Ng Meral Klebokel a Uldesuel a Dios er Kid!
Kid a iliuekl er a mengasireng el llomes me a klemerang me ak melbedebek el kmo kede meral oureng a saul er a ikel dolab.
Kede ngeltengat el muut el mocha keldibel er tial ongdibel er a beluulechad el rokir el ngara cheungel a dereder er a profet e President el Thomas S. Monson. President, ng betik a rengmam e oldubech er kau el rokui!
Chelsel a urerek el omekall a skoki, ak kmal klou el ultuil er a computer eng di diak sal oureor lousbech er a computer er ngak. A urerek er a obis, loungerachel a ureor, e te mla er ngii a resekretari me a rolngeseu er ngak er a urerek er a bek el sils.
A rokui a mlengodech er sera 1994 er a kmokedong el General Authority. Ttial okedong a mle uchul a betok el ungil techall el olngeseu e ng di ng mle uldimukl a betok el ureor er a obis er a Ikelesia—el dimlak kumdasou el uasei.
Ng mlo mechas a renguk, e le kot a belkul dongu er a urerek a computer.
Ng mle kot el taem er a klengar ngak, el kureor loba tial ngodech,mengasireng, e chetituokel el klalou er a beluulechad.
Sera uchelel, e ng kmal mle meringel er ngak oureor lousbech er a computer.
A remeduch er a computer el chad a milasem lolisechakl er ngak el mo meduch er a computer. Te dilchor bitar ngak, el kmeed el mera ongelngelek, e a chedngelel chimorir a mekdekumed el metetechotech er tial keyboard.
“Mesang?” tir a melekoi. “Tiaikid a teletelel omoruul er ngii.”
Ng dimlak kisang. Ng mle meringel lomesuub.
Ng mle meringel er ngak a mesuub el mo meduch lousbech a computer.
Ng mle klou el taem, blelekel lomeruul, klou el reng; me a klou el urungulek me a klaumerang; mea tekingel a bechik; me a betok el blil a soda el diak kuchais a ngklel.
Chelecha, lluich me a eru el rak ruriul, e ak di iliuekl er a computer. Ngar ngii a email address er ngak, me a twitter, me a Facebook. A kuba smartphone, tablet, laptop, me a digital camera. Ng uaisei, el duch er ngak er a computer a diak el bol uaia euid a rekil ngalek, eng di uai ngak el mla chengelakl er a okeuid a rekik, e ak telkib el meduch er a computer.
E ng di ak mla metebengar a mengasireng el tekoi. Sel lorael a duch er ngak er a computer el mo klou, e ng uaia lorael mo beot a renguk er ngii.
Oumesingd er a reksi er a chad, e a rolel a cheldecheduch a ultuil er a retel a uos. A doldurokl malechub e kede melai a tekoi eng sebechel tela el klebesei malechub eng buil. Chelechal sils e a tekinged a merael telal telael el mile er a meliduil malechub eng merael eou, e a bol telkib el meoud, eng ngmasech a rengud e mo seselk a rengud.
Ng kse er kid a rechad: el sel bo demeduch er a tekoi, luldimukl er a kmo ngerang, el mengasireng, eng uaia dobes e mo beot a rengud el kirel.
Kid Kede Omekbeot Chedaol Tekoi?
A domekbeot a tekoi er a rua computer a sebechel ko er a di kekerei el tekoi. E ng di, mekngit el dolekoi, le bebil er a taem eng osisiu el kse a dobang el mo er a ikel diak a ulebengelel osisechakl er a ebangkelio er a Jesus Kristo. Chelsel a Ikelesia er a Jesus Kristo, e kede kmal mla ngmai a betok. Kede iliuekl er a kmal mechas a rengud el idisel a llomes me a klemerang me a ko er a melebedebek el uase kede meral mereng a saul el kirel.
Ka momdasou er tirkel ultirakl er a uchelel el tir a mirael e milngedecheduch er a Osobel er a le ngara beluulechad. Ka momdasou a rengrir er a omereng el saul me a omengull el locha milkeek a rengrir e mekeeek a uldesuir er a lesang el mekiis er a kodall, me a dirrek sera lomelchesiu a llechul a telemall er a chimal. A klengar tir a locha di mle merekong el diak di losisiu!
