2010–2019
Vakavuvuli kei na Yalayala
Okotova 2016


Vakavuvuli kei na Yalayala

Kemuni na taciqu, me da qarauna na yagoda kei na noda vakasama ena noda rokova na ivakavuvuli e virikotori ena Vosa ni Vuku, e dua na ituvatuva vakarautaki vakalou

Ena bogi nikua kemuni na taciqu, au masuta nona veituberi na Tamada Vakalomalagi niu wasea vei kemuni na noqu itukutuku.

Ena 1833 a vakatakila na Turaga vua na Parofita o Josefa Simici e dua na ituvatuva ni tiko bulabula. Na ituvatuva oqori e kune ena ika 89 ni wase ni Vunau kei na Veiyalayalati ka vakatokai me Vosa ni Vuku. E solia eso na idusidusi bibi me baleta na kakana eda kania, ka vakatabuya na vakayagataki ni veika eso ena vakatubuleqa ki yagoda.

Sa yalataki vei ira era talairawarawa ki na ivakaro ni Turaga ka rokova ena yalodina na Vosa ni Vuku na veivakalougatataki eso, ka okati kina na bula vinaka kei na ikuri ni kaukauwa vakayago.1

Ena dua na gauna wale toka ga oqo au a wilika e dua na itukutuku dina ni kena vakaraitaki vakaqaqa na yalayala oqo. E dua na lewenilotu yalodina, o John A. Larsen, a vakaitavi ena iKarua ni Valu Levu kei Vuravura ena Daunitataqomaki e Baravi mai Amerika ena waqa na USS Cambria. Ena dua na ivalu ena Yatu Filipaini, sa yaco mai na itukutuku ni sa lako tiko mai e dua na mataivalu waqavuka dau vakalutu gasaukuro kei na waqavuka ni vala na kamikaze. Sa soli na ivakaro me ia na vagalala. Me vaka ni sa biubiu oti na USS Cambria, eratou a soqona nodratou iyaya o John kei na tolu na itokani ka vakusakusa yani ki baravi, ena vakanuinui me ratou vakaleleci yani ki na dua vei ira na waqa sa biubiu tiko. Kalougata ni a vakavodoki ratou e dua na waqa ni vakalele ka vakatotolo yani ki na iotioti ni waqa se qai biubiu tiko. O ira na tamata ena waqa oya, ena nodra sasaga me ra lako yani vakatotolo, era a osooso tiko ena dreke ka rawa walega kina me ra viritaka yani na dali vei iratou na lewe va, me ratou kaba yani ki dreke.

O John ni vava tu i dakuna e dua na retio bibi e kunei koya ni lili tu ena dua na muanidali 40 na fute (12 na mita), ena yasa ni waqa sa mua tiko ki wasaliwa. Sa tekivu me sasaga cake, dua na liga ki na dua tale, e kila kevaka ena taura sirita, sa na rawa saraga ni rusa. Ni se qai kabata rawa ga na dua na ikatolu ni dali, sa vakila na kama ni ligana ena levu ni mosi. Sa malumalumu vakalevu sara ka vakila ni sa voleka me sega ni tautauri rawa tiko.

Ni sa lailai sara na nona igu, ka vakasamataka vakabibi na leqa sa tarai koya tu, a tagi vuni vua na Kalou o John, ka tukuna Vua ni a dau rokova voli ga na Vosa ni Vuku ka bulataka tu e dua na bula savasava—ka sa gadreva vakalevu sara ena gauna oqo na kena veivakalougatataki yalataki.

A qai tukuna e muri o John ni tinia ga na nona masu, sa vakila na drodro mai vakayauyau ni kaukauwa. Sa tekivu me kaba tale ka totolo cake sara. Ni yacova yani na dreke, e taumalua tu ga na nona icegu ka sega mada ga ni bau ceguoca. Sa nona na ikuri ni veivakalougatataki ni bula vinaka kei na kaukauwa ka yalataki tu ena Vosa ni Vuku. A vakavinavinaka vua na Tamana Vakalomalagi ena gauna oya, kei na vo taucoko ni nona bula, me baleta na isau ni nona masu ni lomaleqa ni kere veivuke.2

Kemuni na taciqu, me da qarauna na yagoda kei na noda vakasama ena noda rokova na ivakavuvuli e virikotori ena Vosa ni Vuku, e dua na ituvatuva vakarautaki vakalou. Au vakadinadinataka mai vuniyaloqu, na veivakalougatataki lagilagi sa waraki keda tu ni da vakayacora vakakina. Me na yaco vakaidina oqo, au masuta ena yaca ni noda Turaga ka iVakabula, o Jisu Karisito, emeni.

iDusidusi

  1. Raica na Vunau kei na Veiyalayalati 89:18–21.

  2. Raica na John A. Larsen, ena Robert C. Freeman and Dennis A. Wright, comps., Saints at War: Experiences of Latter-day Saints in World War II (2001), 350–51; vakadonui na kena vakayagataki.