2010-2019
Mga Prinsipyo kag Mga Promisa
Oktubre 2016


Mga Prinsipyo kag Mga Promisa

Kabay nga amligan naton ang aton mga lawas kag mga hunahuna paagi sa pagtuman sa mga prinsipyo nga ginbutang sa “Word of Wisdom,” ginhatag nga isa ka diosnon nga plano.

Karon nga gab-i, mga kautoran, ginapangamuyo ang paggiya sang Langitnon nga Amay samtang ginapaambit ko ang mensahi ko sa inyo.

Sang 1833 ang Ginuo nagbugna kay Propetang si Joseph Smith sang isa ka plano para mangabuhi nga may maayong lawas. Ang plano ara sa ika 89 nga section sang Doctrine and Covenants kag kilala bilang Word of Wisdom. Nagahatag ini sang isa-isa ka direksyon parte sa pagkaon nga aton ginakaon, kag nagadumili ini sa paggamit sang mga butang nga makasamad sa aton mga lawas.

Yadtong nagatuman sa mga sugo sang Ginuo kag himpit nga nagasunod sa Word of Wisdom ginpromisahan sang partikular nga mga bugay, kalakip ang maayong lawas kag dugang nga lawasnon nga resistensya.1

Bag-o lang nabasa ko ang matuod nga asoy sang isa ka milagrosong pagpakita parte sa sining mga promisa. Isa ka himpit nga miyembro sang Simbahan, si John A. Larsen, nag-alagad sang World War II sa United States Coast Guard sa barko nga USS Cambria. Sa isa ka inaway sa Philippines, may balita nga may nagapadulong nga hubon sang manugbomga nga mga eroplano kag kamikaze fighter planes. Ang mga mando sang gilayon nga pagbakwit ginhatag. Bangud kay ang USS Cambria nagpanakayon na, si John kag ang tatlo ka kaupod naghimos sang ila mga gamit kag nagdalidali pakadto sa dalay-ahan, nagalaum nga makasakay sa manuglakat nga mga barko. Maayo lang kay may isa ka landing craft nga nagkuha sa ila kag madasig nga nagpakadto sa pinakaulihing barko nga manuggwa sa baybayon. Ang mga tawo sa manuglakat nga barko, sa pagtinguha nga makahalin sa gilayon, masako sa ibabaw kag naghaboy lamang sang mga kalat sa apat ka mga lalaki, ginlauman nga sila makasaka paibabaw sa barko.

Si John, may mabug-at nga radyo sa iya likod, kag nasapwan ang kaugalingon nga nagakabitkabit sa katapusan sang 40-piye (12 m) nga kalat, sa kilid sang barko nga nagapaggwa sa dagat. Nagsugod sia sa pagbutong sang iya kaugalingon pasaka, isa ka kamot sa isa ka tion, nakabalo nga kon mabuy-an niya ang kalat, halos pat-ud gid nga mapatay sia. Pagkatapos nga makasaka sa ikatlo nga bahin paibabaw, nabatyagan niya ang iya mga butkon daw nasunog sa kasakit. Nangluya sia nga ang pamatyag niya indi na sia makapadugay sa pagpangunyapot.

Nadulaan sang kusog, samtang nagapaabot na lang sia sang iya swerte, si John mahipos nga nagpangamuyo sa Dios, nagsiling sa Iya nga permi gid niya gintuman ang Word of Wisdom kag nangabuhi nga matinlo—kag karon desperadong ginakinahanglan niya ang ginpromisa nga mga bugay.

Si John sang ulihi nagsiling nga sang pagkatapos niya pangamuyo, nabatyagan niya ang gulpi nga dakong kakusog. Nagsugod sia sa pagsaka liwat kag daw halos naglupad sia paibabaw sa kalat. Sang ara na sia sa ibabaw sang barko, normal ang iya pagginhawa—kag daw sa wala lang sing natabo. Ang mga bugay sang dugang nga kaayo sang lawas kag resistensya nga ginpromisa sa Word of Wisdom naangkon niya. Nagpasalamat sia sa iya Langitnon nga Amay sadto, kag sa bug-os pa niya nga kabuhi, sa sabat sa iya desperadong pangamuyo para sa tabang.2

Mga kautoran, kabay nga halongan naton ang aton mga lawas kag mga hunahuna paagi sa pagtuman sa mga prinsipyo nga ara sa Word of Wisdom, ginhatag nga isa ka diosnon nga plano. Upod ang bug-os ko nga tagipusuon kag kalag, nagasaksi ako sa mahimayaon nga mga bugay nga nagahulat sa aton kon kita nagatuman. Kabay nga ini matabo, ginapangamuyo ko sa ngalan sang aton Ginuo kag Manluluwas, si JesuCristo, amen.

Notes

  1. See Doctrine and Covenants 89:18–21.

  2. See John A. Larsen, in Robert C. Freeman and Dennis A. Wright, comps., Saints at War: Experiences of Latter-day Saints in World War II (2001), 350–51; used by permission.