Sohte Popohl Laudsang Ahi Ese Me Irail Ese

Riei ohl oh lih oko, me keren ahi medemedewe laud peidek wet: “Ma koaros me noumw serihkan ese me pid rongamwahu wet kohsang rehmw—ni kowehte me wia arail sounpadahk—ia uwen me irail ese?” Peidek wet doke irail koaros me poakehng, kin kaweid, oh kin wia karasaras ohng serihkan.

Sohte ehu kisakis laud me kitail kak kiheng neitail serihkan palahsang ehu mehn ketemen teng oh loal me kitail ese me atail Sounkomour ieias. Neitail serihkan ese me kitail ese? Oh me keioun kesempwal, irail esehier me E ketin ieias?

Ni ahi wia kisin pwutak, I wia seri me keioun apwal en kakairada ohng ahi nohnohu. I wia seri angiangin men. Ahi nohnohu kin indahngie me dahme e keioun masak iei me I sohte pahn mour lel ni ahi laudila. I nohn mwekidikid.

I taman ehu ansou ni ahi pwulopwulo I iang ahi peneinei mwomwohd nan mihtingen kamadipw sarawi. Ahi nohnouh apwetehnte alehdi nah pwuhk sarawi ieu. Pwuhk kapw wet kapatapene pwuhk koaros en rongamwahu wet oh me mih nan werengehu iei tehn doaropwe lain ehu mehn nting.

Nan mihtingo, I peki ma I kak koledi nah pwuhk sarawio. Pwehki ah mentehnoh I en wauneki tiahk sarawio, e kiheng ie nah pwuhko. Ni ahi wie kilkilang pwuhko, I kilangada me e ntingihdi ah koasoandi ehu nan wasahn ntingo. Pwe I en song kawehwehda ah kosoandio, I anahne indahng kumwail me I wia keriemen nah seri wenemen oh edei Brett. Ahi nohnohu ntingihdier, ni lipw weitahta, ehu kosoandi: “Kanengamahieng Brett!”

Mehn sawas pwe kumwail en kak wehwehki kahpwal akan me ahi pahpa oh nohno lelehng ni ara apwahpwalihada aht kisin peneinei, mweidehng ie I en koasoaiahieng kumwail mwomwen aht kin wadek pwuhk sarawio. Ehu ehu nimenseng, ahi nohnohu kin wadek Pwuken Mormon ohng kiht ni ansoun mwengehn nimenseng. Soangen ansouet, ngehi oh riei pwutak laud, Dave, kin mwomwohd nenenla ahpw sohte kin wauneki. Udahn mehlelo, se sohte kin rong. Se kin wadwadek nting me mih ni kilin koakon en sihrielo.

Ni imwilahu, ehu nimensengo, I medewehda me I pahn lokaia inen ohng ahi nohnohu. I idek reh, “Ino, dahme ke wiewiakihengkit soahngen? Dahme ke kin wadeki Pwuken Mormon nimenseng koaros? Ngehi eri wia koasoai ieu me mwuhr I uhd namenekihda. Ni mehlel, I sohte kamehlele me I koasoaia soahngo. I indahng ahi nohnohu, “Ino, I sohte rongorong!”

Ah pasapeng limpoako wia ehu ansou kesempwal nan ahi mour. E indahng ie, “Nei pwutak, I iang mihting ehu me President Marion G. Romney padahngki kapai kan en wadek pwuhk sarawi kan. Nan mihting wet, I alehdi ehu inou me ma I pahn wadek Pwuken Mormon ohng nei serihkan rahn koaros, I sohte pahn luhsang irail. Ih eri kadehde nan meseiet, oh ni ngoang unsek, nda, “Oh I sohte pahn luhsang uhk!”

Ah koasoai ko sair ie mehlel. Mendahte ahi sohitar akan, I warehng komourla. E padahkiheng ie padahk mehlel poatoapoato me I wia seri en Sahm Nanleng me diren limpoako. I esehla me sohte katepe dahme wiawi, I warehng komourla. Ansou kesempwal ehu met ohng kisin pwutak soh unsek men.

Erein I pahn kapingki ahi nohnohu oh koaros me kin poakehng serihkan ni unsek, mendahte en serihkan sohitar akan. I inenen kamehlele me lih koaros nan mwomwohdiso wet—I pahn likwerih kin irail “tohnleng”—wia nohno men nan Zion, menda ma irail pwopwoud de soh de sohte nainki seri nan mour wet.

Pahr ekei samwalahro Keieu en Presidency pakairkihda: “Pwukoahn nohno wia pwukoah sarawi. E wia pwukoah ileile, papah sarawi ehu me aramas emen kak wia. E elehieng lih akan me pahn wauneki oh papah en duwehla tohnleng kan.¹

I kapingki tohnleng kan nan Mwomwohdiso wet me ahneki eimah oh limpoak en kapwilewei me mehlel poatoapoato ohng Sapwelimen Samatail Nanleng serihkan.

I kapingki kisakis me iei Pwuhken Mormon. Pwuhk wet kolokol rongamwahu unsek en Sises Krais. I sohte ese emen me pwerisek en wadek Pwuken Mormon ehu ehu rahn, ni mohngiong mehlel oh ni pwoson Krais me luhsangehr ah kadehde oh pwupwilahr. En soukohp Moroni ah inou iangahki pasapengpen mehlel en soahng koaros—me iangahki ahneki kehl en tehk wasa oh sohpeisang tepelo. (Kilang nan Moroni 10:4–5.)