Ka momdaou er tirkel Santo er a uchelel chelechal taem el mle medengelii a Profet Joseph Smith e rirngesii lolisechakl er a mla moluut el ebangkelio. Ngua ngera lulmelchesiu er a bo lodengei el uase a cheldecheduch er a delongelel a Dios me a chad a mla obok, el meskid a bleketakl el llomes er a beluulechad er sel blid el ngar bab.
A kmal ngaruchei, e ka momdasou er sel kau a mle melchesuar er sel kot el taem el blo moumerang e modengei el uase ke meral ngelekel a Dio; e a Jesus Kristo a meral kilengei el mo chuarm el kirel a kengtim me luchul e bom klikiid; e a klisichel a priesthood a merang el sebechel somesemau el mora rebetik er a rengum er chelechang el mo er a ulebongel; e ngarngii a ngar el profet er a beluulechad er chelechal sils. Tiang diak el sal mengasireng e mechas a rengud er ngii el tekoi?
Momtab aikal rokui, ng mekera e kid er a chelsir a rokui el chad a diak bo de ngara deureng el kirel a mo er a Ikelesia e ngara omengull? Malechub e kede mo mesaik el menguiu chedaol llechukl? A kumdasou e tia locha sebechel dubech alsekum a rengud a diak bol ngara omereng el saul el mechas a rengud er a chedaol e klebokel el sengk el Dios a mla meskid. Ng beot e mereched er kid el ngmai a klemerang el melodech a klengar, e ng di bebil er a taem eng diak el sal blak a rengud el ngar sel rael er a roltirakl. Kede blechoel touchakl osenged er a chelitecheterir a rebebil er a rechad er a ikelesia e diak doltirakl okesiul a Mastang er kid. Kede kiei er a klengar el mui er a betok el techall eng di diak de ues el kmo ng meklou a belkul.
Sel Dodengelii el Tekoi
Sera kngeasek el chad, e a resechelik a blechoel loker el kirel a klechelid er ngak. Ak blechoel lomuchel el mesaod aikel ngodech, el uaia Llach er a Ulekerreuil a Bedenged. E a bebil er a taem e ak melekoi aikel losisiu er a bebil er a klechelid. Ng diak a tara ikang el chemas a rengrir. E ng di sel kusaod el kirel tial klou el uldasou er a deureng el ngara Chedam er a Babeluades el kired a Rengelekel, e te orenges.
Ak dobedebekak el meluches er a lecheklel a uldasou er a mo suobel er a board er a klas er kemam er a ikelesia el mla er a Frankfurt, Germany. Ak liluches a mechaibibeob el uaia le klengar ruchei, klengar chelechang, me a klengar sel deluut el mora rechad er a Blid er a Babeluades ruriul er tial klengar.
Sera kngeasek, eng meral soak louchais el kirel tial mengasireng el klumech. Sel kusaod aikal osisechakl lousbech a beot el di tekingek, e a renguk a mo mui er a omereng el saul el mora Dios el ngii a betik a rengul er a Rengelekel me a Osobel el ngii a ulsebelid el rokui er a kodall me a beluu er a ngau. Ak meral mle chemat er tial klumech er a beltik el reng, deureng, me a urunguled.
A rebebil er a resechelik a kmo tial klumech a kora lodengelii, eng di aikal tekoi a dimlak le mosisechakl er a klechelid er tir. Ng uaia le kora di mla medengei el kmo aikal tekoi a klemerang, el kmal di uaia kuchais er tir a tekoi el di bla lodengei er a ngara mong.
Kid Olab a Nger!
A kumera el kmo a bek el chad a olab er a chelsel a rengrir a ker el kirel a klengar. Ngak a mla er ker el mei? Ngera uchul me ak ngar tiang? Ngera mo dubech ruriul er ak mad?
