O Ai Korakorara ana Baire Atuara!
Ti a katobibiaki ni kamimiin ootan te koaua are I kantaningaia bwa ti na butimwaea rekena iroura.
Ti a kakabwaiakira ni ikotaki riki n te maungatabu ni katotobia te aonnaba iaan ana tararua ni kairiri ara burabeti ae tangiraki ae Beretitenti, Thomas Monson. Beretitenti ti tangiriko ao ti boutokaiko ma nanora ni kabane!
Inanon tataneiaiu ni maiu ngke I riki bwa te bwairati I rangi ni katan iaon mwakurin te kombiuta ma e rangi ni kanganga karaoana iaon au kombiuta. Ngke I karaoa au mwakuri n te aobiti, taan buobuoki ao taan koroboki a bon akoi ni buokai ni mwakuri.
Nikabane bitaki aikai inanon, 1994 ngke I weteaki bwa te Mataniwi ni Kabuta, ao weteakiu kanoana aanga aika tamaroa ni wakinna, ma e bon karekei naba mwakuri aika a bati mwakurin te Ekaretia n te aobiti— ni mwaiti nakon are I kantaningaia.
Ni mimiiu, bwai ni mwakuri ni barongai mwakuri n te aobiti a toka iaon te kaombiuta.
N te moan tai ni maiu, N na kataneiai ni mwakuri n au kombiuta are I bon aki ataia bwa N na kanga ni karaoia.
N te moan, e kaangaanga kamanenakin te kombiuta irou, ao e karika te kangare.
Aomata aika iai aia atatai iaon rabakau aika boou a kataia n reireinai ni kamwakura te kombiuta. A tei i akuu, a roko i aon angau, a rangi ni baititi tabonibaiia ngke a tabe n taibi iaon te kiboote.
Ko noora aron ae I tia ni karaoia? a atonga ma te kukurei, “Anne aron karaoana.”
I aki noria. Bon te bibitaki ae kaangaanga.
E bon rang kanganga au tai n reiakina kamwakuran te kombiuta.
E anaa te tai ae abwabwaki, okiokirana, taotaona n nano te kantaninga ao te onimaki ae bati, mwaitin te karaunano mairoun kaain abau, ao mwaitin te riita n tiota are I aki kaoti araia.
Ngkai, 22 te ririki imwiina, I a bwakuaku n rabakau ni kombiuta. E a reke au atureti n te iimeeri. Twitter, akaunti, ao te iteraniba n te Facebook. Iai au smartphone, te taburete, te raebutaobu, te bwai n rawetamnei. Ao, ngkai e aki rang bati n raoiroi au konabwai, n aekaia aomata aika imarenan 70 ao79 te ririki, ma I a rabakau.
Ma I a ataa te bwai teuana ae kamimi. I a rabakau kamanenaakin rabakau aika boou are I kabwaka ni karekeana
Ibukin rongorongoia aomata aika mwaiti, te itoman e birimwaaka kanga te aoti. Kanakoan taian rongorongo ao karekeana kaekaaia e kona n anai boong ao bon namwakaina naba. N te bong aei e mwananga ara rongorongo ni ngaa ni kiromita rinanon karawa ni ngaa ni mita iaan marawa n roko iroun temanna ni iteran te aonaaba are teuana, ao ngkana iai te iremwe ae tao tii tabeua te teekan, ti un ao n aki tataon nanora.
E taraa n ae bon kateia aomata: are ngkana ti tataneiai ma te bwai teuana, ae bon te bwai ae kamimi man tangiraki irouia aomata, ti kabua ara karinerine ao ni kaakeaa bongana.
Ti Karekei Koauan te Tamnei n Akea Booia?
Karekeakin rabakau aika boou n aki kabooaki ao bebeten karekeaia ngkana ko tangiria e aki rang bongana. Ma, te kananokawaki, iai iroura te aeka ni katei anne nakon karaababaan te maiu are aki toki ao reirein ana euangkerio Iesu Kristo. N ana Ekaretia Ibukia Aomata Aika Itiaki, ti anganaki baika a mwaiti. Ti a katobibiaki ni kamiimiin mwaitin te ota ao te koaua are I kantaningaia bwa ti na kukurei n are reke iroura.
