Au Peb tus Vajtswv txoj Hau Kev Zoo Npaum Li Cas!
Nyob ib ncig ntawm peb muaj qhov kaj thiab qhov tseeb ntau heev es kuv xav paub saib peb puas saib tej ntawd rau nqi tiag tiag.
$Peb tau koob hmoov vim peb rov qab los koom ua ke nyob hauv lub rooj sab laj no raws li peb tus yaj saub thiab tus Thawj Tswj Hwm, Thomas S. Monson, coj. Thawj Tswj Hwm, peb hlub koj thiab peb txhawb nqa koj kawg siab kawg ntsws!
Thaum kuv ua ib tug neeg tsav nyob hoom, kuv tau cia siab rau tej tshuab koospistawj ntau heev kom thiaj tsav nyob hoom tiam sis feem ntau kuv tsis kov ib lub tshuab koospistawj kuv tus kheej. Thaum kuv ua hauj lwm ua ib tug tub lag luam, cov neeg pab cuam tau pab kuv khiav tej hauj lwm koospistawj ntawd.
Tag nrho tej no hloov thaum xyoo 1994, thaum kuv raug hu los ua ib tug Tuam Thawj Coj. Kuv txoj hauj lwm tshiab no kuj muaj cib fim ntau kom pab lwm tus neeg, tiam sis kuv kuj yuav tsum ua hauj lwm hauv lub Koom Txoos lub hoob kas ntau—ntau dua kuv muaj peev xwm xav.
Ua rau kuv xav tsis thoob uas lub cuab yeej tseem ceeb tshaj kom saib xyuas kuv tej hauj lwm yog siv ib lub koospistawj rau kuv tus kheej.
Thawj zaug hauv kuv lub neej, kuv yuav tsum siv ib lub koospistawj. Yeej txawv heev rau kuv.
Txij thaum kuv nyuam qhuav pib siv, kuv thiab lub koospistawj tsis tshua sib raug zoo.
Cov neeg txawj siv koospistawj sim qhia kuv saib yuav ua li cas siv. Lawv sawv ntawm kuv lub nraub qaum thiab thaum twg kuv xav tau kev pab, lawv mam li cev tes mus kov lub ntaus ntawv.
“Ua li ntawd xwb ne,” lawv hais yam zoo siab heev. “Puas nkag siab?”
Kuv tsis nkag siab li. Yog ib yam nyuaj heev rau kuv.
Kuv kawm qeeb qeeb heev li.
Yeej siv sij hawm ntev. Kuv yuav tsum rov qab kov koospistawj ntau zaus, ua siab ntev, cia siab thiab muaj siab ntseeg ntau heev. Kuv tus poj niam tau hais lus txhawb nqa kuv, thiab kuv haus ntau liv dej qab zib uas kuv yuav tsis qhia npe tawm ntawm no.
Nim no, tom qab 22 xyoos, tej khoom koospistawj nyob ib ncig ntawm kuv. Kuv muaj qhov chaw email, ib qho account Twitter, thiab ib phab ntawv Facebook. Kuv muaj ib lub xov tooj smart phone, ib lub tshuab tablet, ib lub tshuab laptop, thiab ib lub koob thaij huj digital. Thiab, txawm tias kuv tej kev txawj kov koospistawj piv tsis tau rau ib tug me nyuam xya xyoo, los rau ib tug neeg muaj xya caum tawm xyoo, kuv kov tau zoo dog dig.
Tiam sis kuv yeej pom ib yam ntxim xav txog. Kuv yim txawj kov technology, kuv yim xav tias yeej los muaj li ntawd xwb.
Rau tib neeg zaj liv xwm feem ntau, tej kev sib txuas lus mas ceev npaum li ib tug nees khiav tau. Qhov uas xa xov thiab txais lus teb yeej siv sij hawm li ob peb hnub los yog ob peb hlis. Niaj hnub nim no peb tej tsab xa xov mus ib txhiab mais mus saum qaum ntuj los yog ib txhiab mev mus hauv qab thu dej kom ncav tau ib tug neeg nyob lub ntuj tim ub, thiab yog tias muaj dab tsi tab kaum tej kev xa xov no, peb txawm nyuaj siab thiab tsis muaj siab ntev tos li.
