E Leai Se Olioli Sili Atu Nai lo le Iloa ua Latou Iloa

Uso e ma tuafafine, talu ai nei sa ou mafaufau loloto ai i lenei fesili: “Afai o mea uma ua iloa e tou fanau e uiga i le talalelei e sau mai ia te outou—ua na o outou lo latou punaoa—o le a le tēlē o lo latou iloa?” O lenei fesili e faatatau ia i latou uma o e alolofa, faiaoga, ma uunaia fanau.

E i ai se meaalofa sili atu e mafai ona tatou tuuina atu ia tatou fanau nai lo na o se manatuaga ua mumuina loloto i o latou loto tatou te iloa o loo soifua lo tatou Faaola? O latou iloa ea tatou te iloa? Ma le mea sili, ua latou iloa mo i latou lava o loo soifua o Ia?

Ao ou laitiiti, o a’u le tamaitiiti sili ona faigata na tausi e lo’u tina. Na matua ova lou ulavale. Na tau mai e lo’u tina o ona popolega sili na i ai faapea a nei ou te le aulia lou tulaga matua. Matuai ou ulavale lava.

Ou te manatua ao ou laitiiti i le nofo ai i se tasi o sauniga faamanatuga faapitoa ma lo matou aiga. Faatoa maua e lo’u tina se seti fou o tusitusiga paia. Sa i ai faatasi i lenei seti fou tusi faavae uma i le lomiga tuufaatasi e tasi, ma sa i ai i le ogatotonu ni pepa laina mo faamatalaga tusitusia.

I le taimi o le sauniga, sa ou fesili atu pe mafai ona ou uuina ana tusitusiga paia. Ma le faamoemoe o le a uunaia ai lo’u faaaloalo, sa ia tuuina mai ia te a’u. Ao ou matamata i ana tusi, na ou iloa ai sa ia tusia se sini patino i le vaega o faamatalaga. Ina ia tuuina atu se talaaga i lana sini, e tatau ona ou tau atu ia te outou o a’u o le lona lua o le fanau e toaono ma o lo’u igoa o Brett. Sa tusia e lo’u tina, i le lanumumu, le na o le tasi lava le sini: “Onosai ia Brett!”

O se faamaoniga atili e fesoasoani atu ia tou malamalama i tofotofoga na feagai ma o’u matua i le tausia o lo matou aiga, sei ou tau atua a matou faitauga tusi faaleaiga. O taeao taitasi, e faitau ai e lo’u tina le Tusi a Mamona ia i maua i le ‘aiga o le taeao. I lea lava taimi, ma te nonofo filemu ai ma lou uso matua, o Dave, ae leai se faaaloalo. O le mea moni lava, ma te le faalogo. Na ma faitauina ia upu i luga o le pusa siriolo [cereal].

I se tasi taeao, sa ou filifili ai e fai sao atu loa i lo’u tina. Sa ou fai atu, “Aisea ua e faia ai lenei mea ia i ma’ua? Aisea e te faitau ai le Tusi a Mamona i taeao uma?” Ona ou faia lea o se faamatalaga ou te ma e tau atu. O le mea moni, ou te le talitonu sa ou faia. Sa ou fai atu ia te ia, “Tina, ou te le o faalogo!”

O lana tali alofa mai sa avea ma se taimi taua tele i lo’u olaga. Sa ia fai mai, “Atalii, sa ou i ai i se sauniga lea na aoao mai ai Peresitene Marion G. Romney e uiga i faamanuiaga o le faitau o tusitusiga paia. I le taimi o lenei sauniga, sa ou maua ai se folafolaga afai ou te faitauina le Tusi a Mamona i la’u fanau i aso taitasi, e le leiloloa i latou.” Ona ia tilotilo sao mai lea i ou mata ma, ma le naunautaiga atoa, fai mai, “Ma e te le leiloa!”

Na tuia lo’u loto i ana upu. E ui i ou le atoatoa, sa ou taua ina ia faasaoina! Sa ia aoao au i le upumoni e faavavau o a’u o se atalii o se Tama Faalelagi alofa. Sa ou aoao e tusa lava po o a tulaga, sa ou taua. O se taimi sili lea mo se tamaititi le atoatoa.

E faavavau pea ona ou faafetai mo lo’u tina agelu ma mo agelu uma o e alolofa atoatoa i fanau, e ui i o latou le atoatoa. Ou te talitonu faamaoni i tuafafine uma—o le a ou tauina i latou o “agelu”—o ni tina i Siona, e tusa pe ua faaipoipo pe leai pe ua fananauina ni fanau i lenei aafiaga faalelalolagi.

Na folafola mai e le Au Peresitene Sili i tausaga ua mavae: “O le avea ma tina, e latalata atu i le faaleatua. O se galuega aupito maualuga, ma aupito paia lea e faia e le tagata. E tuu ai o ia, o le na te faamamaluina lona valaauga paia ma lana galuega, e pito atu i agelu.”¹

Ou te faafetai mo agelu i le Ekalesia atoa o e folafola atu ma le lototoa ma le alofa ia upumoni faavavau i fanau a le Tama Faalelagi.

Ou te faafetai mo le meaalofa o le Tusi a Mamona. Ou te iloa e moni! O loo i ai le atoaga o le talalelei a Iesu Keriso. Ou te le iloa se tasi o le o loo faitauina ma le filiga le Tusi a Mamona i aso taitasi ma le manatu mama i ai ma le faatuatua ia Keriso o le ua leiloa lana molimau ma ua pau ese atu. O folafolaga faavaloaga a Moronae o loo aumai faatasi ai ma le ki ina ia iloa le moni o mea uma—e aofia ai ma le maua o le tomai ia iloatino ma aloese mai pepelo a le fili. (Tagai Moronae 10:4–5.)

