E, Le Silisiliese Na’uā o le Fuafuaga a lo Tatou Atua!
O loo siomia i tatou e se tamaoaiga ofoofogia tele o le malamalama ma le upumoni lea ou te tomanatu ai pe o tatou talisapaiaina moni ea mea ua tatou maua.
Ua faamanuiaina lava i tatou e toe potopoto foi i lenei konafesi i le lalolagi atoa i lalo o le taitaiga ma le faamalumaluga a lo tatou perofeta pele, Peresitene Thomas S. Monson. Peresitene, matou te alolofa ia te oe ma lagolagoina oe ma o matou loto atoa!
I le taimi o lo’u olaga faigaluega o se pailate, sa ou faalagolago tele ai i le maoti ma le faatuatuaina o masini komepiuta ae sa seāseā ou iloa faaaoga la’u lava ia komepiuta patino. I la’u galuega faaofisa o se pule sili, sa i ai ni alii ofisa lagolago ma ni failautusi sa fesoasoani ma le agalelei ia te au i galuega.
Sa suia nei mea uma i le 1994, ina ua valaauina a’u o se Pulega Aoao. Sa i ai i lo’u valaauga le tele o avanoa ofoofogia e auauna atu ai, ae sa aofia ai foi ma se vaega tele o galuega faaosiga a le Ekalesia—e sili atu nai lo mea na ou mafaufau e mafai ona fai.
Sa faateia a’u, ona o le meafaigaluega autu e faatumauina ai le lelei o la’u galuega, o se komepiuta patino.
Mo le taimi muamua lava i lo’u olaga, sa ao ona ou faamasani i lenei lalolagi ese, lavelave ma fenumiai.
I le taimi muamua, sa fai si le lelei o le ma faauoga ma le komepiuta.
Sa taumafai tagata tekinolosi e aoao a’u i le auala e faaaoga ai le komepiuta. Sa latou tutu moni lava i o’u tua, aapa mai i luga o o’u tauau, ma patia patā solo o latou tamaitama’ilima i le taina o mea i luga o le fataki.
“Vaai?” latou te fai mai ai ma le mitamita. “O le ala lena e te faia ai.”
Sa ou le i vaaia. O se suiga faigata tele.
Sa matua faigata tele ia te a’u e pei o se pa piliki.
Sa tele se taimi na alu ai, o le fai soo, onosai; tele se faamoemoe ma se faatuatua; le tele o faamautinoaga mai si o’u toalua; ma le tele o apa inu o le a ou le ta’u atua igoa.
Ia, i le 22 tausaga mulimuli ane, ua siomia a’u i tekinolosi faakomepiuta. Ua i ai sa’u tuatusi imeli, se itulau Twitter ma se itulau Facebook. E i ai sa’u telefoni poto, se tapeleti, komepiuta feaveai, ma se meapueata otometi. Ma, e ui atonu e le i oo o’u tomai faatekinolosi i tomai o se tamaitiiti masani e fitu tausaga, mo se toeaina fitusefulu tausaga, ae lea e seki a a’u.
Ae ua ou matauina se mea mata’ina. O le faateleina lava o o’u tomai faatekinolosi, o le faateleina foi lena o lo’u manatu faatauvaa i ai.
Mo le tele o le talafaasolopito o le tagata soifua, o fesootaiga sa tupu i le saoasaoa o solofanua. O le auina atua o se feau ma le mauaina o se tali sa mafai ona alu ai ni aso po o ni masina foi. O aso nei o a tatou feau e faitau afe maila e oo i ai i le lagi po o le faitau afe o mita i lalo o le vasa e oo atu ai i se tagata i le isi itu o le lalolagi, ma afai e i ai se tuai i ni nai sekone, tatou te lē fiafia ma lē onosai.
E foliga mai o le natura lea faaletagata: a o tatou faasolo ina masani atili i se mea, e oo lava i se mea faavavega ma ofoofogia, tatou te le mauaina so tatou lagona maofa ma taulima ai o se mea masani.
Pe o Tatou Manatu Faatauvaa ea i Upumoni Faaleagaga?
O le manatu faatauvaa i tekinolosi faaonapo nei ma le faigofie o le mauaina atonu o se mea faatauvaa. Ae, o le mea e faanoanoa ai, o nisi taimi e faapena ai o tatou uiga i aoaoga faavae e faavavau o le talalelei a Iesu Keriso e faalautele ai lo tatou malamalama. I le Ekalesia a Iesu Keriso, ua tele mea ua aumai ia i tatou. O loo siomia i tatou e se tamaoaiga ofoofogia tele o le malamalama ma le upumoni lea ou te tomanatu ai pe o tatou talisapaiaina moni ea mea ua tatou maua.
