Ng Diak a Ngarbab el Deureng sel Dodengei el Kmo a Rengeleked a Medengei

Rodam me a rodos, ak mla melbedebek er tiakid el ker: “Omko ikel rokui lodengei a rengelekiu el kirel ebangkelio a mla er kemiu el mo er tir—el kmal di mla er kemiu el mo er tir—e ngua ngera klungel a klemedengei er tir?” Tia el ker a mo er tirkel rokui el tir a betik a rengrir, e olisechakl, e omekrael er a rengelekir.

Ngar ngii a ngodech el ngarbab el sengk el sebeched el mesterir a rengeleked el uai sel mesisiich el uldesuir el medengei el kmo kid a medengei el uase a Osobel a ngar? Tir te medengei el kmo kid a medengei? E a kmal ngaruchei, ng di tir el mla mo medengei el kmo Ngii a ngar?

Se er a kekerei el buik, e ngak a kot el mle meringel el ngelekel a delak lomekeroul er ngak. Ng kmal mle imis el odikel a bedengek. Sel kmal mle dektel a delak a kmo ng locha diak ngar el mo klou el chad. Ak kmal mle tekangel.

Ak dobedebekak er a kekerei el buik e kdengchokl lobengkel a telungalek er ngak er a tal temel a sakrament miting. A delak a kmal dirk ngiluu a beches el hong er ngii er a chedaol llechukl. Tia el beches el hong a ulab aikel rokui el chedaol llechukl e sel kmal belngel a mla er ngii a babier loluches er a chelsel.

Tia er a ki mngara sakrament miting, e a kuleker ngii el uase ng sebechek loba tial chedaol llechukl. Ng ulemdasou el kmo ng locha sebechel uchul e ak mo chelellakl, me ng mocha odersii er ngak. Se er a kumiis a llel tial hong, e ng tilab osengek a tekoi el bla lluches a delak el uaia le moktek er ngii. Uchei er a kuchais a mle llechukl el moktek er ngii, e msall e kuchais er kemiu el kmo ngak a ongeru el ngalek er a chelsir a retelolem el ngalek e a ngklek a Brett. A delak a lilchesii a kmal di chimol moktek er ngii el tekoi, loba bekerkard a chesengel loluches: “Mo Klou a Renguk er a Brett!”

A lemuut el bebil er a olchotel ngosukemiu el mo medengelii a ringel el ble el chelbangel er ngii a rechad er a blik er a lomekeroul er kemam, e msall e kuchais a teletelel omengiuel chedaol llechukl er a telungalek er kemam. Bek el tutau, e a delak a menguiu er a Babier er a Mormon el me er kemam er a temel a blengur. Tia ikid el taem, e a obekuk, er a Dave, me a ngak a dengchokl e ng di diak ki mchelellakl. A kmal louchais er kemiu a klemerang, ng dimlak a ta me ki morrenges. A ki bai milnguiu a tekoi el llechukl er a blil a cereal.

Uriul, er a tal tutau, e ak mocha mengedecheduch er a delak. Ak dula el kmo, “Chedil, ngera me ke meruul er tiang el mei er kemam? Ngera me ke menguiu er a Babier er a Mormon er a bek el tutau?” E sola dillii a tekoi el ngii ak sal merur louchais er ngii er kemiu. A mera er ngii, ng diak kumerang el uase ak meral dillii tial tekoi. Ak dilu er ngii el kmo, “Chedil, ngak a kmal diak kurrenges!”

A klebokel el nger ngii a meral ngar ngii a rirellii er a klengar ngak. Ng dilu el kmo, “Rungalek, ak mla er a miting e a President Marion G. Romney a ulsisechakl el kirel a klengeltengat er a omengiuel chedaol llechukl. Chelsel tia ikid el miting, e ak ngiluu a yaksok el uase alsekum ak menguiu er a Babier er a Mormon el mo er a rengelekek er a bek el sils, e te diak bol rebet er a klengit.” E kmal mocha ongeng a medak, e dula el kmo, “Ng mo diak mrebet er a klengit!”