Iangoia reirei n taai akekei ake a nakonako ao n taetae ma te Tia Kamaiu n Ana tai ni mwakuri n te aonaaba. Iangoa te nano ni kakaitau ao te karinerine are tia n rin inanoia ao ni kaonii aia iango ngke a Noria n uti man te ruanimate, ngke a ringii ikoakina ni Baina ao Rarikina. A na manga bon akea bitakin maiuia!
Iangoia Aomata aika Itiaki n te tai aio ake a ataa te Burabeti Iotebwa Timiti n tataekina te euangkerio ae kaokaki, I iangoa aroia n namakinna n ataia bwa te Atua e taetae ma aomata ni kaota te koaua te ataibwai iaon te aonaaba man mwengara ae te tiretio ieta.
Ma moan te bongana riki, iangoa ae ko namakinna n te moan tai are ko kakoaua ao n oota bwa boni ngkoe ni koaua natin te Atua; bwa Iesu Kristo e motinnanoa te kurakai ibukin au bure bwa ko aonga ni manga itiaki riki; bwa mwaakan te nakoanibonga e bon koaua ao e kona ni kabaeko nakoia aika ko tangiriia n akea tokina, bwa iai te burabeti ae maiu i aonaaba ni boong aikai. E aki tamaroa anne ao ni kamimi?
Katautauan aikai ni kabane, bwa e na kanga n riai bwa ngaira aomata ti na aki kukurei ni iri taraomaurin te Ekaretia? Ke te kua ni wareki booki aika tabu? I taku bwa e kona n reke ngkana tii nanora a aki namakinna rinanon te kakaitau ao te karinerine ae ana bwaintangira te Atua ae tabu man tamaroa are anganiira n akea boona. Ti kai waetata ni bitaki nakon te koaua, ma ti aki kabanei nanora nako iai n te kawai n riki bwa reirei. E mwaiti n ririki ae ti kariaia ngaira bwa ti na katikaki man aki kororaoia tabeman aika membwa n aki rimwiin te Mwatita. Ti maiuakina te maiu ae karabaaki n aanga aika kamimi ma ti aki toki ni kabwaka n atakin bonganaia ao tamaroaia.
Te Rongorongo ae Ataaki
Ngke te ataeinimwane ngai, a titirakinai raoraou aron au aro. Mwaitin te tai I moanna ni kabwarabwara te kaokoro, n aekan te Taeka n Reirei. N taai tabetai I katereterea boraoina ma aaro ni Kiritian ake tabeua. Akea mai buakon aikai ae na rang bati n anaaki nanoia iai. Ma ngkana I taekinna bwa e bon aki riai bwa te aomata e na manga kaokaki man te mate n rabwata aio, bwa e na bon uruaki te babaire ni kakukurei are korakora are karekea Tamara are i Karawa ibukiia Natina, A bon anaaki nanoia iai.
I uringa ngke I kataia n korea te babaire ni kamaiu i aon te burakibooti n te ruu n reirei n ara umwantabu, i. Frankfurt, Germany. I korei mronron ake a tei i bukin te maiu are imwain aei, te maiu ae mamate ao te karairaki n oki imwiin te maiu aei.
Ngke I mena n te ririki imarenan 13 ao 19, ao I tangiria ni kan tibwaa te rongorongo ae kakukurei. Ngke I kabwrabwarai reirei aikai n oin au taeka aika bebete, I kaonaki n te namakin ni kakaitau ibukin te Atua are tangiriia Natina, ao te Tia Kamaiu are kamaiuira ni kabane man te mate ao moone. I rang kakatonga n te rongorongo n tangira, te kukurei ao n kaantaninga.
Tabeman raoraou a taku bwa te rongorongo aei e namakinaki ataakina, e ngae ngke a aki reiakinaki bwaai aikai n reirein aia aro. Kanga e taraa n ae tia n ataaki baikai irouia bwa a koaua; n tai nako ma nanoia ae nano ni koaua bwa a tia n ataia.