Ua li no yeej yog ib yam uas tib neeg ua: thaum peb yim paub txog ib yam dab tsi twg, twb yog ib yam ua rau peb xav tsis thoob, peb maj mam xav hais tias qhov ntawd yeej zoo li qub es nws tsis ua rau peb xav tsis thoob li lawm.
Peb Puas Saib tej Qhov Tseeb ntawm Sab Ntsuj Plig Ua Ib Yam Qub?
Qhov uas peb tsis saib peb tej tshuab khoom uas muaj niaj hnub nim no tseem ceeb tej zaum yuav tsis ua li cas. Tiam sis, ntxim tu siab uas qee zaum peb coj cwj pwm zoo li yam li ntawd rau tej lus qhuab qhia ntawm Yexus Khetos txoj moo zoo. Hauv lub Koom Txoos, peb tau txais ntau yam nplua mias. Nyob ib ncig ntawm peb muaj qhov kaj thiab qhov tseeb ntau heev es kuv xav paub saib peb puas saib tej ntawd rau nqi tiag tiag.
Cia li xav txog cov thwj tim thaum ntxov uas tau nrog tus Cawm Seej taug kev thiab sib tham thaum Nws ua neej nyob hauv lub ntiaj teb. Tej zaum cov thwj tim thaum ub ua Vajtswv tsaug thiab hawm Nws thaum lawv pom tias Yexus tau sawv hauv qhov tuag rov qab los, thaum lawv kov tej qhov txhab hauv Nws ob txhais tes. Lawv lub neej yeej hloov lawm mus ib txhis li!
Cia li xav txog cov Ntseeg thaum ntxov hauv lub caij nyoog kawg no uas paub tus Yaj Saub Yauxej thiab hnov nws qhia txoj moo zoo txum tim rov qab los. Cia li xav saib lawv yuav zoo siab npaum li cas paub hais tias daim ntaub thaiv nruab nrab ntawm lub ntuj thiab lub ntiaj teb tau qhib plho dua ib zaug ntxiv, es qhov kaj thiab qhov kev txawj ntse tau tshwm sim tuaj roos lub ntiaj teb los ntawm peb lub vaj tse saum ntuj ceeb tsheej los.
Qhov zoo kawg, cia li xav saib nej xav li cas thaum thawj thawj lub sij hawm uas nej ntseeg thiab to taub hais tias nej yog Vajtswv ib tug me nyuam tiag; hais tias Yexus Khetos tau raug txom nyem theej nej tej kev txhaum kom nej thiaj huv dua; hais tias lub hwj chim pov thawj hwj muaj tseeb tiag thiab muab tau nej thiab nej cov neeg uas hlub sib khi ua ke rau lub neej no thiab lub neej nyob mus ib txhis; hais tias muaj ib tug yaj saub ua neej nyob hauv lub ntiaj teb no niaj hnub nim no. Puas yog qhov no zoo kawg nkaus thiab ntxim xav tsis thoob li?
Xav txog tej no, puas yuav muaj ib lub sij hawm uas peb yuav tsis tshua zoo siab tuaj mus koom peb lub Koom Txoos tej kev teev tiam? Los yog nkees nkees nyeem cov vaj lug kub? Tej zaum muaj li no tsuas yog tias peb tej siab tej ntsws hnov tsis tau qhov zoo kom thiaj ua Vajtswv tsaug thiab hawm Nws rau tej txiaj ntsim dawb ceev thiab zoo uas Nws muab pub rau peb. Muaj tej qhov tseeb uas hloov tau tib neeg lub neej nyob ntawm peb qhov muag tiag nyob ntawm peb tej tes, tiam sis qee zaum peb tuav npom theeb rau ntawm txoj kev peb taug ua thwj tim. Feem ntau peb pheej xav txog qhov uas peb cov khub mej zeej tsis zoo tag nrho es peb tsis ua raws li tus Xib Hwb tus yam ntxwv. Peb taug ib txoj kev uas muaj tej pob zeb ci muaj nqis, tiam sis peb cais tsis tau tej pob zeb ntawd tawm ntawm tej me nyuam pob zeb uas tsis muaj nqis.
