Dagiti Prinsipio ken Kari

Ita kakabsat, sapaykoma ta tarabayennak ti Amatayo iti Langit iti panangibinglayko iti mensahek kadakayo.

Idi 1833 impalgak ti Apo ken ni Propeta Joseph Smith ti plano para iti nasalun-at a panagbiag. Masarakan dayta a plano iti maika-89 a benneg ti Doktrina ken Katulagan a maawagan iti Nainsiriban a Balikas. Mangted daytoy iti nalawag a direksion maipanggep ti taraon a kanentayo, ken mangiparit kadagiti sustansia a makadangran iti bagitayo.

Dagiti natulnog kadagiti bilin ti Apo ken napudno nga agtungpal iti Nainsiriban a Balikas, maikarian kadagiti parabur a pakairaman ti nasayaat a salun-at ken natibker a pammagi.¹

Nabasak itay nabiit ti pudno a pakaammuan maipanggep kadagitoy a kari. Napudno a miembro ti Simbaan, nagserbi ni John A. Larsen iti World War II iti United States Coast Guard iti barko a USS Cambria. Bayat ti gubat iti Pilipinas, naipadamag ti umas-asideg a ragup dagiti agbomba ken kamikaze nga eroplano. Naibilin ti madagdagus a panagbakwit. Gapu ta nakapanawen ti USS Cambria inummong da John ken ti tallo a kaduana ti ramitda ket alistoda a napan iti baybay tapno aglugan iti barko. Naimbag ta inlugan ida ti bilog a kimmamakam iti maudi a barko. Makumikom dagiti lallaki iti dayta a barko, iti ayatda a makapagbakwit a dagus, ket bassit ti orasda a mangibato iti lubid kadagiti uppat a lallaki tapno makasalpada.

Nakabitin ti bagi ni John, a nagbaklay iti nadagsen a radio, iti ungto ti 40 a kadapan ken 12  a metro a lubid, iti sikigan ti barko nga aglayag iti baybay. Inkarigatanna ti kimmalay-at, nairut ti kapetna iti lubid, ta ammona a no makaibbet, awan duadua a matay. Idi makakalay-at iti apagkatlo, nariknana nga agut-oten dagiti takiagna. Kimmapsut ket nariknana a saannan a kabaelan pay ti kumpet iti lubid.

Gapu iti napukaw a pigsana, bayat ti panangpanunotna iti gasatna, naulimek a nagkararag ni John iti Dios, a nangibagaanna Kenkuana a tungtungpalenna ti Nainsiriban a Balikas ken nagbiag a nadalus—ket kasapulanna unay itan dagiti naikari a bendision.

Kinuna ni John idi agangay nga idi malpasna ti agkararag, nakarikna iti naisangayan a pigsa. Rinugianna manen ti umuli ket alisto a nakauli iti lubid. Idi makagteng iti rabaw, nakaanges iti nalukay—ket nakagin-awa. Naited kenkuana dagiti bendision ti natibker a pammagi, a naikari iti Nainsiriban a Balikas. Nagyaman iti Nailangitan nga Amana iti unos ti panagbiagna, ta nasungbatan ti kararagna. ²

Kakabsat, aywanantayo koma dagiti bagi ken panunottayo babaen ti panagtungpal kadagiti prinsipio a naipakaammo iti Nainsiriban a Balikas, maysa a nadiosan a plano. Naimpusuan a paneknekak dagiti nagloriaan a bendision a sagrapentayo no agtungpaltayo. Sapay koma ta kasta, iti nagan ti Apo ken Mangisalakantayo, a ni Jesucristo, amen.