Iai Kaekaana n te Ekaretia!
I kakoaua bwa aomata nako bwa teuaei ke neienne iai i nanoia tabeua taian titiraki aika moan te boongana ni kaineta te maiu, I roko ma ia? Tera bukin rokou? Tera ae na riki imwin mateu?
Aekan titiraki aikai a bon aki toki n titiraki aomata man te moan tai. Taan Rabakau aron te maiu, taan reirei, ao aomata aika a mwaatai a tia ni kabanea maiuia ao kaubwaia ni kakaei kaekaaia.
I kakaitau bwa ana eungkerio Iesu Kristo ae kaokaki e a tia ni kaekai. Kaekaan titiraki a reiakinaki n Ana Ekaretia Iesu Kristo Ibukiia Aika Itiaki ni Boong Aika Kaitira. A rang ni maataata ao a koaua ni bebete, ao are ti ti reireiniia iai ara ataei aika teniua aia ririki n te kiraati n te Tianbiim.
Taari ao mwaane aika akea tokiia ae akea moana ao akea tokina. Ti a bon kaman riki.1 Ngaira naati tamnei aika mimitong, irouia ara Karo ake i Karawa!
Ti roko man ana tabo te Uea ae Atuara Ngaira kaain te auti ni uea ae ana auti Elohim, te Moan n Rietata. Ti nakonako ma ngaia n te maiu are imwain aio. Ti ongo ngke E taetae, ti kakoaua Mimitongina, ti reiakinii Kawaina.
Ngkoe ao Ngai ti ira te Kauntira ae Rietata ike Tamara ae tangiraki e kawenea Ana baire ibukira—bwa ti na roko n te aonaaba, ni karekei rabwatara aika mamate, n reiakina te rinerine imarenan te raoiroi ao te buakaka ao n rikirake ni kawai aika bati are a na akea totokoaia.
Ngkoe ao Ngai ngke ti rinnako inanon te roki ao n rin n te maiu ae mamate aio, ti na aki manga uringa maiura are mai mwaina. A na iai totoko ao kaangaanga ao kataaki. Ma ti ataia naba bwa karekean rabwatara bon te bwai ae korakora bonganana ibukira. O, e uara ara kantaninga bwa ti na waetata n reiakinna ni karaoa te rinerine ae eti, ni kaitarai ana kariri Taatan, ao n tokin te tai te oki nakoia ara Karo aika tangiraki i Karawa
Ti ataia bwa ti na bure ao ni karaoi kairua— tao aika a rangi ni kakaiaki. Ma ti ataia bwa ara Tia Kamaiu, Iesu Kristo, e bubuti bwa e na roko iaon te aba, ni maiuakina te maiu ae aki bubure ao n anga nanona n anga oin maiuna bwa te karea ae akea tokina. Ti ataia bwa ti anga nano Nakoina, ti na kakoaua ma korakoran nanomi ni kabane n nakonako n te maiu ae raoiroi, ti kona n tebokaki ni kaitiakaki ao n teuana riki te tai n rin imatan Tamara are i Karawa.
Ma, n te onimaki inanon Ana mwakuri ni Kamaiu Iesu Kristo, ngkoe ao Ngai ti na kariaiakaki n inaomatara n Ana Baire Tamara are i Karawa.
Anne bukin menara ikai n te buraneti ae te aonnaba ae tamaroa—bukina bwa te Atua e anganiira te tai, ao ti rineia ni butimwaia. Maiura ae mamate, bon ti te aki tiku ni maan ao e na toki ni maten rabwatara. Ma te iango ae boongana bwa ngkoe ao Ngai ti na bon aki kamaunaaki. Tamneira a na bon reitinako ni maiu ao n tataninga te Mangauti—te bwai n tangira ae aki kabooaki nakoira ni kabane iroun Tamara are i Karawa are tangiraki ao Natina te Mwaane, Iesu Kristo2Tamneira ao rabwatara a na manga bootaki, n akea te maraki ao n toaraoi rabwataia.
