No tin Goso di mas Grandi di Sa Ku Nan Sa

Mi rumannan, resientemente mi tabata meditá riba e pregunta aki: “Si tur kos ku boso yunan tabata sa di evangelio a bini di boso—komo nan úniko fuente---kuantu nan lo sa?” e pregunta aki ta apliká na tur esnan ku ta stima, guia, i influensiá muchanan.

Tin un regalo di mas grandi ku nos por kompartí ku nos yunan ku un rekuerdo marká profundamente den nan kurason ku nos sa ku e Redentor ta biba? Nan sa ku nos sa? I di mas importante, nan a yega di sa pa nan mes ku E ta biba?

Tempu mi tabata un mucha, mi tabata mi mama su yu di mas difísil pa kria. Mi tabatin abundansia di mas di energia. Mi mama ta bisa mi ku su temor di mas grandi tabata ku lo mi no a biba pa bira adulto. Mi tabata demasiado aktivo.

Mi ta kòrda komo un mucha chikitu sintá den un reunion sakramental partikular ku nos famia. Mi mama a kaba di haña un sèt nobo di skritura. E set nobo aki a kombiná tur e bukinan kanóniko den un edishon, i den e sentro tabatin papel linea pa tuma nota.

Durante di e reunion, mi a puntra si mi por a tene su skrituranan. Ku e speransa di yuda mi pa ta reverente, el a duna mi nan den banki. Miéntras mi tabata wak den nan, mi a mira ku el a skibi un meta personal den e sekshon di nota. Pa duna konteksto na su meta, mi mester bisa boso ku mi ta di dos di seis yu i mi nòmber ta Brett. Mi mama a skibi, na kòrá, un meta so: “Pasenshi ku Brett!”

Komo mas evidensia pa yuda boso komprondé e desafio ku mi mayornan tabata enfrentá pa kria nos famia, laga mi konta boso tokante nos lesamentu di skritura ku famia. Tur mainta, mi mama tabata lesa e Buki di Mormon na nos famia durante desayuno. Durante e momentu ei, mi ruman hòmber grandi, Dave, i ami lo sinta ketu pero no reverente. Pa ta kompletamente honesto, nos no tabata skuchando. Nos tabata lesa e kosnan skibí riba e kaha di sereal.

Finalmente, un mainta, mi a disidí pa konfrontá mi mama. Mi a sklama, “Mama, di kon bo ta hasi e kos aki ku nos? Di kon bo ta lesa e Buki di Mormon tur mainta?” Despues mi a hasi un deklarashon ku mi tin bèrgwensa pa atmití. Realmente, mi no por kere ku enbèrdat mi a bisa asina. Mi a bisé, “Mama, mi no ta skuchando!”

Su kontesta amoroso tabata un momentu desisivo den mi bida. El a bisa, “Mi yu, mi tabata na un reunion unda Presidente Marion G. Romney a siña tokante di e bendishonnan di lesamentu di skritura. Durante di e reunion aki, mi a risibí un promesa ku si mi lesa e Buki di Mormon na mi yunan tur dia, lo mi no pèrdè nan.” El a wak mi stret den mi kara, i ku determinashon apsoluto, a bisa, “I lo mi no pèrdè bo!”

Su palabranan a penetrá den mi kurason. Apesar di mi imperfekshonnan, mi tabata bal la pena pa salba! El a siña mi e bèrdat eterno ku mi ta un yu di un Tata Selestial amoroso. Mi a siña ku no ta importá e sirkunstansia, mi tabata bal la pena. Esaki tabata un momentu perfekto pa un mucha hòmber imperfekto.

Mi ta eternamente gradisí pa mi mama angelikal i pa tur e angelnan ku ta stima mucha perfektamente, sin importá nan imperfekshonnan. Mi ta kere ku firmesa ku tur hermana---lo mi yama nan “angelnan”----ta mamanan den Sion, sea ku nan ta kasá òf no òf a haña yu durante di e eksperensia terenal aki.

Añanan pasá e Promé Presidensia a proklamá: “Maternidat ta serka di dibinidat. E ta e servisio di mas haltu i sagrado pa por wòrdu asumí pa humanidat. E ta pone e ku ta honra su yamamentu i servisio sagrado banda di e angelnan.”¹

Mi ta gradesido pa e angelnan den Iglesia ken ku balentia i amor ta proklamá bèrdat eterno na yunan di Tata Selestial.

Mi ta gradesido pa e regalo di e Buki di Mormon. Mi sa ku e ta berdadero! E ta kontené e plenitut di e evangelio di JesuCristu. Mi no konosé niun hende ku ta lesa e Buki di Mormon kada dia ku intenshon berdadero i ku fe den Cristu ku a pèrdè nan testimonio i a kai afó. Moroni su promesa profétiko ta karga ku n’e e yabi pa konosé e bèrdat di tur kosnan----inkluso di tin e habilidat pa diserní i evitá e desepshonnan di e atversario. (Wak Moroni 10:4–5.)