I pil kapingki Sahm Nanleng limpoako oh Sapwellime Pwutak, Sises Krais. Sounkomouro wiadahr karasaras unsek ohng mwomwen mourn an sampah me sohte unsek oh sohte pahrek. Kitail poakehng Ih pwehki ihme ketin tepin poakehng kitail (1 Sohn 4:19). Ah limpoak ohng kitail sohte imwi. E wia kempoakepahtail me keieun loaloapwoat. E pwidau kerekerki lapalahn dingiding en nta ohng kowe oh pil ong ie (Luhk 22:44). E mahkehng me sohte warehng mahk. E poakehng me sohte warehng limpoak. E wiahda dahme sohte aramas kak wia: E wiadahr Tomwpen Dihp pwe en powehdi dihp akan, lokolok kan, oh soumwahu kan en aramas koaros.

Pwehki Tomwpen Dihp en Sises Krais, kitail kak momour ni atail ahneki inou me sohte katepe soangen apwal me kitail lelehng, kitail ansou koaros kak koapwoaroapwoarki Ih, “me ketin roson en komourla” (2 Nephi 31:19). Pwehki Sapwellime Tomwpen Dihp, kitail kak ahneki popohl, meleilei, peren laud, oh mour soutik.

Presiden Boyd K. Packer padahngkiher: “Palahsang me malaulau kan me sohpeilahngehr tepelo, sohte mehkot emen ahnlahr, sohte mesuwed me emen kak tengedieng, sohte uhwongada, sohte dihp, sohte pwupwila, sohte kauwehla kosonned kak perehsang emen aramas en alehdi inou en mahk mehlel. Iet ih inou me wiawidahr sang tomwpen dihp en Krais.”²

Ehu kemwekid kesempwal nan poadoapoad en mour en aramas iei en Sounkomouro ah pwarek oh apwaliada mehn mahsako nan wein Amerika. Song medewe pahn ia mwomwe ma ke iang mihmi wasahu. Ni ahi medewe laudehr Sapwellime limpoak oh epwel keneinei ohng pwihnen souleng me kohpenehr ni tehnpas sarawio, I tamandahr serihkan me I poakehng mehlel. I songehr medewe ia mwomwen ahi pepehm ni ahi pahn kilang serihkan, pein kilangada Sounkomouro ah lukuluke emen emen seri en kohla Reh, pein kadehdeh limen Sounkomouro, pein kilang serihkan, ni arail wad emen, ni keneinei pehm lihpw kan ni ninlimehko oh elueluwehko, oh eri pein kilang emen emen ah kesihkerda oh kadehdehki me Kauno ieias! (Kilang nan 3 Nephi 11:14–17; pil tehk17:21; 18:25.) I en kak kilang neitail serihkan arail pirekek oh inda, “Ino, Ipa, Ih met!”

Kilel

Sounkomour rehn serihkan

I sehse ma mie ehu mehkot nan sampah me kak kiheng kitail peren laud oh popohl sang atail ese me neitail serihkan ese Sounkomouro, atail ese me irail ese iawasa mahkpen diparail kan pahn kohsang ie. Ihme kahrehda, ni atail wia tohn Mwomwohdiso, kitail padahngki Krais, oh kitail kadehdehki Ih (2 Nephi 25:26).

• Ihme kahrehda kitail kin iang neitail serihkan kapakap rahn koaros.

• Ihme kahrehda kitail kin iang neitail serihkan wadek pwuhk sarawi rahn koaros.

• Ihme kahrehda kitail kin padahkiheng irail en papah mehteikan, pwe irail en kak alehdi kapai en esehla pein irail ansou me irail pahn mendahkihla pein irail oh papah mehteikan (kilang nan Mark 8:35; Mosiah 2:17).

Ni atail pahn loaloapwoatehng ideidawehn mour en tohnpadahk, kitail kakehlailihki neitail serihkan limpoak me Sounkomouro ahneki ohng irail oh kaweid sarawi oh perehre ni arail pahn sohpai kasongosong keper kan.

Rongamwahu wet ni mehlel pidada emen emen aramas. E pidada emen sihpw me salongalahr (kilang nan Luk 15:3–7); e pidada lihen Samaria men ni wasahn pihlo (kilang nan Sohn 4:5–30); e pidada pwutak emen me salongala oh ahpw diereko (kilang nan Luk 15:11–32).

Oh e pidada kisin pwutak kis me kak inda me e sohte kin rongorong.

E pidada emen emen kitail—menda ma kitail sohte unsek—wiahla ehu ohng atail Sounkomour duwehte Ah wia ehu ohng Seme (kilang nan Sohn 17:21).

I kadehdehki me mie Samatail Nanleng me limpoak, me ese adatail kan! I kadehdehki me Sises Krais iei Sapwellimen Koht oh E Ieias. E wia Sapwelime Iehros oh weliapatail rehn Sahmo. I doula oh kadehdehki me komour mie pwehki Ih—oh sohte ehu ahl.

I kapakapki me kitail pahn loaloapwoat ohng atail pepehm kan oh wiewia kan pwe en sewesehda Sapwelimen Sahm Nanleng serihkan en esehla Ih oh pehm Ah limpoak. Ni atail pahn wia met, E inoukihda me kitail pahn ahneki popohl poatoapoat oh peren nan mour wet oh mour me kohkohdoh. Ni mwaren Sises Krais, amen.