Ou te faafetai foi mo se Tama Faalelagi alofa ma mo Lona Alo, o Iesu Keriso. Na saunia e le Faaola le faataitaiga sili o le ala e ola ai i se lalolagi lē atoatoa ma le le talafeagai. “Ua tatou alolofa ia te ia, aua na ia muai alofa mai ia te i tatou” (1 Ioane 4:19). E le mafuatiaina Lona alofa mo i tatou. O Ia o la tatou uo sili ona faamaoni. O Lona afu “ua pei o alualu toto ua pau ifo” mo oe ma a’u foi (Luka 22:44). Na Ia faamagalo i e na foliga e le mafaamagaloina. Na Ia alofa i e le alofagia. Na Ia faia mea e le mafai e se tagata ola ona faia. Na Ia saunia se Togiola ia faatoilalo ai agasala, tiga, ma ma’i o tagata uma.

Ona o le Togiola a Iesu Keriso, ua mafai ona tatou ola ma le folafolaga e tusa lava po o a tauiviga o tatou feagai ai, e mafai lava ona tatou faamoemoe ia te Ia, “o le ua malosi aoao e laveai” (2 Nifae 31:19). Ona o Lana Togiola, ua tatou maua ai le olioli, filemu, fiafia, ma le ola e faavavau.

Na saunoa mai Peresitene Boyd K. Packer: “Vagana ni nai tagata toaitiiti lava o e ua filifili i le malaia, e leai se amio, leai se tuinanau, leai se fouvalega, leai se solitulafono, leai se liliuese, leai se agasala e le aofia ai i le folafolaga o le faamagaloga atoatoa. O le folafolaga lena o le togiola a Keriso.”²

O se tasi o mea sili ona matautia na tupu i le talaaga faaletagata o le asiasiga talai lea a le Faaola i tagata anamua o Amerika. Vaai faalemafaufau pe faapei pe ana faapea na i ai iina. A o ou mafaufau loloto i Lona alofa ma popolega i na vaega o le Au Paia na potopoto i le malumalu, na ou toe tomanatu i tamaiti taitoatasi o e e sili ona ou alofa i ai nai lo le ola. Na ou taumafai e vaai faalemafaufau atu pe faapei ou lagona i o outou tamaiti, ia molimau patino i le valaaulia a le Faaola i tamaiti taitasi ia o mai ia te Ia, ia molimau i aao faaloaloa mai o le Faaola, tu i autafa o tamaiti taitasi, taitoatasi, lagona lemu ia tulaga fao i Ona aao, ona vaai lea ia i latou taitasi o tu ma molimau mai o loo soifua o Ia! (Tagai 3 Nifae 11:14–17; tagai foi 17:21; 18:25.) O le faliu mai o tatou fanau ma fai mai, “Tina, Tama, o Ia lea!”

Ata

O le Faaola ma tamaiti

Ou te iloa pe i ai se mea i lenei lalolagi e mafai ona aumaia le fiafia ma le olioli sili nai lo le iloaina e iloa e a tatou fanau le Faaola, o le iloa latou te iloa “po o le a le puna e mafai ona latou tepa taulai i ai mo se faamagaloga o a latou agasala.” O le mea lena, i le a avea ai ma tagata o le Ekalesia, “matou te talai atu Keriso” ma matou molimau atu ia Keriso (2 Nifae 25:26).

• O le mea lena tatou te tatalo ai ma a tatou fanau i aso taitasi.

• O le mea lena tatou te faitau ai tusitusiga paia ma i latou i aso taitasi.

• O le mea lena tatou te aoao ai i latou ia auauna atu i isi, ina ia latou maua faamanuiaga o le sailia o i latou lava ao latou gauai atu i le auaunaga i isi (tagai Mareko 8:35; Mosaea 2:17).

Ao tatou tuuto atu i tatou lava i nei mamanu faigofie o le avea ma soo, ua tatou faamalosia a tatou fanau i le alofa atu i le Faaola ma se taitaiga ma le puipuiga faalelagi ao latou fetaiai ai ma matagi malolosi a le fili.

O le talalelei e faatatau moni lava i le tagata e toatasi. E faatatau i le mamoe e tasi na leiloa (tagai Luka 15:3–7); e faatatau i fafine Samaria e toatasi i le vaieli (tagai Ioane 4:5–30); e faatau i le atalii faamaumauoa e toatasi (tagai Luka 15:11–32).

Ma e faatatau i se tamaiiiti e toatasi atonu na faapea atu na te le o faalogo.

E faatatau ia i tatou taitoatasi—lo tatou le atoatoa o i ai—ia tasi ma le Faaola e pei ona tasi o Ia ma Lona Tama (tagai Ioane 17:21).

Ou te molimau atu ua i ai so tatou Tama Faalelagi alofa, e silafia i tatou i o tatou igoa? Ou te molimau atu o Iesu Keriso o le Alo soifua o le Atua soifua. O Ia o le Toatasi Na Fanaua ma o lo tatou Fautua i le Tama. Ou te molimau atu foi e oo mai le olataga e ala i Lona suafa—ma e leai lava se isi auala.

O la’u tatalo ia tuuto atu o tatou loto ma lima e fesoasoani i fanau uma a le Tama Faalelagi ia iloa o Ia ma ia lagona Lona alofa. Ao tatou faia, ua Ia folafola mai ia i tatou le olioli ma le fiafia e faavavau i lenei lalolagi ma i le lalolagi a sau. I le suafa, o Iesu Keriso, amene.