Mafaufau i na uluai soo o ē na savavali ma talanoa faatasi ma le Faaola i le taimi o Lana galuega faalelalolagi. Mafaufau i le lotofaafetai ma le migao atonu na lōfia ai o latou loto ma faatumulia ai o latou mafaufau ina ua latou vaaia o Ia ua toetu mai le tuugamau, ina ua latou fetagofi atu i manu’a i Ona aao. O le a le toe tutusa lava o latou olaga!
Mafaufau i uluai Au Paia o lenei tisipenisione na iloaina le Perofeta o Iosefa Samita ma faalogo ia te ia o tala’i atu le talalelei toefuataiina. Mafaufau pe na faape’i o latou lagona i le iloaina ua toe matala le veli i le va o le lagi ma le lalolagi, ma susulu mai ai le malamalama ma le poto i luga o le lalolagi mai lo tatou aiga faaselesitila i luga.
Ae o le mea sili o mea uma, mafaufau po o le a sou lagona i le taimi muamua na e talitonu ai ma malamalama o oe moni o se atalii [po o se afafine] o le Atua; ma na puapuaga ma le loto i ai Iesu Keriso mo au agasala ina ia mafai ona e toe mama; o le mana o le perisitua e moni ma e mafai ona faamau ai oe i ē pele ia te oe mo le olaga nei ma le faavavau atoa; ma o loo i ai se perofeta soifua i le lalolagi i aso nei. E le matagofie ma ofoofogia ea lena mea?
I le mafaufau ai i nei mea uma, e mafai faapefea la e i tatou mai tagata uma, ona le fiafia e auai i a tatou sauniga Faale-Ekalesia e tapuai ai? Pe ua lē lavāvā foi faitau ia tusitusiga paia? Ou te manatu na o le pau le auala e mafai ai [ona tupu ai lena mea] pe afai lena e le toe lagonaina e o tatou loto se loto faafetai ma le maofa mo meaalofa paia ma ofoofogia ua foai mai e le Atua ia i tatou. Ua faigofie ona tatou vaaia ma mauaina upumoni e suia ai olaga, ae o nisi taimi tatou te savavali ma tulemomoe i luga o le ala o le avea ma soo. E tele lava ina tatou faatagaina i tatou lava ia faalavelaveina i uiga le atoatoa o o tatou uso a tagata nai lo le mulimuli i faataitaiga a lo tatou Matai. O loo tatou ola i se olaga e tumu i avanoa ofoofogia ae e tele lava ina tatou le iloaina lo latou taua tele.
O Se Savali Masani
A o avea a’u ma se alii talavou, e fesili mai a’u uo ia te a’u e uiga i la’u lotu. E tele ina ou amata i le faamatalaina o eseesega, e pei o le Upu o le Poto. O isi taimi ou te faamamafaina ai tulaga e tutusa ai ma isi lotu Kerisiano. E leai ma se mea o nei mea e faafiafiaina tele ai i latou. Ae a ou talanoa e uiga i le fuafuaga sili o le fiafia a lo tatou Tama i le Lagi mo i tatou o Ana fanau, e gauai mai i latou ia te a’u.
Ou te manatua lo’u taumafai ai e tusi le ata o le faaolataga i luga o se laupapa i se potuaoga o le matou falesa i Frankfurt, Siamani. Sa ou faia ni li’o na fai ma faatusa o le muai olaga, olaga faaletino, ma le toefoi atu i o tatou Matua Faalelagi pe a mavae lenei olaga.
A o ou talavou, oka so’u fiafia e faasoa atu lenei savali fiafia. A ou faamalamalama atua nei mataupu faavae i a’u lava ia upu faigofie, e taumasuasua lo’u loto i le agaga faafetai mo se Atua e alofa i Lana fanau, ma se Faaola na togiolaina i tatou uma mai le oti ma seoli. Sa ou mitamita lava i lenei savali o le alofa, olioli, ma le faamoemoe.
Sa fai mai nisi o a’u uo na lagonaina le masani i lenei savali, e ui lava o ia mea sa lei aoaoina lava i a latou aoaoga faalelotu. Sa peisea’i na latou iloaina lava i taimi uma le moni o nei mea, e peisea’i sa na ona ou faasusulu atu o se malamalama i se mea ua leva ona mauaa i o latou loto.