Mi ta gradesido tambe pa un Tata Selestial amoroso i pa Su Yu, JesuCristu. E Salbador a duna e ehèmpel perfekto kon pa biba den un mundu imperfekto i inhustu. “Nos ta stim’é, pasobra el a stima nos promé” (1 Juan 4:19). Su amor pa nos ta sin midí. E ta nos amigu di mas berdadero. El a soda “manera ku tabata gotanan di sanger” pa boso i ami (Lukas 22:44). El a pordoná lokual ta parse imperdonabel. El a stima esun no stimá. El a hasi lokual ningun mortal no por a hasi: el a proveé un Ekspiashon pa vense e transgreshonnan, dolornan, i enfermedatnan di henter humanidat.

Pa motibu di e Ekspiashon di JesuCristu, nos por biba ku e promesa ku sin importá kua nos difikultatnan por ta, semper nos por tin speransa den Dje, “ku tin poder pa salba” (2 Nefi 31:19). Pa motibu di Su Ekspiashon, nos por tin goso, pas, felisidat, i bida eterno.

Presidente Boyd K. Packer a deklará: “Eksepto pa e poko nan ku a skohe pa pèrdishon, no tin habito, adikshon, rebelion, transgreshon, apostasia, krímen ku ta stroba pa e promesa di pordon kompletu. Esei ta e promesa di e ekspiashon di Cristu.”²

Un di e eventonan di mas inkreibel den historia humano ta bishita di e ministerio di e Salbador na e habitantenan antiguo di Amérika. Visualisá den boso mente kon lo por ta pa tabata aya. Ora mi a meditá riba Su kuido amoroso i tierno na banda di Santunan reuní na e tèmpel, mi a reflehá riba e muchanan individual ku mi ta stima mas ku bida mes. Mi a purba di imaginá kon lo mi a sinti pa mira nos chikitunan, pa personalmente mira e Salbador invitando kada mucha pa bini na Dje, pa mira e Salbador su ekstendé pa para banda di kada mucha, un pa un, sinti e markanan den su mannan i pianan, i despues pa mira kada un di nan para i duna testimonio ku e ta biba. (Wak 3 Nefi 11:14–17; wak tambe 17:21; 18:25.) Pa tin nos muchanan bira i bisa, “Mama, Tata, ta E!

Imagen

Salbador ku muchanan

Mi no sa si tin kualke kos den e mundu aki ku por trese mas felisidat i goso di sa ku nos yunan konosé e Salbador, pa sa ku nan sa di kua fuente nan por wak pa un remishon di nan pikánan. Ta p’esei, komo miembronan di Iglesia, “nos ta prediká di Cristu “i nos ta testifiká di Cristu (2 Nefi 25:26).

• Ta p’esei nos ta hasi orashon tur dia ku nos yunan.

• Ta p’esei nos ta lesa e skrituranan ku nan tur dia.

• Ta p’esei nos ta siña nan pa sirbi otronan, p’asina nan por tin e derechi di risibí e bendishonnan den e búskeda di haña nan mes ora nan ta pèrdè nan mes den servisio na otronan. (wak Marko 8:35; Mosia 2:17).

Segun nos ta dediká nos mes na e patronchinan simpel aki di disipulado, nos ta duna poder na nos yunan ku amor pa e Salbador i ku guia dibino i protekshon ora nan ta enfrentá e bientunan duru di e atversario.

E evangelio ta berdaderamente tokante di esun. E ta tokante un karné pèrdí (wak Lukas 15:3–7); e ta tokante un muhé samaritano na e pos (wak Juan 4:5–30); e ta tokante un yu pèrdí (wak Lukas 15:11–32).

I ta tokante un mucha hòmber chikitu ku por a reklamá ku e no ta skuchando.

Ta tokante kada ún di nos ---imperfekto manera nos por ta----bira ún ku e Salbador meskos ku E ta ún ku Su Tata. (wakJuan 17:21).

Mi ta testifiká ku nos tin un Tata Selestial amoroso, ku konosé nos na nos nòmber! Mi ta testifiká ku JesuCristu ta e Yu bibu di e Dios bibu. E ta e Yu Unigénito i nos Abogado ku e Tata. Tambe mi ta testifiká ku salbashon ta bini den i pa medio di Su nòmber—i den ningun otro manera.

Ta mi orashon ku nos lo dediká nos kurason i nos mannan pa yuda tur Tata Selestial su yunan pa konosé i sinti Su amor. Ora nos hasi asina, E ta primintí nos goso eterno i felisidat den e mundu aki i den esun benidero. Den e nòmber di JesuCristu, amèn.