Ib Zaj Lus Qub
Thaum kuv tseem yau, kuv cov phooj ywg yuav nug kuv txog kuv txoj kev ntseeg. Feem ntau kuv yuav pib piav txog tej yam txawv lwm tus ntseeg, ib yam li Lo Lus Txawj Ntse. Ho lwm lub sij hawm kuv yuav hais txog tej yam uas zoo ib yam li lwm txoj kev ntseeg Khetos. Tej yam no tsis ua rau lawv txaus siab ntau pes tsawg. Tiam sis thaum kuv tham txog peb Leej Txiv Saum Ntuj Ceeb Tsheej txoj kev zoo siab uas Nws npaj tseg rau peb sawv daws Nws cov me nyuam, lawv puav leej tig pob ntseg mloog.
Kuv nco tias kuv sim teeb txoj kev cawm seej rau ntawm daim kab das hauv ib hoob qhia ntawm peb lub tsev teev ntuj nyob hauv Frankfurt, Yelemes Teb. Kuv sau tej voj voog uas piv tau rau lub neej ua ntej lub neej no, lub neej no, thiab qhov uas peb rov qab mus rau peb Niam thiab Txiv Saum Ntuj Ceeb Tsheej tom qab lub neej no.
Ua ib tug tub hluas, kuv tau nyiam qhia tawm tsab xov xwm tseem ceeb no. Thaum kuv piav txog tej ntsiab cai siv kuv cov lus, kuv lub siab lub ntsws yuav zoo siab ua Vajtswv tsaug uas hlub Nws cov me nyuam thiab rau ib tug Cawm Seej uas txhiv peb sawv daws dim ntawm txoj kev tuag thiab lub ntuj txiag teb tsaus. Kuv zoo siab heev vim yog zaj lus qhia txog kev hlub, kev xyiv fab, thiab kev cia siab.
Kuv cov phooj ywg ib txhia yuav hais tias zaj lus no yog zoo li ib zaj lus uas lawv tau hnov dua, txawm tias yeej tsis tau kawm tej lus qhuab qhia ntawd hauv lawv tej kev ntseeg teev. Zoo nkaus li lawv twb paub hais tias tej yam no muaj tseeb, ib yam li kuv tsom teeb rau ib yam uas twb muaj hauv lawv lub nruab siab lawm.
Peb Muaj Lus Teb!
Kuv ntseeg hais tias txhua tus tib neeg muaj tej lus nug hais txog lub neej no hauv lawv nruab siab. Kuv tuaj qhov twg tuaj? Vim li cas kuv los nyob no? Yuav muaj li cas tom qab kuv tas sim neej?
Tib neeg ntiaj teb tau nug tej lus nug no txij thaum chiv keeb los. Cov tub laj lim, kws tshawb fawb, thiab kws txuj tau siv sij hawm tas sim neej thiab nyiaj txiag ntau nrhiav kom tau lus teb.
Kuv zoo siab heev uas Yexus Khetos txoj moo zoo uas txum tim rov qab los muaj tej lus teb rau cov lus nug nyuaj kawg hais txog lub neej no. Cov lus teb no yog qhia hauv Yexus Khetos lub Koom Txoos ntawm Tsoom Haiv Neeg Ntseeg ntawm Hnub Nyoog Kawg. Cov lus no muaj tseeb, ncaj ncees, thiab yooj yim to taub. Cov lus teb no yog los ntawm saum ntuj los, thiab peb qhia tej lus tseeb no rau cov me nyuam muaj peb xyoos hauv hoob kawm Sunbeam.
Kuv cov kwv tij thiab cov muam, peb yog neeg nyob mus ib txhis li, tsis muaj qhov pib tsis muaj qhov kawg. Peb yeej los nyob txawm.1 Peb yog cov me nyuam ntsuj plig ntawm Niam Txiv Saum Ntuj Ceeb Tsheej!
Peb los ntawm tus Tswv peb tus Vajtswv lub nceej vaj los. Peb yog me nyuam ntawm lub vaj tse Elauhis, tus Vajtswv Siab Tshaj Plaws. Peb tau nrog Nws mus kev hauv peb lub neej ua ntej yug log hauv ntiaj teb no. Peb hnov Vajtswv Leej Txiv hais lus, ua tim khawv pom nws lub yeeb koob, thiab kawm Nws txoj hau kev.