Aikal ker a di bla loker a rechad er a uchelel. A resemmong, rechelimosk, me a remeduch a mla chemoit a klengar tir losiik a nger.
Ak mereng a saul el kmo a mla moluut el ebangkelio er a Jesus Kristo olab a nger el kirel aikel kot el chetituokel el ker er a klengar. Aika el nger a mosisechakl er a chelsel a Ikelesia er a Jesus Kristo er a Uriul-klebesei el Santo. Ng kmal klemerang, e bleketakl, e melemalt, e beot a bo dodengei. Ng omekellomes er kid, e kid olisechakl el mo er a chedei a rekrir el ngalek el ngara er a klas er a Sunbeam.
Rodam me a rodos, kid a diak a ulebengeled el chad, el diak a ucheled e diak a ulebengeled. Kid a di mla ngar ngii.1 Kid a meral ngalek er a reng el ngelekel chedaol, diak el mad, e mesisiich Chedam me a Chedil er a Babeluades!
Kede mlei el mlara blid er a babelaudes er a Rubak el Dios er kid. Kid a ngalek er a ngarbab el blai er a Elohim, el Kot el Ngarbab el Dios. Kede mirael lobengkel er sel klengar ruchei. Kede rirngesii el mengedecheduch, e milsa klisichel, e siluub a Teletelel.
Kemiu me a ngak a mla er sel Klou el Miting el Chedam a ulechotii a moktek er Ngii el kired—el kmo kede mei er a beluulechad, e nguu a bedenged er a tech, e mesuub el melilt er a ungil me a mekngit, e mukeroul er a chelsel a teletael el omko ng diak de mei eng diak el sebeched el nguu.
Sera dorael lengelakl er sel orars e desiseb er a beluulechad, e kede mle medengei el uase ng mo diak dodengelii sel klengar ruchei. Ng morngii a ultok me a cherarou me a ongetikaik. E ng di kede dirrek el mle medengei el uase a ngeiul a bedenged er a tech a kmal mle klou a belkul. Kede, meral ulureng me bol sebeched el melilt a ungil, e mo mesisiich er a ongetikaik er a Diablong, me bol sebeched lemuut el mora rechad er a blid er a babeluades.
Kede mle medengei el kmo kede ruebet er a klengit—luldimukl er a oberaod el klengit. E ng di kede dirrek el mle medengei el uase a Osobeled, el Jesus Kristo, a dirrek el ulengit el mei er a beluulechad, e mo kiei er a klikiid el klengar, e odersii a klengar Ngii el mo chuarm el kired. Kede mle medengei el uase a dodersii a rengud el mo er Ngii, doumera er Ngii, e dolasm el blak a rengud el mo merael er a rolel a roltirakl, eng sebeched el mo klikiid e lmuut el mo soiseb er a rengedel a Chedam er a Babelaudes.
A le uasie, e ngokiu a klaumerang er a tngakireng er a Jesus Kristo, e kau me a ngak a mililt el kongei, er sel uldeusel a Chedam er a Babelaudes.
Seikid a uchul e kede ngar tiang el klebokel el beluu—le Dios el milskid a techall, e kid a mililt el kongei er ngii. A klengar kid er a beluulechad, a uaisei, el di kedeb el taem e kid a mora kodall tial bedenged er a tech. E ng di sel klou a belkul el kmo kau me ngak kede techang a diak bol riid. A Reng er kid a melemolem el ngar e mengiil er a Okiis er a kodall—el ngii a tada el sengk el mora rokui el chad el mlara Chedam er a Babeluades me a Ngelekel, el Jesus Kristo.2 A Okiis er a Kodall, a uchul e a bedenged a lmuut el mo dmak, el mo mimokl er a ringel me a rokui el telemall.
Uriul er a Okiis er a kodall, e ng morngii a Sils er a Kerkeriil. Ng uaisei el rokui a di mo suobel e nguu a klebkellel a renged, e ng di tirkel ulumerang er a Dios e ulsiik loltirakl llechul me a chedaol ruoll tirkei a mo nguu a diak a ulebengelel klengar el ngii a diak dotebengar a klebkellel me a klungiolel.