Imwin te Mangauti, a na iai te Bong ni Motikitaeka. Are a na kamaiuaki iai ao n rin n te abanuea ae mimitong, ake a kakoaua te Atua ao ni ukeuke n rimwin Ana tua ao otenanti a na rin ni maiu n taabo aika akea tokiia are aki kona ni iangoaki mimitongiia ao n onrake n te rietata.
Bongin te Motikitaeka bwa te bong n akoi ao n tangira—te bong are naano aika uruaki a karauaki, ranimata n nanoanga a oneaki nakon ranimata ni kakaitau, bwaai ni kabane a na kaetaki.3
Eng, a na namakina te nanokawaki ae korakora ibukin te bure. Eng, a na mwaiti nanokawakira are rootakira ae korakora bukin ara kairua, nanobabara, ao ara kamaraki nano are karikira bwa ti na kabuai aanga ibukin te tai ae tamaroa ae na roko.
Ma iai irou te onimaki bwa ti na aki rauaki ti n ana motikitaeka te Atua; ti na bon kubanako riki n Raoiroina ae akea tiana, ana nanoanga, ana tituaraoi ao ana tangira ibukira, Natina.Ngkana nanora ao ara mwakuri ae raoiroi, ngkana iai ara onimaki iroun te Atua, ngkanne ti na taraa are aranna Moroni “ana tabo Iehova ae kakukurei, te Tia Motikitaeka ae akea tokina.4
Pro Tanto Quid Retribuamus
Tariu ao Mwaneu aika tangiraki, raoraou aika tatangiraki, e aki kaon nanomi ao ami iango n te kamimi ao te karinerine ni iangoan ana baire ni kakukurei Tamara ae tangiraki are tia ni katauraoia ibukira? E aki kaonira n te kukurei ae aki kona ni kabotauaki arona? n ataa mimitongin te tai ae na roko are katauraoaki ibukiia ni kabane akana a kantaninga Iehova?
Ngkana ko aki namakina te kamimi ao te kakukurei, I kaoko bwa ko na kakaea, kamatebwaia, ao ni iangoia ma te karaurau bebeten te koaua ae matoatoa n te euangkerio ae tia ni kaokaki “Katikua n am iango ma te korakora taekan te maiu ae akea tokina. 5 A na kaota aia koaua nakoim ibukin te baire ni kamaiu ae mimitong.
Ngkana ko namakina aio mai mwaina, I titirakiniko n te bong aei, “Kam [kona] n namakinna ngkai?6
N te tai ae nako, e reke au tai ni mwananga nako Belfast Meangin Ireland. Ngke I mena ikekei, I ataa ana taeka ni kanikina, are rekereke ma te motoo “Pro tanto quid retribuamus,” ke tera ae ti na anga ni kabooa mwiina n ae mwaiti?”7
I kaoi ngkami bwa kam na iangoa te titiraki aei. Tera ae ti na anga ni kabomwi ibukin raraan te ota ao te koaua are e a tia te Atua ni kabaroa nako aora?
Tamara ae moan te tangiraki e tuangiira bwa ti riai ni maiuakina te koaua are ti karekea man iran te kawai are E a tia ni katauraoia. Mangaia ae, ti na ninikoria ao n onimakina ana kairi te Tamnei. Ti a karaoa aei n ara taeka ao ara mwakuri n tibwaia ma raora rongorongon ana baire ni kakukurei te Atua aika kairaki ma ieta. A bia riki ara mwakuri bwa ara tangira ibukin te Atua ao Ibukiia natina, ngkai bon ngaia tarira ao mwanera. Aio moan waakin te bwai ae ti kona ni karaoia ni kabomwi n ae mwaiti.
N te bong teuana “a na katorobubua ni waae ni bane, ao a na bane neewe ni karaoiroia” bwa ana kawai te Atua a riai ao ana baire e kororaoi.8 Ibukimi ao ngai, karika te bong anne bwa te bong aio. Ti na katanoata ma Iakobwa ngkoa “O ai korakorara ana baire Atuara!9
N aio I kakoaua ma nanou ni kakaitau nakon Tamara are i karawa, ngkai I angani ngkami au kakabwaia, n aran Iesu Kristo, amen