Cov Ntsiab Cai thiab cov Lus Cog Tseg
Thov kom peb yuav tu peb lub cev thiab peb lub siab thaum peb ua raws li cov ntsiab cai uas muaj nyob hauv Lo Lus Txawj Ntse, uas Vajtswv tau pom zoo.
Cov kwv tij, hmo no kuv thov kom peb Leej Txiv Saum Ntuj Ceeb Tsheej coj kuv txoj hau kev thaum kuv hais lus rau nej.
Thaum xyoo 1833 tus Tswv muab ib txoj hau kev txog kev noj qab nyob zoo tshwm sim rau tus Yaj Saub Yauxej Xamiv. Txoj hau kev ntawd los muaj nyob hauv phau Lus Qhuab Qhia thiab Kev Khi Lus tshooj 89 thiab hu ua Lo Lus Txawj Ntse. Qhov no qhia peb txog cov zaub mov uas peb noj, thaib txwv tsis pub peb siv tej yam uas tsis zoo rau peb lub cev.
Cov uas ua raws li tus Tswv cov lus txib thiab rau siab ua raws li Lo Lus Txawj Ntse tus Tswv tau cog lus rau cov ntawd tias yuav foom cov koob hmoov zoo rau lawv, xws li kev noj qab nyob zoo thiab lub dag lub zog.1
Tsis ntev kuv nyeem ib zaj dab neeg uas muaj tseeb txog kev cog lus no. Ib tug mej zeej ntawm lub Koom Txoos uas rau siab ntseeg, John A. Larsen, tau ua tub rog thaum muaj Kev Tsov Rog Thoob Ntiaj Teb thib Ob nyob hauv lub Teb Chaws Amelikas Coast Guard hauv lub nkoj USS Cambria. Thaum lawv ntaus rog nyob hauv Philippines, lawv txais xov xwm tias ib co nyab hoom tso foob pob thiab nyab hoom tua rog tab tom yuav los. Lawv raug txib kom tshem txhua yam tawm. Vim lub nkoj USS Cambria twb mus lawm, John thiab nws peb tug khub muab lawv cov khoom sib sau thiab khiav mus rau ntug dej hiav txwv, lawv cia siab tias ib lub nkoj uas tseem yuav mus thauj tau lawv. Zoo siab uas ib lub nkoj tsaws rau ntug dej hiav txwv tseem nyob thiab lawv mus ceev rau lub nkoj loj uas tseem tsis tau tawm mus. Vim lawv maj muab txhua yam tshem tawm, cov txiv neej nyob hauv lub nkoj ntawd, ua hauj lwm nyob rau qhov chaw sawv saib hav dej thiab muaj sij hawm tso hlua rau plaub tug txiv neej no, cia siab tias lawv yuav muaj peev xwm nce saum qhov chaw sawv saib ntawd.
John, uas muaj ib lub xov tooj cua hnyav khi rau nws lub nraub qaum, tuav nkaus txoj hlua uas ntev li plaub caug foot (12 m), nyob ntawm lub nkoj ib sab uas tab tom mus rau tim lub plawv hiav txwv. Nws pib rub nws tus kheej, tuav txoj hlua nce lub nkoj, es nws paub hais tias yog nws tuav tsis taus txoj hlua ntxiv, nws yeej yuav piam sij. Thaum nws nce ib feem peb xwb, ua rau nws txhais ncaj npab mob dhau. Nws qaug zog heev nws xav tias ntshe nws tuav tsis tau ntxiv.
Vim nws tsis muaj zog lawm, thaum nws xav txog nws txoj hmoov, John thov Vajtswv, qhia Vajtswv tias nws tau ua raws li Lo Lus Txawj Ntse thiab tau ua neej dawb huv—thiab tam sim no nws yeej xav tau cov koob hmoov uas Vajtswv cog lus tias nws txais tau.
John hais tias thaum nws thov Vajtswv tiav, ua rau nws muaj zog heev. Nws pib nce lub nkoj ntxiv thiab nws nce tau sai sai. Thaum nws nce los txog qhov chaw sawv saib, nws txoj kev ua pa yeej zoo li qub thiab zoo li nws tsis tau siv zog ua dab tsi. Nws yeej txais tau cov koob hmoov ntawm kev noj qab nyob zoo thiab lub dag lub zog uas Vajtswv cog lus tias yuav muaj nyob hauv Lo Lus Txawj Ntse. Nws tau ua nws Leej Txiv Saum Ntuj Ceeb Tsheej tsaug thaum ntawd, thiab txij thaum ntawd mus tas nws lub neej, vim Vajtswv hnov nws tej lus thov kom txais kev pab.2
Cov kwv tij, thov kom peb yuav tu peb lub cev thiab peb lub siab thaum peb ua raws li cov ntsiab cai uas muaj nyob hauv Lo Lus Txawj Ntse, uas Vajtswv tau pom zoo. Kuv ua tim khawv kawg kuv lub siab lub ntsws txog cov koob hmoov uas Vajtswv yuav foom pub rau peb thaum peb ua li ntawd. Kuv thov kom yuav muaj li no, los ntawm peb tus Tswv thiab Cawm Seej lub npe, Yexus Khetos, amees.