O Fuhkah Woiyacn Plwacn luhn God Lasr!
Kuht rauniyucklac ke luhpan lut wolacna luhn kahlwem ac ma pwacye ma nga nuhnkuh fin kuht tarilacna ke ma lasr uh.
Kuht arulacna ahkinsewowoyeyuck in sifil tuhkweni ke toeni luhn facluh nohfohn se inge ye kolyuck luhn mwet pahluh ac Prestuhn sacohk lasr, Thomas S. Monson. Prestuhn, kuht luhngse kom ac kuht tahpuhk kom ke insiacsr nohfohn!
Ke moul in orekma luhk oacna sie pilot ah, nga luhlahlfongi yohk ke suwohswohs ac kuh in orekma ke ohiyacn computer uh tuhsruhk suhkwac etuh in orekmakihn computer nuhtihk sifacna uh. Ke orekma luhk in ohfohs oacna sie executive, oasr mwet kahsruh ac sihm kuhlwacnglacna luhk suc kahsrweyuc ke orekma inge.
Ma inge nohfohn eklac ke 1994 ah, ke nga pahngyak oacna sie General Authority. Kunohkohn luhk uh use pacl wolacna puhs in luti, tuhsruhk oacyacpac wi orekma yohk ke ohfohs luhn Alu uh—puhs likina nga kuh in nuhnkuh.
Ke lut luhk, kuhfa na pwacye in ahkfahsrye wo orekma luhk uh pa sie computer nuhtihk sifacna.
Ke pacl se emet in moul luhk, nga muhtwacwacack in etwaclah ac muhtwacwacack orekmakihn ma se inge ma nga tiac etuh kuhtwena ma kac.
Ke muhtwacwacackiyac ah, nga ac computer nuhtihk uh tiacna insese.
Mwet suhmaht ke technology uh srihke in lutiyuc ohiyacn orekmakihnyacn computer uh. Eltahl ac tu na tukuk, sang paholos ahluhkwelah finpihsuck, kufun paholos sana pwacye arlacna pihsrpihsr ke elos taip ke kiport uh.
“Liye?” eltahl ac fahk arlac yuckihn. “Kom ac oruh angwe.”
Nga tiacna liye. Ma inge sie eklac na upac.
Upac na pwacye nuh sihk in etwaclah orekmakihnyen computer uh.
Ma inge eis pacl yohk, kalweniyuck, mongfihsrwacsr, ma na yohk ke finsrak ac luhlahlfongi; ahkkweyeyuck puhs sin muhtwacn kiyuck uh; ac tin in kola diet na puhs ma ngwac tiac fahk.
Ingena, yac 22 tohkoh, nga rauniyucklac ke computer technology. Oasr email address se luhk, Twitter account se, ac Facebook page se. Oasr smartphone se, tablet se, laptop se, ac digital camera se nuhtihk. Ac, ke etuh luhk ke ma inge tiacna apkuhran nuh ke etuh luhn sie tuhlihk yac itkohsr, nuh sin sie mwet mahtuh matwac, nga oruh wo pacna.
Tuhsruhk nga akihlen sie ma arlac usrnguck. Ke yohkaclihk etuh luhk in orekmakihn uh, srihkeni luhngse luhk in orekmakihn.
Ke sie ip yohk ke ma mahtuh luhn mwet uh, aetuhi uh sikyak ke muhiyen soko ohsr. In suhpwaclah sie pweng ac eis sie top kuh in sun lwen kuh finne mahlwem. Mihsenge pweng lasr uh som mael tausin nuh yen engyeng uh kuh mita tausin ye meoa uh in sun sie mwet ke ipin acn sahyac ke facluh, ac fin oasr wetoklac se ke finne seconds na ekahsr, kuht ac kasrkuhsrakwack ac semuhtwengyak.
Oacna in ohiyac se luhn mwet uh: ke kuht pahlah ke ma se uh, finne sie ma usrnguck kuh mokleyuck, ac wacngihnlac atacn kaksahk lasr ac oruh oacna sie ma na mah.
Yac Kuht Pihlesruh Ma Pwacye ke Ma luhn Nguhn uh?
Pihlesruh technology ac ma oasr pacl inge uh kuh in tiac arlac yohk srihpac. Tuhsruhk, ke ahsor, kuht kuhtuh pacl uh oasr lasr kain atac sacn ke mwe luti ma pahtpaht ac wowo ke wosasuc luhn Jisus Kraist uh. Ke Alu luhn Jisus Kraist, utuckuh ma yohk nuh sesr. Kuht rauniyucklac ke luhpan moklweyuck wolacna luhn kahlwem ac ma pwacye ma nga nuhnkuh fin kuht tarilacna ke ma lasr uh.