A tekingel a meral silbechii er a renguk. Me ng diak el iior er a telitur ngak, le ng mle klou a belkul ak sobel! Ngii a ulsischeklak el kirel a diak a ulebengelel klemerang el kmo ngak a ngelekel a oubeltik el reng el Chedam er a Babeluades. Ak silubii el kmo ng diak el iior er a teletael el kngara chelsel, e ng di ng mle klou a ultutelek. Tia meral mle ungil taem el mo er a metitur el buik el uai ngak.

Ng diak kubes a sulel a uaia anghel el delak me tirkel uaia anghel el chedil loba cherrungel el beltik el reng el mo er a rengalek el diak el iior er a telitur tir. A kmal mui loumerang el kmo a rokui el odos—e ngak omekedong er tir el “anghel”—a chedil er a Zion, a le bechiil me a lak me a loungalek me a lak er chelechal taem.

Betok el rak er a memong e a First Presidency a ultebedii a tekoi el kmo: “ A klechedil a kmeed el uaia chedaol. Ng kot el ngarbab, e chetengakl el omesiou el chad a kudmeklii. Ng rulterir tir ka ikid el redil el tir a mengull er tial chedaol ngerachel me a omesiou el mo uaia re anghel.”¹

Ak mereng a sulir a re anghel er a chelsel a Ikelesia el meral bleketakl e oba beltik el reng louchais a diak a ulebengelel klemerang el mo er a rengelekel a Chedam er a Babeluades.

Ak mereng a saul er a sengk er a Babier er a Mormon. Ak medengei el kmo e ng klemerang! Ng oba mui el cherrengelel ebangeklio. Ng diak kudengelii a chad el meral blak a rengul menguiu er a Babier er a Mormon er a bek el sils, loba blak el reng me a klaumera er a Kristo e mla oridii a klaumera er ngii malechub e ng mla mo cheroid er a ikelesia. Sel ulochel a Moroni oba nger el uase ng mekera bo dodengei a klemrang er a rokui el tekoi—luldimukl a duch er kid el dongchii e oridid er a ongetikaik er a cherarou. (Mesa Moroni 10:4–5.)

Ak dirrek el mereng a sulel a oubeltik el reng el Chedam er a Babeluades me a Ngelekel, el Jesus Kristo. A Osobel a ulechotii a cherrungel lokesiu el kmo ng mekera de kiei er tial meringel e chetituokel el beluulechad. “Ng betik a rengud er ngii, le ngii el mle kot loubeltik el reng el mei er kid” (1 Johanes 4:19). A beltkil a rengul kired a diak a telkelel. Ngii a meral sechelid. Ng mlo mengerngars a “klsbengel er a rasech” el kirem e kirek(Lukas 22:44). Ngii a ulusubes er a re diak el mousubes el chad. Ngii a ulebeltik el reng el mo er a re diak loubeltik el reng. Ngii a riruul aikel diak a chad el remuul el tekoi. Ngii a kildmeklii a Tngakireng luchul e bo de mesisiich er a klengit, ringel, me a secher el ngara rokui el chad.

Ngultuil er a Tngakireng er a Jesus Kristo, e ng sebeched el kiei loba sel yaksok el kmo ng diak el iior er a ringel el de chelbangel, le ke de blechoel lultuil er a urunguled er Ngii, “el ngii a sebechel lolsobel” (2 Nephi 31:19). Ngokiu a Tngakireng er Ngii, e ng sebeched el mo metik er a deureng, budech, deuil a reng, me a diak a ulebengelel klengar.