Nej thiab kuv tau koom ib lub Tuam Rooj Sab Laj uas nyob ntawd peb Leej Txiv tau qhia txog Nws lub tswv yim rau peb txhua tus—hais tias peb txhua tus yuav los rau hauv lub ntiaj teb, txais ib lub cev nqaij daim tawv, kawm xaiv qhov zoo tawm ntawm qhov phem, thiab loj hlob tuaj zoo tshaj txhua yam.
Thaum peb los dhau daim ntaub thaiv los rau hauv lub neej no, peb paub hais tias peb yuav tsis nco qab lub neej ua ntej lub neej no. Yuav muaj kev tawm tsam, kev ntxhov siab, thiab kev haub kev ntxias. Tiam sis peb paub hais tias qhov uas peb tau ib lub cev nqaij daim tawv tseem ceeb heev. Auj, peb cia siab hais tias peb yuav kawm xaiv qhov yog, tiv tau Ntxwg Nyoog tej kev haub kev ntxias, thiab thaum kawg rov qab mus nrog peb niam txiv saum ntuj ceeb tsheej nyob ua ke dua.
Peb paub tias peb yuav poob yuam kev ua txhaum—tej zaum ua txhaum loj. Tiam sis peb kuj paub hais tias peb tus Cawm Seej, Yexus Khetos, tau cog lus tias Nws yuav nqis los hauv lub ntiaj teb no, ua neej nyob tsis ua txhaum, thiab yeem txo Nws txoj sia ua txoj kev txi theej peb sawv daws lub txhoj. Peb paub hais tias yog tias peb muab peb lub siab rau Nws, tso siab rau Nws, thiab rau rau siab taug txoj kev ua thwj tim, peb yuav raug ntxuav tau thiab rov qab mus ntsib tau peb Leej Txiv Saum Ntuj Ceeb Tsheej.
Yog li ntawd, vim peb ntseeg rau ntawm Yexus Khetos txoj kev txi, nej thiab kuv, raws li peb txoj kev ywj siab xaiv, tau lees txais Leej Txiv Saum Ntuj Ceeb Tsheej lub tswv yim.
Yog vim li ntawd peb thiaj nyob hauv lub ntiaj teb zoo nkauj no—vim rau qhov uas Vajtswv muab lub cib fim rau peb, thiab peb xaiv los ua raws li Nws lub tswv yim. Tsis kav, peb lub neej hauv lub ntiaj teb no tsis ntev thiab yuav xaus thaum peb tas sim neej. Tiam sis lub ntsiab ntawm nej thiab kuv yeej yuav tsis raug puas tsuaj mus. Peb sab ntsuj plig yuav tseem muaj sia thiab yuav tos txoj Kev Sawv Rov Los—ib lub txiaj ntsim pub dawb rau txhua tus los ntawm peb Leej Txiv Saum Ntuj Ceeb Tsheej thiab Nws Leej Tub, Yexus.2 Thaum lub sij hawm Sawv Rov Los, peb tej ntsuj plig thiab peb tej cev nqaij daim tawv yuav rov qab los sib npuab, tsis muaj mob nkeeg thiab zoo tag nrho.
Tom qab txoj Kev Sawv Rov Los, yuav muaj lub Hnub Txiav Txim. Muaj tseeb uas thaum kawg txhua tus neeg yuav raug cawm dim thiab txais ib lub nceeg vaj uas muaj yeeb koob, lawv cov uas tso siab rau Vajtswv thiab rau rau siab ua raws li Nws tej kev cai thiab tej kab ke yuav txais lub neej nyob mus ib txhis li uas muaj yeeb koob uas ua rau yus xav tsis thoob li.
Hnub Txiav Txim no yuav yog ib hnub uas muaj kev hlub tshua thiab kev hlub ntau—ib lub hnub thaum tej siab ntais rhe yuav rov qab kaj, thaum tej kua muag nyuaj siab yuav pauv mus ua kua muag zoo siab, thaum txhua yam yuav kho kom zoo tag nrho.3
Muaj tseeb tiag, yeej yuav muaj kev tu siab vim yog tej kev txhaum. Muaj tseeb tiag, yuav muaj kev khuv xim thiab kev nyuaj siab ntau vim yog peb tej kev txhaum, peb tej kev ua ruam, thiab peb tej kev tawv ncauj uas ua rau peb xiam tej cib fim kom tau ib lub neej yav tom ntej uas zoo kawg.