Nuhnkuh ke mwet tuhma lutlut emet ah suc fahsr ac sramsram yurin Mwet Lahngo ke pacl in luti Lal facluh ah. Nuhnkwaclah tarilacna ac muhtahl ma utyak nuh insiaclos ac nwacklah nankwaclos ke elos Liyacl otyak liki kuclyuck sac, ke elos puhla kihnet ke pahol ah. Moul lalos ac tiac oacna met ah!
Nuhnkuh ke Mwet Luhlahlfongi emet ke fihl in pacl se inge suc etwacl Mwet Pahluh Joseph Smith ac lohngohl luti wosasuc fohlohkyak ah. Motkwelah ohiyac ma elos puhlakihn in etuh lah lihsrlihsr inmahsrlon kuhsrao ac facluh sifilpac oasri, sang kahlwem ac etwacack nuh facluh ke lohm celestial sesr lung.
Tuhsruhk yohk srihpac nuh kwewa, nuhnkuh ke ohiyac kom puhla ke pacl se emet kom luhlahlfongi ac kahlwem kac lah kom tuhlihk nuhtin God ah; lah Jisus Kraist El kena in kweok ke ma koluk lom kom in kuh in sifil nwacsnwacslah; tuh kuh luhn pristut sacn pwacye ac kuh in kapri komi nuh sin mwet kom luhngse an nuh ke pacl ac nuh tok ma pahtpaht; lah oasr sie mwet pahluh moul fin facluh mihsenge. Yac ma ingacn tiac ma wolacna ac usrnguck se?
Motko nohfohn ma inge, ohiyac fuhkah ma kuht ke mwet nuh kwewa uh in tiac pwacrack ke wi ahkfuhlwactyeyacn kuhlwacnsap ke Alu lasr uh? Kuh in ullac ke riti ma suhmuhslah muhtahl uh? Nga muh ma inge kuh in sikyak muhkwena fin insiacsr koflah puhla tarilacna ac kaksahk ke mwe sang muhtahl ac wolacna God El use nuh sesr uh. Fihsrwacsr ac sa nuh sesr in eis ma pwacye ke moul eklac uh, tuhsruhk kuht wacwact na ke inkacnek luhn mwet tuhma lutlut uh. Puhslac pacl kuht sifacna lusrongkuhtlac ke sesuwohs luhn mwet wiyacsr uh sahyacn in ukwe srihkasrak luhn Mwet Kol lasr. Kuht moulkihn sie moul sesseslah ke pacl wowo na usrnguck tuhsruhk kwacna tiac akihlen yohk srihpac la uh.
Sie Pweng Etweyuck
Ke nga sie mukul fuhsr ah, kawuck luhk ah ac siyuck ke alu luhk uh. Nga kwacna muhtwacwacack in ahkuhtweyac ma siena kac uh, ma oacna Kahs in Lahlmwetmwet. Kuhtuh pacl uh ngwac ahkyohkye ma oacna sie ke alu Kristin sahyac uh. Wacngihn ke ma inge ahkpwacryaclosyak upac. Tuhsruhk ke nga sramsram ke plwacn wolacna luhn engan Pahpah tuhmasr Inkuhsrao El use nuh sesr ke tuhlihk Nahtuhl uh, nga eis lohacng lalos uh.
Nga esam ke srihke in srolwaclah plwacn in molwelah sac ke johkport lun kuhlahsrum ke lohm alu lasr fin acn Frankfurt, Germany. Nga oraclah raun ma ahol moul met liki moul se inge, moul suhkawihl, ac fohlohk nuh yurin Ninac Pahpah tuhmwacsr Inkuhsrao tukun moul se inge.
Ke nga sie mwet fuhsr ah nga luhngse in akacsruhi pweng na pwacr se inge. Ke nga ahkuhtweyac ip yohk inge ke kahs fihsrwacsr luhk sifacna, insiuck nwacnwaclah ke tarilacna nuh sin sie God suc luhngse tuhlihk Nahtuhl, ac sie Mwet Lahngo suc molikuhtlac nohfohn liki misac ac hell. Nga yuckihn na pwacye pweng se inge ke luhngse, engan, ac finsrak.
Kuhtuh sin kawuck luhk ah fahk lah pweng se inge elos puhlakihn pac, finne ma inge sonna lutiyuck ke ma etweyuck ke alu lalos ah. Oacna elos in nuh etuh na lah ma inge pwacye, oacna ngan ahkacsmakihnyaclos ke kuhtuh ma elos etuh tari pacl nuh kwewa ke insiaclos.
Oasr Top Lasr!
Nga luhlahlfongi lah mwet nuh kwewa us insiaclos kuhtuh kain kihsen siyuck yohk srihpac ke moul uh sifacna. Nga tuhkuh oyac? Efuh nga oasr inge? Meac ac sikyak tukun nga misac?
