Pa oruh kuht wi tuhlihk nahtuhsr pruhe lwen nuh kwewa uh.

• Pa oruh kuht weluhlos riti ma suhmuhslah lwen nuh kwewa uh.

• Pa oruh kuht lotwelos in kuhlwacnsuhpuh mwet sahyac, elos in muh kuh in eis mwe insewowo in konwaclosyak sifacna pacl elos esaclosyang sifacna nuh ke kuhlwacnsuhpuh mwet sahyac uh (liye Mark 8:35; Mosiah 2:17).

Ke kuht kihsackihn kuhtyang nuh ke atac fihsracsr ke fahsr tukun Leum uh, kuht ahkkweye tuhlihk nahtuhsr ke luhngse luhn Mwet Lahngo ac ke kolyuck ac karihngihnyuck lucng me ke elos puhtatyang nuh ke mwe sruhf luhn devil uh.

Wosasuc uh pwacye lah ma ke kais sie mwet. Ma ke soko sheep tuhlac (liye Luke 15:3–7); ma ke sie muhtwacn Samaria ke sie luhf in kof (liye John 4:5–30); ma ke sie wen suhnuhntac (liye Luke 15:11–32).

Ma ke sie tuhlihk mukul srihsrihk ma kuh in fahk muh el tiacna lohng.

Ma ke kais sie sesr—finne kuht kuh in tiac suwohs—eklac ma sefanna nuh sin Mwet Lahngo oacna ke el ma sefanna nuh sin Pahpah (liye John 17:21).

Nga fahkwack luhlahlfongi lah oasr Pahpah Inkuhsrao luhngse se tuhmasr, suc etwekuht ke inesr! Nga fahkwack luhlahlfongi lah Jisus Kraist pa Wen moul nuhtin God moul. El pa Wen Kuloh Sefanna ac Mwet Iwe lasr nuh sin Pahpah. Nga tahfwelah in fahkwack lah molwelah tuhkuh ke Inel—ac wacngihn ohiyac sahyac.

Nga pruhe tuh kuht fah kihsackuhnwacng puhla ac mukwikwi lasr in kahsruh tuhlihk nuh kwewa nuhtin Pahpah Inkuhsrao in Etwacl ac puhla luhngse Lal. Ke kuht oruh uh, El olwelah nuh sesr engan ma pahtpaht ac insewowo ke moul se inge ac ke moul se fahsruh uh. Ke inen Jisus Kraist amen.