Tiam sis kuv tso siab hais tias tsis yog peb yuav txaus siab rau Vajtswv txoj kev txiav txim xwb; tiam sis peb kuj yuav xav tsis thoob thiab zoo siab vim yog nws txoj kev tshav ntuj, kev hlub tshua, kev ua siab zoo, thiab kev hlub rau peb, Nws cov me nyuam. Yog tias peb tej kev xav thiab tej hauj lwm tau zoo, yog tias peb muaj siab ntseeg rau ntawm ib tug Vajtswv muaj txoj sia nyob, ces peb yuav cia siab tau rau qhov uas Maulaunais hu ua “Yehauvas tus zoo kawg nkaus lub rooj txiav txim, tus Txiav Txim uas Nyob Mus Ib Txhis.”4
Pro Tanto Quid Retribuamus
Kuv cov kwv tij thiab cov muam, kuv cov phooj ywg, puas yog peb xav tsis thoob thaum peb xav txog peb Leej Txiv Saum Ntuj Ceeb Tsheej txoj kev zoo siab zoo kawg uas Nws tau npaj rau peb? Puas yog nej txhua tus xyiv fab heev paub txog lub neej yav tom ntej uas npaj tseg rau tag nrho lawv cov uas tos ntsoov tus Tswv?
Yog tias nej tsis tau hnov los yog xav txog tej kev xyiv fab no, kuv caw nej los nrhiav, kawm, thiab xav txog tej qhov tseeb ntawm txoj moo zoo uas txum tim rov qab los. “Cia tej kev zoo ntawm lub neej nyob mus ib txhis li roos nej tej siab tej ntsws.”5 Cia tej no ua tim khawv rau nej hais txog txoj kev cawm seej los saum ntuj los.
Yog tias nej twb tau hnov tej no dua, kuv nug nej niaj hnub nim no, “[Nej] puas xav li ntawd nim no?”6
Tsis ntev tas los no kuv tau muaj lub cib fim mus tim teb chaws Belfast, Ireland. Thaum kuv nyob ntawd, kuv pom Belfast lub Cim Tiv Thaiv, uas muaj cov lus hais tias “Pro tanto quid retribuamus,” los yog “Peb yuav muab dab tsi pub pauv qhov uas peb txais lawm ntau?”7
Kuv caw peb txhua tus los xav txog lo lus nug no. Peb yuav muab dab tsi pub rau Vajtswv pauj tau qhov kaj thiab qhov tseeb uas Vajtswv tau muab pub rau peb?
Peb Leej Txiv Saum Ntuj tsuas thov kom peb ua neej raws li qhov tseeb uas peb tau txais thiab hais tias peb taug kev raws txoj kev uas Nws tau npaj tseg. Yog li ntawd, cia peb ua siab loj thiab tso siab rau tus Ntsuj Plig txoj kev coj. Cia peb faib txoj moo zoo hais txog Vajtswv txoj kev zoo siab rau lwm tus neeg. Cia peb txoj kev hlub Vajtswv thiab Nws cov me nyuam coj peb mus qhia peb cov kwv tij nus muag. Nov yog qhov pib ntawm tej yam peb ua tau kom thiaj pauj tau tej koob hmoov ntau uas peb tau txais.
Muaj ib hnub twg “txhua lub hauv caug yuav txhos, thiab txhua tus nplaig yuav lees” hais tias Vajtswv tej kev ncaj ncees thiab Nws lub tswv yim zoo tag nrho.8 Rau nej thiab kuv, cia hnub ntawd yog hnub no tiag. Cia peb qw nrov, ua kev nrog Yakhauj yav thaud hais tias, “Auj saib peb tus Vajtswv lub tswv yim zoo npaum li cas!”9
Kuv ua Vajtswv tsaug thiab ua tim khawv txog tej no, thiab kuv foom koob hmoov rau nej, los ntawm Yexus Khetos lub npe, amees.