A President Boyd  K. Packer a millekoi el kmo: “Ng diak luldimukl er tirkel mekesai el mla melilt er a diablong, e ng diak a mekngit el blekeradel, mekngit el kse, mekngit lomeruul, rebet er a klengit, rebetel a chad er a chedaol tekoi, telemall el diak luldimukl er a chelsel sel yaksok er a mui el klausubes. Tia ikid a yaksok er a tngakireng er a Kristo.”²

A ta er a kmal meang el cheldecheduch er a chelsel a reksi er a rechad a sel odngelel Osobel el mo er a ruchelir a rechad er a Beluu er a Merikel. Ka mko er a melcheluches er ngii er a uldesuem omko ke mla risei. Sel kulbedebek er a bekokeuii e medemdemk el beltik el reng er Ngii el mo er tial chelechad er a Resanto el keldibel er a templo, e ak mo melbedebek er a re dersta el ngalek el tir a kmal betik a renguk er tir. Ak mla melasm lomdasou el kirel el kmo ak locha mo omelchesiu el uangerang sel kisterir a remekekerei el ngalek el meral mesa Osobel el siotai er a dersta el ngalek el mo er Ngii, e sioning chimal Osobel loldars el bedul tir, el kdechor e kumes er a dersta er tir el ngalek, lou dersta er tir el merutech a ultil a deel er a Chimal me a Ochil, e mesterir el dechor e ouchais el kmo Ngii a ngar! (Mesa 3 Nephi 11:14–17; dirrek mesa 17:21; 18:25.) E mesterir a rengeleked lobult el du el kmo, “Chedil, Chedam, ng meral Ngii!”

siasing/Llecheklel

Osobel lobengkel a rengalek

Ng diak kudengei el kmo ngar ngii a ngii di el ngera er tial beluulechad el sebechel meskid a mui el deureng el uai sel bo dodengei el kmo a rengeleked a medengelii Osobel, sel dodengei el kmo tir a medengei el uase “te obult el mo er techang el kirel a ngbetel a kngterir.” Se ikid a uchul e sel de chad er a Ikelesia “e ke de olisechakl el kirel a Kristo” e ouchais el kirel a (2 Nephi 25:26).

• Tia ikid a uchul e ke de meluluuch lobengterir a rengeleked er a bek el sils.

• Tia ikid a uchul e ke de menguiu chedaol llechukl lobengterir er a bek el sils.

• Se ikid a uchul e ke de olisechakl er tir el mo mesiou e ra ta me a tang, me bol sebechir el ngmai a klengeltengat sel bo le ngara omesiou el kirir a (Mesa Markus 8:35; Mosiah 2:17).

Sel dodersid el bedul aika el beot el teletael er a roltirakl, e ke de smisicheterir a rengeleked loba beltik el reng er a Osobel me a chedaol ulekrael lobengkel a ucheliu sel bo el chelebangel a kengaol ongetikaik er a cherarou.

A ebangkelio a meral melutk el kirir a dersta el chad. Ng melutk el kirel a chimo el mla remiid el sib (see Lukas 15:3–7); ng melutk el kirel a chimo el ungil dil er a Samaria (mesa Johanes 4:5–30); ng melutk el kirel a chimo el mla touchakl el (mesa Lukas 15:11–32).

Ng melutk el kirel a chimo el kekerei el buik el dmu el uase aleko ng diak lorrenges.

Ng melutk el kirel a dersta me a dersta er kid—e uaisei el diak el decherrungel—el mo tang lobengkel Osobel el uai Ngii me a Demal el di tang (mesa John 17:21).

A kuchais el kmo ngar ngii a oubeltik el reng el Demad er a Babeluades, el ngii a medengei a ngkled! A kuchais el kmo a Jesus Kristo a ngar el Ngelekel a ngar el Dios. Ngii a Di Chimong el mesebechakl er kid er a medal a Chedam. Ak lemuut louchais el kmo a mo suobel a mei lokiu a Ngklel—ng diak a ngodech el rael.

Nglunguchek me dodars a rengud me a omerelled el mo olngeseu er a rokui el ngelekel a Chedam er a Babeluades el mo medengelii e mo melchesuar a beltik el reng er Ngii. Sel bo de uasiei, e Ngii a yaksok er kid a diak a ulebengelel deureng er tial klengar me sel klengar el merael mei. El ngara ngklel a Jesus Kristo, amen.