Kain in kihsen siyuck inge siyuckyuck sin mwet uh e ke na muhtwacwacyacn pacl uh. Mwet lutlut ke ma pwacye, mwet suhmaht, ac mwet yohk etuh la eis pacl yohk ke moul ac pacl lalos suk top uh.
Nga tarilacna lah wosasuc fohlohkyak luhn Jisus Kraist oasr top kac nuh ke kihsen siyuck upac emet ke moul uh. Top inge lutiyuck ke Alu luhn Jisus Kraist luhn Mwet Luhlahlfongi ke Lwen-sahflah uh. Top inge uh pwacye, kahlwem, suwohs, ac fihsrwacsr in kahlwem. Top inge uh ma moklweyuck, ac kuht luti nuh sin tuhlihk matwac yac tolu ke kuhlahs luhn Sunbeam uh.
Tamuhlwel ac tahmtahel, kuht mwet ma pahtpaht, wacngihn muhtwacwacackiyac kuh sahflahiyac. Kuht oasr pacl nuh kwewa.1Kuht na pa tuhlihk nguhn nuhtihn Pahpah Ninac wolacna, kawihl, ac kuhlacna Inkuhsrao!
Kuht tuhkuh ke acn in nuhnuhnkuh inkuhsrao luhn Leum God lasr. Kuht ma ke lohm fuhlwact sel Elohim, Leum God Fuhlwactlacna. Kuht fahsr weluhl ke moul se met lasr ah. Kuht lohng El sramsram, lohoh ke wolacna Lal, luti ke inkacnek Lal.
Nga ac kowos wi sie Miting Luhlahp ma Pahpah luhngse tuhmasr El ahkkahlwemye plwacn Lal nuh sesr—lah kuht fah tuhkuh nuh facluh, eis mahno uh, lutlut in sulaclah inmahsrlon ma wo ac koluk, ac kapkapwack ke inkacnek ma koflah in orek sahyac.
Ke kuht ahluhkwelah lihsrlihsr sac ac utyak nuh ke moul in mahno se inge, kuht etuh lah kuht fah koflah in esam moul se met ah. Ac fah oasr kihsrucngyac ac ma upac ac mwe sruhf. Tuhsruhk kuht oacyacpac etuh lah in eis sie mahno el ma na yohk srihpac se nuh sesr. O, fuhkah luhpan finsrak lasr tuh kuht in sa lotwelah in oraclah sulaclah pwacye, lain mwe sruhf luhn Setuhn, ac sie pacl fohlohk nuh yurin Ninac Pahpah sacohk tuhmasr Inkuhsrao.
Kuht etuh lah kuht fah oruh ma koluk ac tahfonglac—sahp finne ma upac uh. Tuhsruhk kuht etuh pac lah Mwet Lahngo lasr, Jisus Kraist, El olwelah in tuhkuh nuh facluh, moulkihn moul nwacsnwacs, ac sifacna sang moul Lal nuh ke sie kisac ma pahtpaht. Kuht etuh lah kuht fin sang insiacsr in pwacyena nuh sin Leum, luhlahlfongwel, ac kwacfeacng ke kuhiyen insiacsr nohfohn in fahsr ke inkacnek luhn mwet tuhma lutlut, kuht fah owolac nwacsnwacs ac sifilpac utyak nuh ye muhtuhn Pahpah luhngse tuhmasr Lucng.
Na, ke luhlahlfongi ke Iwaclah luhn Jisus Kraist, kom ac nga sukohsohk, ke kena sukohsohk lasr, plwacn luhn Pahpah Lucng.
Pa oruh kuht oasr facluh kahto se inge uh—ke srihpen God El use nuh sesr pacl wowo, ac kuht sulaclah in eis. Moul lasr fin facluh, tuhsruhk, finne kihtin pacl na ac fah sahflah ke misac luhn mahnosr. Tuhsruhk nguhnnguhn in kom ac nga fah tiacna kuhnausyucklac. Nguhnasr fah kalweni in moul ac sano Sifil Moulyak—sie mwe sang sukohsohk nuh sin mwet nuhkwewa sin Pahpah luhngse tuhmasr Lucng ac Wen Nahtuhl, Jisus Kraist.2 Ke Pacl in Sifil Moulyak uh, nguhnasr ac mahnosr fah sifilpac fahsrweni, sukohsohklah liki ngal ac suhfasiyen mahno uh.
Tukun Sifil Moulyak, ac fah oasr sie Lwen in Nuhnuhnkuh. Ke ma nuh kwewa fah moliyucklac ac eis sie tohkohsrahi luhn wolacna, mwet suc luhlahlfongi God ac suk in ukwe masap Lal ac akwuck uh fah moul ke ma pahtpaht ma koflah in nuhnkweyuck ke wolacna ac sesseslah ke fuhlwactiyac.