Ua Ia I Tatou Tali!
Ou te talitonu o loo tauaveina e tagata soifua uma i o latou loto se ituaiga o fesili autu e faatatau i le olaga lava ia. O fea na ou sau ai? Aisea ua ou i ai iinei? O le a le mea o le a tupu pe a ou oti?
O nei ituaiga o fesili ua fesiligia pea e tagata soifua talu mai le amataga o taimi. Ua faaaluina e le au faifilosofia, sikola, ma tagata atamamai o latou olaga ma tamaoaiga e saili ai mo tali.
Ou te faafetai lava ua i ai i le talalelei toefuataiina a Iesu Keriso ia tali i fesili sili ona faigata o le olaga. O nei taili o loo aoaoina i totonu o Le Ekalesia a Iesu Keriso o le Au Paia o Aso e Gata Ai. E moni, manino, tuusa’o, ma faigofie ona malamalama i ai. E musuia, ma e tatou te aoao atua i a tatou fanau tai tolu tausaga i le vasega o le Aveolela.
Uso e ma tuafafine, o i tatou o tagata e faavavau, e aunoa ma le amataga ma le gataaga. Sa tatou i ai lava i le amataga.1 O i tatou o fanau agaga moni lava a ni Matua Faalelagi paia, tino ola pea, ma silisiliese!
Ua tatou o mai mai maota faalelagi o le Alii lo tatou Atua. O i tatou o le aiga tautupu o Elohima, le Atua Silisili Ese. Sa tatou savavali faatasi ma Ia i lo tatou muai olaga. Sa tatou faalogo o fetalai o Ia, molimauina Lona mamalu, ma aoaoina Ona ala.
Sa tatou auai i se Fono Tele lea na tuu mai ai e lo tatou Tama Pele Lana fuafuaga mo i tatou—o le a tatou o mai i le lalolagi, maua ni tino faaletino, aoao ia filifili i le va o lelei ma le leaga, ma alualu i luma i ni auala ia e le mafai ona faia i se isi lava ala.
Sa tatou iloaina lava a tatou pasia le veli ma ulufale mai i lenei olaga faaletino, o le a tatou le toe manatuaina loa le olaga muamua. O le a i ai le faafeagai ma faigata ma faaosoosoga. Ae sa tatou iloaina foi o le mauaina o se tino faitino sa matua sili ona taua mo i tatou. Sa tatou faamoemoe o le a vave ona tatou aoao ia faia filifiliga sa’o, tetee atu i faaosoosoga a Satani, ma mulimuli ane ai toefoi atu i o tatou Matua pele i le Lagi.
Sa tatou iloaina o le a tatou agasala ma faia ni mea sese—masalo e oo lava i ni agasala ogaoga. Ae sa tatou iloaina foi sa aioi lo tatou Faaola, o Iesu Keriso e afio mai i le lalolagi, soifua o se tagata lē agasala, ma ofofua mai Lona soifua i se taulaga e faavavau. Sa tatou iloaina a gauai atu o tatou loto ia te Ia, faalagolago ia te Ia, ma tauivi ma le malosi atoa o tatou agaga e savavali i le ala o le avea ma soo, o le a mafai ona faamamaina i tatou ma toe ulufale atu ai i le afioaga o lo tatou Tama pele o i le Lagi.
O lea, faatasi ai ma le faatuatua i le taulaga a Iesu Keriso, na tatou taliaina ai e ala i lo tatou loto fuatiaifo, le fuafuaga a le Tama Faalelagi.
O le mafuaaga lena ua tatou i ai iinei i lenei paneta matagofie o le lalolagi—ona na ofo mai e le Atua ia i tatou le avanoa, ma sa tatou filifili ai e taliaina. Peitai, o lo tatou olaga faaletino, ua na o se tulaga le tumau, ma o le a faamutaina i le oti o o tatou tino faaletino. Ae o le ute o le ituaiga tonu o tagata e i ai oe ma a’u o le a le faaumatiaina. O le a ola pea o tatou agaga ma faatalitali i le Toetutu—o se meaalofa foaifua mai i tagata uma e lo tatou Tama Faalelagi alofa ma Lona Alo, o Iesu Keriso.2 I le Toetu, o le a toe tuufaatasia ai o tatou agaga ma tino, ua saoloto mai tiga ma lē atoatoa faaletino.