Sel Sils er a Kerkeriil a mo sils er a chubechub me a beltik el reng—el sils el telemall el reng a mo ungil, e a lengelel a klengit el reng a mo mutechei lobengkel a lengelel omereng el saul, el rokui el tekoi a di mo ungil besul.3
Oi, kede mo melchesuar a dmolech el klengitelreng el klengit a uchul. Oi, kede mo ouchel a rengud e meringel a uldesued el kirel a telitur rekid, klebelengud, me a kldidiul a rengud el mla rullid el metom er a techall el kirel a ungil klengar kid er medad.
E ng di ak mui el medengei el uase ng diak di bo lungil a rengud el kirel a kerkeriil er a Dios; kede dirrek el mo mechas a rengud e mui a rengud el kirel a krasia, chubechub, blekerurau, me a beltik el reng er Ngii el kired, kid a Rengelekel. Alsekum a soal a rengud me a urered a mle ungil, alsekum e ngarngii a klaumera er kid er a krasia er a Dios, e seikid eng sebeched el mesa sel ngii a lolekoi er ngii a Moroni el kmo “ng soad el mo er ngii el medal a mesisiich el Jehovah, el Diak a ulebengelel chad er a Kerkeriil.”4
Pro Tanto Quid Retribuamus
Rodam me a rodos er ngak, kemiu el sechelik, ng diak el mokeek a rengmiu er a klebekellel me a mengasireng el mo melbedebek er sel klou el uldasou er a deureng el Demad er a Babeluades a mla kudmeklii el kired? Ng diak lokeek a rengmiu er a diak a smodii el deureng sel bo modengelii a meang el taem er medad el ngii a mla mekedmokl el kirir tirkel tir a mengiil er a Rubak?
Alsekum eng dirkak molchesuar tial klebokel el deureng, e ak siotai er kau el mo osiik, mesuub, e molbedebek a beot e mesisiich el klemerang er a mla moluut el ebangkelio. “Bo molbedebek er a klisichel a diak a ulebengelel klengar.”5 Bol uchul a klaumerang er kau el kirel a chedaol uldasou er a mo suobel.
Alsekum e ko mla omelchesiu el uaisei, e a kuker kemiu er chelechal sils, “Ng sebechem el melchesuar chelechang?”6
Ng dirk mlar ngii a techellek el mo er a omerael el mo er a Belfast, el ngara Northern Ireland. Sera kbong, e ak mlo metik el kmo a Belfast Coat of Arms, lobengkel a kerbai el “Pro tanto quid retribuamus.” malechub “Ngera kede odersii el kirel a kmal betok el bla dengai?”7
A kulengit er a dersta er kid el mo melbedebek er tial ker. Ngera kede odersii e ng mo sebeched el ngmai a obdois el llomes me a klemerang el Dios a mla meskid el kmal chachisois?
A betik er a rengud el Chedam a kmal di olengit me bo de kiei lokiu a klemrang el bla dengai e doltirakl er a rael el Ngii a ml otii. A leuaisei, e bol mesisiich a rengud e dultuil er a ulekrael er a Chedaol Reng. Dochotii lokiu omelkinged me a omerelled e douchais el mo er a rechad tial mengasireng el klmechel a Dios el kirel a uldasou er a deureng. A moktek er kid bo lochotii a beltkil a rengud el mo er a Dios me a Rengelekel, le tir a odam me a odos er kid. Tiaikid a uchelel aikel sebeched el remuul el kirel a kmal betok el bla dengai.
A tara klebesei e a bek el uach a mo outubaruach, me a bek el ngor a mo kombesar el kmo a rolel a Dios a meral melemalt me a uldeusel a meral cherrungel.8 Mo er kau me a ngak, e seikid el sils bol chelechang. Bo douchais el kirel a klebokel el uldesuel a Dios el uaia Jacob er a recheuodel!”9
Aika kuchais loba dmolech lomereng el saul el mo er a Demad er a Babeluades, e meskemiu a klengeltengat er ngak, el ngara ngklel a Jesus Kristo, amen.