Lwen in Nuhnuhnkuh sacn ac fah sie lwen pahkomuhta ac luhngse—sie lwen ke inse muhsahl uh ac onweyucklac, ke sronin muhta ahsor uh ayaollac ke tarilacna, ke ma nuh kwewa fah oreklac suwohs.3
Ahok, ac oasr puhla ahsor yohk ke srihpen ma koluk. Ahok, ac fah oasr auli ac finne kasrkuhsrak ke srihpen tahfonglac lasr, lahlfon lasr, ac utuck nuhnak lasr ma oruh kuht in tiac puhla pacl wowo nuh ke pacl wowo fahsruh uh.
Tuhsruhk nga luhlahlfongi lah kuht ac tiac falkihn muhkwena ke nuhnuhnkuh luhn God, kuht fah oacyacpac lut ac sesseslah ke luhng kuhlwacng, pahkotwen, kuhlwacng, ac luhngse ma pahtpaht Lal nuh sesr, tuhlihk Nahtuhl. Fin kena ac orekma lasr uh wo, fin oasr luhlahlfongi lasr ke God moul se, na kuht kuh in rahrahlac nuh ke ma Moroni el pahngon “nien nuhnuhnkuh luhn Jehovah kuhlwacna, Mwet Nuhnuhnkuh Ma Pahtpaht.”4
Pro Tanto Quid Retribuamus
Tamuhlwel ac tahmtahel sacohk wiyuck, kawuck sacohk luhk, yac insiyacsr ac nuhnak lasr uh tiacna nwacnwaclah ke usrnguck ac kaksahk in nuhnkuh ke plwacn wolacna luhn engan Pahpah tuhmasr Inkuhsrao El ahkolah nuh sesr uh? Yac ma inge tiac nwek kuhtlac ke engan ma tiacna kuh in sruhmuhnyuck in etuh wolacna luhn pacl fahsruh ma ahkoeyucklac nuh sin mwet nuh kwewa suc sano na Leum uh?
Kowos fin soenna puhla kain usrnguck ac engan uh, nga suli kowos in suk, lutlut kac, ac motko ma pwacye fihsrwacsr ac yohk ke wosasuc fohlohkyak uh. Motko ke yohk srihpaciyacn moul ma pahtpaht uh.”5 Lwelah ma inge in fahkwack luhlahlfongi nuh suwos ke plwacn muhtahl luhn molwelah.
Kowos fin tuh puhla ma inge met, ngwac siyuck suwos mihsenge, “Yac [kowos] kuh in puhla oacna inge?”6
Nga tuhfahna eis pacl wowo in fuhfahsryucsr nuh Belfast, Northern Ireland. Ke nga oasr we, nga akihlen Belfast Coat of Arms, ma motto se weacng “Pro tanto quid retribuamus.” Kuh “Meac kuht ac sang fohlohkihn nuh ke ma yohk?”7
Nga suli kais sie sesr in motko kihsen siyuck soko inge. Meac kuht sang fohlohkihn nuh ke etwacack yohk ac ma pwacye God El use nuh sesr uh?
Pahpah luhngse tuhmasr El siyuck na sesr tuh kuht in moulkihn ma pwacye kuht eis uh ac lah kuht ukwe inkacnek El use uh. Ke ma inge, lwelah kuht in puhlaik ac luhlahlfongi ke kolyuck luhn Nguhn. Lwelah kuht in ke kahs ac ke orekma akacsruhi yurin mwet wiyacsr uh pweng wolacna ac mokleyuck ke plwacn in engan luhn God uh. Lwelah srihpac lasr in pa luhngse lasr nuh sin God ac nuh sin tuhlihk Nahtuhl, ke srihpen elos tamuhlwel ac tahmahel wiyacsr. Pa inge muhtwacwacacyen ma kuht kuh in oruh in fohlohkihn ma yohk uh.
Sie lwen, “intwe nuhkwewa fah kohtkohtuh, ac lohoh nuhkwewa fah taltal” lah inkacnek luhn God pwacye ac plwacn Lal suwohs.8Nuh sum ac nga, lwelah lwen sacn in pa mihsenge. Lwelah kuht in fahkwack, weluhl Jacob ke pacl met ah, “O Fuhkah Woiyacn Plwacn luhn God Lasr!”9
Ke ma inge nga fahkwack luhlahlfongi ke tarilacna loal nuh sin Pahpah tuhmasr Lucng, ke nga fihliyac yuruwos mwe insewowo luhk, ke inen Jisus Kraist, amen.