A maea le Toetutu, o le a i ai se Aso o le Faamasinoga. E ui o le a faaolaina mulimuli ane ia tagata uma ma maua se malo o le mamalu, ae o i latou o e faalagolago i le Atua ma saili atu e mulimuli i Ana tulafono ma sauniga o le a mauaina ni olaga i faavavau ia e lemafaamatalaina i le viiga ma le ofoofogia i le mamalu.
O le Aso o le Faamasinoga o le a avea ma se aso o le alofa mutimutivale ma le alofa—o se aso e faamaloloina ai loto nutimomoia, o le a suia ai loimata faanoanoa i loimata o le lotofaafetai, o le taimi o le a sa’o ai mea uma.3
Ioe, o le a i ai le faanoanoa matuitui ona o le agasala. Ioe, o le a tatou salamo e oo foi i le tiga ona o a tatou measese, lo tatou valea, ma lo tatou lotomaaa na mafua ai ona tatou misia ni avanoa mo se lumanai sili atu ona lelei.
Ae ou te talitonu lava o le a le gata ina faamalieina i tatou i le faamasinoga a le Atua; ae o le a tatou maofa foi ma faagaeetia i Lona alofa tunoa le i’u, alofa mutimutivale, ma le alofa mo i tatou, o Lana fanau. Afai na lelei o tatou manaoga ma galuega, afai tatou te faatuatua i le Atua soifua, ona mafai lea ona tatou tepa taulai atu i le mea na saunoa ai Moronae “le pa faamasino logomalie a le Ieova silisili, le Faamasino Faavavau.”4
Pro Tanto Quid Retribuamus
Ou uso e ma tuafafine pele, a’u uo pele, e le faatumuliaina ai ea o tatou loto ma mafaufau i le ofo ma le maofa pe a mafaufau i le fuafuaga sili o le fiafia a lo tatou Tama Faalelagi ua saunia mo i tatou? E le o faatumulia ai ea i tatou i le olioli le mafaamatalaina o le iloaina o le lumanai mamalu ua saunia mo tagata uma o e faatalitali i le Alii?
Afai e te lagonaina se ofo ma se olioli faapena, ou te valaaulia oe ia saili, suesue, ma mafaufau loloto i ni upumoni faigofie ma loloto o le talalelei toefuataiina. “Ia tuu le tulaga mamalu o le faavavau ia mau i luga o o outou mafaufau”5 Tuu atu ia i latou e molimau atu ia te outou e uiga i le fuafuaga paia o le faaolataga.
Afai na e lagonaina nei mea muamua, ou te fesili atu ia te outou i le asō, “E mafai ea ona outou lagonaina nei?”6
Talu ai nei sa ou mauaina le avanoa e malaga ai i Belfast, Aialani i Matu. A o i ai iina, sa ou matauina le pine Belfast Coat of Arms, lea sa aofia ai le mautauave “Pro tanto quid retribuamus,” po o le “O le a se mea tatou te foai atu o se taui mo le tele o mea [ua maua]?”7
Ou te valaaulia i tatou taitoatasi ia mafaufau i lenei fesili. O le a se mea tatou te foai atu o se taui mo le tele o le malamalama ma le upumoni ua sasaa mai e le Atua i o tatou luga?
Ua augani mai lo tatou Tama pele ia tau lava ina ia tatou ola i upumoni ua tatou maua ma ia tatou mulimuli i le ala ua Ia saunia. O le mea lea, ia tatou lototetele ma faalagolago atu i le taitaiga a le Agaga. Ia tatou faasoa atu i o tatou uso a tagata e ala i upu ma amio le savali ofoofogia ma le musuia o le fuafuaga o le fiafia a le Atua. Ia avea lo tatou faanaunautaiga ma o tatou alofa mo le Atua ma mo Ana fanau, aua o i latou o o tatou uso ma tuafafine. O le amataga lenei o mea e mafai ona tatou faia ia toe taui atu ai le tele o mea [ua tatou maua].
E i ai se aso “o le a tootuli tulivae uma, ma tautino atu laulaufaiva uma” o ala o le Atua e tonu ma e atoatoa Lana fuafuaga.8 Mo oe ma a’u, ia avea lena aso o le asō. Ia tatou folafola atu faatasi ma Iakopo o anamua, “E, le silisiliese na’ua o le fuafuaga a lo tatou Atua!”9
Ou te molimau atu ai i nei mea ma le lotofaafetai tele i lo tatou Tama Faalelagi, a o ou tuua ai a’u faamanuiaga ia te outou i le suafa o Iesu Keriso, amene.